100 лет государственности Удмуртии
Ижкар+19 °C
31 -тӥ куартолэзь 2020 Воскресенье
16+

Атыкай музъемез утён: воргоронъёслэн армие ветлон шоры учконзы

  • 12925
  • 0
Ижкар / Удмуртия
Атыкай музъемез утён: воргоронъёслэн армие ветлон шоры учконзы
Туспуктэм: Григорий Фомин

23-тӥ тулыспалэ кунамы Атыкай музъемез утисьлэн нуналэз пусйиське. Сямлы пӧрмемын ни, кышномуртъёс та празднике вань воргоронъёсты но пиосты ӟечкылало, соослы кузьымъёс кузьмало. Озьы ке но, куд-огез та нуналэз армие ветлэмъёсын гинэ герӟа, сурон сапеген одӥг яке кык ар ӵоже музъемез лёгамъёсты, удысужлыко ожгарчиосты зэмос утисьёсын лыдъяло. Праздник азьын ивортодэтъя «Удмуртия» агентство армие ветлэм, ветлымтэ но служба нуись муртъёсын вераськиз, соослэсь солдат улон сярысь малпанъёссэс тодӥз.

Пичи Пурга ёросысь Брангурт черкогуртысь 30 аресъем Виталий Бармин армиын службазэ нуиз 2008–2009-тӥ аръёсы.

Мынэмды потыса-а армие мынӥды?

— Повестка вуон азьын ортчи военкоматын медосмотр. Прапорщик юаз, кытчы, пе, мынэмед потэ? Мон шуи, кыдёке, умой луысал Владивостоке, Тихоокеанский флотэ. Со шуиз, я. И мыным повестка вуиз Тихоокеанский флотысь. <…> Егит боецлы дышетскем бере монэ кельтӥзы со часте ик, кытын дышетсконмы ортчиз. <…> Пырак отчы сюрем уг поты вал, потэ вал корабль вылэ сюрем яке морской пехотае, но сюри, кытчы сюри — радиоаппаратостроениелы дышетскеменым валче.

Кыӵе мылкыдын солдат дырдэс тодэ ваиськоды?

— Службамы ортчиз умой, шулдыр. Выль эшъёс кылдӥзы, олокытысь но пиос вал. Службаын мон вань ужрадъёсы пыриськи. Кылсярысь, ку боевой корабльёсмы кошко вал походэ Аденский заливе пиратъёсты контролировать карыны, ми соосты пумитаськом вал причал вылын крезьгурен, маин

бармин.jpg
Ижкарын ВМФ-лэсь нуналзэ пусйыку Фото: Виталий Барминлэн архивысьтыз ©

Ар ӵоже кыӵе ке тунсыко учыр но луылӥз, дыр?

— Огпол тани монэ келязы вал нюлэскы, частьмы вӧзын кабелез согыны. Мон малпай, кабелез согыса вутто ӝыт сиськонозь но часте вуо. Часъёсы ӧй вал, телефонэ ӧй вал. Малпай, кыло, кызьы пиос кырӟало учебной ротаысь, но частям берто. Но монэ ыштӥзы, малпазы, мон пегӟи шуыса. Тревога ӝутӥзы. Собере эше вуиз но шуэ, тонэ, пе, ӝыны час утчало ни, нош тон татын. Сюрыны ӧз сюры, но серем вал, ыштӥзы шуыса.

Армия — со улонысь одӥг арзэ ыштон шуыса малпанъёс вань. Тӥ кызьы лыдъяськоды?

— Адямилэн визез ӧвӧл ке, пӧртэмлыкез ӧвӧл: со отын но, татын но дыр ыштоз.

Марлы тӥледыз армия дышетӥз?

— Чылкытлы, астэ чакланы, дышетски туж умой утюганы. Табере ваньзэ ачим утюгасько! Ыбылӥськыны мон арми дорозь но быгатӥсько вал. Автоматэз но сэрттыны-бичаны армиозь быгатӥсько ни вал.

Владивостокын туж яраз, военной музеяз ветлэммы вань, туж тунсыко. Ку-о мон отчы вуысал на, Владивостоке? Тазьы вуылыны ке отчы, кулэ 30 сюрс пала — со ӧжытэз — билетъёслы гинэ. Татын — кун чотын.

Ижкарысь 24 аресъем Артак Амарян армие ветлэмын ӧвӧл. Шоръёзо школаез йылпумъямез бере вылӥ дышетсконние пыриз.

Потэ-а вал армие мынэмды?

— 18 аресын потэ вал. Али уг ни, малы ке шуоно тодӥсько ни мар улонлэсь кулэ, валасько, мар со понна лэсьтоно. Армия — со умой инты малпанъёстэ радъяны, дисциплиналы астэ дышетыны. Одӥг ар армиын — со умой дыр малпаськыны, кин тынад луэмед потэ матысь дыре. Соин ик 18 аресын армия — со кулэ маке, нош 24-ен — улонлэсь одӥг арзэ ыштон.

