Ижкар-13 °C
23 -тӥ толшор 2021 Кӧснунал
18+

Котькудӥзлэн аслаз, но ваньмызлэн одӥг сярысь: Удмуртиын улӥсь пӧртэм выжыысь адямиослэн анай кылзы сярысь малпанъёссы

  • 17180
  • 0
Ижкар / Удмуртия
Котькудӥзлэн аслаз, но ваньмызлэн одӥг сярысь: Удмуртиын улӥсь пӧртэм выжыысь адямиослэн анай кылзы сярысь малпанъёссы
Туспуктэм: Григорий Фомин

Кылъёслэсь но лулчеберетъёслэсь пӧртэмлыксэс утён вылысь котькуд ар 21-тӥ тулыспалэ быдэс дуннеын Анай кыллэсь калыккуспо нуналзэ пусъё. Со ЮНЕСКО-лэн валтӥсь конференциезлэн ӧтчамаз 1999-тӥ арын ялэмын. Собере сыӵе пумкылъянлы ООН-лэн валтӥсь ассамблеяез дурбасьтӥз.

Музъем вылын 3-7 сюрс пӧртэм кылъёс лыдъясько. Соос пӧлын дунневыл кылъёс – ӟуч, англи, француз, немец, испан. Вань кун яке нимлыко кылъёс: Швециын - швед, Польшаын – поляк, Казахстанын - казах но мукет. Нош тросэзлэн нокыӵе нимлыко «интызы» ӧвӧл, но соосын нуналмысь верасько. Одӥгеныз - 100 адями, мукетыныз - 10 сюрс, куинетӥеныз – 100 сюрс…

Анай кыллэн нуналаз ивортодэтъя «Удмуртия» агентство Удмуртиын улӥсь пӧртэм выжыысь адямиослэсь юаз: мар соос понна анай кылзы но макем ӵем куто сое улонын? Валэктонъёс сётӥзы элькунысь йӧскалык политикая министр Лариса Буранова, Печатья но калыке ивортодэт вӧлмытонъя агентстволэн кивалтӥсезлэсь ужзэ быдэсъясь Приск Мгои но «Татар кызы-2018» калыккуспо вожвылъяськонын вормись Диляра Гильмутдинова.

Лариса Буранова

Удмурт кыл – со мынам песяйёсы, со мынам папалэн но мамалэн улонзы, со мынам выжыосы, сотэк мон ӧй луысал, дыр, дунне вылын.

Удмурт кылын мон уж дурын но вераськисько ӵем дыръя, нош семьяын ми удмурт кылын вераськиськом мамаен, папаен.

Соглаш-а, ӧвӧл-а удмурт кыл – со дорын гинэ вераськон кыл шуыса?

Туннэ мон озьы ӧй верасал ни. 20 ар талэсь азьлогес со озьы ик вал: кухняын пукон кыл со вал. Уката ик Ижкарын нокытын но – ульчаын, транспортын – уг кылӥськы вал удмурт кылэз, уг чузъяськы вал со. Нош табере мукетгес югдур. Со, конешно, ӟуч кыл кадь ик эшшо улонэ пыӵамын ӧвӧл, но мон соин шумпотӥсько: туннэ удмурт кылын шудо, удмурт кылын пӧртэм ужрадъёс ортчыто. Али (27-тӥ шуркынмонэ – ред.) Удмурт кыллэн нуналыз вал ке, Кун Кенешын котькуд депутат со нуналэ ӟечъяськиз, вазиськиз кык кылын – нырысь удмурт кылын, собере быдэс вераськонзэ ӟуч кылын. Мыным туж кельше со.

Азьвыл кытын ке Ижкарын удмурт кыл чузъяське ке, туж паймыса учко вал со адями шоры. Кытысь ке космосысь вуэм кадь! Али тодам вайисько: кинэн ке трамвайын мынӥськом вал, со пуке вал, мон сылӥсько со вӧзын но вераськиськом удмурт кылын. Со потӥз вазьгес, мон пукси но мынӥсько. Мон вӧзын пиосмурт сылэ вал, со вазиськиз: «А вы на каком это языке разговаривали?». Мон шуисько: «Удмурт кылын». «Удмуртский язык так звучит?», - юа со. Сыӵе тунсыко мыным потӥз. Солэн вал со нырысетӥ учыр, ку со радио, телевизор пыр ӧвӧл, огшоры ульчаын кылӥз улэп удмурт кыл кызьы кылӥське, чузъяське. Одӥг пол юазы, француз кылын-а вераськиськоды шуыса. Али озьы ӧвӧл.

