Ижкар+1 °C
7 толсур 2019 Кӧснунал
16+

Куинь диплом басьтӥз «Удмуртия» книгапоттонни огъяросси вожвылъяськонъёсын

  • 4476
  • 0
Ижкар / Удмуртия
Куинь диплом басьтӥз «Удмуртия» книгапоттонни огъяросси вожвылъяськонъёсын
Туспуктэм: Майя Бывальцева

«Удмуртия» издательство книга поттӥсьёслэн кык огъяросси вожвылъяськонъёсазы куинь диплом утӥз. Со сяна, эшшо кык таукаронъёс басьтӥз. Вормисьёсты пусъён Москваын «Горд площадь» («Красная площадь») V книга фестиваль улсын ортчиз. Кыӵе книгаоссэс но кинэ таяз радэ пусйизы но фестивале пыриськемзы сярысь журналистъёслы издательстволэн кивалтӥсез Юрий Кузнецов но валтӥсь редакторез Георгий Грязев веразы.

Лушкемлык шарае потыны юрттӥз

Россиысь книга поттӥсьёслэн тужгес бадӟымез вожвылъяськонзы – «Арлэн устоез книгаез», сое Россиысь книга поттӥсьёслэн ассоциацизы ортчытэ. 2018-тӥ ар понна «Лучшее издание, вносящее вклад в диалог культур» номинациын «Удмурты: тайна тамги» книгаез пусйизы.

Со вожвылъяськон улсын ик Россиысь Йӧскалык ужпумъёсъя федерал агентство «Удмуртия» издательстволы «Музей-заповедник «Лудорвай» книгаез понна Таукарон гожтэт сётӥз.

Россиысь Печатья но калыке ивортодэт вӧлмытонъя агентство Улосвыл но шаертодон литературая «Малая Родина» конкурсаз «Многонациональная Россия» номинациын «Удмурты: тайна тамги» книга понна издательстволы диплом сётӥз. Нимаз диплом книгалэн авторез Георгий Грязев басьтӥз.

«Удмуртия» книгапоттониысь дизайнерлэсь Валентин Семёновлэсь вылӥ быгатонлыксэ Агентство Таукаронэн пусйиз.

2018-тӥ ар понна утэм данъетъёс
2018-тӥ ар понна утэм данъетъёс Фото: Майя Бывальцева © udmurt.media

Издательствоысь кивалтӥсьёс верамъя, огдыре тамында данъетъёс соос ӧз на басьтылэ вал.

Пусйымон, кыказ ик вожвылъяськонын дунъясьёс одӥг книгаез бырйизы.

Маин со висъяськиз мукетъёсызлэсь? Нырысь ик, нимыз: а мар со сыӵе тамга шуыса юаны лыкто, тайна эшшо, мар отын сыӵе мифическоез маиз ке но пуштросэз вань шуыса. <…> Собере мар мукет издательствоослэсь кыӵе ке но висъетмы вал? Асьмелэн ик автормы но, асьме дорын ик ужа, то есть со книгаез асьмеос ик ми лэсьтӥмы - «Удмуртия» издательство. Соин ик кык диплом басьтӥм одӥг номинациын: как автор и как издательство. Сыӵеосыз быдэс Россиын нокин ӧй вал ни
Юрий Кузнецов, «Удмуртия» книгапоттоннилэн кивалтӥсез

Озьы ик ас кужыменызы но «Лудорвай» музейын ужасьёс юрттэмен «Музей-заповедник «Лудорвай» книгазэс поттӥзы.

