Ижкар+19 °C
14 -тӥ оштолэзь 2021 Вирнунал
18+

Татьяна Ишматова: удмурт калыкен герӟаськем юанъёс нырысьсэ чузъяськизы улосвыл но кун кивалтӥсьёслэн пумиськоназы

  • 1066
  • 0
Ижкар / Удмуртия
Татьяна Ишматова: удмурт калыкен герӟаськем юанъёс нырысьсэ чузъяськизы улосвыл но кун кивалтӥсьёслэн пумиськоназы
Туспуктэм: Анжелика Петрова

Удмуртиын элькунлэн шоркараз Удмурт лулчеберетъя юртэз усьтон пумысен кенешонъёс, эскеронъёс мыно. Тодэ вайытом, со В. Г. Короленко нимо театрлэн азьвыл юртаз интыяськоз шуыса чакламын. Та дыре ассэ юртэз но эскеро — валаны кулэ, макем бадӟым тупатъян ужъёсты отын быдэстоно луоз. Со дыре ик вуоно Центрлэсь концепцизэ кылдытон мынэ. Кызьы вераз иворъёсъя «Удмуртия» агентстволы «Удмурт Кенеш» огазеяськонлэн тӧроез Татьяна Ишматова, ӵектослэн инъетэз пӧсьтолэзь пумозь дась луыны кулэ, нош гужем пумозь ваньзэ радъяны малпало.

— Татьяна Витальевна, кылем арня пумын Удмурт лулчеберетъя центрез тырмытонъя ужась группалэн пумиськонэз ортчиз. Мар сярысь вераськиды?

— Милям та ужпумъя нырысетӥ гинэ пумиськон ӧй вал ини. Со быдэсак, шуом, уж кутскемын пӧртэм оръёсъя. Бадӟым пумиськон вал, кытчы ми люкамы вань мылкыд карисьёсты — Ижкарысь филармониын люкаськылӥм вал, мер кылзонъёс ортчытыса, калык аслэсьтыз мылкыдъёссэ мед вералоз шуыса. Мон туж шумпотӥсько, отчы туж трос сыӵе тодмо адямиос ветлӥзы шуыса. Озьы ик ветлӥзы егитъёс но. Адӟисько, та мылкыд, кудӥз туннэ вань та ужпум котыр, со туж бурдъя, калык кыӵе ке выль мылкыдын кутске та уж борды.

— Ижкарын удмурт центр кулэ шуыса вераськонъёс одӥг ар гинэ уг мыно ни…

Асьмеос зэм но центр сярысь 20 ар ӵоже трос гинэ вераськиськом. Пӧртэм интыос но шедьтылэмын вал, пӧртэм адямиос но со борды басьтӥськылэмын вал, но идеологиез но пӧртэм вал. Кутскылӥм ке вал нырысь вераськыны, кыӵе ке духовной центр пумысен — вот Касим Галихановлэн проектэз вал, кылдытыны кулэ шуыса духовно-нравственной-а, кызы-а со нимаськоз центр, кытын луоз куала но, вӧсяськон инты. Собере кыкетӥез вал — со туристъёсты, куноосты пумитаны гостинично-ресторанный комплекс.

Нош туннэ вераськиськом ини сыӵе центр сярысь (мыным йӧтэ, со туж шонер вераськон), со центр кулэ азинтыны удмурт культураез. Мукет сямен вераса, ужаны удмурт культура понна но, асьмеос мед азинском шуыса, но со дыре ик куноосты но, туристъёсты но палэнэ кельтыны уг яра — со луыны кулэ одӥгез площадка, кудӥз Ижкар понна но ужалоз, Удмурт Элькун понна но ужалоз, со дыре ик возьматоз удмуртъёслэсь азинскемзэс. Соин валче татын туж трос тунсыко малпанъёс, кызьы сое азинтыны луэ. Асьме «аксакалъёсмес» ке верано ке, Михаил Гаврилович Атамановлэн туж тунсыко малпанъёсыз, Владимир Емельянович Владыкин вераз, Кельмаков Валей Кельмакович, Ванюшев Василий Михайлович быдэс куинь бамен гожтӥз.

— Удмурт лулчеберетъя центр элькунысь министерствоосын но валче ужаны кулэ, дыр?

