Ижкар+1 °C
9 -тӥ толсур 2021 Покчиарня
18+

Меӵ удмурт Анастасия Шумилова: «Мон улӥсько аслам удмурт дуннеям, нош мар луоз, отысь потӥ ке»

  • 625
  • 0
Ижкар / Удмуртия
Меӵ удмурт Анастасия Шумилова: «Мон улӥсько аслам удмурт дуннеям, нош мар луоз, отысь потӥ ке»
Туспуктэм: Константин Вознесенских

Вордӥськиз «чемпионъёслэн гуртазы», но спортэн ӧз эшъяськы. Поттӥз кылбур бичетсэ, но сое али адӟем уг пот шуэ. Туж трос ужа, но ассэ азьтэмен лыдъя. Паймоно кадь, ваньмыз та одӥг адями — удмурт кылбурчи, «Кенеш» журналлэн валтӥсь редакторез Анастасия Шумилова. 

Нылмурт ассэ рос-прос, тыршись адямиен возьматӥз ини. Удмурт, ӟуч, англи кылъёсты тодэ, эстон кылэз дышетэмын, гожъяське. Со сяна, пӧртэм ӵектосъёсы пыриське, егитъёслэн «Куара» огазеяськонзылэн ёзчиез луэ. 2015-тӥ арын кылбуръёсыныз «Дыр-эктон» бичетсэ поттӥз, 2018-тӥ арын «Ку» книгаеныз тодматӥз. Нырысетӥ бичетэз понна Эстониысь Ӵыжы-выжы калыкъёслэн программазылэсь литературая премизэ басьтӥз. Солэн тодэ ваёнъёсыныз, малпанъёсыныз азьланьтӥськом «Меӵ удмуртъёс» ӵектосмес.

«Мынам "синдром отличницы"»

Анастасия Шумилова Пичи Пурга ёросысь Орлой гуртын вордӥськиз. Гуртсэс калыкын «чемпионъёслэн гуртсы» нимало, угось тросэз орлойёс спортэн эшъясько, пичи дырысенызы куасэн бызьыло. Но Настяез соос пӧлы пыртыны уггес луы.

 Спортэн эшъяськись гуртын будыса, спортсменъёслы уд-а вожъяськиськы вал?

— Пичи дырысеным ик, школаын дышетскыкум, вожвылъяськон мылкыды ӵем поталляз, ваньзэ умойгес карем потэ вал. Но спортсменъёслы ӧй вожъяськылы, спортлэсь палэнынгес улӥ. Мон данъяськисько гуртысьтымы Василий Трошкин тренеренымы, усто бызьылӥсь вань пиналъёсын, егитъёсын. Тани куасэн бызьылӥсь Денис Филимонов мынам ӵыжы-выжые луэ. Со али егитъёслэн сборноязы пыриське, пӧртэм вормонъёс басья. Мон туж шумпотӥсько! Но мынам аслам удысэ вал, мукет сюресэ.

Мон золгес вожъяськисько кырӟаны быгатӥсь адямиослы, малы ке шуоно удмуртъёсты кырӟась калык шуо ук. Мон мамалэсь ӵем юаллясько: малы милям семьяямы нокинлэн но уг луы чебер кырӟамез но верамез? Со шуэ: ӧз кылды, семьяосамы кырӟасьёс ӧй вал. Мон туж синмаськыса учкисько калык кырӟанъёсты чебер кырӟась нылъёс шоры. Со сыӵе усто быгатонлык! Возьмасько 60 арес тырмонме: соку возьдаськонэ быроз но, мон кыӵе ке но «Орлой гуръёс» ансамбле пырисько. Вань мӧйыос сюлмысьтызы кырӟало ук.

Россиысь калыкъёслэн литератураоссылы сӥзем фестивальын. Красноярск, 2021
Россиысь калыкъёслэн литератураоссылы сӥзем фестивальын. Красноярск, 2021 natlitrf.ru

 Со понна тон дышетсконын астэ туж умой возьматӥд: Баграш-Бигра шор ёзо школаез зарни медален йылпумъяд, пӧртэм олимпиадаосы пыриськылӥд, вормисе поталляд. Кытысь дышетскыны сыӵе мылкыдыд?

