Ижкар+3 °C
18 коньывуон 2019 Удмуртарня
16+

Сюрес вылэ потыку кышкан луыны кулэ ӧвӧл: Пичи Пурга ёросысь удмурт нылкышно автостопен Европае вуылӥз

  • 1823
  • 0
Яган / Удмуртия
Сюрес вылэ потыку кышкан луыны кулэ ӧвӧл: Пичи Пурга ёросысь удмурт нылкышно автостопен Европае вуылӥз
Туспуктэм: Ольга Павлова

Гужем. Шутэтскон вакыт. Туала улонын нокинэ уд паймыты ини зарезь дуре, мурт кунэ лобеменыд, машинаяд пуксьыса мынэменыд. Но Пичи Пурга ёросысь Яган школаысь ватсаса тодон-валан сётӥсь Ольга Павлова капчи сюресъёсты бырйисьёс пӧлы уг пыры. Удмурт нылкышно чылкак огназ автостоп амалэн Европае вуылыны малпаз. Малпаз – быдэстӥз. Ивортодэтъя «Удмуртия» агентстволэн корреспондентэзлы со вераз, кызьы ӝутскиз сыӵе йӧспӧртэм амалэн дуннеез учкыны, кыӵе сюлмаськонъёс кылдылӥзы но мар паймытӥз.

«Европае ветлыны малпанэ кемалась вал»

Мон кема малпай та сярысь, но мынам кунгож сьӧры потаны паспорт гинэ но лэсьтыны уксё висъяме уг луы вал. Но Европае ветлыны мынам малпанэ кемалась вал ини
Ольга Павлова, мынӥсь-ветлӥсь

Солэн кылъёсызъя, кунсьӧр паспорт «Яган онлайн» медиацентр кылдытыны «Рыбаков фондлэсь» грант утэмез бере лэсьтоно луиз, угось соос Эстониын стажировка ортчытӥзы. 

Куке мон визаме киям басьтӥ, учки - 30-тӥ гудырикошконозь. Малпай, юнме медаз кылльы со, кызьы ке но мыныны кулэ
Ольга Павлова, мынӥсь-ветлӥсь

Шутэтскыны потыса, Ольга Павлова малпаськыны кутскиз, автостопен мыныны льӧль малпанзэ быдэстыны ӧдъяз, угось коньдонэз но трос уз луы шуыса йыраз возиз.

Малпай, малпай но, собере мыным курдыт луиз. Учкыны кутски «ӝуась» путёвкаос. Малпай, кытчы ке но Грецие ветлыны, Италие. Но малпасько, мон путёвкаез басьто но мар мон адӟо со путёвкаен? Зарезез но отелез? И всё? Номыре но уд адӟы. Озьы дӥсьтӥ
Ольга Павлова, мынӥсь-ветлӥсь

Автостопен Европае мыныны малпанэз борды юн кырмиськыса, нылкышно «ВКонтакте» мерлыко вотэс пыр аслыз эш утчаны кутскиз. Нырысь ик Германиысь ӟуч нылашен вераськиз, но со бырйисько на шуыса ивортӥз. Озьы Ольга Павлова утчан ужзэ азьланьтӥз но Юрий Поплавскиен тодматскиз.

Малпасько, мон огнам кылём-а, мар-а Европаетӥ ветлыны. Воксё курдыт ук. Шедьтӥ одӥг пияшез, Белоруссиысь, Гомельысь. Соин ми гожъяським. Собере телефон пыр герӟаським. Мон соин вераськыса, валай, пияш мынам картэ кадь ик шуыса – ачиз номыр аламазэ уз лэсьты. Оскись со. Собере мон тодӥ, куке ми соин пумиським, со сӧсыр шуыса
Ольга Павлова, мынӥсь-ветлӥсь

«Автостопын валтӥсез - вераськыны быгатон»

Юрий Поплавскиен нылкышно Белоруссиысь Брестын пумиськиз. Нош отчыозь Удмуртиысь Пичи Пурга ёросысь Миндэр гурт дорысен быдэсак сюрессэ нялтас мынӥсь машинаосын ортчиз.