Али издательствоямы сыӵе, дыр, коллектив люкаськемын, кудӥзлэн аръёс ӵоже люкаськиз ни сыӵе быгатонлыкез, лыдӟисьёсын кусыпъёсыз, куке быгатӥськомы ини ӟеч книгаосты поттыны асьме лыдӟисьёслы, соос мед шумпотозы шуыса, соос мед данъяськозы шуыса асьсэ адямиосынызы. Тани милям редакторъёсмы но, видимо, сыӵе люкаськемын, корректоръёс но, художникъёс но, дизайнеръёс но, и тӥни со куке огазе ваньмыз люкаське, со вулкан кадь улӟе но потэ кыре
Георгий Грязев, «Удмуртия» издательстволэн валтӥсь редакторез

Валентин Юрьевич Семёновмылэсь быгатыса ужамзэ адӟизы. Ми Валентинмы понна туж но туж шумпотӥськом, малы ке шуоно со издательствоын ужаны кутскемез бере, милям книгаосмы зэмзэ но лыдӟисьлы матын луизы. Нылпиослы-а ми дасяськом, бадӟым агай-апайёслы-а ми дасяськом, книгаосмес котькыӵе ярмаркае, котькыӵе конкурсэ нуллыны возьыт ӧвӧл
Юрий Кузнецов, «Удмуртия» книгапоттоннилэн кивалтӥсез

Вожвылъяськонъёсы быдэс Россиысь кӧня ке сюрс книгаос вуо. Коньдон ласянь но, ужасьёслэн лыдзыя но бускель Татарстанысь яке Башкортостанысь издательствоослэн мында луонлыкъёсмы ӧвӧл ке но, «Удмуртия» книгапоттоннилэсь ужъёссэ синйылтытэк уг кельто ни, пусъе Юрий Кузнецов.

Милемыз, удмуртъёсты, адӟыны кутскизы. Со туж шумпотымон. Авторитет бордын ужам кадь ини, мон шуисько, таре авторитет но ми вылэ мед ужалоз ни каньылля, малы ке шуоно сотэк уг луы. Шуак-дуак книгадэ, оло, уз но адӟе мукетъёсыз пӧлын. Тани Книгоиздательёслэн ассоциацизылэн офисаз <…> коридоръёсын но, кабинетъёсын но со конкурсэ вуэм книгаос гурезь ӝужда. Но… «Удмурты: тайна тамги» книгаез мон адӟи, вице-президентмылэн ӝажы вылаз тань тазьы сылэ. О! тань та коридорын уг ке костаськы, Олег Василичмылэн сюлмаз бинялтӥськем ук шуыса, сюлэм ик нясь-нясь луиз
Юрий Кузнецов, «Удмуртия» книгапоттоннилэн кивалтӥсез

«Азьло аръёсы но «Удмуртия» издательство малы син шоразы йӧтэ вал? Милям вылӥын, пе, культура, кызьы сётӥськом со суредъёсты ик, со книгаез ик пуштроссэ: ваньмыз интыяз. Со чебер, со гольтрес но ӧвӧл, со законъёсты но тӥямын ӧвӧл, и кызьы туала лыдӟисьлы кулэ, озьы сётэмын», – ватсаз Георгий Грязев. 

Кызьы «Удмуртия» фестивалез «ӝуатӥз»

«Удмуртия» туэ 100 ар тырмонзэ пусъе. Соин валче фестивальлэн нырысетӥ нуналаз, 1-тӥ инвожое, книгапоттонниен нимысьтыз тодматон ортчиз (со сяна, Татарстанысь но Башкортостанысь издательствоослэн, соослы озьы ик 100 ар тырме). Ужрадэз чебертӥзы но вунонтэм карыны юрттӥзы Кияса ёросысь Вуж Салья гуртысь «Тайвади» но «Усточи» фольклор коллективъёс, кырӟась Олеся Полатова.

Москваысь кузёос туж но туж милемыз ушъязы, малы ке шуоно тӥ, пе, сётӥды тылгизьы быдэс фестивальлы, тӥ кутскон сётӥды, соин ик фестивальмы но туж шулдыр, йӧскалык шӧмо ортчиз
Юрий Кузнецов, «Удмуртия» книгапоттоннилэн кивалтӥсез

Книга фестивальын Татьяна Голиковаен
Книга фестивальын Росси кивалтэтлэн тӧроезлэн воштӥсеныз Татьяна Голиковаен Фото: vk.com (Удмуртия Книжное-Издательсвто © http://udgiz.ru/

Вуоно арын фестивальын нимаз книгаен тодматон ортчытыны малпало. Москваысь удмуртъёслэн бӧляксы нош ик юрттыны пумит уз луы шуыса оско.

