Ижкар-15 °C
28 -тӥ тулыспал 2021 Воскресенье
18+

2018-тӥ ар: Кузебай Гердлы 120 ар, Алабгоын удмуртъёслэн конференцизы но Удмурт кыллэн дунневыл нуналыз

  • 16835
  • 0
Ижевск / Удмуртия
2018-тӥ ар: Кузебай Гердлы 120 ар, Алабгоын удмуртъёслэн конференцизы но Удмурт кыллэн дунневыл нуналыз
Туспуктэм: ИА «Удмуртия»

Ортчись арлэн берпуметӥ нуналъёсаз матысь адямиослы кузьымъёс утчан, ӝӧк вылэ пуктоно сиён-юонъёс сярысь малпанъёс вискын котькудӥз малпаське, дыр, нош мар тунсыкоез, пусйымонэз вал соослэн улоназы 2018-тӥ арын. Ортчемез сярысь ум жалялэ, сое тодамы возем. Ивортодэтъя «Удмуртия» агентство Удмуртилэн но удмуртъёслэн улонысьтызы куд-ог ужрадъёсты толэзен-толэзен тодэ вайытэ. Соос пӧлын удмурт югдытӥсь Кузебай Герд вордскем дырысен 120 ар тырмонэз пусъён ужрадъёс, удмуртъёслэн нырысетӥ огъяросси ӧтчамзы дырысен 100 ар тырмонлы сӥзем улосвылкуспо конференци, нырысьсэ пусъем Удмурт кыллэн нуналыз но трос мукетыз.

Толшор

14-тӥ толшоре Удмуртиын гожъясез, йӧскалык азьветлӥсез, Удмурт автономия кылдытон понна нюръяськисез Кузебай Гердэз буре ваизы. Ижкарысь синпелетэз доры удмурт азьветлӥсьёс, политикъёс, дышетӥсьёс, пиналъёс люкаськизы. Удмурт калыклэн дано пиезлы сӥзем ужрадъёс элькунын быдэс ар ӵоже мынӥзы. 

Вавожын Кузебай Гердлэн юбилеезлы сӥзем флешмоб


Ижкарын «2017-тӥ арын удмурт кылын тужгес кужмоез чеберлыко литература уж» вожвылъяськон вормисьёсты пусйизы. Россилэн улосвылъёсысьтыз но кунгож сьӧрысь ог 100 пала ужъёс вуизы. Нимысьтыз ӧри куать номинациосъя 10 тужгес кужмооссэ бырйиз.

Куинь удмурт журналистъёс - Александр Бикузин, Мария Векшина но Владимир Михайлов - Эрик Батуев нимо йӧскалык премиез басьтӥзы

Толшор пумын Ижкарын бесерманъёс сярысь выль документальной фильмез возьматӥзы. «Нация» фильмен тодматскыны этнографъёс, историкъёс но асьсэос бесерманъёс лыктӥзы. Санкт-Петербургысь режиссёрлэн Юлия Мироновалэн кивалтэмез улсын съёмкаос Юкаменск ёросысь бесерман гуртъёсын мынӥзы.

Тулыспал

Тулыспалысен Ижкарысь Кузебай Герд нимо кун йӧскалык гимназиен кивалтыны кутскиз кылосбур тодосъя кандидат Татьяна Волкова. Удмуртиысь дышетонъя но тодосъя министерствоен ялэм конкурсын со куинь мукет вожвылъяськисьёсты азьпалтӥз

Удмуртиысь гурт возёсъя но сиён-юонъя министрлэсь ужзэ быдэсъясе 36 аресъем Ольга Абрамоваез юнматӥзы

Кыккылолыкъя «Билингва» удмурт центр ужзэ паськытатӥз. «Билингва. О практиках формирования двуязычия в современной городской среде» ӵектосэн Росси азьмуртлэн грантъёсъя фондысьтыз коньдон утыса, ужрадъёсы пӧртэм выжыысь анай-атайёсты ӧтьыны луонлык кылдӥз. Анай кылэз утьыны мылкыд вань ке, луонлыкъёс шедёзы, шуо анайёс

Удмуртиысь паралимпиец 23 аресъем Владислав Лекомцев биатлонъя Хрусталь глобусэз утӥз. Жаляса верано, нимо-дано спортсмен Кореяе Парамлимпи шудонъёсы мынон понна ӧтён ӧз басьты. Элькунысьтымы эшшо одӥгез дано спортсменмы – куасэн бызьылӥсь Максим Вылегжанин – озьы ик валтӥсь стартъёсы мынытэк кылиз. Калыккуспо олимпи комитет Пхёнчханын ортчись Олимпи шудонъёсы ӧз лэзьы.

«Удмуртиысь калыкъёслэн ассамблеязы» мер огазеяськонлы тӧрое Дышетонэз азинтонъя институтлэсь кивалтӥсьсэ, «Удмурт Кенеш» ассоциацилэсь вице-президентсэ Владимир Байметовез бырйизы.

Ижкарын нырысьсэ «Удмурт йӧ» фестиваль ортчиз. Йӧлэсь скульптураос лэсьтыны Россиысь но Белоруссиысь 15 команда вуиз. 