Мон аслым оскисько. Мон пӧртэм адямиосын пумиськылӥ улонам, ваньмыныз мон огкыл шедьтӥсько. Соин ик та ласянь мон ӧй курда. Вераськеме мынам трос луэ, нош автостопын со валтӥсез. Водителен вераськыны одно ик кулэ, соосыз кылзӥськыны кулэ. Татын философиез сыӵе. Одӥг нуналэ куать машинаен но мыныны луэ, нош луэ воксё одӥг машинаен. Котькуд куать машина - со куать улон. Тон соосын тани та улонэз улӥськод
Ольга Павлова, мынӥсь-ветлӥсь

Ольга Павловалэн верамезъя, сюрес вылаз солы воксё пӧртэм визьмын адямиос пумиськылӥзы, котькудӥзъя одно тупатскыны кулэ. Со гурт пияш ке, тон гурт нылаш луыны кулэ, солы умойтэм медаз луы, шуэ нылкышно.

Мынам малпанэя, Европа туж ик бадӟым ӧвӧл, соин ик мон котькыӵе кунэ вуыны дась вал. Валтӥсез - мон отын мар ке но мед тодом, валалом, адӟом, кызьы адямиос уло
Ольга Павлова, мынӥсь-ветлӥсь

Соин нылкышно кытчы мыныны бырйиськыса ӧз улы. Белоруссиысь эшезлэн чаклам сюресэз вал ини бере, соя ик кариськиз, угось пиосмурт Европаетӥ трос пол ветлэмын ини. Брестысен Варшаваозь соос нялтас машинаосын мыныны, нош отын автобусэ пуксьыны вераськизы.

Брестын.jpg
Брестысь тужгес тодмо интыын Фото: Ольга Павлова ©

Юрий Поплавский улосчимылы Польша сьӧрын автостопен кошкыны туж шуг шуыса валэктӥз, угось отын автобанъёс (ӝог ветлон сюресъёс – ред.) кутско. Соин ик Европаез котыртыны потэмъёс автобусъёсты бырйизы. Ольга Павловалэн кылъёсызъя, отын дунтэм автобусъёс ветло. Соос «FlixBus» нимасько.

Нырысетӥ могӟет

Варшаваын автобусэ пуксьыса, Европаез котыръясьёс Хорватиысь Загребе вуыны кулэ вал.

План планэн, нош мынам автобусэ билет басьтэме ӧз луы, малы ке шуоно сайтсы росси картаез копак уг лыдӟы. Соин ик мыным кулэ вал кассаысь билет басьтыны, нош касса ворсамын вал ини. Шутэтскон нуналъёсы соос уг ик ужало. Пӧрмиз озьы, что эше мынам кошкиз автобусэн, нош мон кыли огнам тодмотэм Европаын
Ольга Павлова мынӥсь-ветлӥсь

Татын вераны кулэ, нылкышно Европае нырысьсэ вуэм сяна, эшшо англи кылын но уг вераськы. Озьы ке но, со ӧз ыштӥськы, отельёсын инты быръёнъя сайт пыр хостел шедьтэм. Но отчы кар транспортэн мыныны кулэ, нош ик билет басьтонэн шугъяськонъёс кылдӥзы.

Билет басьтыны уг быгатӥськы, автоматъёс сыло. Нош Польшаын одӥг остановка билеттэк мынӥд ке, утыр ик полицейскойёс пыро, штраф сёто. Адямиос мыным юрттӥзы. Мон валай адямиосын вераськыны быгатӥсько шуыса: полякъёсын но, англи кылын вераськисьёсын но. Ог-огез валаны луэ
Ольга Павлова, мынӥсь-ветлӥсь

Озьы, уйзэ хостелын кӧлыса, Ольга Павлова ӵуказеяз Загребе вырӟиз. Сюресэз Австрия пыр ортчиз.

Изьыкум кыӵе кунъёстӥ ортчим, мон уг тодӥськы, но Австриын пересадка вал. Югыт вал ини. Мон отын кык час вал. Автовокзаллэсь котырзэ учки. Отын промзона
Ольга Павлова, мынӥсь-ветлӥсь

«Кезьыт» Австрия но «тодмо» Хорватия

Австрия нылкышнолы «кезьыт» потэм. Вена но сюлмызъя тупамтэ.