— Али, бадӟымгес луыса, ӵем малпаськисько пичи, егит дыры сярысь. Кылбуръёс пыр но сое валаны выри ни, чеберлыко амалъёсын сое аслым возьматыны. Со юрттэ. Малпасько, мынам котьку вал «комплекс отличницы». Мон али но, кыӵе ке ужез лэсьтыса, витисько, мыным кыӵе ке но дунъет пуктозы шуыса. Со умой ӧвӧл, малы ке шуоно котькуд ужез дунъет понна быдэстоно ӧвӧл, сое лэсьтыку лыдэ басьтоно, умой-а, пайдаё-а со луоз аслыд но, котырысьтыд калыклы но. Нош мынам со комплексэ пичи дырысеным вал. 

Мон уг тодӥськы, кытысь со потӥз, оло, школаысь ик. Дышетӥсьёс но адӟо, кыӵе ке пинал умой дышетскыны пӧрмытэ ке, сое эшшо золгес лӧпкытъяло. Сыӵе дышетскисьёслэсь курон но котьку бадӟымгес. Пушкам котьку таӵе кышканэ вал: азьло маке лэсьтыны пӧрме вал ук, нош отӥяз ӧз пӧрмы ни ке? Экзаменъёс азьын но. Кыӵе ке олимпиадаосы мыныкум малпасько: кылем арын мон нырысетӥ инты басьтӥ вал, нош таяз ӧй ке быгаты, мар луоз, мар шуозы? Дунне быроз кадь.

Алигес тодам вайылӥ покчи классъёсын «кык» басьтэмме. Кыкетӥ яке куинетӥ классын вал со. Уж сётэмын вал: кыӵе ке произведениез люкетъёслы люконо но котькудӥзлы ним сётоно. Быдэс класс ӧз лэсьты, мон но ӧй. Уг тодӥськы ни малызэ. Соку ваньзылы «кык» пуктӥзы. Мыным но. Мынам сыӵе стресс вал! Доре кышкаса бертӥсько, малпасько, мар шуозы мамен-папен. Нош соос тодо ни «кыке» сярысь. Коля, агае, серекъяса пуке, ваньзылы верам ини. Сыӵе серем учыр!

Валамон, монэ дышетӥсьёс но туж лӧпкытъязы дышетскыны. Оско бере — тырши.

 Школа бере дышетскондэ Удмурт кун университетысь удмурт кылосбуръя факультетын азинтӥд. Со аслад сыӵе малпанэд вал-а?

— Мыным куддыр потэ вал, кыӵе ке но инженер луыны умой луысал шуыса. Математика но мыным кельше вал. Тыршысал ке, пӧрмысал, дыр, но мынам ваньмыз ас ӧрызъя кошкиз. Удмурт кылосбуръя факультетэ пыри, малы ке шуоно элькунын олимпиадаын нырысетӥ инты басьтӥ вал, мынам ЕГЭ-осы но умой сётэмын вал. Соин ик монэ экзаменъёстэк кутӥзы. Пыри англи кылъя группае, малпай, англи кылэз тодыны кулэ шуыса. Тросэз огдышем сямъя кошкиз кадь: кулэ дышетскыны - мон дышетскисько, кулэ параосы ветлыны - мон ветлӥсько. Али малпаськисько, дышетскысал ке валаса, малы со мыным кулэ… Соку но оценкаос поннагес дышетскиськиз, мед тонэ умой студент малпалозы шуыса.

Кин тон?

 Иське ку рос-прос валан лыктӥз, кин луэмед, кыӵе ӧрын азинскемед потэ?

— Мон 26-27 арескам гинэ валай, мар мынам кареме потэ, мар мыным кельше, мар мынам пӧрме. Бер но ӧвӧл, вазь но ӧвӧл. Мон али малпасько: кызьы 15-17 арескын адями тодыны быгатэ, кин тон сыӵе? Тани «Кенеш» журналлэн берло номерысьтыз Вячеслав Краснопёровен, Йӧскалык театрысь артистэн, интервьюез паймыса лыдӟи. Со вера, 10-тӥ классын дышетскыкуз ас понназ рос-прос малпаз, со артист луоз шуыса но ваньзэ со понна кариз. Али со - артист. Кызьы 15 яке 16 арескын адями сыӵе тыршись луыны быгатэ ини, кызьы вала, мар солы кельше, мар кулэ? Мынам ноку но озьы ӧй вал. Кыӵе ке но ӧр монэ кытчы ке но нуэ. Соин ик мон котьку синмаськыса учкисько асьсэлэсь льӧль малпанъёссэс йылаз-пумаз вуттӥсь адямиос шоры.