— Ми со пумысен но малпаськиськом, кенешиськом ини — та кык ужпумез быдэстон понна, кыӵе ведомствоос кылкутыны кулэ. Малыке шуоно Удмурт лулчеберетъя центр лулчеберетъя министерстволэн, шуом, бурд улаз луиз ке, со, мон малпамъя, одӥг улон сюресэз — котьма ке но, бадӟымгес саклык висъяло соос коллективъёслы, нош асьмеос вераськиськом кыл политика сярысь но, асьмеос вераськиськом финн-угор кусыпъёс пумысен но, культура удысын гинэ ӧвӧл, дышетон удыс но одно ик луыны кулэ. Оло, музей сэрегез но луыны кулэ, кытын движенилэн (удмурт движенилэн — ред.) историез возьматэмын луоз, дано адямиослэн, кудъёсыз батыръёсысен кутскыса азинтӥзы удмурт калыкез. Соин ик мыным аслым но туж тунсыко та малпанэн улыны.

Мон шумпотӥсько, асьмеос Короленколэсь нимзэ ум ыштӥське, утчаськом луонлык, кызьы чебер возьматыны, шуом. Та Центрен со туж-туж умой герӟаськоз шуыса валаськомы ваньмы. Одӥгез туж тунсыко малпан вал, кудзэ вераз мыным егит нылаш, одно, пе, кулэ вал лэсьтыны Центрын ик Короленколы сӥзем сэрег кыӵе ке но, малы ке шуоно тросэз уг валало, марлы со отын но кыӵе инты басьтэ со удмурт калыклэн улоназ, малы удмуртъёс сое сыӵе гажало шуыса. Соин ик мон озьы шуысал — ми али нуиськом уж проектной группаен, кудӥз нимысьтыз гожъялоз концепцизэ, <…> ми утчаськиськом, мае ке туж тунсыкозэ, туж пуштросозэ, мае пыртыны луысал та центре.

Куинетӥез уж — ноку но ас понназ «Удмурт Кенеш» сое уз быгаты вырӟытыны, ми сое валаськом. Ми та юанэз ӝутӥм, сое кызьы ке но азинтӥськом, но озьы ик кусып возиськом асьме кивалтӥсьлэн командаеныз. Нимысьтыз та ӵектосэз курировать каре Свинин Александр Александрович (Удмуртилэн тӧроезлэсь ужзэ огдырлы быдэсъясьлэн советникез — ред.). Соин кенешонъёс милям ортчо, кыӵе вамыш лэсьтом азьланяз, кызьы сое азинтыны кулэ шуыса.

— Уж пӧзе, озьы ке но сое йылаз-пумаз вуттонлы оскисьтэмъёс но вань…

— Удмуртъёслэн сыӵе сяммы — кызьы шуо, «вордскымтэ чуньы вылын ворттылыны кулэ ӧвӧл», асьмеос сое валаськом. Валамон, тросгес вераны кулэ, куке со быдэстэмын. Но татын нырысетӥ люкетэз бере, мон шуисько, туала улонлэн куронъёсыз — асьмеос кулэ калыклэсь юаськыны, удмуртъёслэсь гинэ ӧвӧл, мар тунсыкоез луыны быгатэ отын. Но мынам осконэ туж бадӟым. Малыке шуоно та Центр сярысь «Удмурт Кенеш» гинэ уг вера, тӥ кылӥськоды асьтэос но — со тема чузъяське пӧртэм инстанциосын.

 Бен, Удмуртилэн тӧроезлэсь ужзэ быдэсъясь та ужпумез Россилэн азьмуртэныз пумиськонын но ӝутӥз…

— Оло, нырысьсэ, кӧня мон та удысын ужасько, йӧскалык политикаен герӟаськем юанъёсын, нырысьсэ чузъяськиз та тема, куке Александр Владимирович Бречалов пумиськылӥз Росси Федерацилэн президентэныз Владимир Владимирович Путинэн. Котьку верасько вал экономика пумысен (валамон, валтӥсь удыс), тазалыкез утён, дышетон, валамон, ожтӥрлык, сюресъёс, но ноку но саклык, нимысьтыз саклык, уг висъяськы вал калыклы — удмурт калыклы яке йӧскалык политикаен герӟаськем юанъёслы. Асьмеос адӟиськом, та пумиськон бӧрсьы протоколын, кудӥз интыямын Кремльлэн сайтаз, туж бадӟым блок мынэ, кытын висъямын саклык калыкъёслы.

