Ижкар+1 °C
13 -тӥ оштолэзь 2021 Пуксён
18+

«Гудыри» газетлэн но Иосиф Наговицынлэн котырес лыдпуссылы сӥзем огъяросси конференци ортчиз Ижкарын

  • 14567
  • 0
Ижкар / Удмуртия
«Гудыри» газетлэн но Иосиф Наговицынлэн котырес лыдпуссылы сӥзем огъяросси конференци ортчиз Ижкарын
Туспуктэм: Майя Бывальцева

Туннэ, 1-тӥ шуркынмонэ, Удмурт кун университетын улосвылысь иворъёсты вӧлмытӥсь йӧскалык ёзэсъёслэн кунын воштӥськонъёс вакытэ интызы сярысь вераськизы. «Удмурт дунне» газетэн но дышетсконниен радъям огъяросси научно-практической конференциез «Гудыри» газет потыны кутскем дырысен 100 ар но Удмурт автономиез ӧдӥгез кылдытӥсьлэн Иосиф Наговицынлэн вордскемез дырысен 130 ар тырмонлы сӥзизы. Ужрадэ Венгриысь но Финляндиысь тодосчиос пыриськизы. Конференцилэн ужез ньыль секциосъя радъяськиз: Удмуртиысь журналистика: история но туннэ нунал; литератураын йӧскалык ужпумъёс но иворъёсты вӧлмытӥсь ёзэсъёс; иворъёсты вӧлмытӥсь ёзэсъёслэн йӧскалык литературной кылэз азинтонын интызы; иворъёсты вӧлмытӥсь ёзэсъёс но гуманитарной тодметъёсты дышетон.

«Гудырилэн» кылёсбурез

«Удмурт дунне» «Гудырилэсь» кутскем ужзэ азьланьтӥсь луэ, угось кыксы ик соос одӥг ужпумез быдэсто, пусйиз туала элькун газетлэн валтӥсь редакторез Зинаида Рябинина.

Ми лыдъяськом, «Гудырилэн» туала нимыз – «Удмурт дунне». <…> Ми быдэсъяськом чылкак одӥг кадь ужпумъёсты: гожъяськом асьме калык понна, кунысьтымы, элькунысьтымы югдурез валэктӥськом, социально-значимой луись ужпумъёсты, огшоры калык сярысь ивор сётӥськом. Оглом, азьвыл но, али но одӥг кадь ужпум - калык доры анай кылын ивор вуттон
Зинаида Рябинина, «Удмурт дунне» газетлэн валтӥсь редакторез

«Гудыри» вань удмуртъёслэн Алабгоын ортчем нырысетӥ ӧтчамзы бере потыны кутскиз. Соку солэн нырысетӥ ужпумез вал калыкез югдытон, сое мер но политика улонэ кыскон. Та ласянь туала журналистъёслы, оло, капчигес ужаны, но али газет-журналъёслэн мукет сюлмаськонъёссы кылдӥзы.

Тужгес уродэз – усё выльысен тиражъёс. Совето вакытэ соос туж ӝутскылӥзы, али выльысь усё. Валамон, солэн туж трос мугъёсыз. Азьвыл сое сётъяло вал дунтэк, 1918-тӥ арын, али дунтэк газет ӧвӧл. Собере али ӧвӧл ӟуч кылэз валасьтэм лыдӟисьёс, информация соос басьто котькытысь, со ачиз пыре корка телевизор пыр, телефон пыр, соин ик лыдӟемзы луэ ӟуч кылын иворъёсты но
Зинаида Рябинина, «Удмурт дунне» газетлэн валтӥсь редакторез

Удмурт ивор вӧлмытӥсьёс вотэсын

Ивортодэт вӧлмытонын пумен бадӟым инты басьтэ интернет. Котькуд минут выль ивор вуон вакытэ газетъёс но лыдӟисьёссы доры ӝоггес вуыны тыршо, асьсэлэсь вотэсбамъёссэс кылдыто. Но элькунысь тросэзлэн газетъёслэн ужъемышъёссы туж ик шумпотымон ӧвӧл, вераз ивортодэтъя «Удмуртия» агентстволы УдГУ-ысь журналистикая кафедралэн кивалтӥсез, кылосбур тодосъя кандидат Дмитрий Ефремов. Ёрос, кар но элькун газетъёсты со ар пала юри чакласа улӥз.