Иж тымет дурын йӧ скульптураосты кылдытон

3 фото

Пичи Пурга ёрослэн тӧроез Сергей Юрин луиз. Муниципал клыдытэтлы кивалтӥсез конкурс амалэн бырйизы. 

Удмуртъёс «Андроид» вылын ужась смартфонъёслы финн-угор вераськон кылбугор (разговорник) поттӥз. Отчы улонын тужгес ӵем кутӥськись 9 пӧртэм финн-угор кылъёс (пор, коми, удмурт, мадьяр, карел, эрзя, финн, вепс, коми-пермяк), озьы ик ӟуч но англи кылъёс пыртэмын. 

Вавожын «Герд лыдӟонъёс» элькун конференци ортчиз. Отчы Удмуртиысь 350 пала удмурт азьветлӥсьёс люкаськизы. Тодмо но егит тодосчиос, дышетӥсьёс но пиналъёс пӧртэм ӧръёсъя 11 ивортонъёсын тодматӥзы. Озьы ик ужрадын Кузебай Герд нимо йӧскалык премилэсь 2017-тӥ ар понна лауреатъёссэ данъязы

Ижкарын вордскем 15 аресъем Алина Загитова нылъёс пӧлын фигурной нискыланъя Олмипи чемпионка луиз. Пхёнчханын вакчи программаын улосчимы дунне рекорд пуктӥз. Солэсь азьвылгес командаос пӧлын фигурной нискыланъя вожвылъяськонын азвесь медаль утӥз

Пичи Пургаын XXIV Спортъя элькун тол гурт шудонъёс йылпумъяськизы. Ваньмызлэсь кужмо луэмзэс возьматӥзы Эгра ёросысь спортсменъёс. Нялтас вераса, Пичи Пургаын гурт шудонъёслы выль куас база пуктӥзы

Южтолэзь

Якшур-Бӧдья ёросысь Мукши гуртысь шоръёзо школаын улосчизэс, Удмуртиысь калык гожъясез, Россиысь лулчеберет удысысь дано ужасез Егор Загребинэз буре ваён пулэз сӥё-дано усьтӥзы.

18-тӥ южтолэзе Удмуртиын улӥсьёс Россилы азьмуртэз быръёнъёсы пыриськизы. Куара сётыны лыктэм муртъёс пӧлысь 76,23 процентэз (571 сюрс 600 адями) Владимир Путинлы дурбасьтӥз.

Удмурт Элькунлэн дано кунмуртэз, Росси кивалтэтлэн премиезлэн лауреатэз, Кузебай Герд нимо йӧскалык премилэн лауреатэз, Россиысь гожъясьёслэн огазеяськонзылэн ёзчиез, истори тодосъя доктор, профессор Владимир Владыкин 20-тӥ южтолэзе 75 арес тырмонзэ пусйиз. Удмурт калыклэсь дано пизэ котырес лыдпусэныз сӥё-дано ӟечкылазы «Удмурт Кенеш» огазеяськонлэн Пичи кенешаз.

Владыкин — со океан, тодонлыкен тырмытэм ярдуртэм океан. Преподавательёс трос, дышетӥсь одӥг. <…> Дышетӥсь луыны котькудӥз уг быгаты, нош таӵе дышетӥсез улонын пумитаны — со шуд
Алексей Загребин, истори тодосъя доктор, Кун Думаысь депутат

Кузебай Гердлэн кылбуръёсыз нырысьсэ чузъяськизы Ижкарысь троллейбусын. Кылбуретлэн дунневыл нуналаз ужрадэз Удмуртиысь Кузебай Герд нимо йӧскалык музей, Кузебай Герд нимо йӧскалык гимназия но «ИжГорЭлектроТранс» муниципал предприяти радъязы. 

Кузебай Гердлэсь кылбуръёссэ Ижысь троллейбусын лыдӟизы

10 фото

Улосвыллэн Кун Кенешаз Удмуртилэсь дано кунмуртсэ, элькунысь Вылӥ Кенешлэн 11-тӥ ӧтчамезлэсь тӧрозэ Валентин Калининэз данъязы. 22-тӥ южтолэзе солы 80 арес тырмиз.

Тӥлесьтыд адӟем карыны кулэ егит кивалтӥсьёс но, бадӟым кивалтӥсьёс но. <…> Тӥ кылдытӥды сыӵе инъет, кудӥз вылын ми туннэ но элькунэз азинтӥськомы
Ярослав Семёнов, Удмуртиысь кивалтэтлэн тӧроез

«Выжы-выжы-выжыкыл» IV нылпи элькун фестивальлэн йылпумъян люкетэз ортчиз. Удмуртиысь Калыкъёслэн эшъяськон юртазы Алнашысь, Пичи Пургаысь, Глазкарысь но Ижкарысь нылпи садъёсы ветлӥсь пиналъёс финн-угор калыкъёслэсь 8 выжыкылзэс возьматӥзы. 

2 сюрслэсь трос адями «Бадӟым удмурт диктантэз» нимысьтыз радъям интыосын гожтӥз. Удмуртиын 97 площадка ужаз, эшшо 24-ез — удмуртъёс тросэн улон улосвылъёсын: Татарстанын, Башкортостанын, Пермь шаерын, Марий Элын. Александр Шкляевен дасям текст понна 85 адями 100 балл басьтӥз.