Удмурт Элькунын туж трос калыкъёс уло — 130-лэсь тросгес. Трос гинэ йӧскалык лулчеберетъя огазеяськонъёс кылдытэмын. Но Александр Владимирович нимысьтыз пусйиз: татын вань «Удмурт Кенеш» огазеяськон, кудӥз огазея удмуртъёсты, ми потӥмы шуыса сыӵе мылкыдын — кылдытыны кулэ шоркарамы лулчеберетъя центрез но сое быдэстыны кулэ кунлыкмылы 100 ар тырмонэзлы (Удмуртилэн кунлыкезлы 100 ар тырме 2020-тӥ арын — ред.). Мыныт туж яраз — со одӥг блокын куинь бадӟым посыл вераз. Со вала, Удмурт Элькун — со йӧскалык элькун шуыса, татын трос калык пӧлын нимысьтыз титульной этносэз удмуртъёс шуыса (со нимысьтыз сое ӧз вера, но «Удмурт Кенешез» пусйыса со сое вераз). Удмурт культурая центр — милям сыӵе куронмы чузъяськиз бере, туннэ нуналлы со ачиз вала но, адӟе но, шӧдэ но, дыр, лэсьтыны кулэ кыӵе но вамышъёс удмурт калык доры. Лэсьтыны сое, мае ми сомында аръёс ӵоже куриськом, но нокызьы лэсьтыны ум быгатӥське.

Куинетӥез, туж валтӥсь ужпум — 100 ар тырмонэз кӧня вераськом, но со кызьы ке но уг чузъяськы вал, малы ке шуоно али ваньзы дасясько Калашниковлэн юбилеезлы (тодмо конструктор Михаил Калашников вордскем дырысен 2019-тӥ арын 100 ар тырме — ред.), но огез мукетызлы уг люкеты, уката ик дырыз висъяське, одӥг аре ӧвӧл со. Соин ик, мон малпамъя, со туж бадӟым вамыш азьлане. Али ужкагазъёс лыкто, оргкомитет кылдытэмын луоз шуыса, пуктэт юнматэмын луоз нырысь ик элькунын. Та оргкомитетын тӧроезлэн воштӥсез луоз асьме дано президентмы («Удмурт Кенешлэн» — ред.) Валентин Кузьмич Тубылов.

— Ӧвӧл-а кышкытлык тазьы ӵошен кенешыса, пӧртэм-пӧртэм мылкыдъёсты люкаса со Центр пумысен, котькудӥз шобретэз ас вылаз кыскыны кутскоз но пумаз номыр уз пӧрмы шуыса?

— Со озьы ик луоз, но татын со понна ик, дыр, вань адямиос, кудъёсыз радъяло та ужез, шуом. Вот ми «Удмурт Кенешын» но нырысь Ижкар кенешен пумиськылӥмы асьме кивалтӥсьёсынымы, соос куспазы мед кенешозы шуыса. Эшшо сыӵе пумиськон луоз азьветлӥсьёсмес люкаса. Но мон котькуд кенешонмес кутскыку но, быдтыку но верасько: асьмеос кулэ вераны огазе малпанмес, астэ возьматон понна гинэ кулэ ӧвӧл. Со кулэ луыны трос калыклы тупась. Ӵош кариськыса. Соку гинэ со кужым луоз.

Татын мукетгес кышкытлыкез, марлэсь курдало асьме удмуртъёс. Туж модной сочетание али луиз государственно-частное партнёрство. Милемлы но верамын вал, та Центр одно ик сыӵе формаен луыны кулэ шуыса, одӥг гинэ элькун ваньзэ уз быгаты сое радъяны, уката ик со дырлы, кудӥз пуктэмын. Кышкытлыкез вань сыӵе — со адями, кудӥз тыре коньдон, со ик, кызьы шуо, «крезьгурез но быръе», кызьы со отын луыны кулэ. Соин ик сыӵе юанъёс чузъясько, милесьтым юало: уз луы-а со эшшо кыӵе ке одӥг бизнес-центр, кытын адямиос (Удмурт лулчеберетъя юрт улэ висъям юртэ -ред.) пырон понна мар ке удмуртлыкен карозы но… кызьы азьланяз со азинскоз? Но абсурдозь со но вуыны кулэ ӧвӧл. Асьмеос вераськиськом ке кафе луыны кулэ, валамон, удмурт культурая центрын япон сиёнъёсын кафе яке ресторан луыны кулэ ӧвӧл. Со ваньмызъя али концепциез кылдытӥськом.

Кыкетӥез, бизнесэн вераськонъёс мыно бере, нырысь ик, концептуально, со татчы, шуом, тупаны гинэ кулэ ӧвӧл — улыны со малпанэн. Соос юрттыны кулэ сое азинтыны кызьы ке.

