Ижкар+5 °C
21 куарусён 2019 Кӧснунал
16+

Вӧсьлыко Удмуртия: кызьы бускеллясько элькунын пӧртэм осконъёсын улӥсь калыкъёс

  • 596
  • 0
Кестым - Кулига / Удмуртия
Вӧсьлыко Удмуртия: кызьы бускеллясько элькунын пӧртэм осконъёсын улӥсь калыкъёс
Туспуктэм: Майя Бывальцева

27-28 шуркынмонэ Ижкарын муниципал кылдытэтъёслэн «Мир в диалоге» росси форумзы ортчоз. Ужрадын кун йӧскалык политикаез радъян ужпумъёс сярысь вераськон мыноз. Нимысьтыз саклык интыысь аскивалтон ёзэсъёслэн вӧсьлык огазеяськонъёсын кусыпъёссэ радъянлы висъялозы. Бадӟым форум азьын Удмуртиысь Калыкъёслэн эшъяськон юртсы улосвылысь Йӧскалык политикая министерство юрттэмен улосвылысь «Удмуртия конфессиональная» пресс-тур радъязы. Журналистъёслы но блогеръёслы шаермылэн уйпалысьтыз мусульманъёслэн но староверъёслэн улон-вылонэнызы тодматскыны луонлык кылдӥз.

Бигеръёслэн туала Удмуртилэн уйпалаз вуэмзы

Нырысь ик вуимы Балезино ёросысь Кестым гуртэ – чупчипал бигеръёс доры. Журналистъёсты Удмуртиысь уйпал ёросъёсысь имам-мухтасиб, Кестымысь мечетьлэн имамез (кивалтӥсез) Ильмир хазрат Касимов пумитаз. Вӧсяськонъёсты нуэм сяна, со шаертодонэн тунсыкъяське, гуртысь школалэн музееныз кивалтэ. Солэн верамезъя, туала Балезино ёрослэн интывылаз мусульманъёс XIV даурын ик вылэм ни. Сое Гордино гурт вӧзысь шедьтэм шай из возьматэ.

1323-тӥ арысь <...> изэз бусыез гырыку шедьтӥзы, кытын со вал, рос-прос ум тодӥське, но кытын ке Гордино вӧзын. Памятник кышномуртлы, гожтэмын латин букваосын булгар кылын, араб кылысь элементъёсын – Коранысь верам кыл гожтэмын. Со возьматэ, куке но татын мусульманин улӥз шуыса
Ильмир Касимов, Кестым мечетьысь имам

Ильмир Касимов верамъя, туала Удмуртилэн уйпалаз, со пӧлын Балезино ёросэ, удмуртъёс, бигеръёс но бесерманъёс одӥг вакытэгес вуизы – XVII дауре. Кестым ужкагазъёсын нырысьсэ 1678-тӥ арын пусъемын. Гуртэз Киров улосвылысь Слободской ёросысь Карино гуртысь потэм мурт кылдытэм, соин ик элькунмылэн уйпалаз улӥсь бигеръёсты карин бигеръёс нимало.

Карин бигеръёслэн нырысетӥ кивалтӥсьсы вал Касим. Со ик выжылы кутскон сётӥз. Туннэ тросэз Кестымын улӥсьёс Касимов фамилиез нулло. Али со выжыын 10 сюрслэсь трос адями лыдъяське. 2017-тӥ арын Кестыме Касимовъёслэн выжы праздниказы («Касимовлар жыены») кунлэн пӧртэм улосвылъёсысьтыз 800-лэсь трос куноос вуизы

Кестымын улӥсь бигеръёс 5-6 гуртъёс кылдытӥллям. Та дырлы Балезино ёросын кылемын на Падера, Ахмади но Бектыш. Со сяна, кӧня ке гуртъёс вань Глаз но Юкаменск ёросъёсын.

Туннэ Балезино ёросын улӥсьёс пӧлысь ог 10 процентэз – бигеръёс. Со сяна, азербайджанъёслэн бӧляксы вань на, со сокем ик бадӟым ӧвӧл, но йылолъёсты быдэстыны имамъёсты ӧтчало. Озьы 3 сюрс 500 пала мусульманъёс луо. Кестымын али 800-лэсь трос улӥсез, со пӧлысь 90 процент палаез – бигеръёс.