Оштолэзь

4-тӥ оштолэзе, нырысетӥ удмурт нылкышно кылбурчилэн Ашальчи Окилэн 120-тӥ вордскем нуналаз, Гракын «Ашальчи лыдӟонъёс» ортчизы. Ужрад кылбурчилы сӥзем стела дорын кутскиз. Грак черкгуртэ Удмуртиысь но Татарстанысь ог 300 адями люкаськиз. Озьы ик ужрадын Ашальчи Оки нимо йӧскалык но ёрос премилэсь лауреатъёссэ пусйизы. Тодэ вайытом, элькун данъетэз туэ театроведлы Анна Евсеевалы но тодосчилы Галина Шушаковалы сётӥзы. Оштолэзе ик ляб адӟисьёслэн Ашальчи Окилэсь «Та буртчин чуръёсыд» бичетсэ лыдӟыны луонлыксы кылдӥз

Игорь Титовез Удмуртиысь тазалыкез утёнъя министре, нош Анастасия Муталенкоез улосвыл кивалтэтлэн тӧроезлы воштӥсе юнматӥзы. 

Лулчеберет удысын яркыт ужрад луиз егит кырӟасьлэн, эстрадая «Шулдыр ӝыт» ансамбльлэн лулчеберетъя кивалтӥсез Наталья Ушаковалэн «Яратон» шоуэз. «Бадӟым, яркыт шоу. Кемалась милям таӵеез ӧй вал», - веразы концерт бере учкисьёс. 

Ижкарын Удмурт лулчеберетъя юртлы выль юрт пуктозы. Со сярысь тодмо луиз 18-тӥ оштолэзе «Удмурт Кенеш» огазеяськонлэн исполкомезлэн ёзчиосыз но удмурт азьветлӥсьёс улосвыл тӧроен Александр Бречаловен пумиськонын. 

Удмуртиысь кун йӧскалык театрысь артистъёс — Роман Болтачев, Максим Григорьев, Вадим Дмитриев но Иван Плотников — сцена вылын фехтованиея «Азвесь шпага» («Азвесь шпага») IX калыккуспо фестивальын куинь данъет басьтӥзы. Пожвылъяськонын соос удмурт кылын номер возьматӥзы. https://udmurt.media/udm/news/kultura-i-turizm/35320/

Куартолэзь

3-тӥ куартолэзе Ижкарлэн тӧроез Юрий Тюрин отставкае кошкиз. Удмуртилэн шоркареныз со 2015-тӥ арысен кивалтӥз. 

Иван Ястреб Удмуртиысь лэсьтӥськонъя, жилищно-коммунальной возёсъя но дыкужымъя министре юнматӥзы

9-тӥ куартолэзе Удмуртиын «Быронтэм полк» («Бессмертный полк») акцие котькулэсь трос адями пыриськиз - 67 сюрс 600. Ивортодэтъя «Удмуртия» агентство Вормон парадысь но шествиысь меӵак возьматон нуиз. 

Вормон нунал но «Быронтэм полк» Ижкарын


Удмурт ИТ-ӧнерчиос покчи пиналъёслы удмурт кылэз дышетон понна «Чингыли» мультимедиа шудон кылдытӥзы. Отын куинь люкетэз: шудон; кылбуръёс, выжыкылъёс, мадиськонъёс; удмурт-ӟуч кыллюкам.

Пугачёво черкогурт вӧзын кӧс турын ӝуаны кутскиз. Азьвыл ожгар частьлэн интывылаз одӥг-ог снарядъёс пушытлӥзы. Ожгар городокын улӥсьёсты бускель гуртъёсы поттӥзы. 50 гектар пала музъем вылэ вӧлмем тылпуэз кысонэ самолёт но вертолёт пыриськизы.

Музейёслэн калыккуспо нуналзы азьын ивортодэтъя «Удмуртия» агентство элькунысь Кузебай Герд нимо йӧскалык музейысь таксидермистэн — пӧйшур сульдэръёс лэсьтӥсь ӧнерчиен — Сергей Евсеевен тодматскиз. Солэн мастерскояз ми адӟимы, кызьы лэсьтӥсько «Удмуртилэн инкуазез» адӟытоназ экспонатъёс но тодӥмы, кызьы та удыс тодослы юрттыны быгатэ. 

18-тӥ куартолэзе Татарстанысь Алабгоын удмуртъёслэн нырысетӥ ӧтчамзы дырысен 100 ар тырмонлы сӥзем улосвылкуспо конференци ортчиз. Отчы Удмуртиысь, Бигерысь, Башкириысь, Киров улосвылысь но Пермь шаерысь, Марий Элысь тодосчиос, азьветлӥсьёс, дышетӥсьёс но дышетскисьёс люкаськизы - ваньмыз 300 пала адями. Вераськон этнотуризмез, удмурт кыллы дышетонэз но удмурт движениез азинтон но мукет ужпумъёс сярысь мынӥз.

