Ижкар+24 °C
18 гудырикошкон 2019 Воскресенье
16+

Умой уж ачиз но пиштэ: Пичи Пурга ёросысь Куреггурт Выль ар тылъёсын ӝуатскиз

  • 5756
  • 0
Куреггурт / Удмуртия
Умой уж ачиз но пиштэ: Пичи Пурга ёросысь Куреггурт Выль ар тылъёсын ӝуатскиз
Туспуктэм: Руслан Нуриахметов

Выль ар азьын Пичи Пурга ёросысь Куреггурт бадӟым каръёс сямен чибориё тылъёсын пиштэ. 1-тӥ толсурысен гуртысь валтӥсь кызэз ӝуатэм бере юртъеръёсты чеберъян кутске. Котькуд семья ас мылкыдызъя корка бордаз яркыт гирляндаос ошылэ. Сыӵе сям гуртын 12 ар талэсь азьвыл кылдӥз, вераз ивортодэтъя «Удмуртия» агентстволы Куреггуртлэн тӧроез Олег Дыгаев.

Пичи Пурга ёросысь Куреггурт Выль ар азьын тылъёсын пиштыны кутске


Солэн кылъёсызъя, 12 ар талэсь азьло гуртысьтызы коркаез палэнысь воргорон басьтӥз но Выль арлы бакчаысьтыз лыстэм кыззэ гирляндаосын чеберъяз. Кӧня ке ар ортчыса, пиосмурт юртсэ вузаз, нош солэсь сямзэ Олег Дыгаев азьланьтӥз. 10 ар талэсь азьвыл гурт тӧро корка бордаз тылъёсын «Выль арен» кылъёс гожтӥз. Вань гурт калыкез чеберъян борды кыскыны эшшо 8 ар кулэ луиз на.

Тодӥськоды ук, калык консервативной, котьмалы нырысь пыкъяськозы, кышкасагес, та мар дауртэ шуыса учко. Ог 5 ар ортчыса, шуисько, тӥ ваньды кыстӥськоды, адямилэсь бере кылиськом шуыса кышкаса, асьтэос ошылыны кутскоды. Озьы ик луиз. Но мон кӧня ке янгышай, 8 ар со кыстӥськиз
Олег Дыгаев, Куреггуртлэн тӧроез

Кызьы шуэ Куреггуртын улӥсь Татьяна Егорова, ӝытазе коркаослэн яркыт пиштэмзы Выль арлэсь матэктэмзэ возьматэ. Калык шумпотыса юртъерзэ чеберъя. Куазь сётыку, тужгес мыло-кыдоосыз лымылэсь пӧртэм кабъёс лэсьто. Выль ар мылкыд кылдытон понна гирляндаосты ӝуатоно бере, валамон, котькудӥзлэн электротыл понна тыриськонэз будэ. Но лыдпус сокем бадӟым ӧвӧл, лыдъя Татьяна Егорова.

Мон ӧй шуысал, трос кошке шуыса, сыӵе шӧдскымон ӧвӧл, сокем вормонтэм ӧвӧл, дыр, кадь потэ. Гирляндаос тыро бере, быгато иське
Татьяна Егорова, Куреггуртын улӥсь

Олег Дыгаев верамъя, светодиод гирляндаос, ӟырдась лампаосын ӵошатыса, сокем трос дыкужым уг кыско. Озьы ик туала пиштӥсь арбериос тылпулэсь утиськон куронъёс ласянь но тупамонэсь.

Праздниклы Куреггуртэз чеберъязы

6 фото

Куреггуртлэн эшшо одӥгез Выль ар сямез – праздникез ӵошен пумитан. Арлы быдэ 31-тӥ толсуре егитъёс но, арлыдоос но пӧрмыса клубе пото. Мылысь-кыдысь та ужрадэ гуртысь «Азвесь нюжа» ансамбль пыриське. Китай дырпусъя вуоно арлэн тодметэз парсь бере, коллективын кырӟасьёс Татьяна Чернова, Антонида Тимофеева но Светлана Коровина туэ куинь парсьпиос дӥсяськыны малпало.

Арлы быдэ 31 числое милям ортче клубын бал-маскарад. Отчы котькудӥз 16 аресысен пересьмытозяз дӥсяськыса пото. Ми отчы шумпотыса потӥськом. Туэ но куиньнамы куинь парсьпи дӥсяськом но потом. Парсьпи кадесь ик асьмеос но
Татьяна Чернова, Куреггуртын улӥсь

Ӵапак бал-маскарадын гуртэз Выль арлы чеберъянлы йылпумъянъёс лэсьтозы. Ужрадын аспӧртэмлыко чеберъям юртъерез но тужгес трос пиштӥсь коркаосын урамез пусъёзы, шуэ Олег Дыгаев.

Тӧролэн кылъёсызъя, арысь аре гуртоос чеберъянзэс узырмыто, кылсярысь, вуоно арын, коркаосты сяна, гуртысь выжез но чибориё тылъёсын югдытыны чаклало.

Ватсалом, Выль ар тылъёс Куреггуртын Йӧ вылэ султонозь, 19-тӥ толшорозь, ӝуалозы. 

Наши партнеры

Наверх
Вниз