1950-1960 аръёсы Удмуртилэн уйпалаз 25-лэсь трос бигер гуртъёс вал, али 15 пала, дыр. Тросэз соос Юкаменск ёросын вал. Вань со гуртъёсын мусульман лулчеберет вал, котькудаз сямен гуртын мечеть яке вӧсяськон корка вал. Мынам чотамея 1930-тӥ аръёс дырозь Удмуртиын 30-лэсь трос мечетьёс вал, со пӧлысь 20 палаез, ӧжытсэ 21-ез - Удмуртилэн уйпалаз. Соку ислам Удмуртилэн уйпалаз тросгес вал, малы ке шуоно Удмуртилэн лымшораз бигеръёс бергес вуизы. Кизнерын, Можгаын мечетьёс 90-тӥ аръёсы кылдӥзы ни
Ильмир Касимов, Кестым мечетьысь имам


Мечетьёс пуктон

Удмуртиын мечетьёс сярысь нырысетӥ гожтэмъёс 1743-тӥ пумисько, ӵапак улосвыллэн уйпалаз, вал-а соку соос лымшорын, али тодмо ӧвӧл. Кестымысь имам верамъя, Екатерина II кивалтон вакытозь Россиын ислам «катлэн палэназ вал». Мечетьёсты нимысьтыз лэземен гинэ пуктыны яраз, лэзьытэк ужасъёссэ куашкатылӥзы.

1743-тӥ арын Ватка палась епископ Священной Синодэ гожтэтаз катэз чаклатэк ужась мечетьёс сярысь вераз. Со пӧлын Кестым гуртысь мечеть но Починка гуртысь мечет сярысь гожтэмын. Со гожтэтлы луыса ми тодӥськомы, мечеть вал ни шуыса
Ильмир Касимов, Кестым мечетьысь имам

Куашкатӥзы-а соку мечетез яке ӧз, тодмотэм, но Кестымын кӧня ке мадёнъёс вань.

Мечетез куашкатыны лыктэмез тодыса, мулла гуртын улӥсь вань калыкез люкам но вӧсяськон юртэз куинь полэс кульчоен котыртӥллям. Воргоронъёсты пушказ султытӥллям, нылкышноосты - шораз, педпала – нылпиосты. Гуртоослэн малпамзыя, пиналъёсты но кышномуртъёсты уз йӧтылэ, нош воргоронъёс дорозь уз но вуэ. Ваче пумит сылон вир кисьтытэк йылпумъяськиз. Муллалэн визьлыко луэмез мечетез но, воргоронъёсты утьыны быгатӥзы, пе, угось пиосмуртъёс пумитъяськысалзы ке, соосты Сибыре келясалзы. Нош бигеръёсты черке пыртыны лыктӥсьёслэсь гуртоос нюлэскы ватскиллям, шуо.

Кестымысь вужез но вылез мечетьёс

11 фото

1930-тӥ аръёс дорозь Кестымын куинь мечеть вылэм. Туннэ 1905-тӥ арын пуктэм юрт сылэ на, али отын адӟытон радъямын, нош вӧсяськонъёс со вӧзы 2013-тӥ арын пуктэм юртын мыно.

Милям вӧсь нергеос ноку ӧз дугдылэ. Совето вакытъёсы удмурт гуртъёсын пылатонъёс ӧй вал ни, ӧз лэзьылэ, кытчы ке сьӧрло ветлон луэ вал пыласькыны яке венчаться кариськыны, нош милям, бигеръёслэн, Кестымын но Балезино ёросын венчанитэк нокин ӧз улы. Со комсомолец яке коммунист ке но, ӝытазе, уйин лушкем имам, мулла доры, яке имам доры мыны кышказы ке, тодӥсь адями доры мынылӥзы. Исламын ӧвӧл сыӵеез, священник гинэ нергеез ортчытыны кулэ шуыса
Ильмир Касимов, Кестым мечетьысь имам


«Калыклэн тау каронэз но Инмарлэн бакельлыкез»

Тунсыко кылем даурын пуктэм мечетьлэн историез. Со Кестымысь купечлэн Гусман Касимовлэн сётэм кылызъя пуктэмын.