Мерлыко вотэсъёсты #Инстаудмурточки марафон тулкымъяськытӥз. 23-тӥ куартолэзе кутскем ужрадэ 250-лэсь трос нылъёс пыриськизы. Нылъёслэн туспуктэмъёссы пыр дуннеысь калыкез удмуртъёсын, Удмуртиен тодматон марафон борды итӥськизы Удмуртиысь, Татарстанысь, Башкортостанысь, Ямалысь, Екатеринбургысь, Москваысь, Рязаньысь, озьы ик Венгриысь, Австриысь, Ирландиысь, Германиысь, Болгариысь, Лымшор Азиысь нылъёс. 

Удмурт кун университетысь Удмурт кылосбуръя, финно-угроведения но журналистикая институтын кыкетӥ курсын дышетскись дышетскись Евгения Аркова «Мисс Студенчества Финно-Угрии - 2018» калыккуспо вожвылъяськонын вормиз. Нялтас вераса, азьвыл конкурсъёс вормисьлэн улосвылаз ортчытъясько вал, но туэ радъясьёс валатэтэ (положение) воштонъёс пыртӥзы, вожвылъяськон Россиысь котькуд финн-угор улосвылын мед радъяськоз шуыса валэктӥзы. Озьы вуоно арын со Ханты-Мансийскын ортчоз. 

Анастасия Шумилова «Ку» нимо кыкетӥ бичетэныз тодматӥз. Книгае ог кык ар ӵоже гожтэм кылбуръёсыз пыризы. Нялтас веарса, Анастасия Шумиловалэн но Богдан Анифногеновлэн кылбуръёссы Удмуртиысь туала кылбурчиослэн «Поэт Up» альманахсылэн нырысетӥ люкетаз пыризы. Бичетэ ваньмыз 10 егит авторъёс шедизы

Инвожо

Вотка карлэн выль тӧроез Алексей Заметаев луиз. Кар Думаысь депутатъёс куинь кандидатъёс пӧлысь солы дурбасьтэмзэс веразы. 

16-тӥ инвожое Удмуртиын тулыс бусы ужъёсты йылпумъянэз пусйизы Удмуртиын. Ува ёросысь Пекшур гурт вӧзысь возь вылэ элькун Гербере туэ 10 сюрслэсь трос адями вуиз.

Валтӥсез — со мылкыд, кудӥныз лыкто быдэс элькунысь но бускель улосвылъёсысь адямиос. Лыкто ӵошен шумпотыны, вераськыны. Котькуд ар выль кусыпъёс герӟасько, выль эшъёс кылдо. Со дыре ик та праздник дыръя ми валаськомы: трос дыр ортчыса но удмурт калык аслэсьтыз кылзэ, аслэсьтыз лулчеберетсэ утьыны быгатӥз, соосты дунъя, соосын данъяське но быдэс дуннелы возьматэ
Ярослав Семёнов, Удмуртиысь кивалтэтлэн тӧроез

Удмуртиын эктонъя «Мост» XV калыккуспо лагерь ортчиз. Отчы «Чебеляй» удмурт коллектив, Эстониысь «Каякас» ансамбль но Румыниысь «Сазлабу» мадьяр коллектив пыриськизы. Ӵектосэз быдэстыны коньдон Азьмуртлэн грантъёсъя фондысьтыз утӥзы.

Ижкарын эктонъя «Мост» калыккуспо лагерь ужа


Глаз ёросын ленд-артъя «Легенды ДондыДора» нырысетӥез фестиваль ортчиз. Быдэс Удмуртиысь 30 кибашлыос коръёслэсь но вайёслэсь16 кабъёс (фигураос) лэсьтӥзы. 

Удмуртиын куинетӥзэ Куиськонъя огъяросси школа ортчиз. Отчы асьме элькунысь сяна, Кировысь, Москваысь, Орёлысь, Астраханьысь, Тюменьысь, Тверьысь, Великий Новгородысь, Нижний Новгородысь, Владимир но Челябинск улосвылысь 40 адями люкаськиз. Ижкарын куиськонъя праздник ортчытыса, мукет нуналъёсаз Алнаш ёросысь «Варзи-Ятчи» санаторийын кибашлыос понна дышетон радъяськиз.

Пӧсьтолэзь

Удмурт кыл туж туала луэ шуыса возьматэ MORT нимын удмурт рэп кырӟась (Алексей Пикулев), со «Горинча» нимо выль альбомзэ поттӥз. Отчы 10 кырӟанъёсыз пыризы. 

Шуыны луоз, котькуд кырӟан мукет крезьгур жанръёслы но кельшись луыны турттэмын, но озьы ке но, одно ик со кыле рэп кырӟан удмурт кылын
MORT, рэп быдэстӥсь

Инвожое но пӧсьтолэзе тросэз Удмуртиын футболэн шудонъя дуннелэн чемпионатэныз улӥзы. Киров нимо паркын нимысьтыз пуктэм фан-зонае трансляциосты учкыны 200 сюрс адями вуылӥз. Нош Москваысь удмуртъёслэн бӧляксы Россиысь но быдэс дуннеысь футбол понна висисьёсты Удмуртиен тодматӥз. Оог кызё пала адями улосвыллэн куншетэныз, удмурт дӥсен Никольской ураме люкаськиз.