Куке тон тодмотэм интые пыриськод, тон соку ик валаськод, тыныд со инты сюлэмыдъя-а, ӧвӧл-а. Нош татын кыӵе ке но «кезьыт-а», мар-а мыным вал. Адямиосыз но. Мыным маин ке но ӧз кельшы. Хотя автобус укноетӥ учкиськод ке, отын чебер - гурезьёс, бусыос, ваньмыз киземын, коттеджъёс дворецъёс выллем
Ольга Павлова, мынӥсь-ветлӥсь

Трослы сюлэмызъя луэм солы Хорватия.

Нош куке Хорватие пыримы… Кунгожез ортчиськод но отын… гурезьёс, бусыос, будосъёс… Сюрес но. Автобан отын но вань. Но вӧзаз сюрес мынэ, огшоры. Котькытын со асфальтэн шобыртэмын, нош татын гравиен. Россие кадь ик пыри
Ольга Павлова, мынӥсь-ветлӥсь

Загребын улосчимес Белоруссиысь эшез пумитаз ини. Отын со каучсёрфинг сайт пыр улон инты пумысен но вераськем ини. Озьы мынӥсь-ветлӥсьёсты Загребын куно каризы. Соос понна нимысьтыз пичи корка висъязы.

Собере Плитвицкой тыос солэн планаз вал но кӧня ке нунал зарезь дурын. Мон солы ваньмыныз соглаш шуи, кӧня ке нуналлы зарезь дуре гинэ мед вуылом
Ольга Павлова, мынӥсь-ветлӥсь

Ольга Павловалэн верамезъя, Плитвицкой тыос но зарезь дурын улыны шуыса соос палатка басьтӥзы. Угось курорт луись карын тужгес дунтэмез улон инты сюрс манетлэсь трос сылэ. Тыос дуре вуыса, парке пырон азязы соос песьтэръёссэс ваньбурез возён камерае, пичи коркае кельтӥзы. Соин сэрен ӧжыт гинэ инбам улэ ӧз кыле. 

Озьы пӧрмиз, Плитвицкой тыос котыре ми 17 час бере гинэ вуим, нош ворсатозязы потыса ӧм вуттэ. Соос 20 часын ворсасько. Милемлы сокем кельшиз, дырез чакланы вунэтӥм. <…>. Малпасько, сюриськиз, кызьы ми таре уйзэ ортчытом, палаткамы со коркае кылиз. <…> Нош визьмо, лякыт сямо хорватъёс, адямиос песьтэръёссэс ӧз басьтэ шуыса адӟыса, коркаез ӵогатэк кельтӥллям. Озьы ми со коркаын уйзэ ортчытӥм
Ольга Павлова, мынӥсь-ветлӥсь

Уйлы буш кыльыны кулэ луись коркаысь ӝуась тылэз адӟыса, отчы югдурез чаклась вуэм. 

Ми ӟуч сямен валэктӥм, милемлы усьтыса кельтӥзы шуыса, песьтэръёсмес басьтыны лыктӥм, али дӥськутмес воштӥськом, оло, татын ик уйзэ но ортчытом шуыса. Нош со милемлы «добре, добре, добре» шуиз но кошкиз
Ольга Павлова, мынӥсь-ветлӥсь

Хорватиысь Плитвицкой тыос Ольга Павловалэн синмыныз

8 фото

Бӧрысь эшъёс Риека каре зарезь дуре шонтӥзы. Отын шутэтскизы, пыласькизы. Но, жаляса верано, куазь зоро тупаз, соин ик малпамзыя палаткаын улыны ӧз кылды. Улосчимы кык нуналзэ хостелын ортчытӥз. Нош собере бертон пала вырӟизы.

Сюрессы Венгрия, Словакия, Польша пыр ортчиз.