Мон туж шумпотӥсько: егитъёс али удмурт кылын, удмурт сямъёсын, удмурт орнаментэн, удмурт дӥськутъёсын выро, кыӵе ке но проектъёс лэсьто. Али туж нормально, ку Шор площадьын асьме шоркарын удмурт кылын кырӟан кырӟало: яке «Сайлентъёс» кыӵе ке но рок-фестивальын, яке эшшо кин ке. Мон малпасько, ми туж шонер мынӥськом.

Приск Мгои.jpg

Мар адями понна анай? Со ик - анай кыл. Асьмеос шуиськом анайлэн кылэз. Адями яратэ ке аслэсьтыз анайзэ, со аслэсьтыз вордскем кылзэ но яратыны кулэ. Анай кыл ке ӧз луы, калык но каллен быроз, дыр. Кыл – котькуд калыклэн визитной карточкаез. Ӧвӧл кыл – ӧвӧл лулчеберет, ӧвӧл история, ӧвӧл литература.

Адями кӧня кылэз тодэ, сокем узырен ассэ лыдъяны быгатэ. Мон кӧня ке кылъёсты тодӥсько: умой тодӥсько вордскем курд кылме, вылӥ дышетскеме армян кылын, 25 арлэсь кема ни Россиын улӥсько, татын ужасько но ӵукнаысен ӝытозь эшъёсыным ӟуч кылын вераськисько.

Дорын ми котьку сямен анай кылын вераськыны тыршиськомы. Но пиналъёсын, куке соос школае ветлӥзы, тросгес ӟуч сямен вераськылӥмы, дорысь ужез ӟуч кылын лэсьтылӥмы. Но ваньмон дыръя нырысетӥ интыын - анай кыл. Куддыр серем но луылэ вал: нылпиос медаз валалэ шуыса, соос татын Дэриысь школае мынӥзы, кышноеным курд кылысь армян кылэ выжыса вераськылӥмы, но соос валало ни вылэм!

Мар тужгес валтӥсез: мон кӧня улӥсько ни Удмуртиын, ноку ӧй кепыралля анай кылыным вераськыны. Нокин но монэ ӧз но пыкылы. Адями анай кылыныз вераськыны возьдаське ке, мон малпаськыны кутскисько: адями анай кылзэ уг гажа, кызьы сое калык гажалоз, макем чылкыт мылкыдыз луоз солэн монэн вераськыкуз. Транспортын, урамын анай кылын вераськисьёсты кылӥсько ке, туж шумпотӥсько.

Тани асьмелэн «Удмурт-ӟуч кыллюкам» вань, отын 50 сюрс кылъёс! «Космос» выллем кылъёсты куштыса но, 40 сюрс пала кылёз, дыр. Удмурт кыл – со туж узыр кыл. Мон курд кылэ дуннеысь классикъёслэсь кылбуръёссэс берыктылӥ, озьы ик удмуртъёслэсь - Ашальчи Окилэсь, Кузебай Гердлэсь, Флор Васильевлэсь. Удмурт кылбурчиос лулпушсыя, куректонзыя мыным туж матын луо.

Диляра Гильмутдинова.jpg

Мынам нырысетӥ кылъёсы вал бигер кылын, бигер кыл мон дуннеез тодыны кутски. Бигер кыл – со мон понна семьяе, матысь адямиосы, мынам выжыосы, мынам виры.

Семьяын, эшъёсыным мон бигер кылын вераськисько. Али мон Удмуртиын улӥсько (Диляра Татарстанын вордскиз – ред.), паймымон, но татын но бигеръёс туж трос вылэм. Зэмзэ вераса, мыным туж кельше, Ижкарын трос калыкъёс но кылъёс вань шуыса. Туж тунсыко урамын удмурт кылэз кылзӥськыны. Ижкарын удмурт кыл паськытгес мед кутӥськоз вылэм, кылсярысь, мер транспортын дугдылонниосты удмурт кылын мед верасалзы. Асьмеос трос йӧслыко кунын улӥськомы шуыса данъяськыны кулэ! 



Наверх
Вниз