Та арескам мон тодӥсько ини, удмурт текстъёсын ужаны быгатӥсько кадь шуыса. Мынам кыӵе ке но быгатонлыкъёсы та удысын вань. Соосты, валамон, волятоно но волятоно на, но со ваньмыз луоз, мон оскисько солы. Но, валамон, текстъёсын ужам сяна, адямиосын но трос ужано луэ. Котькыӵе тон профессионал ас удысад мед луод, тыныд котырысь калыкен огкыл шедьтыны быгатыны кулэ.

post-dukes группалэн «Ныл келян гур» кырӟанэзлы клипез лэсьтыку
«Куара» огинлэн «Тамга» лабораториез. Post-dukes группалэн «Ныл келян гур» кырӟанэзлы клип лэсьтыку vk.com («КУАРА» огин)

 Гожъяськон удысын сяна, тон астэ «Куара» мер огазеяськонын, озьы ик мукет удысъёсын но эскериськод.

— «Куараез» но мон ужез сямен учкисько. Ми «куараосын» туж трос ужаськом. Али тани выль проектъёсмы кутскозы. Проектъёсъя ужакумы, мыным коньдон но тыро, со туж умой, уж понна уксё басьтыны быгатӥськод ке. Эшшо татын ужаме монэ шумпоттэ, угось валасько, со уж юнме ӧвӧл, со кинлы ке но кулэ шуыса. Асьмелэн, ичигес калыкъёсысь потэм адямиослэн ужмы но вылӥгес дунъяське кадь. Уже удмурт кылэн, лулчеберетэн герӟаськемын бере, со валан сётэ, тон юнме шорысь уд улӥськы шуыса. 

Мон алигес валай, макем со бадӟым уж. Тон кылбур гожтӥськод но, со удмурт кыл понна но пичияк вамыш луэ. Мон тае валай но, со бӧрсьы ик солэн мышкыз адӟиськиз, сыӵе кышканэ кылдӥз: мон улӥсько аслам удмурт дуннеям, кӧм пушкын кадь, нош мон отысь потӥ ке, мар луоз, кин мон луо? Олокыӵе но учыръёс луыны быгато ук. Кин мон луо удмурт кылытэк? Монэ отын дунъялозы-а? Мар ке но карыны быгато-а? Со кышкан туж сюлэмшугъяськытэ.

 Нош кин тыныд ужаны мылкыд сётэ, юрттэ? Кинлэсь ӟеч кылъёссэ, дунъетсэ возьмаськод?

— Нырысь ик мамалэсь (анаез – Людмила Шумилова, Пичи Пурга ёрос лыдӟетъюртысь валтӥсь библиотекарь – ред.). Мыным туж кельше берло дыре эшъяськонмы. Вераськиськом трос, ӵемысь - уж сярысь. Со ачиз но трос ужа. Куддыр мыным жингыртэ но шуэ: «Настя, вераськыны дыр ӧвӧл, ну-ко, мыным али ик юрттэт кулэ. Кызьы сое берыктоно, кызьы тае кароно?». Ачиз но мыным юрттэ.

Пичи Пурга ёрос библиотекаын
Пичи Пурга ёрос библиотекаын. Настя вӧзын паллян паласез — анаез Фото: Максим Егоров ©

Вакыт но арлыд

 Кин тон, кин луэмед потэ берло аръёсы гинэ валад ай шуиськод ке но, 30 аресэдлы ужан тубатъя вылӥе ӝутскид ини: «Удмурт дунне» газетын корректорысен «Кенеш» журналлэн валтӥсь редакторез дорозь. Кыӵе малпанъёсын «Кенеше» ужаны лыктӥд?

