Ижкар+1 °C
13 -тӥ оштолэзь 2021 Пуксён
18+

Анай кылэз утён: мылкыд вань ке, луонлыкъёс шедёзы

  • 12257
  • 0
Ижкар / Удмуртия
Анай кылэз утён: мылкыд вань ке, луонлыкъёс шедёзы
Туспуктэм: Майя Бывальцева

Ижкарын Кыккылолыкъя «Билингва» удмурт центрлэн 12-тӥез семинарез ортчиз. Таяз радэ отчы удмурт семьяос сяна, армян, азербайджан, бигер но немец семьяос пыриськизы. Сыӵе луонлык кылдӥз «Билингва. О практиках формирования двуязычия в современной городской среде» ӵектос улонэ пыӵаны кутскемен. Тодады вайытом, «Удмурт Кенешлэн» та ӵектосэз кылем арын Росси азьмуртлэн грантъёсъя фондысьтыз коньдон утӥз. Со сяна, юрттэт висъя Удмуртиысь Йӧскалык политикая министерство.

Пумиськонын котькудӥз аслаз семьяяз анай кылэз утён сярысь вераз. Валамон, луонлыкъёс огкадесь ӧвӧл. Кылсярысь, удмурт кылэз нылпи садын, школаын ватсаса дышетыны луэ ке, армян яке азербайджан кылъёс ласянь сыӵе луонлык элькунамы ӧвӧл. Соин ик кылэз утён нырысь ик семьяен герӟаськемын.

Семинарлэн нимысьтыз ӧтем куноез луиз философияя доктор, Парижысь Шундыӝужан кылъёсъя но цивилизациосъя институтысь профессор Ева Тулуз. Али со укмыс кылъёсты тодэ, куиньзэ со пӧлысь — пичи дырысеныз.

Трилингва но «боевой монолингвизм»

«Мынам анае вал итальянка, атае — португалец, ми улӥмы Франциын. Мон малпасько, анай-атае ӧз малпалэ, нокыӵе идеология ӧй вал, но соослэн потэ вал нылпизылы асьсэлэсьсэ сётэмзы. Анае монэн котьку итальян кылын вераськиз, атае котьку португал кылын вераськиз. Но соос ог-огзылэсь кылзэс умой тодо вал. Соос ӧз малпалэ монэ француз кыллы дышетыны, но нылпилэн мукет пиналъёсын вераськемез потэ, озьы со ас понназ пӧрмиз. Мар тужгес пусйымонэз, мынам малпамея — со мылкыдо (эмоциональной) герӟет. Мон понна итальян — со анайлэн кылыз, португал — атайлэн кылыз», — вераз Ева Тулуз.

Солэн кылъёсызъя, озьы ик юрттӥз итальян но португал кылъёсын книгаосты лыдӟемез, кудъёссэ озьы ик анай-атаез сётӥзы. «Монэ Португалиын но, Италиын но асьсэлэн кожало», — шуэ со. Пичи дырысен кылдэм трилигвизм азьланяз мукет кылъёсты дышетыны туж юрттӥз.

Со дыре ик Ева Тулуз пусйиз, соос ӧз улэ «боевой монолингвизм» югдурын.

Мынам син шорам йӧтэ, Росси общество боевой монолингвизмын улэ шуыса — ваньмыз ӟуч кылын луыны кулэ, ӟуч кылын гинэ. Сыӵеез ӧй вал (мынам — ред.), соин ик, дыр, капчигес вал. Но котьма ке но, мон малпасько, со анай-атайёслэн тыршемзы, нылпиослэн соосын огъя инъетсы мед луоз шуыса
Ева Тулуз, философияя доктор

Армян — ӟуч — удмурт

Одӥгез анай вераз, сое пичи дырысеныз удмурт кыллы ӧз дышетэ шуыса, соин ик со пиезлы но сое сётыны уг быгаты. Нош нылпи садын, кытчы ветлэ пияш, удмурт кыл ӧвӧл. Солэн кылъёсыз шонеръяськем кадь чузъяськизы. Аслаз югдурез сярысь вераса, Татев Мирзоян нырысь ик со кышномуртлы вазиськиз, угось солэн кыкез ик пиосыз армян кылэз тодо.