Удмуртилэн прокурорез Артём Николаев луиз

Можгалэн кар думаез карлы тӧрое Михаил Трофимовез бырйиз

4 сюрс пала адями финн-угор сиён-юонъя «Быг-Быг» фестивале вуылӥз. Соос пӧлын Карелиысь, Коми-Пермяк автоном округысь, Эстониысь, Венгриысь куноос. «Быг-Быг» улсын туэ нырысьсэ туала йӧскалык крезьгуръя фестиваль ортчиз. Отчы дасо пала коллективъёс но нимаз быдэстӥсьёс пыриськизы. 

Нырысьсэ Киясаын Спортъя элькун гужем гурт шудонъёс ортчизы. Ӵошатсконъёслы черкогуртын стадион но ФОК пуктӥзы. Ёросысь кибашлыос шудонъёсы пыриськись 25 командаослы но куноослы кузьым - шеп-пияш мунё - дасязы. Ӵошатсконъёслэн радлыказы триатлонэз выльысь пыртӥзы. Гурт шудонъёсын асьсэ группаосазы Дэри, Шаркан но Кияса ёросъёс вормизы

Ижкарын нырысьсэ Кубыз фестиваль ортчиз. Ужрадэз мадьяр этнографлэн, кубызчилэн, туспуктӥсьлэн, кылчилэн Миклош Дэметэрлэн «Кубызлэн шаераз» адӟытонэз усьтӥз. Фестиваль улсын Чудья Жени (Евгений Бикузин) кубызэн шудыны дышетӥсь книгаеныз тодматӥз. Фестивальлэн берпуметӥ нуналаз Казаньысь Удмуртие берпуметӥез вашкала сямъя шудӥсь кубызчи Михаил Романов ветлӥз.Киров нимо паркын бадӟым концерт ортчиз

Мыным потэ, та туж кулэлыко, бадӟым выль уж. <…> Та ваньмыз огазея но данэ ӝутэ удмурт калыклэсь кубыз крезьгурзэ. <…> Мыным потэ, та туж бадӟым кыӵе ке но пример возьматон, азьпалан таӵе тани ужрадъёсты синйылтыны но паськытгес карыны
Пётр Данилов, Удмуртиысь лулчеберетъя но туризмъя министрлэн воштӥсез

Юкаменск ёросысь Тылыс гурт Россиысь азинлыко улон интыос пӧлы шедиз. Со «Село 21 века» огъяросси вожвылъяськонын вормиз. Кунын нырысьсэ ортчем конкурсэ 33 улосвылъёсысь 114 ӵектос пыриськиз.

Ижкарысь эм академилэн ректорез Николай Стрелков интыужысьтыз кошкиз. Со дышетсконниен 24 арлэсь кема кивалтӥз.

Удмуртиысь но Белоруссиысь гурт предприятиос улосвылысь етӥн будэтон удысэз азинтонын валче ужан сярысь тупанкыл гожтӥзы

Оскисько, та тупанкыл – вузпӧрез паськытатон но асьме дорын лэсьтэмзэ вузан ласянь нырысетӥез вамыш
Александр Бречалов, Удмуртилэн тӧроез

Москваын ньылетӥез «Гербер» шулдыръяськон ортчиз, «Эрмитаж» садын радъям адӟытон-вузкаронэ, эктон-кырӟанъёсы, шудонъёсы, ӵошатсконъёсы 7 сюрс пала адями пыриськиз. Туэ ужрад «Удмуртия Заряжает» ӧтён улсын ортчиз. 

«Гербер – 2018» Москваын


Таяз арын нырысьсэ «Гербер» праздник Санкт-Петербургын ортчиз. «Озеро Долгое» паркын радъям ужрадэ 3 сюрс пала куноос вуизы. Люкаськемъёсты Удмуртиысь, Москваысь но Башкириысь творчествоя удмурт коллективъёс шулдыртӥзы, туж шуныт пумитазы «Брангуртысь песянайёсты». Озьы ик адӟытон-вузкарон, мастер-классъёс ортчытӥзы. 

Гудырикошкон

Можгаын 15-тӥ ползэ ни выль емышъёслы сӥзем «Выль» удмурт йӧскалык элькун праздник ортчиз. Сюги шур дуре пӧртэм ёросъёсысь куноос люкаськизы: кин бакча сиёнъёссэ, йӧлзэ-вӧйзэ, сӥльзэ но чечызэ вузаны, кин вожвылъяськонъёсы пыриськыны, кин выль кеньырлэсь вӧсям ӝук сиыны. 

«Выль» элькун шулдыръяськон Можгаын


Google компания аслаз GBoard клавиатураяз Россиысь 25 кылъёсты ватсаз, соос пӧлын удмуртсэ но. 

Удмуртиысь Сергей Пудов но Арслан Гильмутдинов асьсэ классазы суй-пыдзыя сӧсыр спортсменъёс пӧлын шоссеын велосипедэн ворттылонъя Дуннелэсь кубоксэ утӥзы.

Дэбес ёросысь Яг гуртын Геннадий Корепанов-Камскийлы буре ваён пул усьтӥзы. Удмурт крезьгурчилэн со гуртын 18 аресозяз улӥз. 

Удмуртиысь Суредан устолыкъя элькун музейын удмурт кылын экскурсиос нуыны кутскизы. Гудырикошконлы кык адӟытонъёссэс удмурт кылэ берыктӥзы. 