Куинь ёрос газетъёс пӧлысь одӥгезлэн, мон сое учкыса потӥсько ни быдэс ар ӵоже, азьвыл кутскыкуз сьӧдо-тӧдьыё туспуктэмъёс гинэ вал, кык нимысьтыз бамез гинэ отын вал, информация но выльдӥське вал арнялы одӥг пол яке эшшо но ӧжытгес, оло, нош толэзьлы но одӥг пол луылэ вал. Туннэ со газетлэн бамез воштӥськемынгес ни, но та газетлэн но, мукетъёсызлэн но, жаляса верано, туж трос шекъёссы кылемын на
Дмитрий Ефремов, УдГУ-ысь журналистикая кафедралэн кивалтӥсез

Озьы ик со вераз, ёрос газетъёслэн вотэсбамазы удмурт кылын потӥсь ватсэт возьматытэк кыле шуыса. Дмитрий Ефремовлэн кылъёсызъя, умой ласянь висъяське Глаз ёросысь «Иднакар» газет. 

Нимысьтыз вераны быгатӥсько «Иднакар» сярысь. Со мыным туж кельшиз, малы ке шуоно солэн ог радэ пуктэмын удмурт кылын вариантэз, версиез но, ӟуч кылын но. Но отын но кӧня ке шекъёсыз пумиськыло, технической характерен, куке букваосты адӟыны уг луы, вылысьтыз вылаз соос луо, лыдӟыны тоже шуг-секытъёс кылдо
Дмитрий Ефремов, УдГУ-ысь журналистикая кафедралэн кивалтӥсез

Ижкарын ужась элькун газетъёсын югдур шӧдскымон ӟечгес луыны кулэ кадь. Татын кылдытӥсь устолыко ӧнерчиосты но шедьтыны капчигес, визь-кенеш сётӥсьёс но тросгес кадь. Озьы ке но, вотэсбамъёссы огкадесь ӧвӧл.

«Удмурт дуннелэн» вотэсбамаз, мынам малпамея, тужгес ӟеч результатъёс, шӧдскымонэсь, адӟыны луымон. Отын видеоконтент но вань, туспуктэмъёс но трос гинэ, выльдӥськон ласянь но туж ӟеч ужало. Но мон ӵошатӥ на озьы ик «Ӟечбур» газетэз – малы ке но отын туж, туж ляб шӧдске программной обеспечение бордын ужан. <…> Шуг-секытъёс вань, но тенденция туж умой адӟиське – адямиос тыршо, ужало. Азьланяз та тенденция, мон малпасько, азьланьтӥськоз но вотэсбамысь газетъёс ӟечгес луыны кутскозы», - пусйиз Дмитрий Ефремов.

Конференция
Студентъёс конференциын Фото: Майя Бывальцева © udmurt.media

Удмурт журналистикалы ӧнерчиосты дасян

Туала лыдӟисез вотэсбамлэн вылтусыныз гинэ уд паймыты. Сое кыскон понна ӟеч пуштрос кулэ. Озьыен, удмурт кылын вольыт, тунсыко гожъяськыны быгатӥсь журналистъёслы кулэяськон будэ. Татын эшшо одӥг ужпум шараяськиз: Удмурт кун университетысь Удмурт кылосбуръя, финно-угроведениея но журналистикая институтлэн журналистикая ёзэтаз удыслы нимысьтыз удмурт ӧнерчиосты дасяны луонлыкъёс ӧвӧл.