Татевлэн семьяез Удмуртие Армениысь 13 ар талэсь азьло вуиз. Бадӟымезлы пиезлы соку 7–8 толэзь вал. Нылпи садэ ӟуч кылэз тодытэк мынӥз.

Садике мыныкуз ӟуч кылын «дай хлеб» гинэ тодэ вал. Визьнодасьёсын со армян кылын вераськылӥз. Мыным со садике ик ужаны мыноно луиз
Татев Мирзоян

«Визьнодасьёс шуо вал, «яке милемыз армян кыллы дышеты, яке сое ӟуч кыллы, ми мед валаломы, мар куре милесьтым нылпи». <…> Мыным кулэ вал армян кылэз но утьыны, сое ӟуч кыллы но дышетыны. Али пие 4 кылъёсты тодэ — армян, ӟуч, француз, англи», — вераз Татев Мирозоян.

Аслаз нылпиосыз, озьы ик Ижкарын улӥсь мукет армян пиналъёс анай кылзэс медаз ыштэ шуыса, Татев Мирзоян арнянуналъёсы ужась школаын армян кылъя но литературая урокъёсты нуыны кутскиз.

«Пичиез пие татын вордскиз ни, али со (3 арес — ред.) ӟуч кылын кӧня ке вераське, кӧня ке армян кылын, но ваньзэ, мар со вера ӟуч кылын, ми армян кылэ берыктӥськомы. Кытын ке шудыса, кытын ке косыса <…>. Но ми соин армян кылын гинэ вераськиськомы. Со ӟуч садике мынӥз, соин ик ӟуч кыл валтӥсьгес луэ, угось со быдэс нунал ӵоже ӟуч кылэз гинэ кылэ. Но армян кылын ваньзэ вала, дорын милям армян кылын гинэ верасько», — шуиз со но ватсаз, татын улӥсь удмуртъёслы, сьӧрлось лыктэм калыкъёсын ӵошатыса, асьсэ кылзэс утьыны капчигес шуыса.

Куд-огез кышкало, нылпиен пичиысеныз анай кылын гинэ вераськид ке, азьланяз ӟуч кылэз дышетонын шугъяськонъёс кылдозы шуыса. Александр Пушкин вордскем дырысеныз француз кылэз гинэ тодэ вал. Но со ӧз люкеты солы быдӟым ӟуч кылбурчи луыны.

Вавожын улӥсь Манукянъёслэн семьяязы нылпиоссы армян, ӟуч но удмурт кылъёсты тодо. Анайзы Алварт Паронян верамъя, куспазы соос армян кылын верасько, нош эшъёсынызы — удмурт кылын.

«Наринэ нылпи садэ ветлӥз, отысь выль удмурт кылъёсты ваиз — ческыт, чебер, нянь. <…> Собере школае мынӥз, юан кылдӥз — дышетоно яке ӧвӧл удмурт кылэз. Ми атаенымы соглаш вал — мед дышетоз, кызьы вераз вал милям тодмо гожъясьмы Хачатур Абовян, кӧня кылъёсты тодӥськод, сомында ик адямиосты», — вераз Алварт Паронян.

Удмурт кылэз дышетон капчиен ӧз сётӥськы, тодаз вае со. Гуртысь ужез лэсьтыны юрттэт сётыны асьсэос уг быгато бере, бускельёссылы но вазиськоно луылӥз. Тыршемзы юнме ӧз луы.

«Эмезьпу кылэз куаросъя но букаосъя эскероно вал, классысьтызы Наринэ гинэ ужез «витьлы» быдэстӥз», — пальпотэ анай.

Секыт вакытъёсы но вашкалаосмы асьме кылмес утьыны тыршизы, табере эрико дуннеын быгатӥськомы шат ми кылмес, узыр историмес вунэтыны, шуэ кышномурт. Нылпиоссы анай кылзэс умойгес мед тодозы шуыса, Армениысь книгаосты — чеберлыко литератураез, азбукаез — ваизы.

Мон армян кылъя филолог, нылпиосы армян грамматикаез ӧй ке дышетысалзы, мон асме простить ӧй карысал. <…> Мон кужымме уг жаляськы, атаймы но тырше. Возе асьтэлэсь кылдэс, уте, эн возьдаське
Алварт Паронян

Нылпиосызлэсь вордскем шаерзэс сӥлы карыса, Алварт Паронян Кузебай Гердлэсь удмурт кыл сярысь удмурт кылын кылбурзэ лыдӟиз.