21-тӥ гудырикошконэ Можга ёросысь Уча черкогуртын элькунысь удмурт кылъя но литературая дышетӥсьёслэн форумзы ортчиз. Таӵе бадӟым пумиськон люканы муг луиз дышетон сярысь федерал катэ анай кылъёсты дышетон ласянь воштонъёс пыртэмен валче. Ужрадэ озьы ик пыриськизы школаослэн кивалтӥсьёссы, дышетонъя но тодосъя министерствоысь ӧнерчиос, Удмуртилэн Кун Кенешысьтыз но Россилэн Кун Думаысьтыз депутатъёс. 

Куддыръя дышиськом ини, таӵе ужрадъёсын кӧня ке бӧрдон калэ вуоно шуыса, весь ваньмыз урод шуыса. Татын котькуд докладчик туж умой анализ лэсьтӥз, вераз аслэсьтыз ужезлэсь, шуом, ляб интыоссэ, тужгес зол интыоссэ
Татьяна Ишматова, «Удмурт Кенеш» огазеяськонлэн тӧроез, Кун Кенешысь ялан ужась ӧрилэн кивалтӥсез

Пиналъёс пӧлын шашкиосъя Европалэн чемпионкаез Пичи Пурга ёросысь Ульяна Иванова ӟуч шашкиосъя дуннелэн чемпионкаез луиз

Глаз ёросысь Адам гуртысь «ДондыДор» паркын Вань удмурт воршудъёслэн ыстэм муртъёссылэн люкаськоназы Удмуртиысь, Бигерысь но Киров улосвылысь 40 воршудъёсысь адямиос вуизы.

Вить удмурт гожъясьёслэн - Алексей Ельцовлэн, Римма Игнатьевалэн, Ульфат Бадретдиновлэн, Владимир Михайловлэн но Лия Малыхлэн - ужъёссы Россиысь калыкъёслэн нылпи литературая антологиязы пыризы. Книга кунысь 201 авторлэсь 55 йӧскалык кылъёсын гожтэм но ӟуч кылэ берыктэм произведениоссэс огазеяз. 

Удмурт Элькунъя кунпуш ужъёсъя министерствоен кивалтӥсе Алексей Поповез юнматӥзы. Удмуртиысь промышленностья но вузкаронъя министр Виктор Лошкарёв луиз.

Кияса ёросысь Уддяди гуртын Нылкышноос пӧлын лэнд-артъя нырысетӥез «Кыз» элькун фестиваль ортчиз. Инкуазь материалъёслэсь кабъёс (фигураос) лэсьтон бордын Ижкарысь но Кияса ёросысь 11 кибашлыос тыршизы. 

Удмуртиысь, Башкириысь, Татарстанысь но Пермь улосвылысь 100 пала быгатӥсь удмурт пиналъёсты «Шундыкар» лагерьлэн 26-тӥ сменаез огазеяз. Нылъёс но пиос 10 ӧръёсъя выль тодон-валанъёс басьтӥзы. Нырысьсэ «Туспуктон» отряд ужаз. 

Шундыкар-2018


Куарусён

Удмуртиысь егитъёслэн «Шунды» огазеяськонзы удмурт нылпиос понна кык ӝӧквыл шудон поттӥз. Одӥгез 5-7 аресъем нылпиослы визьнодась шудон, кыкетӥез – 5-8 аресъем пиналъёслы кылъёсын шудон.

Удмуртиысь Калыкъёслэн эшъяськон юртсы 10 ар тырмонзэ пусйиз.

Туннэ нокинлы но, дыр, ӧвӧл валэктоно талэсь кулэзэ. Кӧня ужрадъёс тани татын нуисько! Зэмзэ но ас бордаз вань калыкъёсты бинялтэ, бурд улаз возе, шуыны быгатом. Та Эшъяськон юрт пыр но тупаса уло вань калыкъёс, азьланяз но озьы ик мед луоз
Николай Мусалимов, 1999-2001 аръёсы Удмуртиысь йӧскалык политикая министр

Удмуртилэн кунлыкезлы 100 ар тырмонэз пусъён ужрадъёсты пумысен кенешизы. Юбилей 2020-тӥ арын луоз, но сое пусъёнлы кутскон сётозы ни 2019-тӥ арын 4-тӥ шуркынмонэ Глазкарысь «Глазов-арена» йӧ дворецын, отын «#Удмуртия огазея!» («#Удмуртия объединяет!») театр шоу ортчоз. 

Удмурт йӧскалык театрын нырысьсэ моноспектакль возьматӥзы. Итальян драматурглэсь Алессандро Барикколэсь «1900-й. Легенда о пианисте» пьесазэ бырйиз но шудӥз егит артист Максим Григорьев. Спектакль театрлэн пичи залаз мынэ. 

Ижкарысь «Олимпиец» йӧ катокын Россиысь но Удмуртиысь дано тренерез Виктор Кузнецовез буре ваёнлы сӥзем следж-хоккеен шудонъя огъяросси ӵошатсконъёс ортчизы. Турнире кунысь ньыль команда пыриськиз. Йылпумъянъёсъя «Удмуртия» клуб куинетӥ инты басьтӥз. Та турнир арлы быдэ радъяськоз шуыса вераськизы.

