Ижкар-12 °C
7 -тӥ южтолэзь 2021 Воскресенье
18+

Аръёс но иворъёс: Алабгоын «Гудыри» газетэз поттыны кутскизы

  • 1064
  • 0
Ижкар / Удмуртия
Аръёс но иворъёс: Алабгоын «Гудыри» газетэз поттыны кутскизы
Фото: elabuga-foto.ru

Иворъёсъя «Удмуртия» агентство но Удмурт Элькунысь йӧскалык лыдӟетъюртлэн «Йӧскалык но шаертодон литературая но библиографияя центр» ёзэтэз «Аръёс но иворъёс» нимысьтыз ӵектос кылдытӥзы. Отын ми вераломы, мар сярысь гожъязы пӧртэм аръёсы удмурт кылын потӥсь газетъёсын.

Статьяосты гожтонын уже кутӥськомы пӧртэм аръёсы потэм удмурт кылын газетъёсты, соос пӧлын «Гудыри», «Егит большевик» но мукетъёсыз. Газетлэн сканер пыр поттэм копиосыныз тодматскыны луэ Удмуртиысь Йӧскалык лыдӟетъюртлэн сайтаз.

Нырысетӥяз ивортонамы возьматомы, мар сярысь гожъязы «Гудыри» газетлэн нырысетӥ номеръёсаз. Солэн нырысетӥ номерез потӥз 31-тӥ (18-тӥ) коньывуонэ 1918-тӥ арын Алабгоын (Елабугаын). Редакторез Трофим Борисов. 

Газет бамъёсысь басьтэм люкетъёсысь вань гожтэмъёсты воштонъёс пыртытэк сётӥськомы.

Нырысетӥ номерын «Газет поттӥсьлэн кылыз» йыръян улын гожтэмын: «Та дырозь Алабгоын «Виль Синь» нимо удмурт газет потэ вал. Та газет первой Учредительной Собранияез мактаса вера вал. Табере Учредилкаез бай (узыр) муртъес гынэ куро ини. <…> Табере виль газет поттӥськом ини. Нимыз солэн «Гудыры» луоз.

Асьме удмуртлы Советской власть гынэ эркын улон сетоз. Соин-ик та газетын тужгес, но тыршом валэктыны Совет сярись. Туала уже гынэ ум вералэ, валэктом кыӵэ луоз улон вылон дас ар, яке уногес но улыса. Асьме удмурт туннэ нуналэн улэ, чик уг тоды мукэт муртлэсь зечкын улэмзэ. Соин-ик тужгес но валэктом революцияез. Марлы сокэм калык курадзе, мар понна казыр жугисько ваньзэ сое «Гудыры» газет валэктоз. <…>

Туала дыръя газеттэк шуг. Туала дыръя кажной калыклэн ас кылыныз газетэз вань. Зюч газетэз, зюч кылын гожтэмез асьмес ваньмы ум тодӥське; чырдӥмы ке но троссэ ум валаське, валасез туэ эжыт — пиос-муртъес гынэ одӥг-кык валало. Кышно-муртъесыз ке нош верад, соос тыпак пеймыт. Удмурт газетэз, удмурт кылын гожтэмез коть кинь, коть кыше удмурт: пересез но, пиналэз но, пичиез но, бадзымез но, пиосмурт но, кышномурт но — ваньмыз валаса яратса кылзиське. <…>».

«Гудырилэн» нырысетӥ номераз ик (азьланяз ваньмаз сямен) Кузьма Чайниковлэн «Шунды жужалоз» кылбурез печатламын. 

Фото: Национальная библиотека Удмуртской Республики
 Фото: Национальная библиотека Удмуртии

Газетлэн нырысетӥ номераз ик сётэмын ялон: «Алабгоись удмурт семинарияэ дышеськын лыктэлэ. Семинария усьтӥське 4-ӥ ноябре (виль календаръя). Двухклассной школэз пыр потэм муртйосыз семинарие экзаментэк басьто, арессэ, уськытэк. Общежитие (патер) безплатно луоз. <…>». («Дыртэлэ»)

Семинарие ӧтьыса ялон 1918-тӥ ар понна вань номеръёсын пумиськылэ. 5-тӥ номерын (Пуксьон, 10 (27) декабре) «Пеймытӥсь потын турттымтэ удмуртъес» ужын Удмурт дышетӥсь ныл (кушемним -ред.) удмуртъёс семинарие дышетскыны сиён но дӥськут ӧвӧлтэмысь уг мыно шуыса ӝожтӥське, гожтэ: «Пересьёс кыльлильлям пеймытын удмуртъёслы люгыт ӧс усьтымтэись. Пинял нылпиёсыз ум дугдытэ люгыт усьтӥськэм ӧс доре мынонзылэсь. Ведь вальлян пересьёс веральлям: кияд сюрэмзэ, пияд пон, шуса. Асьмеос но пичи усьтӥськэм ӧсэз ум ворсалэ — вӧлак усьтыса поныны туртскоме».