Табере милям туж бадӟым вань мылкыдмы: вуоно аре одно ик нимысьтыз книгалы презентация ортчытыны. Ӵапак таӵе книга али дасяськомы ни, 99 процентлы со дась, нимаськоз со «Секреты удмуртских мастеров» шуыса. Отын копак удмурт калык искусство люкамын: кызьы, шуом, корка ӵыпон бордысен, озьы ик куиськон, пужыятӥськонэн бырыса. Соин ик, малпасько, тань та книга люкырак калыкез люканы быгатоз шуыса
Юрий Кузнецов, «Удмуртия» книгапоттоннилэн кивалтӥсез

Удмуртиысь издательство фестивале ог 60 пӧртэм книгаоссэ возьматыны но вузаны нуиз. Георгий Грязевлэн верамезъя, берен туж ӧжытэз берытскиз. Туж мыло-кыдо басьтӥзы удмурт кылын книгаосты но. Валтӥсь редактор Китайысь нылашен суро-пожо кылын вераськыса ог-огзэс валаны тыршемзэс, собере коньдон пумысен споръяськемзэс тодаз вайиз. Шундыӝужан палась кунысь куно удмурт дӥськутлы сӥзем книгалы синмаськем, нош манетъёсыз ӧвӧлэн я доллар, я евро ӵектэ, пе. Пумитъяськыса но, мар но евроен ик басьтӥллям ни. Табере книгаосмес кунсьӧр валютаен вузаны потӥм, серекъяло издательствоысь кивалтӥсьёс.

Сомында вузаммы ӧй вал на. Кошкиз Америкае но, кошкиз Китае но, Аргентинае но, Россиез уг вераськы ни. Даже удмурт кылынъёссэ но басьто Москваын но улӥсьёс, кунгож сьӧрын но улӥсьёс. <…> Соку ик кошкизы самоучительёс, словарьёс удмурт кылын. Нырысетӥ нуналаз ик быриз «Мифы, легенды и сказки удмуртского народа», кудӥз али выль издание потӥз. Озьы ик туж умой кошкизы мукет выжыкылъёсмы. Юало на кухня сярысь, юало на дӥськутъёс сярысь, удмурт калык сярысь. Озьы бере, вань милемлы мар бордын ужаны
Георгий Грязев, «Удмуртия» издательстволэн валтӥсь редакторез


Вуоноезлы малпанъёс сярысь

Юрий Кузнецовлэн верамезъя, туж тунсыко ӵектон вуиз Россиысь калыкъёслэн ассоциацизылэн тӧроезлэсь Светлана Смирновалэсь: дасяны куинь кылын книга.

«Удмуртские народные мифы и легенды» берыктыны англи кылэ. И со книга луыны кулэ удмурт, ӟуч, англи кылъёсын. Ми со куронлы туж шумпотӥськом, малы ке шуоно асьмеос собыдӟа ужрадэз коньдон ласянь ми ӧм вормысалмы, дыр. Соин ик, малпасько, вуоно аре тань та книга но шулдыртоз, дыр, «Горд площадез»
Юрий Кузнецов, «Удмуртия» книгапоттоннилэн кивалтӥсез

Солэн верамезъя, туала вакытэ книгаосты англи кылын поттонлы бадӟымгес саклык висъяны кулэ, угось удмуртъёсын тунсыкъяськон озьы-а, тазьы-а быдэс дуннеын вань. Но азьланяз эшшо китай кыл сярысь но малпаськыны кулэ, оло.