1903-тӥ арын гужем Гусман Касимов Меккае хадже мынэм. Со дыре Кестымын бадӟым тылпу пуромем. Гуртоос турнаны кошкемын вылэм, соин ик тылпу ӝыны гуртэз басьтэм. Архивысь ужкагазъёсъя, 136 юртъёс но мечеть сутскиллям. Нош купечлэн бадӟым юртъерез вылэм. Тылпу сярысь тодыса, со кыл сётэм: коркаез сутскымтэ ке, вань узырлыксэ выль мечеть пуктыны сётоз. Кышноез солэсь юам: «Нош мар нылпиосыдлы кельтод?». Купеч верам: «Калыклэсь тау каронзэ но Инмарлэсь бакельлыксэ». Кӧшкемыт тылпу Гусманлэн юртэз дорозь вуымтэ. Озьы купечлэн тыршеменыз 1905-тӥ арын Кестымын выль мечеть усьтӥзы.

Со мечетьын ик мусульман школа вал, отын Кестымысь пиналъёс дышетскизы, мукет гуртъёсысь но ветлӥзы. Кылсярысь, 20-тӥ даур кутсконын отын 191 пиос дышетскизы. Дышетон нимаз вал – пиосты мечетьын дышетӥзы, нылъёсты – мулла дорын, муллалэн кышноез дышетылӥз. Со мында ик нылъёс но вал ке, 300-лэсь трос пиналъёс дышетскизы. Али милям сюозь но уг вуы, Кестымысь школаын 90-лэсь трос дышетскисьёс
Ильмир Касимов, Кестым мечетьысь имам

Коранэз дышетон

Кестымысь имам верамъя, али мечете 10-15 адями дышетскыны ветлэ. Коранэз лыдӟыны, гожъяськыны дышетско.

Тросгес шудон пыр – суредаськон, араб букваосты гожъянэз дышетӥськом, кыӵе ке юанъёслы валэктонъёс сётӥськом но вакчи вӧсь кылъёс. <…> Семьяосын араб кылын лыдӟиськыны гинэ ӧвӧл, вӧсь кылъёсты но туж ӧжытэз тодэ ни, песянайёс гинэ шат. Соин ик али улӟытоно луэ, нырысь ик анай-атайёсын ужаны, собере ини, мылкыдзы вань ке, пиналъёсты дышетыны
Ильмир Касимов, Кестым мечетьысь имам

Пусъём, мусульманъёслэн священной книгазы – Коран - араб кылын гожтэмын, берыктэм ужъёсты Коранэн уг лыдъяло, со валэктон гинэ луэ. Ильмир Касимов араб кылэз Кузонысь медресеын дышетӥз. Солэн верамезъя, Коранэз лыдӟонын куинь ёз (уровень) вань.

Тон наизусть тодӥськод, кылзӥськыса дышетӥд. Со нылкышноос пӧлын вӧлмемынгес, революцилэсь азьвыл кышномуртъёсты гожъяськыны ӧз дышетэ, лыдӟиськыны гинэ яке наизусть дышетыны. Мынам песянае, кылсярысь, наизусть тодэ вал, араб кылын лыдӟиськыны уг быгаты вал. Кыкетӥез ёз али тужгес вӧлмемын – адями араб кылын куронъёсъя лыдӟиськыны быгатэ, Коранэз лыдӟе, но пуштроссэ уг вала. Тужгес вылӥез, куке адями лыдӟе но пуштроссэ вала. Куинез ик амал луыны быгатэ. Ачиз кыл – со академ ёз, кылэз дышетыны секыт
Ильмир Касимов, Кестым мечетьысь имам

Кестымысь мечетьлэн вуж юртаз али ислам музей интыяськемын шуыны луоз. Татын XIX пумысь-XX даур кутсконысь Коранъёс утисько. Азьвыл соос котькуд коркан луыны кулэ вал, лыдӟиськыны ӧз ке но быгатылэ. Али но, бен, пӧртэм ӧвӧл. Татын вань нырысьсэ типографи амалэн печатлам Коранъёс, азьвыл литография амал кутӥське вал. Тунсыко соиз но, Коранэз типографи амалэн нырысьсэ поттӥзы ӵапак Кузонын, визьрадэзъя со понна Аравия, Турция яке Египет тупалогес кадь ке но.