Виктор Кузнецовез буре ваёнлы сӥзем следж-хоккеен шудонъя огъяросси турнир Ижкарын

8 фото

Алнаш ёросысь Асангуртын Трокай Борисовлы синпелетэз усьтӥзы

Ижкарын Удмуртилэсь кунлыксэ одӥгез кылдытӥсез, Вотской автономной улосвыллэсь нырысетӥ кивалтӥсьсэ Иосиф Наговицынэз буре ваизы. Удмурт азьветлӥсьлэн 130-тӥ вордскем нуналаз улосвыллэн шоркарысьтыз синпелетэз доры сяськаос понӥзы.

Адями, кудӥз улонэзлэн берпуметӥ нуналозяз аслэсьтыз осконъёсызлэсь ӧз куштӥськы, кудӥз вордскем шаерезлэсь кыдёкын вал ке но, берытскиз но удмурт калыклэн историяз, удмурт кунлыклэн историяз бадӟым, мур пытьы кельтӥз
Татьяна Ишматова, «Удмурт Кенеш» огазеяськонлэн тӧроез, Кун Кенешысь ялан ужась ӧрилэн кивалтӥсез

Коньывуон

8-тӥ коньывуонэ Ижкарысь Удмурт кун филармониын бесерман но удмурт кылбурчилэн Михаил Федотовлэн вордскем дырысеныз 60 ар тырмонлы сӥзем ӝыт ортчиз. Кылбурчиез буре вайыны солэн ӵыжы-выжыосыз, эшъёсыз но творчествозэ яратӥсьёс лыктӥзы. «Удмуртия» издательство Федотовлэн ужъёсыныз «Берытскыны дыры вуоз» бичет поттӥз. Отчы азьвыл потэм ньыль книгаосысьтыз калыклы тужгес кельшем кылбуръёсыз пыризы. 

Кылосбур но йӧскалык дышетон удыслы сӥзем IV калыккуспо конференцие Ижкаре Удмуртиысь, Москваысь, Татарстанысь, Башкириысь, Марий Элысь, Пермь шаерысь, Венгриысь, Финляндиысь, Эстониысь, Испаниысь но Германиысь 300 пала дышетӥсьёс, тодосчиос, дышетон но тодос удысысь ӧнерчиос люкаськизы. Ужрадэз кылчиослэн Иван Таракановлэн но Геннадий Ушаковлэн котырес лыдпуссылы сӥзизы. 

Вавож ёросысь Тыловыл черкогуртлэн школаяз Удмурт АССР-лэн но РСФСР-лэн дано артисткаезлы, Удмурт АССР-лэн калык артисткаезлы Нина Бакишевалы буре ваён пул усьтӥзы.

Ижкарлэн тӧроез луиз Глазкарлэн азьвыл кивалтӥсез 50 аресъем Олег Бекмеметьев. Удмуртилэн шоркарезлэсь тӧрозэ нырысьсэ конкурс амалэн бырйизы

Удмуртиысь кивалтэтлэн тӧроез Ярослав Семёнов «Дорога 2018» калыккуспо адӟытонлэн пленарной кенешоназ элькунын та удысъя быдэстэм ужъёслы йылпумъянъёс лэсьтӥз. 2018-тӥ арын улосвылын 198 иськемлэсь ятыр автомобиль сюресъёсты тупатӥзы

Ижкарысь гурт возёсъя кун академи 75 ар тырмонзэ пусйиз. Та дыре отын очной но заочной амалэн ог 6 сюрс 500 адями дышетске. Арлы быдэ дышетсконнисысь 1700 егит ӧнерчиос пото,

Шуркынмон

Ижкарын «Гудыри» газетлэн но Иосиф Наговицынлэн котырес лыдпуссылы сӥзем огъяросси конференци ортчиз. Ужрадын улосвылысь иворъёсты вӧлмытӥсь йӧскалык ёзэсъёслэн кунын воштӥськонъёс вакытэ интызы сярысь вераськизы. Озьы ик ми журналистъёсты дасян ужпумъёсын, иворъёсты вӧлмытон удысын ужасьёслэн удмурт кылэз кутэмзы сярысь тунсыкъяськимы.

2-тӥ гудырикошконэ Россиысь ваньмаз улосвылъёсын Удмуртиен кичӧлтэм «Бадӟым этнографи диктант» калыккуспо ужрад ортчиз. Нимысьтыз дасям интыосы 300 сюрслэсь трос адями вуиз. Элькунамы 222 площадкаосы 10 сюрслэсь трос адями лыктӥз. Вань юанъёслы шонер валэктонъёс сётыса, 100 балл басьтыны луэ вал. Удмуртиын шоро-куспо балл 55,12 луиз

Удмурт Элькунлэн вордӥськем нуналаз, 4-тӥ шуркынмонэ, удмурт кырӟанъя «Элькуновидение-2018» вожвылъяськонлэн йылпумъян люкетэз ортчиз. Полуфиналысь но финалысь баллъёсты ватсаса, конкурсын «Мон удмурт» кырӟанэн Дэбес ёросысь Артемий Гаврилов вормиз

«Удмурт Кенешлэн» Пичи кенешаз огазеяськонлэн Данъян книгаяз пыртэм муртъёсты сӥлы каризы. Отын ик Трокай Борисов нимо йӧскалык премиез сётӥзы. Сое Дэри ёрос администрацилэн тӧроезлэн воштӥсез – Гуртэз азинтонъя но гурт возёсъя управленилэн кивалтӥсез, экономика тодосъя кандидат Валериан Никитин басьтӥз. Пусйыны кулэ, та мерлыко данъетэз сётъянын кӧня ке ар вис вал.