Мыным туж кельшиз Краков, мынам отчы эшшо ветлэме потэ на. Со сыӵе тунсыко. Варшаваен ӵошатоно ке, Варшава со кар но кар, номыриз но отын тунсыкоез ӧвӧл кадь. Отын, Варшаваын, вуж карзы но вань, со реставрация пыр ортчемын ини. Со сяна туж тунсыкоез номыр ӧвӧл. Нош Краковын ваньмыз тунсыко потӥз, ваньзэ адӟем потӥз
Ольга Павлова, мынӥсь-ветлӥсь

Ольга Павловалэн Европае мынон-ветлонэз оглом куинь арня кыстӥськиз, со пӧлысь вить нуналзэ Хорватиысь Риека карысь Адриатической зарезь дурын ортчытӥз. Нылкышно Белоруссие, Польшае, Австрие вуылӥз, Словения пыр ортчиз, Хорватиез адӟиз, Венгрия, Словакия пыр бертӥз. Со понна огъя 30 сюрс пала коньдон быдтӥз.

Ольга Павловалэн сюресэз кузя

15 фото

Сюрес вылэ потыны малпасьёслы ӵектонъёс

Песьтэр бичан азьын адями валаны кулэ, быгатоз-а со чиданы пӧртэм адямиосын вераськыны, быгатоз-а со алама учыръёсы ассэ утьыны. Адями кышка ке, мон малпасько, кутсконэз но ӧвӧл. Куке тон кышкаськод, тонэн вераськись сое туж умой шӧдэ. Соин ик кышкан таӵе ужын луыны кулэ ӧвӧл. Ас кужымедлы оскон гинэ
Ольга Павлова, мынӥсь-ветлӥсь

Озьы ик песьтэрдэ ялан вылад нуллыны дась луыны кулэ. Ольга Павловалэн верамезъя, буш киын сюрес вылэ потыны уг яра - кузь сюресэз нялтас машинаосын ортчыса, уйёсы палаткаын кӧлыса но адямилэн котырыз чылкыт но ӝикыт луыны кулэ. 

Мон туж жаляй гижы тупатон ӧй басьты шуыса. Малы ке шуоно путешественник, тужгес но автостопом, дикарём дуннеез котыртӥсь котьку но чылкыт но ӝикыт луыны кулэ. Со бордысь зын потыны кулэ ӧвӧл, гижыосыз чылкыт луыны кулэ. Соин ик сьӧре астэ утялтон макеос, кот салфеткаос, воштӥськон ул дӥсь, шуныт кофта, штань басьтоно, со сяна номыр но кулэ но ӧвӧл ни
Ольга Павлова, мынӥсь-ветлӥсь

Йылпумъянъёс

Ольга Павлова Европае автостоп амалэн вуылэмез пумысен пичи но ӧз жаля шуыса пусъе. Йыраз сомында малпанъёс, выль тодон-валанъёс кылемын уго. Европае вуылыса, улосчимы ас понназ трос выльзэ усьтӥз. Выль кунъёсты адӟем сяна, солэн улон шоры учконэз но ӧжыт воштӥськиз.

Мон отын валай, что мынам кылъёсты дышетонэ уг мыны вал, малы ке шуоно, нырысь ик, мон солэсь кулэлыксэ ӧй адӟы, мыныны малпаса но мон сыӵе кулэлыкез ӧй адӟы. Со сяна, мыным англи кыл, немец кыл пелез вандэ кадь потэ вал. Уг кельшо вал. Нош татын мон кылӥ, кызьы огшоры адямиос, семья куспазы, нылпиосынызы верасько, и мынэсьтым воксё пельме ӧз ванды, туж чебер со кылӥське
Ольга Павлова, мынӥсь-ветлӥсь

Озьы, улосчимылэн мукет кылъёсты дышетыны мылкыдыз но ӝутӥськиз. Со сяна, Ольга Павловалы туж тунсыко потэм, Европаын нылпиосын ӵемысьгес атайёс возисько шуыса.

Педло гинэ но, нылъёсын но, соос ветло. Ми дорын мон сыӵезэ ӧй адӟылы
Ольга Павлова, мынӥсь-ветлӥсь

Европаетӥ ортчемезлэсь умой мылкыд люкаса, табере Ольга Павлова вуоно арын сюрес вылэ потон сярысь малпаське ини.

Вуоно арлы мынам Европае потаны визае уз луы ни. Нимаз мон сое уг басьты. Соин ик малпасько Уйпал Кавказэ, Грузие, Турцие вуылыны
Ольга Павлова, мынӥсь-ветлӥсь

Наши партнеры

Наверх
Вниз