Туннэ нуналэ, зэмзэ вераса, удмурт кылын гожъяськись журналистъёсты нимысьтыз группаосын дасяны луонлыкъёсмы ӧвӧл. Азьвыл журналистика ёзэтэ сётӥське вал 30 пала бюджет интыос, туннэ нунал понна, шуом, 10-13, 14 инты гинэ сётӥське. Стандартъёсты лыдэ басьтыса, группаын 13 адямилэсь ичи луыны уг быгаты, соин ик милям нимысьтыз удмуртъёслы кыӵе ке но квота сётэммы уг луы
Наталья Кондратьева, УдГУ-ысь Удмурт кылосбуръя, финно-угроведениея но журналистикая институтлэн кивалтӥсез

Нялтас вераса, та ужпум Удмуртиын гинэ лэчыт вылымтэ. Россиысь журналистъёслэн Элистаын ортчем форумазы Ингушетиысь элькун газетлэн валтӥсь редакторез ӝожтӥськиз, ингуш кылын гожъяськыны быгатӥсь журналистъёссы ӧвӧл шуыса. Нош отын 94 процентэз улӥсьёс ингушъёс луо.

Кызьы вераз Наталья Кондратьева ивортодэтъя «Удмуртия» агентстволы, журналистика ёзэтэ араз 1-2 гинэ удмурт пиналъёс пыро. Соослэсь вожвылъяськыны луонлыкъёссэс будэтон понна, институт пӧртэм луонлыкъёс утча. Кылсярысь, «Школа заочной журналистики», «Мои первые шаги в науку» курсъёсы, журналистикая олимпиадае пыриськемъёс огъя кун экзаменъёссы борды ватсаса баллъёс басьтыны быгато.

Та ужпумез ми сэрттыны-пертчыны тыршиськомы, но пока кужыммы уг тырмы. Вазиськиськомы трос пӧртэм кагазъёсын министерствоосы, но пока милемыз уг кыло. Но оскем потэ, Владимир Владимирович Путинлэн Ханты-Мансийскын ӝутэм ужпумъёссэ лыдэ басьтыса, азьланяз, оло, тросгес бюджет инты висъяськоз национальной журналистикаез азинтон понна
Наталья Кондратьева, УдГУ-ысь Удмурт кылосбуръя, финно-угроведениея но журналистикая институтлэн кивалтӥсез

Коньывуон пумын Ханты-Мансийскын Владимир Путин Йӧскалык кусыпъёсъя кенешлэн пумиськоназ пыриськиз. Отын кун йӧскалык политикаысь лэчыт ужпумъёс, демографи, Россиысь калыкъёслэсь анай-кылъёссэс утён амалъёс сярысь вераськизы. Азьмуртлэн кылъёсызъя, выжы калыкъёслэсь эрикрадъёссэс быдэсъян, аспӧртэмлыксэс утён – Россиысь валтӥсь ужпумъёс пӧлын, со кун йӧскалык политикалэн стратегиеныз юнматэмын.
Пленарной кенешонын
Пленарной кенешон дыръя Фото: Печатья но ивортодэт вӧлмытонъя агентство © apmcur.ru

Эсэпъёсты тӥян - эсэп?

Анай кылъёсты утёнын иворъёсты вӧлмытӥсь ёзэсъёс нимысьтыз инты басьто. Соослэн ужъёссы пыр кыллэсь воштӥськемзэ, азинскемзэ шӧдыны луэ. Удмуртиысь туала газет-журналъёсын – «Удмурт дунне», «Ӟечбур», «Кизили», «Кенеш» - удмурт кыллэсь кутӥськемзэ чаклаз элькунысь Дышетон удысысь йӧскалык ужпумъёсты эскеронъя тодос институтлэн кивалтӥсезлэн воштӥсез, кылосбур тодосъя кандидат Вера Пантелеева. Кыллэн азинскемез котькудаз адӟиське, шуиз со ивортодэтъя «Удмуртия» агентстволы, мукетыз ужпум, кыӵе солэн азинскон сюресэз, воштӥськемез.