Удмуртиын нырысьсэ Юрий Перевозчиков нимо визьбур вожвылъяськон (троеборье) ортчиз. Удмурт кылъя, экономикая но обществознания тодон-валанъёссэс эскерыны элькунлэн пӧртэм ёросъёсысьтыз 90 пиналъёс вуизы. Тужгес трос балл люкам 33 нылъёс но пиос дипломъёс но кузьымъёс басьтӥзы

12-тӥ толсуре Ижкарын Кыкетӥ Калыккуспо Парадельфи шудонъёс усьтӥськизы. Россиысь но 21 кунъёсысь 1500 пыриськисьёс яратон, эшъяськон, шаер, инкуазь, шуд но малпанъёс сярысь 300-лэсь трос произведениосты быдэстӥзы, музейёсын но адӟытонъёсъя центръёсын 500-лэсь трос суредъёсты но чеберлыко киужъёсты возьматӥзы

Дэри ёросысь Лудорвай школалэн кивалтӥсез но удмурт кылъя но литературая дышетӥсь Надежда Мерзлякова «Анай кылъя, со пӧлын ӟуч кылъя, дышетӥсьёслэн огъяросси мастер-класссы» конкурсын «Учитель-мастер» номинациын вормиз

Ижкарын «Лица России. XXI век» книга-альбомен тодматон ортчиз. Та бичетэ быдэс Россиысь ужан удысазы но мер улонын азинлыко пӧртэм йӧслыко 40 егитъёс пыризы. Соос пӧлын Удмуртиысь кылбурчи но кырӟась Богдан Анфиногенов но бесерман крезьёсты быдэсъясь Мария Корепанова. 

Удмурт егитъёслэн «Шунды» огазеяськонзылы тӧрое нош ик Алина Черноваез бырйизы

Ижкарысь Калыкъёслэн эшъяськон юртазы «Пичи Чеберайёс но Батыръёс» VII элькун нылпи фестивальлэн йылпумъян люкетэз ортчиз. Данъян ужрадэ ёрос люкетын вормем пиналъёс люкаськизы.

27-тӥ шуркынмонэ нырысьсэ Удмурт кыллэсь дунневыл нуналзэ пусйимы. Удмуртиын сяна, пӧртэм ужрадъёс Россиысь каръёсын, озьы ик кунгож сьӧрын ортчизы. 

Асьмеос ведь туж пӧртэмесь, учке ай, движениын но. Даже Инмарлы но пӧртэм оскиськом, улон шоры пӧртэм учкиськом. Вот удмурт кылэз гажан милемды мед огазеялоз
Татьяна Ишматова, «Удмурт Кенеш» огазеяськонлэн тӧроез, Удмуртиысь Кун Кенешлэн депутатэз

Толсур

Одӥг чурен тодамы ваёмы толсур понна но иворъёсты: Удмуртлыкез азинтон но вӧлмытон понна выль мер огазеяськон кылдыто Удмуртиын, Йӧскалык театрын «Васьлей» нимын туж меӵак спектакль пуктӥзы, Ижкарын Егитъёс пӧлын следж-хоккеен шудонъя М. Т. Калашниковлэн кубокез понна нырысетӥ калыккуспо ӵошатсконъёс ортчизы – «Удуртия» клуб кыкетӥ инты басьтӥз, Калык творчествоя элькун юртын быдэс ар ӵоже кыстӥськем «Даур гур» фестиваль-вожвылъяськонын вормисьёсты пусйизы, «Удмурт нылкышно кенеш» огазеяськон 25 ар тырмонэзлы сӥзем форум ортчытӥз, ужрадэ Башкириысь но удмурт нылкышноос пыриськизы.

Удмуртиын жуг-жагез поттон понна дунъёсты юнматӥзы, Кык выль книгаосын тодматон ортчиз - Мария Векшиналэн «Оӵ/ӧч кар» но Валерий Мусалимовлэн элькунысь куасэн бызьылон спортлэн историезлы сӥзем книгаеныз. Биатлонъя Демидов нимо огъетын «Ижевская винтовка» ӵошатсконъёс кутскизы, Оксана Бисар удмурт кылбурчиос пӧлын «КЫЛбурд» нырысетӥ слэмын вормиз. Эшшо ми чибориё тылъёсын пиштӥсь гуртэ вуылӥмы - Пичи Пурга ёросысь Куреггуртын улӥсьёс ваньмыз сямен юртъеръёссэс гирляндаосын чеберъяло. Адӟем карымон сям!

Пичи Пурга ёросысь Куреггурт Выль ар азьын тылъёсын пиштыны кутске




Наверх
Вниз