— Мынам кыӵе ке йыг-йыг планэ ӧй вал. Куд-ог дыръя асме Сцилла но Харибда вискын шӧдӥсько. Ваньзы шуо: Настя, тон егит редактор, выль синмын учкиськод дунне шоры, тон «Кенешез» выльдод. Нош мукет ласянь, журналлэн вань аслаз лыдӟисьёсыз, аудиториез, соослы выльдэм «Кенеш» яралоз меда? Мон кӧня ке ӟудӥсько: мар мынэсьтым витё, мар мон карыны кулэ, мар мон карыны быгатӥсько? Пичиен-пичиен ваньмыз луоз, дыр. Редакциын котьку кенешыса ужаськом, малпаськиськом, кызьы, мар ужаны. Ньыль кузя гинэ ке но, тыршыса ужаськом.

 Тон «Кенешлэн» одӥгез тужгес егитэз редакторез луиськод. Тынэсьтыд пиналэн журнал борды нырысетӥ редакторез Василий Максимов гинэ кутскиз. Кызьы со шоры учкиськод?

— Шонерзэ ке верано, азьло вакытэ, куке XX даурлэн кутсконаз удмурт литература азинскыны кутскиз, куке газет-журналъёс кылдӥзы, ӵапак егит муртъёс ужазы та бордын. Соос бадӟым уж понна кылкутылӥзы. Нош асьмелэн али арлыд сярысь валатон воштӥське.

Мон алигес Красноярскын вал, отын книжной культуралы сӥзем ярмарка ортчиз, отын тунсыко вераськон вал — «Новые взрослые». Ку асьмеос быдэ вуиськом, кызьы вошъяськиз «пичи дыр» конструкт? Али калык берлогес быдэ вуэ. Кылсярысь, малпано ке, Кузебай Герд аслаз аресказ мар гинэ карыса ӧз вутты. Нош али, мон аслэсьтым эшъёсме, тодмоосме чакласько ке, — ми зэмзэ но берлогес быдэ вуиськом кадь.

Тани мыным ӝоген 31 тырмоз. Со аресказ мамаелэн вал ини куинь нылпиез. Нош мынам йырсие пежыр ӝутске, малпаськыса, куинь адями понна кылкутоно, соос понна сюлмаськоно шуыса. Мон сыӵе ӧвӧл. Мон со ласянь эгоистичнойгес.

Йӧскалык прессалэн юртысьтыз ужасьёсын
Йӧскалык прессалэн юртысьтыз ужасьёсын Россиысь финн-угор калыкъёслэн форумазы Фото: Максим Егоров ©

«Мукет пичи калыкъёс, литератураямы югдурмес адӟыса, тӥ голямын шуысалзы»

 Литературая журналлэн редакторезлэн синмыныз учкыса, али удмурт литературамылэсь азинскемзэ кызьы адӟиськод?

— Котьку но мае ке валаны кутскиськод, мукетыныз ӵошатыса. Кылсярысь, асьмеос ӵошатӥм ке удмурт литератураез ӟуч литератураен — асьмеос али ик нюръяськиськом, кылмы, литературамы мед кылёзы шуыса. Со ласянь мон пушкын ӵем нюръясько чебер поэзиез яратӥсь мурт но редактор-филолог, кудӥз дышетскемын, кудӥз кӧня ке но тодэ, кызьы кылэн, литератураен ужано. Мукет ласянь, вань адями, кудӥз шумпотэ котькуд текстлы, котькуд турскемлы, куке адями гожтэ мар ке но анай кылыныз. Огласянь — кылэз утён, мукет ласянь — макем ӟечлыко луоз со уж, кудӥныз тон выриськод. Соин ик ӟуч литератураен ӵошатоно ке, отын кӧня авторъёс, калыклэн лыдыз гинэ но — со пӧртэм весовой категориос. Соосын ӵошатыса, милям секыт югдур.