— Филармониын пумиськон дыръя куд-огез веразы вал, та Центр коньдэт чотын улыны кулэ, табыш поттыны уз луы шуыса…

—  Татын но вал пӧртэм малпанъёс. Шуом, со Павел Поздеев ик, кудӥз трос аръёс ӵоже удмуртлыкен выре, со вера аслэсьтыз мылкыдзэ, удмуртлыкен герӟаськем ужъёсын туж секыт коньдон поттыны шуыса. Но адӟом. Мукет ласянь учкыны ке, азинско кадь ук — книгаос но басьясько, пӧртэм, шуом, дискъёс но басьясько, мода асьмелэн. «Айкай» бордын но нылпи студия кылдытон сярысь вераськонъёс мыно ке, мыным йӧтэ, анай-атайёс дась луозы уксё тырыса но нылпиоссэс нуллыны. Со дыре ик удмурт кылъя курсъёс, со сярысь но вераськон вал, отын быдэс ар ӵоже ужась курсъёс луыны кулэ шуыса. Валамон ук, ваньмыз дунтэк уз луы шуыса. Отын луыны кулэ кыӵе сыӵе система, кудӥз кӧня ке коньдон но басьтыны луонлык сётоз, но со дыре ик, валамон, со луыны кулэ бюджетной вариант.

Со сярысь но вераськон вал, вожвылъяськон ог-огмылы кылдытэк… отын уго «Бобровая долина» интыяськемын, гостинично-ресторанный комплекс, собере Центр декоративно-прикладного искусства но отынгес ик, ог-огенымы вожвылъяськытэк, утчаны сыӵе амалъёсты, кудъёсыз медаз ог-огзэс воштэ — мед юрттозы. Татын кафе луиз ке (нялтас вераса, со сярысь трос споръяськонъёс, кулэ-а, ӧвӧл-а, мон малпамъя - кулэ), но со кулэ луыны дунтэм. Гуртысь адями лыктӥз со Центре яке нылпиос лыктӥзы мастер-классъёсы, мед соос быгатозы мар ке басьтыны.

Собере вераськонъёс юрт сярысь гинэ уг мыно, быдэсак пространствоез сярысь. Отын вань туж чебер парковой зона, кудзэ чебер карыса, сузяса, шуом, сое но ужатыны луысал та культурая центрлы. Трос вераськонъёс вал «Айкай» пумысен. «Айкай» шорсюлмыз луиз ке центрлэн, но, валамон, со луоз одӥгез блок. «Айкайлэн» кивалтӥсез но Центрлэн кивалтӥсез — со пӧртэм адямиос луыны кулэ. <…> Котькудӥз азинскыны кулэ ас понназ.

— Центрлэн нимыз пумысен кыӵе валан вань ни-а?

— Трос ӵектонъёс, кызьы ниманы та Центрез. Одӥгез ӵектонмы вал, оло, «Айкай» ик карыны шуыса. Но куд-огез верало, озьы луиз ке, малпалозы, со «Айкайлэн» юртэз шуыса. Мон татын оскытӥсько, ми со нимъёсъя куара сётон ортчытом, кызьы ниманы со Центрез. Малы ке шуоно вань сыӵе но ӵектонъёс, нокыӵе ним кулэ ӧвӧл шуыса — мед луоз «Удмурт лулчеберетъя центр». Кин ке вера, Короленколэсь нимзэ сётоно. <…>

Татын туж чаклано, кызьы со чузъяськоз на ай ӟуч кылын — мыдлань берыктэм, серем медаз лу. Соин валче мон Зинаида Кирилловнаен (Рябинина, «Удмурт дунне» газетлэн редакторез — ред.) соглаш, куке со вераз, вот «Удмурт корка» но шуиськом, нош ӟуч кылын «ко́рка» шуо. Мар со «ко́рка»? Татын туж-туж умой малпаськыны кулэ.

Котьма ке но, асьмеос сое удмуртъёслы гинэ ум пуктӥське. Мон малпамъя, со резервация луыны кулэ ӧвӧл. Со ужась инты луыны кулэ, тросгес адямиосты кыскыны — мед тунсыкъяськозы удмуртъёсын. Татын туж бадӟым ужпумез ми быгатысалмы сэрттыны-пертчыны: маиз курдатэ адямиосты, мар соослы тунсыко уг луы? Соиз, мае соос уг валало. Марлы удмурт кылэз но серекъяло вал? Со уг чузъяськы ке, сое уд валаськы ке, нырысь сыӵе реакция, психологической реакция, адямилэн — ултӥяны, серекъяны. Нош собере соос дышо ни кыллы <…> валаны кутско ин куд-огзэ, соку нокыӵе сыӵе реакция уг кылды.

Мон малпасько, татын но асьмелэн бадӟым ужпуммы сылэ — та Центр азьын но, асьмелэн но — со нимысьтыз ас понназ ужась юрт медаз луы, со луыны кулэ площадка, кудӥз кусып шедьтэ ваньмыныз. <…> Удмуртиез туж тросэз верало, татын одӥгез тужгес чебер но тунсыко Эшъяськон юрт пуктэмын шуыса. Циркез, зоопаркез озьы верало. Вот та Центрез но озьы ик мед верасалзы, со тужгес тунсыкоез малпанды, ӵектосты шуыса.



Наверх
Вниз