Анай кыл — мылкыдо кыл

Шахла Рагимовалэн семьяез Ижкаре Азербайджанысь 14 ар талэсь азьло лыктӥз. 12 но 10 аресъем нылъёсыз анай кылзэс тодо, но дорын вераськон сямен гинэ. Литературной кылэз, грамматиказэ мед валалозы шуыса, Шахла нылъёссэ арнянуналъёсы ужась азербайджан школае нуллэ, ачиз отын дышетӥсь луыса ужа.

«Нылы куинь аресаз садике мынӥз, одӥг ӟуч кылэз но уг тоды вал, со отын ӝыны ар вераськытэк улӥз. Бӧрдӥз но, чал-чал но пукиз, — тодаз ваиз Шахла Рагимова. — Али 6-тӥ классын дышетске, «витьёслы» дышетске, ӟуч кылъя олимпиадаосын «витьёс» басьтэ. <…> Мынэсьтым юало вал, малы тон пиналъёстэ ӟуч кылын куаретӥськод, нош нуныяськод анай кылын. Мон, шуисько, уг быгатӥськы ӟуч кылын нуныяны, угось монэ анае азербайджан кылын нуныялляз».

Анай кыл мылкыдо кыл луэ шуыса Ева Тулузэн но Шахла Рагимоваен соглаш луэмзэ вераз удмурт анай Елена Миннигараева но. Пиенызы пичи дырысеныз ик удмурт кылын гинэ вераськизы, соин со выжыен герӟась кыл луиз.

Али пие (18 арес — ред.) кык кылын вераське, но удмурт кыллы шӧдонэз шунытгес. Удмурт кылын вераськыку со усьтӥське, нош ӟучез ужан кыл луэ
Елена Миннигараева

Пичи нылынызы Миннигараевъёс мукетгес амал бырйыны кенешизы: атай ӟуч кылын гинэ вераськоз, анай — удмурт кылын. Нылпи садэ мынытозь анай кылыныз туж умой вераськем, но али ӟучез ворме. Ярам, шуэ Елена, нылпи садын визьнодасьёссы удмурт кылын верасько, соин ик нылзы но мылкыдыз вань дыръя удмуртэн ӟабыльтэ. Эшшо туж юртто удмурт кылын выжыкылъёсын дискъёс, машинаын мыныкузы соосты одно ик кылзо. Озьы нылпи амалтэк кылъёсты пеляз понэ, кулэ дыръяз соосты вераськоназ пыртэ.

Выль тодмет

Армян но азербайджан анайёс верамъя, кылзэс утьыны юрттэ вордскем палъёсазы ветлон — отын ваньзы асьсэ кылын верасько. Удмуртъёс сярысь озьы вераны уг луы ни. Гуртын улӥсь песянай-песятайёс но ӟучен вазись нунокъёсынызы ӟуч кылын ик вераськыны кутско. Сыӵе воштӥськонэз синйылтӥз Ева Тулуз но.

Сыӵе шумпотӥсько вал, калык анай кылыныз малпаське, улэ шуыса. Но берло дыре сыӵе сюлмаськон кылдӥз: со адямиос ик, кин ӟуч кылэз но рос-прос уг тоды, кытчы ке нылпи вуэ ке, соку ик ӟуч кылын вераськыны кутско. Нылпи сыӵе мылкыд сётэ кадь
Ева Тулуз, философияя доктор

«Татын вань опыт возьматэ, макем кулэ, анай кыл семьяын мед луоз шуыса. Кызьы нюръяськыны, пиналъёсын чик малпаськытэк, ӟуч кыл вылэ выжонэн? Со выль явление, 5 ар талэсь азьло мон сое уг шӧдӥськы вал, нош али котькытын адӟисько», — жаляса вераз Ева Тулуз.

Синтаксисъя но кыл типологияя ӧнерчи, кылосбур тодосъя кандидат Артём Федоринчик таӵе амал ӵектӥз: нылпи ӟуч кылын вера ке, сое ик удмурт кылэ берыктоно — «тазьы-а верамед потэ вал?». Озьы вераськон ӝеганы кутске, нылпи вала — со удмурт сямен вераз ке, ӝоггес луоз. «Бен, татын кескичьяськомы, но со нылпиез валанэ вуттэ — ойдо, удмурт кылын вераськом», — лыдъя Федоринчик.