Кызьы малпаськоды, мар возьма солдатэз службаын?

— Мон уг тодӥськы, мар отын пиосты возьма. Озьы-а, тазьы-а со эскерон. Тынэсьтыд сямъёстэ эскерон, быгатонлыктэ эскерон, одӥг режимын но одӥг формаен улыны луонлыкъёстэ эскерон.

Артак.jpg
Фото: Артак Амарянлэн архивысьтыз ©

Вань сыӵе малпан, армия пияшлэсь воргорон лэсьтэ шуыса. Шонер-а со?

— Адямилэн сямез школаысен адӟиське ни. Отын ми асьмедыз «лэсьтӥськом», отын ик возьматӥськом: азьветлӥсь-а ми, яке бере кылись-а. Ваньмыз, мар луэ школаын, тынэсьтыд адями лэсьтэ. Нош армиын тон возьматод со сямъёстэ, кудъёссэ школаын губка сямен пыӵатӥд. Тон школаын бере кылись мурт вал ке, армиын но сыӵе ик кылёд. Кужмо но дӥсьтыса лэсьтэм ужъёс, ас верамед понна кылкутэм сяна, номыр но тынэсьтыд воргорон уз лэсьты. Нош солы тон армилэсь палэнын но дышетскыны быгатод.

Кыӵе кулэ луыны армия, отчы мыло-кыдо мед мынозы шуыса?

— Мон малпасько, асьме армилэн ӟечлыкез будысал, отчы мылкыд карисьёсты гинэ кутысалзы ке. Соос ик котькытын возьмато туж умой результат. Потэ ке, армие ас мылкыдзыя мед мынозы шуыса, будэтэ уждунзэс 30 сюрс манетозь. Тодӥсько, 18 аресъем пияшлы со али сётӥськись 1500 манетлэсь юнгес мотивация луоз.

Пичи Пурга ёросысь Пуро-Можга гуртысь 21 аресъем Константин Долганов армия бере ассэ катрадлыкез утён удысэн герӟаз. Службазэ со Москваын кунпуш войскоосын ортчиз. Нош табере кинолог луыса Ижкарысь следствиосъя изоляторын ужа.

Армие мыло-кыдо мынӥды-а?

— Потэ вал мынэме, малы ке шуоно вань эшъёсы кошкемын вал. Малпаськытэк мынӥ. Кышкытгес вал — верало вал ваньзы жуго, мар шуыса отын. Но милям сыӵеез ӧй вал. Мынам вал внутренние войска. Ӝыны ар ортчыса, младший сержант ним сётӥзы но ёзэтлэн кивалтӥсез каризы.

f2_4jaTMrzM.jpg
Али пиосмурт кинолог луыса ужа Фото: Константин Долгановлэн архивысьтыз ©

Мар кельшиз армиын?

— Валамон, гуртлэсь мӧзмоно. Но тужгес дуноез — эшъёсын юн кусыпъёс луо, коллективез валаны кутскиськод. Ми эшъяськиськом вал Башкириысь пиосын. Соосын ӵош ветлӥськом вал. Кин ке кутске ке вал бордамы, ог-огмы понна султӥськом вал.

Тон малпамъя, малы одно ик армие ветлоно?

— Улонэз умойгес валаны кутскиськод. Ӵыжы-выжылэсь мӧзмыса, соосты гажаны. Мон уг жаляськы, армие ветлӥ шуыса. Кулэ ваньзылы ветлыны. Тӥни асьмелэн но (гуртысьтымы — ред.) пияшъёс, кин ке но ветлэмын армие, кин ке ӧвӧл. Кинлэн-о визез тросгес?

Армиен гинэ ӧз тырмы, улондэ службаен герӟад. Малы?

— Служба нуи сыӵе войскоосын — адямиослы юрттонэн герӟаськемын. Азьланьтэме потӥз. Али мон пуныен ужасько, следствиосъя изоляторын йыртэмасьёс медаз пегӟе шуыса чакласько. Али кучапи будэтӥсько гуртын. Уж дорын сётӥзы, но пичи дыръяз сое гуртын будэтыны кулэ. Уж дорын милям пуныосты кӧс сиёнэн сюдо. Озьы толыкез ӧвӧл, уз буды.

Кышкыт учыръёс луыло-а уж дорады?

— Али йыртэмасьёс катъёсты тодо, соин ик пеганы уг тыршо. Озьы ке но, котьку дась луыны кулэ. Соин ик милям, графикъя ке но ужаськом, шутэтскон нуналъёсамы но дышетсконъёсы потаны кулэ луэ. Кылсярысь, смена бере ыбылӥськыны ветлӥм алигес. 23-тӥ тулыспаллы сӥзем шутэтскон нуналъёс азьын дышетскон тревога ортчиз.

Ивортодэтъя «Удмуртия» агентство ӟечкыла Атыкай музъемез утисьлэн нуналэныз! Сӥзиськом, кунэз но калыкез кие пыӵал кутыса утьыны кулэлык медаз кылды шуыса.



Наверх
Вниз