Кестым школаысь музей

Кестым школаысь музей

5 фото

Бигеръёслэн улонэнызы тодматэ Кестымысь школа музей но. Отын адӟыны луоз маин висъяське бигер корка мукетъёсызлэсь. Кылсярысь, борддоръёсын трос басмаос ошылэмын (коверъёс, возъетъёс), бадӟым ӝӧксы ӧвӧл, со интые саке – полать выллем кӧня ке ӝутэм инты, корка нылкышно но воргорон люкетъёслы люкемын. Нялтас вераса, пиосмурт куноосты кузё утялтэ вал, нош кышномуртъёсты – кузёкышно. Сыӵе люкиськон али но пумиськылэ, но сокем чутрак ӧвӧл. Вӧсьлык шулдыръяськонын одӥг палаз воргоронъёсты пукто, мукет палаз – нылкышноосты. Шораз кышноен картэз пуктыны тыршо, кочатон медаз луы, пе. Яке пӧртэм нуналъёсы ӧтё. Кылсярысь, кисьтонэ сизьыметӥ нуналаз воргоронъёсты гинэ, куинетӥ нуналаз – нылкышноосты.

Нюлэсъёсы шыпытак кошкемъёс

XVII даурын Никон патриарх кичӧлтэмен Ӟуч парвослави черкын выльдӥськонъёс ортчытэм бере тросэз христианъёс вашкала осконъёссэс, сям-йылолъёссэс утьыны тыршыса, шыпытак нюлэсъёсы кошкылӥзы. Озьы XVIII даур пумын туала Удмуртилэн интывылаз Архангельск, Карелия, Нижний Новгород палась староверъёс вуизы. Выльдӥськонъёсты асэстымтэ муртъёслэн одӥгез выль улон интызы – Кез ёросысь Кулига. Татын улӥсьёсты «старообрядцы-беспоповцы поморского толка» шуо.

Вӧсясько коркаосын, черк ӧвӧл, баӵкоос ӧвӧл. Валамон, вань собор (кенеш – ред.), кудӥз пушкын одно ик бырйиське духовник яке духовница. Одно ик начетчица, начетчик. Милям али но вашкала ӟуч кылъёс кутӥсько: баба, де, читающая, начитать которая может – начетчица. Озьы ик уставщик яке уставщица, кудӥз собор пушкын кылдытэм уставез быдэсъямез сак эскере
Алексей Некрасов, Кулигаысь шаертодонъя музейлэн кивалтӥсез

Солэн верамезъя, кыдёкысь лыктӥсь семьяос починкаос кылдытъязы, соин ик вашкала карта вылысь учконо ке, та палан туж трос нимаз-нимаз улон инты нимъёс пусъемын. Берло соос огазе луизы яке бырылӥзы.

Сокем чурыт патриархат вал, воргоронлэн нимызъя починкаосты, гуртъёсты нималлязы –Степанёнки, Карпушата (али ӧвӧл ни). Эшшо совето литератураын гожтэмын вал, Кам Карпушата гуртын кутске шуыса. Карпушаталэсь азьвыл Карпушинский починок вал – кытын Карп улыны кутскиз. Соин ик эксэй вакытысь Россиын Санкт-Петербургысь, Пермьысь изданиосын <…> Камлэсь кутсконзэ огшоры пусъё вал – Кама карпушинская
Алексей Некрасов, Кулигаысь шаертодонъя музейлэн кивалтӥсез

Нялтас вераса, аслаз Кулигалэн но нимыз воштӥськиз. Эксэй Россилэн картаяз со Кулиги шуыса пусъемын. Алексей Некрасовлэн верамезъя, со вераськонысь ышем вашкала ӟуч кыл.

Кулига кыл номыре уг вера но нокызьы уг берыктӥськы, нош кулиги, кулишки – со вашкала ӟуч кылъёс. Кызьы шуо кылчиос, интыен, йӧслыкен герӟаськем шӧмзэ куштӥськом но кыллэсь выжызэ кельтӥськом ке, со кылын кытысь ке кыдёкысь нюлэскын юртъёс пуктон но гырон понна писпуослэсь бушатэм выль интыез нимало вал
Алексей Некрасов, Кулигаысь шаертодонъя музейлэн кивалтӥсез

Кулигаысь шаертодонъя музей

11 фото

Вашкала сямъёс но девайсъёс

Староверъёс лушкемгес улыны дышемын бере, калыкын трос олокыӵе но вераськонъёс ветло, но ми сюй коркаосын ум улӥське, асьмедыз сутыса ум быдтӥське, шуэ Кулигаысь шаертодонъя музейлэн кивалтӥсез. Бен, вӧсяськоназы муртэз уз лэзе, туспуктонлэсь ватӥськозы – «пудоез, пе, яра, коркаез яра, астэ – уг яра, сьӧлык».