Со азинскон сюресын <…> как раз шӧдоно, адӟоно со воштӥськонъёсты. Со воштӥськонъёс нырысь ик герӟаськемын асьме кылэ трос ӟуч кылъёс пыремен, русификация шуомы сое, яке туж трос англи кылъёс пыремен - соос ӟуч кыл пыртӥ пыро ини. Сое чаклано ке, потэ вылэм, удмурт кыл, удмурт лексика, процентэн лыдъяса, тросгес мед луоз яке аслэсьтыз позицизэ мед возёз шуыса. Но туннэ, мынам чакламея, со палэнысь асэстэм кылъёс тросгес но тросгес луо. Валамон, со огъя тенденция. Ӟуч кылэн но ӵошатоно ке, ӟуч кылэз эскерисьёс но сюлэмшугъяськонзэс со ласянь верало
Вера Пантелеева, Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсезлэн воштӥсез

Озьы ик тодосчи кыл радлыклэсь воштӥськемзэ, тӥяськемзэ пусйиз, уката ик егитъёслэн ужъёсысьтызы. Вера Пантелеевалэн верамезъя, пиналъёс ӟучомо бере, соослэн удмурт сямен вераськонзы радлыксы но, манерзы но ӟуч луыса кошке.

«Валамон, егитъёс (тани, шуом, «Дарт» газетэ гожъясьёс), оло, юромо но озьы тӥяло. Соослы потэ, со тӥян соослэсь аспӧртэмлыксэс возьматэ шуыса – вот соос сокем ик удмуртэсь ӧвӧл ини, соос ини одӥг пыдынызы отын, шундыпуксён план кытын ке, со культураосын, шуомы. <…> Мон сое туннэ курласа гинэ уг вераськы, мон со огъя улонлэсь тенденцизэ адӟисько. Малы ке шуоно тани ӟуч кылэз эскерись вань кылчи, тодосчи Костомаров, солэн вань книгаез «Языковой вкус эпохи». Вот со книгаяз со гожтэ: туннэ, пе, асьмеос адӟиськомы сыӵе явлениез, кудзэ со ӟуч сямен шуэ карнавализация языка. <…> Cолэн шуэмез потэ: нормаез тӥян, пе, туннэ, пе, норма луэ. Кыл ласянь нормаез тӥян – со норма луыса кошке. Вот асьмелэн но сыӵе тенденциос адӟисько», - шуэ Вера Пантелеева.

Элькун ӧвӧл республика (кытчы пуктыны люконпус)

Кыл ласянь вераськонэз йылпумъяны уг луы выль кылъёсты кутонлы саклык висъятэк. Иворъёсты вӧлмытӥсь ёзэсъёс та ласянь нырысетӥ интыын. Но лыдӟисьёс (учкисьёс, кылзӥсьёс) сое пӧртэм сямен пумитало. Журналистъёс ӵемысь кылоно луо, валантэмгес гожъяськиськом шуыса пыкылонъёсты. Вера Пантелеева татын быдэсак ми палан.

Куке выль кылъёсты, шуом, порциен, дозированно пыртӥськомы асьмеос, со ведь лыдӟисьлэсь но огъя культуразэ ӝутэ. Луэ туж суро вераськыны: элькун кыл интые озьы ик республика шуыны, куншет интые озьы ик флаг шуыны но мукет. Но ведь туннэ ӧм ке валалэ, ӵуказе валаломы. Асьмеос ӧм ке валалэ, пиналъёсмы валаса будозы. Соин ик вот со ласянь ваньмыз со верам изданиос туж бадӟым уж нуо, <…> сое одно ик быдэстыны кулэ иворъёсты вӧлмытӥсь изданиос. Нош собере ини – школаын дышетӥсьёс
Вера Пантелеева, Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсезлэн воштӥсез