Но мон ветлӥсько Россиысь ичи калыкъёслэн литератураоссылы сӥзем фестивальёсы. Соку валасько, удмурт калыклэн югдурез туж умой али шуыса, малы ке шуоно ми бырйиськиськом али: тазэ печатлано-а, ӧвӧл-а. Нош адямиослэн номырзы но ӧвӧл яке туж ӧжыт. Трос сыӵе калыкъёс. Со кышкыт, юзыр-кезьыр луоно, югдурзы сярысь кылзӥськыса. <…> Нош ми бырйиськиськом ай, мае али поттом, вераськиськом, кытчы запятойёс пуктыны кулэ яке егитъёс гожъяськыны уг быгато ни шуыса. Мукет пичи калыкъёс, сыӵе югдурез адӟыса, малпалозы, ми воксё голямын шуыса.

Оглом вераса, палэнэ кытчы ке потӥськод ке, туала удмурт культураез, литератураез ноку но возьыт уг луы возьматыны. Тросэз синмаськыса учко, мар асьмелэн али лэсьтӥське. Асьмелэн литературамы но туж умой. Тани Дарали Лели — удмурт дуннеысь огез сыӵе адӟымон адями, кудӥз гожъяське но, пӧртэм проектъёс но валтэ, оломар но каре. Солэн «Зорнамер но Занна» романэз удмурт кылысь потэмын, удмурт культураысь. Мон синмаськисько, егит мурт сыӵе чебер гожъяське, сюжетсэ но быгатыса валтэ шуыса. Асьмелэн пӧртэм жанръёс но вань. Адями бырйыны быгатэ.

Мынам пӧртэм мылкыдъёсы луыло. Мон куд-ог дыръя чабкиськыса пукисько: кызьы, мар шуыса. Куддыр шумпотӥсько. Алигес редакциын чакласа улӥм, мар вуоно арын печатлалом шуыса. Мон лыктыку, мыным веразы вал, милям сыӵе прозамы ӧжыт, кылбуръёс ӧвӧл, озьы-тазьы шуыса. Нош ми татын споръяськыса улӥм, кинэ нырысь печатлано. Ужъёс вань. Черодзэс но адямиос витё. Югдур огсыр ӧвӧл, сое одӥг кылын уд валэкты, уг луы шуыны: удмурт литература умой яке милям ваньмыз урод. Отын сомында ньюансъёсыз, литературной процессын сомында тунсыкоез.

Сергей Матвеев гожъяськисен
Сергей Матвеев гожъяськисен «Туала удмурт поэзия» книгаен тодматскон ужрадын  Фото: Максим Егоров ©

«Номыр ӧд кары ке, воксё номыр уз луы»

 Удмурт литератураез лыдӟисьёс вань-а? Гожъяськисьёсмы кин понна али тыршо?

— Мыным туж кельшиз вал веран, кыӵе ке но фестивальын мон кылӥ сое, одӥг переводчик вераз, солэсь юазы: нош кинлы со тунсыко луоз, кин понна со лэсьтэмын шуыса. Со шуиз: литератураен тунсыкъятон — со цель, марлэн ке йылпумъянэз ӧвӧл, со процесс. Ужаны кулэ, адями литератураен мед тунсыкъяськоз шуыса. Валамон, ужаны туж трос луэ, но результатэз пичи луоз. Но номыр ӧд кары ке, воксё номыр уз луы, яке минусэ кошкод. «Алиса в зазеркалье» книгаын но гожтэмын вал: «Нужно бежать со всех ног, чтобы только оставаться на месте, а чтобы куда-то попасть, надо бежать как минимум вдвое быстрее». Мыным со веран кельше.

Алигес одӥг писатель шуэ: «Гожъяськись нырысь ик гожъяськыны кулэ». Мон соин соглаш. Но со кыӵе ке но идеальной дуннеын, нош татын, асьме дуннеын, кытын асьмеос туала вакытэ улӥськом, со кыӵе ке но роскошь. Малы ке шуоно гожъяськисьлы аслыз эшшо трос мар карыны кулэ луэ. Кылсярысь, литератураез вӧлмытон бордын ужаны — со но милям ужмы ук. Литература сярысь гинэ малпаськоно ӧвӧл, литературной процесс сярысь но.

Соин ик мон тыршисько мар ке но карыны. Кылсярысь, «Кенеш» журналмылэн нимыз тросгес мед чузъяськылоз калык пӧлын. Адямиос сое ӧз ке но лыдӟе, мед тодозы со сярысь. Яке пыриськисько «Даур ТВ-лэн» эфираз, яке эшшо кытчы ке но. Мыным потэ, адямиос акыльтӥзы ни мынэсьтым, но мед акыльтозы, со понна мон нош ик верало «Кенеш» сярысь. Мынам уг луы вужерын гожъяськыса гинэ улэме. Сыӵе улон луиз.