Озьы ик 5-тӥ номерын Голланиын но Бельгиын революиция сярысь вакчи ивортон сётэмын. 

Аръёс но иворъёс
Фото: Национальная библиотека Удмуртии 

6-тӥ номерын тунсыко гожтэт сётэмын:

«Гудри шуон газетлэн потон иньтияз.

Полякись, Васильевской волосӥсь.

Ми Поляк гуртӥсь удмурт пиос та Гудыри шуон виль потэм узы-боры кадь мусо газетэз, первой потэмзэик чыдӥмы-но, туж мылкыдамы кельшиз, туж чебер со вылын гожъямын, туж тодыса, туж асьме удмурт, эшъёсмылэн кӧтазы кельшоно кадь….». 5 удмуртъёс (Иван Плотников, Василий Илюкин, Лаврентий Поляков, Никита Павлов, Семен Петров) газетлэн редакцияз 12 манет но 30 коньы келяло, соос гожто «… та гудыри газет бадзьымгес мед будоз, люгытгес мед луоз, вань удмурт эшъёсмылэсь синьзэс мед усьтоз шуса, газет поттонэ пичи гынэ кузьым лэзиськом».

Трофим Борисов газет потӥтсьлэн кылыныз соослы тау каре но гожтэ: «Тӥляд гожтэтты монэ шумпоттэ, тӥляд мылкыдды мынэсьтым мылкыдме жутэ. Уногес мед луоз вал тӥ кадь валась удмуртъёс».

8-тӥ номерын сётэмын «Гудыри» газетлы «реклама» — гожтӥськыны курон: «1919-тӥ арлы «Гудыри» шуон удмурт газетлы гожтӥське….».

Пусъемын газетлэн кылыз: «Та газетын гожъям кылъес вэчак удмуртъеслы: Алабго удмуртъеслы но, Глаз удмуртъеслы но, Сарапул, Кузон, Оса удмуртъеслы но ваньмызлыик валано кадь мед луоз. Соин но та газетэ Алабго удмуртъеслэн кылынызы гынэ ум гожътэлэ, музон удмуртъеслэн но кылынызы гожтом. Та газет, коть кытӥсь удмуртъеслэсь вераськон кылзэс одиг порма, ваньмызлы валано кадь карны тырше». <…> 

Аръёс но иворъёс
Фото: Национальная библиотека Удмуртии 

Котькуд газетын югдытон уж нуиське, визь-кенешъёс но сётэмын. Кылсярысь, сад-бакчаез возисьёслы: 1-тӥ номерын «Узы-боры сярись», 5-тӥ номерын «Сад мерттон сярись», 7-тӥ номерын улмо будэтыса узырмон сярысь. Вань ӟуч муръё пуктон пумысен валэктонъёс (№ 5), «Испанка шуон висен» сярысь ивортон (№ 2).

Трофим Борисовлэн кылбуръёсыз печатламын, кылсярысь, «Кайгуэ», «Тэдьылэн малпамэз» (№ 2), «Гуртись байеслы» (№ 3).

Аръёс но иворъёс
Фото: Национальная библиотека Удмуртии 

Кузьма Чайниковлэн ужъёсыз: «Шунды жужалоз» (№ 1), «Шуд лыктоз…» (№ 3), «Гажан газет…», «Султэ!» кылбуръёс, но «Адзисьес…» «шудон-серекъян 1 действияйын» (№ 4), «Бадзьым сяртчы» («выжы кыл»), «Нюлэсэз корало…», «Сӥзьыл» (№ 5), «Тыроса адямилы музъем кулэ?..», «Монэ визьтэм шуо…» (№ 7), «Батырлэн кадь кужмы лусалке» (№ 8).

Трос ужъёс сӥземын Горд Армилы, революцилы, граждан ожлы. Кылсярысь, «Туала кырзянъёс» пӧлын но пумисько таӵе кылъёс (№ 6):

Азвесь зундэс, зарни зундэс,

Кийдлы секыт потӥз-а?

Кийдлы секыт ӧй потсал, но,

Горд салдатлэсь курдад-а?

Зьызы дӥсез ой дӥсясал,

Чебер дӥсе лусалке.

Мурт туганэз — туган ӧй шуысал,

Войнае быриз туганэ.

Тӧдьы сяська кытчы потэ —

Гырымтэ ана вылйосы.

Уйын лушкем кинь со бӧрдэ —

Картэм кылем салдатка.

«Гудыри» газетлэн 7-тӥ номераз «Кызьы Петырборез утялтоно» ивор вань. Озьы Петербургез шуо вылэм.



Наверх
Вниз