Ижкарын улӥсь Оганес Егизарян аслэсьтыз чакланъёссэ вераз — малы ке но тросэз удмуртъёс кышкало вераны, соос удмуртъёс шуыса.

Сыӵе югдур историен герӟаськемын, валэктӥз Удмуртие 2000-тӥ аръёс кутсконын вуэм воргоронлы Ева Тулуз.

«Тужгес но 20-тӥ даурысь историын удмуртъёсты шӧдскымон гинэ «тышказы», соос удмуртъёс шуыса. 20-тӥ аръёсысь но, ож бере аръёсысь но история вуттӥз сыӵе югдуре, куке асьсэдыз утён но нылпиоссэс утён понна калык аслэсьтыз мукет луэмзэ ватоно луиз. Куке 1994-тӥ арын нырысьсэ Удмуртие лыктӥ, мон удмуртъёслэсь кылылӥ «ми кыкетӥ сортэн калык» шуыса верамзэс. Транспортын удмурт кылын вераськисьёсты тышкасько вал. Мон сое 2002-тӥ арозь транспортын кылылӥ, собере ӧй ни. Но вань со секыт история, солэн бервылэныз кызьы ке но нюръяськоно», — пусйиз профессор.

Кылъя но лулчеберетъя пӧртэмлыкез возёнлы юрттон вылысь 1999-тӥ арын шуркынмонэ ЮНЕСКО-лэн Валтӥсь конференциез Анай кыллэсь калыккуспо нуналзэ юнматӥз, со арлы быдэ 21-тӥ тулыспалэ пусйиське.

Мылкыд вань ке, луонлыкъёс шедёзы

Семинаре лыктӥзы соос, кин зэмзэ но анай кылыз понна висе — удмурт-а, армян-а, азербайджан-а мед со луоз. Та анай-атайёс валало: луоз кыл — луоз калык, уз луы кыл — уз луы калык. Ог-огзылэн сюлмаськонъёссы, азинсконъёссы но вормонъёссы сярысь вераськыса-кенешыса, одӥг шонер йылпумъян лэсьтӥзы: кинлэн потэ анай кылзэ дышетэмез, со луонлыкъёс шедьтоз. Нош кинлы со кулэ ӧвӧл, ялан мугъёс шедьтоз.

«Удмурт Кенешлэн» Пичи кенешезлэн пумиськоназ 2017-тӥ арын шуркынмонэ Удмуртиысь Дышетонъя но тодосъя министерствоысь йӧскалык дышетонъя ёзэтлэн кивалтӥсез Валентина Корепанова ивортӥз: туннэ нуналэз басьтоно ке, 198 школаын 18 сюрс пала пиналъёс удмурт кылэз предмет чотын дышето, факультатив чотын — 166 школаын 10 сюрс пала пиналъёс

Дышетоно-а нылпиез ӧжыт лыдъем калыклэн кылэзлы яке ӧвӧл? Одӥг ласянь, со котькуд семьялэн аслаз ужез. Мукет ласянь, кылэн ӵош дуннеын ышоз кадь кыӵе ке тодонлык. Калыклэн трос дауръёс ӵоже люкам Тодонлыкез — дуннеез валанэз, йылолъёсыз, эсэпъёсыз — кудӥз оглом цивилизациез но уте шуыны яра, дыр.

Ар ӵоже семинаръёсы ёросъёсысь визьнодасьёсты, кык кылэз тодӥсь нылпиосын ужась ӧнерчиосты (логопедъёсты, психологъёсты) ӧтьылозы.

Ватсалом, семинарез радъязы Кыккылолыкъя «Билингва» удмурт центр, «Удмурт кенеш» огазеяськон, Калыкъёслэн эшъяськон юртсы, Росси азьмуртлэн грантъёсъя фондэз но Удмуртиысь Йӧскалык политикая министерство юрттэм улсын.

Озьы ик лыдӟе: «Кӧня кыллы дышетоно покчи нылпиез: малпанъёс но дышетон амалъёс» но «Анай кылэз дышетон: Ижкарысь удмурт анайёслэн амалъёссы но малпанъёссы»


Наверх
Вниз