Эшшо мыным кельшиз вал Виталий Пронинлэн (Йӧскалык прессалэн юртысьтыз программист – ред.) верамез. Со шуиз: удмуртлык — со DIY (Do it yourself). Удмурт кылэ берыктыса: лэсьты сое ачид. Тыныд мар ке кулэ ке, лэсьты ачид. Куд-ог дыръя озьы луылэ.

«Молот-шоу» ужрад дыръя Дарали Лели но Мария Векшина гожъяськисьёсын
«Молот-шоу» ужрад дыръя Дарали Лели но Мария Векшина гожъяськисьёсын Фото: Максим Егоров ©

«Пушкам котьку малпан вал, гожъяськон  со туж усто шуыса»

 Ачид нош ку литературае сюрестэ лёгид? Ку гожъяськыны кутскид?

— Нина Ивановна (Нина Ботникова, Баграш-Бигра школаысь удмурт кылъя но литературая дышетӥсь – ред.) шуиз вал, школаын ик мар ке гожъясько вал ини. Мон уг тодӥськы ни сое. Со удмурт кылъя туж зол дышетӥсь ук, котьку монэ лӧпкытъя вал удмурт кылын гожъяськыны, пыриськыны кытчы ке но. Нош сыӵе осознанной текстъёсы кылдӥзы, куке мон литературая фестивале вуылӥ. Мыным 24 арес вал. Мон кыӵе ке но писательёсты кылзылӥ, кызьы соос кылбуръёс чебер лыдӟо.

Со сяна, мынам пушкам котьку кыӵе ке но малпан вал, гожъяськон - со туж усто шуыса. Мон котьку синмаськыса учкылӥ писательёс шоры, оглом литература шоры. Мынам но гожъяськеме потэ шуыса малпалляй. Собере кыӵе ке но фестивальын мон текст кылдытӥ, со сыӵе верлибр выллем пӧрмиз, кудӥзлэн ӧвӧл рифмаез, юнверанлэн чередованиез. Гожтӥ, эшелы возьматӥ, нош со филолог, литератураын валанэз вань, со шуиз, тунсыко кылбур, пе. Соку мон малпай: вау! оло, гожъяськыны кутсконо! Озьы со мынам ачиз кошкиз.

 Нош кызьы кылбур бичетъёсыд вордӥськизы?

— Со сыӵе дышетскон вакыт вал, дыр, вань кылбурчиослэн вань сыӵе вакытсы, быгатонлыкез волятон. Сотэк нокызьы но уг луы. Мынам со кызьы ке интенсивно кутскиз. Нырысетӥ текстъёсме поттоно но ӧй вал, дыр. Но мыным матысь эше Вера Штыкова (Йӧскалык прессалэн юртысьтыз вёрсткая но дизайнъя отделлэн редакторез – ред.), кудӥныз ми котьку валаса ужаськом, кемалась эшъяськиськом, ойдо книга поттом шуиз, юрттӥз, ачиз ваньзэ дасяз.

Со книга огшоры шудон кадь но вал, туж валаса лэсьтэмын ӧй вал. Мон али со книгаме уг кутылӥськы ни, малы ке шуоно со мыным уг кельшы. Текстъёсыз. Но со ӧй потысал ке, номыр ӧй но кутскысал. Соин ик, ӵок, мед со улоз ини. Со кыӵе ке но вамыш, но али отысь текстъёсыз мынам адӟылэм уг поты ни, мыным соос понна возьыт. Нош кыкетӥез книгае осознанно гожтэмын ни вал. <…> Малпасько, вуоно арын эшшо одӥгзэ каро на, малы ке шуоно куд-ог текстъёсы люкаськизы. Поэма гожтыны кутски вал.

Вавож ёросысь Гурезь-Пудга гуртысь Кузебай Гердлы сӥзем музейын, Вера Штыкова эшеныз
Вавож ёросысь Гурезь-Пудга гуртысь Кузебай Гердлы сӥзем музейын, Вера Штыкова эшеныз Фото: Чудья Жени ©

 Кин яке мар гожъяськыны мылкыд сётэ?