Англи кылын аннотированной ке но изданиос ӵемгес но ӵемгес поттано, малы ке шуоно асьмеос, удмуртъёс, <…> мукет калыкъёслы но тунсыко. <…> Но тани туэ мон синйылтӥ: тросаз стендъёсын, кылсярысь, «скидки на всё 30 процентов» ӟуч кылын ке гожтэмын, улаз ик китай иероглифен но со ик озьы ик гожтэмын. Горд площадьын ӝыныез али ветлӥсьёс, туристъёс, Китайысь лыктэмын. Сое азьланяз милемлы но сьӧд мыйыке-а, горд мыйыке-а, кытчы ке но бинялтытэк ӧвӧл
Юрий Кузнецов, «Удмуртия» книгапоттоннилэн кивалтӥсез

Озьы ик Юрий Кузнецовлэн пичи, кисые тэрымон кадь, книгаос борды басьтӥськыны мылкыдыз вань. Ас вакытаз «Удмуртская народная одежда» книгаез бадӟым (ӟуч, англи но удмурт кылъёсын) но пичи (ӟуч кылын) форматэн поттӥзы вал. Издательстволэн кивалтӥсез верамъя, вузкаронысь нырысь ик пичиез «тӧлӟиз».

Эшшо одӥг лемлет малпанэз – удмурт калык чеберъяськонъёсын альбом поттыны. Татын Удмуртиысь Йӧскалык музеен одӥг кыл шедьтыны оске, угось бичет соос понна но пайдаё луыны быгатоз – арбериосты «улэпкын» адӟыны мылкыд карисьёс музее тросгес вуозы. Ӵошен ужан опытсы вань ни, удмурт калык дӥськутлы но пужыятсконлы сӥзем книгаос поттӥзы ни вал.

Юрий Кузнецов но Георгий Грязев малпанъёсын пачылмемын
Юрий Кузнецов но Георгий Грязев азьланезлы малпанъёсын пачылмемын Фото: Майя Бывальцева © udmurt.media

Юрий Кузнецов эшшо одӥг выль ужзы пумысь ялон лэсьтӥз: туэ ар пумозь кык томъем антология потоз - туала удмурт проза но туала удмурт поэзия. Со сяна, удмурт сиён-юонъёсын книга вуыны кулэ. Та выллем бичетъёслэсь со аспӧртэм туспуктэмъёсын висъяськоз. 

«Ми сьӧрын удмурт кыллэн азинсконэз»

1919-тӥ арын 29-тӥ куарусёнэ удмуртъёслэн кыкетӥ ӧтчамазы резолюция кутӥзы – удмурт калыкез югдытон понна книга поттонъя ёзэт кылдытоно. 2020-тӥ арын южтолэзе нырысетӥ книга потӥз ни. Юрий Кузнецовлэн верамезъя, «Удмуртия» издательстволэн ужпумез али но ӧз воштӥськы. Учебникъёсты, кылсярысь, соос гинэ потто.

Книгаослэн лыдзыя асьме издательство сокем бадӟым ӧвӧл: араз 55-60 пумо гинэ потто. Мукет ласянь, со ӧжыт но шуыны кыл уз пыры.

Быдэс Россиын 50-лэсь трос книга ог 100 пала гинэ издательствоос потто ар ӵоже, нош Россиын 5 сюрс 500 издательствоос. Соин ик ми, огласянь, пичиесь кадь, но мукет ласянь, ми чик но пичиесь ӧвӧл. Ми туж бадӟым, ас интыяз удыссэ возись издательство
Юрий Кузнецов, «Удмуртия» книгапоттоннилэн кивалтӥсез

Котькытын сямен ик, «Удмуртия» книгапоттоннилы коньдон уг тырмы. Тросгес возь вылэм дизайнеръёсты, корректоръёсты, редакторъёсты, шуэ Юрий Кузнецов. Но сыӵе луонлыксы ӧвӧл бере, кулэ дыръяз ӧнерчиосты медъяса ужатоно луо. Озьы ке но, 100 ар тырмонзэс издательствоын ужасьёс капчи мылкыдын пумитало. Выль но выль вормонъёссы выль тунсыко ужъёс борды басьтыны ӝуто. 

Наши партнеры

Наверх
Вниз