Алексей Некрасов верамъя, 1980-тӥ аръёсы ай соборлэн ёзчиосыз машинае но уг пуксё вылэм, транспорт шайтанлэн шуылӥзы. Трос аръёс ӵоже картофка мерттытэк улӥллям, сое староверъёслы пумит луись Пётр I ваиз шуыса. Но али котькуд бакчаын «кыкетӥ нянез» будэто. Азьвыл коньдонэз но шайтанлэн лыдъяло вал, но туала вакытэ сотэк уг луы. Со ужаса поттэмын ке, «Инмар урод уз кары». Улон азинскемъя улон шоры учкон но воштӥське, отын номыр уродэз ӧвӧл, шуэ Алексей Некрасов, со осконэз вузан ӧвӧл.

Вераны кулэ, татысь староверъёслэн духовниксы Иван Селезнёв туспуктэмъёс лэсьтыны но лэзиз ни. Озьы ик тросэзлэн вань телевизоръёссы, смартфонъёссы.

Югдурез тодыны кулэ, кунын улӥськомы ук, люкиськемын ӧвӧл. Нунокъёсынызы Ватсап пыр но зульыны быгато. <…> Милямъёс кызьы валэкто – ваньмыз Инмарлэсь. Транспорт но Инмарлэсь ук, нош адямилэсь потэ ини, кызьы тон сое кутод – сьӧлыкен яке сьӧлыкатэк. Озьы ик туала девайсъёсын но
Алексей Некрасов, Кулигаысь шаертодонъя музейлэн кивалтӥсез


Православи осконэн бускелляськон

Вераны кулэ, туннэ Кулигаын православи вӧсьлыкъя улӥсьёс но вань, нош нырысетӥзэ черкез отын 1838-тӥ арын пуктӥзы. Ми пыр артэ улэмын, шуэ Глаз епархиысь благочинилэн Кезысь благочинноез протоиерей Сергий Миронов. Берло 100 аръёсы ӟуч православнойёс, удмурт православнойёс, староверъёс ог-огенызы семьяос но кылдытъязы, кинъёс соос табере вӧсьлыксыя – отын но вӧсясько, ми доры но лыкто, пусъе со.

Ветлӥсько, вӧсясько, кудъёсыз даже отпевать карыны но ӧтьыло. Раз адями вӧсьяськемын дак, по православной традиции вань требаосты можно ортчытыны – о здравии вӧсяськын, за упокой вӧсяськын, но, главное, причастие басьтын, <...> малы ке шуоно традиция причащения ӧвӧл страообрядчествоын, особенно беспоповской движениын. Соин ик причаститься кариськем потӥсьёслы мон кык вариант верасько: или выльысь креститься кариськоды, или миропомазание ортчытом но до конца уже православной
Сергий Миронов, протоиерей

Котькуд ар 2-тӥ гудырикошконэ, Илья Пророкез буре вайыса, Кулигаын киросэн вамыштон радъяло. Граждан ож дыръя быремъёслы панихида ортчыто. Озьы ик Быдӟым Атыкай ожын быремъёсты буре ваё.

Кулигаысь православие но Камлэн кутсконэз

5 фото

Али Кулигаын выль черк пукто, сое Дун-чылкыт Александр Свирскийлы сӥзизы. Кам шурлэн кутсконаз сылоз. Кылем арын бугро ӝутӥзы, туэ ӧсъёс пуктӥзы ни. Выжез но иконостасэз ӧвӧл али, соин ик ужез тырмыт на.

Протоиерей Сергий Миронов верамъя, отын ик пыласькон инты лэсьтыны малпало на.

Кызьы шуо: валтӥсез – адями ӟеч мед луоз. Нош адями аслэсьтыз йӧслыксэ но вӧсьлыксэ тодэ ке, со мукетъёссэ но урод уз кары. 

Наши партнеры

Наверх
Вниз