Пленарной кенешонын
Пленарной кенешон дыръя Фото: Печатья но ивортодэт вӧлмытонъя агентство © apmcur.ru

Иосиф Наговицын

Валамон, вунэтоно ӧвӧл, кин асьмелы анай кылын вераськыны, лыдӟиськыны, тунсыко программаосты учкыны но кылзыны луонлык сётӥз. Удмурт калыклы та дырозь улыны инъет кылдытӥсьёс пӧлысь одӥгез – Иосиф Наговицын. Вотской автономной улосвыллэн нырысетӥ кивалтӥсез, РСФСР-ысь мерлыко юрттэт сётонъя калык комиссариатлэн кивалтӥсез вордскем дырысен туэ 130 ар тырмиз. Конференцие солэн ӵыжы-выжыез (внучатой племянницаез), истори тодосъя кандидат Валентина Хазиахметова лыктӥз.

Ачиз со вань улонзэ Казаньын ортчытӥз, Татарстанлэн нырысетӥ азьмуртэзлэн Минтимер Шаймиевлэн мерлыко ужпумъёсъя советникез вал. (Мерлык милям вирамы, серекьяса вераз со журналистъёслы - ред.).

Солэн Иосиф Наговицынлэсь тодмотэм палзэ возьматэмез потӥз – публицист луэмзэ.

Сое кун ужасез сямен гинэ верало. Одӥг лыдӟисьлэн но солэн публицистикая ужъёсыныз тодматскыны луонлыкез ӧй вал. Угось солэн дырыз ӧй вал верамъёссэ поттыны. Кылизы протоколъёс, вераськонъёсыз, гожтэтъёсыз, но ваньмыз со архивлэн алигес усьтэм фондъёсаз. Ӧнерея историк луыса, Иосиф Алексеевич Наговицынэн вирыным герӟаськыса, мон ас вылам басьтӥ архивъёсын ужаны но та адямиез аслам калыкезлы чылкак мукет сямен усьтыны – литераторез но публицистэз, ас калыксэ пумтэм яратӥсь но солы аслэсьтыз улонзэ сётэм адямиез сямен
Валентина Хазиахметова, Иосиф Наговицынлэн ӵыжы-выжыез

Солэн кивалтэмез улсын берло кык аръёс ӵоже ньыль книга потӥз ни. Нырысетӥез – Татарстанын. Валентина Хазиахметовалэн верамезъя, бигер элькунысь мерлыко юрттэт сётонъя программалэн инъетаз Иосиф Наговицынлэн валтӥсь малпанъёсыз кутэмын.

Удмуртилы 100 ар тырмонэз пусъёнлы дасяськон улсын йӧскалык кунлыклы кутскон сётӥсьёс сярысь вераськон ӝутскиз. Татын нырысетӥ интыын вал Максим Прокопьев, Трокай Борисов но Иосиф Наговицын, соин ик книгаез «Три комиссара» нимазы.

Та кык книгаосты дасян улсын ортчытэм эскерон ужъёс берло шараям ужъёссэ поттыны мылкыд сётӥзы, шуэ Валентина Хазиахметова. Озьы Иосиф Наговицынлэн вордӥськем нуналэзлы туэ куарусёнэ эшшо кык том люказы. Нырысетӥзэ Глазкарын поттӥзы, со Удмуртиын ужан вакытэзлы сӥземын. Кыкетӥяз мерлыко юрттэт сётонъя калык комиссариатэн кивалтон вакытысьтыз материалъёс пыртэмын.

Валентина Хазиахметовалэн верамезъя, нимо-дано ӵыжы-выжыезлэсь кылёсбурзэ эскерон уж азьланьтӥське. 

Тодэ вайытом, 1-тӥ шуркынмонэ Удмуртиысь Кузебай Герд нимо йӧскалык музейын «Иосиф Наговицын» адӟытон усьтӥськиз, со 2-тӥ толсурозь ужалоз.



Наверх
Вниз