— Нырысь ик ачим. Мон аслым ачим тунсыко потӥсько. Со но валаны турттон ук, кин тон сыӵе, мар тонэн луиз, кызьы тон татчы вуид. Мукет адямиос но тунсыко. Ӧвӧл сыӵе конкретно нокин но, ваньмыз быгатэ гожъяськыны пуксьытыны, со котьмар луыны быгатэ. Али пример но вераны уг быгаты.

Нош эшшо мон малы гожъяськисько на? Малы ке шуоно мон валай: мон туж тщеславной адями, мыным кельше, куке монэ ушъяло. Монэ ушъяны кутско ке, мон возьдаськыны кутскисько, но со вакытэ ик мынам потэ, монэ мед ушъялозы шуыса, мыным со шумпотон вае, куке умой карисько, мыным сыӵе кельше. Соос (ушъям кылъёс — ред.) котьку тодад кылё.

 Нош литератураысь кинлэсь адӟем кариськод? Кинлэсь дышетскиськод?

— Али удмурт литератураысь вуж произведениосты тросгес лыдӟыны тыршисько. Отын котькуд авторлэсь марзэ ке но тунсыкозэ шедьтыны луэ. Берло дыре туж ӵем лыдӟисько Михаил Федотовез. Вань гожъяськисьёс пусъё, со дунне уровеньем кылбурчи шуыса. Мыным туж кельше Сергей Матвеев. Литератураын, поэзиын со мынам дышетӥсе, шуыны луоз. Со куке но ушъяз вал кылбуръёсме но шуиз: паймисько, Настя, кытысь тон сыӵе кылъёс шедьтӥськод? Мон шуисько: тӥляд кылбуръёсысьтыды (серекъя – ред.). Зэмзэ верано ке, удмурт авторъёсты котькудзэ лыдӟы, котькудзэ кут, ваньзылэсь марлы ке дышетскыны луэ.

 Тон астэ кылбуретын но, драматургиын но эскерыса утчад ини. Нош кинэн астэ лыдъяськод?

— Мон кылбурчи та дырозь. Но мынам туж потэ асме эскереме проза удысын но, малы ке шуоно ӵапак проза возьматэ литературалэсь азинскемзэ. Макем азинскемын проза, сокем азинскемын литература. Мыным со тунсыко. Ӧз пӧрмы ке, ӧз пӧрмы, мон оскисько, куке но, ас поннам ке но, мар ке но гожтыны быгато шуыса. Пьеса но гожтэм потэ. Мынам ӟуч кылын кӧня ке уже вань, удмурт кылын но гожтэм потэ.

Оглом ке, ваньзэ карем потэ. Берло дыре литературалы тросгес саклык висъям потэ. Критикалы но тросгес саклык висъям потэ. Малы ке шуоно мон гожъясько но, валасько: мынам уг тырмы тодон-валанэ, быгатонлыкъёсы умойгес сое карыны. Гожтӥсько но, валасько ляб шуыса. Нош кызьы кужмогес карыны валаны дыры уг тырмы. Тыршоно со понна, кӧня ке пуксёно но дышетсконо. Мыным потэ, мон куддыр отчы но, татчы но вутскыны тыршисько но, кужмы быре. Соин малпасько, оло, одӥг удыслы тросгес саклык висъяно, луоно профессионал со удысад. Но мынам уг пӧрмы.

 Кыӵе произведениосты яратӥськод, выльысь лыдӟылӥськод?

— Пӧртэм вакытэ пӧртэм книга луэ, кудӥз борды мон берытскылӥсько яке со мынам яратоноез шуыны быгатӥсько. Берло дыре мон лыдӟи вал «Довлатов и окрестности» книгаез. Александр Генис гожтӥз сое, Сергей Довлатов сярысь. Туж афористичной книга, туж остроумной. Мыным кельше сыӵе проза. Туж филологичной.

Туала драматургияя но режиссурая центрын драматургъёслэн батлзы дыръя
Туала драматургияя но режиссурая центрын драматургъёслэн батлзы дыръя Фото: Александр Шкляев ©

«Мон туж азьтэмъяськись»

— Кызьы ваньмон дырдэ ортчытӥськод? Кызьы шутэтскиськод? Мар тонэ уж сярысь малпанъёсысь поттэ?

— Мон воксё уг валаськы, кызьы тайм-менеджмент ужа. Кулэ, дыр, дышетскыны солы. Нош мон шонертэм ужасько. Малы ке шуоно мон ваньмон дыръям котьку малпаськыса ветлӥсько, мыным мар ке но карыны кулэ шуыса. Туж шер луэ сыӵе ваньмон дыры, куке мон гань-гань, куке номыр карыны кулэ ӧвӧл. Мукет ласянь, мон туж ӵем азьтэмъяськисько. Уж борды уг кутскиськы, уг кутскиськы, оломар карисько но, дыры токма ортче. Озьы, пӧрме, мон номыр ӧй но ужа, мон ӧй но шутэтскы, малы ке шуоно мынам йырам весь малпанъёс бергазы. Соин мон понна тайм-менеджмент — со fail (‘фейл’, англи кылысь – пӧрмымтэ маке – ред.).

Луыло дыръёс, куке мынам ужъёсы люкасько но мон дорам бертыса ужаса пукисько. И тани ӵуказе мынам deadline (‘дедлайн’, англи кылысь – берпуметӥ нунал – ред.), мон ӧжыт бӧрдытэк пукисько но асме тышкасько: ну, Настя, ну, малы нош ик озьы луиз, луэ вал ук дырез радъяны! Зэмзэ ке верано, шутэтскыны быгатыны кулэ. Нош мынам тани уг луы.

Мон туж азьтэмъяськись. Мон куддыр бертӥсько но час телефонын пукисько. Час ортчиз? Мон номыр ӧй кары? Мон ӧй но шутэтскы, малы ке шуоно мынам так но быдэс нунал компьютер азьын пукыса синъёсы жадемын, нош мон эшшо телефонын. Молодец, Настя! (серекъя – ред.)

Мыным кельше эшъёсын пумиськылыны. Ми серекъяськом али, милям сыӵе пенсионерской пумиськонъёсмы луыло шуыса. Малы ке шуоно пумиськиськом эшъёсын но налоговой вычетъёс сярысь, ремонт сярысь, квартира басьтон, ипотека сярысь вераськиськом. Вераськиськом но серекъяськом, милям кыӵе ке но быдэ вуэмъёслэн сюлэмшугъяськонъёссы ини шуыса. Нош висказ «Гарри Поттерез» учкиськом. Ми сыӵе туала быдэ вуэмъёс, кудъёсызлы ипотека сярысь но сюлмаськоно, «Гарри Поттерез» но учконо!

Берло дыре мыным стендап дото кельше. Азьло мон англи кылынгес учкылӥ, нош али ӟучез но туж азинске. Мыным туж яра, мар лэсьтэ Stand Up Club #1. Мон валасько, со но литературалы матын шуыса, малы ке шуоно стендап но, ӟеч литература сямен ик, кылэз азьпалтыса улэ кадь. Кызьы проза пыр, эшшо мар ке пыр адямиос выль явлениос сярысь вераськыны дышетско. Али, кылсярысь, «новая этика» вань. Кызьы, кышномуртъёс сярысь вераськоно яке эшшо мар ке. Литература но соин выре, стендап но. Стендаперъёс со сярысь вераськыны кыл малпало кадь: мар али асьмемыз котыртэ но мар луоз азьланяз. Мон туж яратӥсько серекъяны, юмор мон понна бадӟым инты басьтэ. Мон уг валаськы, адямилэн юморез валанэз ӧвӧл ке, со туж секыт ук. Куд-ог дыръя ачид шоры но ирониен учкыны кулэ, валаны кыӵе ке но янгышъёстэ но, астэ но. <…> Серекъянлэн психотерапевтической эффектэз вань. Культураын но серекъян бадӟым инты басьтэ. 

«Меӵ удмуртъёс» нимысьтыз ӵектосысьтымы вань геройёсмы сярысь татысь лыдӟыны быгатоды


Наверх
Вниз