Ижкар+22 °C
11 -тӥ пӧсьтолэзь 2020 Кӧснунал
16+

Удмурт калыклэн кунлыкез: кутсконэз но туала вакытлэн куронъёсыз

  • 6653
  • 0
Сарапул / Удмуртия
Удмурт калыклэн кунлыкез: кутсконэз но туала вакытлэн куронъёсыз
Туспуктэм: vk.com (ДК Электрон - ЦВиРНК)

Быдэс элькунмы Удмуртилэн кунлыкезлы 100 ар тырмонэз пусйыны дасяське. Нош трос-а асьмеос тодӥськомы, кинъёс но кызьы ужазы удмурт калыклэн аслаз интывылэз мед луоз, ас кылыныз вераськыны, дышетскыны, кырӟаны мед быгатоз шуыса? Удмурт движенилэн кутсконэз, азинсконэз но туала вакытэз сярысь вераськон мынӥз 15-тӥ коньывуонэ Сарапулын «Удмурт Кенеш» огазеяськонэн радъям научно-практической конференциын. Ужрад Россиысь удмуртъёслэн III ӧтчамзы дырысен 100 ар тырмонлы сӥземын вал, 1919 арын со озьы ик Кам дурысь карын ортчиз.

Россиысь удмуртъёслэн ӧтчамъёссы но соослэн Удмурт кунлыкез кылдытонын интызы

Удмурт кунлыкез кылдытонын Россиысь удмуртъёслэн нырысетӥ куинь ӧтчамъёссылэн интызы сярысь тунсыко но пыр-поч ивортон лэсьтӥз Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсезлэн воштӥсез, истори тодосъя доктор, профессор Людмила Бехтерева.

Нырысетӥ вамышъёс 1917-тӥ арын лэсьтэмын вал. Соку Кузонын лулчеберет удысысь тодмо ужасьлэн Иван Михеевлэн кивалтэмез улсын удмуртъёслэн йӧскалык огазеяськонзы ужаны ӧдъяз. Отын ик со арын 15-22 куартолэзе Поволжьеысь пичи калыкъёслэн ӧтчамзы ортчиз, со улсын удмуртъёслэн секцизы ужаз. Со ӧтчамын удмуртъёс тросэн улон интыосын огазеяськонлэсь ёзэтъёссэ усьтыны, удмурт школаослы Михеевен кылдытэм куронъёсты юнматон сярысь пумкылъян кутӥзы. Со сяна, Трофим Борисовлы, Иван Михеевлы, Максим Прокопьевлы, Константин Яковлевлы удмурт кылын гожъяськонъя, шаертодонъя дышетон пособиос но лыдӟиськон книга гожтыны куронъёс сётӥзы.

Озьы ик 1917-тӥ арын Глазкарын но Алабгоын лулчеберетъя но югдытонъя огазеяськонъёс кылдӥзы. Солэн ужазы валтӥсь инты басьтӥзы дышетон, калыкез югдытон, лулчеберетэз вӧлмытон ужпумъёс.

1918-тӥ ар кутсконын Алабгоысь огазеяськон бордын Удмурт кенеш кылдытӥзы. Солэн кивалтӥсез, «Выль синь» газетлэн редакторез Константин Яковлев Мускоын РСФСР-ысь йӧскалык ужъёсъя калык комиссарен Сталинэн пумиськиз. Соос Наркомнаце удмуртъёслэсь ыстэм муртъёссэс пыртон но Удмуртъёслэн ужпумъёссыя шор комиссариат кылдытон сярысь вераськизы. Удмуртъёслэн нимынызы пумкылъянъёс кутыны быръем ёзэс гинэ кутыны быгатэ вал бере, Алабгоысь Удмурт кенеш калыклэсь нырысетӥ ӧтчамзэ дасяны кутскиз.

Россиысь удмуртъёслэн I ӧтчамзы Алабгоын 1918-тӥ арын 26-тӥ инвожое усьтӥськиз. Отчы Вятской, Казанской, Премской, Уфимской губерниосысь 9 уездъёслэсь 78 делегатъёс люкаськизы. Кивалтыны Максим Прокопьевез бырйизы

Ӧтчамын калыкез дышетон, издательской уж, бигеръёслэсь но башкиръёслэсь элькунзэс но Прикамской губерниез кылдытон шоры удмуртъёслэн учконзы, озьы ик нимаз удмурт волостьёсты кылдытон, тазалыкез утён, РСФСР-ысь Наркомнаце кык адямиез быръён сярысь но мукет ужпумъёсты эскеризы.

Делегатъёс йӧскалык асвалан сярысь малпанлы дурбасьтӥзы. Бигеръёслэн но башкиръёслэн элькуназы удмуртъёсты пыртон сярысь малпанъёслы пумит луизы но троссэ удмуртъёсты огазеясь Прикамской губерниез кылдытонлы дурбасьтӥзы. Йӧскалык школа нимаз луыны, соин удмурт тӧрлык ёзэс кивалтыны но дышетонэз удмурт кылын нуыны кулэ шуыса пусйизы
Людмила Бехтерева, Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсезлэн воштӥсез, истори тодосъя доктор, профессор

Наркомнаце ыстэм муртъёсын Максим Прокопьевез но Михаил Поздеевез бырйизы. 1918-тӥ пӧсьтолэзе отын Прокопьев кивалтэм улсын вотской ёзэт кылдӥз. Соку ик Удмурт автономной трудовой коммуналэн кункатэзлэсь, солэн интывылэзлэн гожезлэсь ӵектоссэ дасязы. Малмыжын, Алабгоын но Глазкарын уездной исполкомъёс бордын удмурт ёзэтъёс но секциос ужаны кутскизы, Кузонын – лулчеберетъя но югдытонъя ёзэт.

1919-тӥ арын II ӧтчам нош ик Сарапулын ортчыны кулэ вал, но Колчаклэн армиез тани-тани карез басьтоз шуыса, сое Прокопьевлэн вордскем палаз – Малмыж уездысь Нырья черкогуртэ выжтӥзы. Ӧтчам 30-тӥ южтолэзьысен 4-тӥ оштолэзёзь ужаз. Отчы 100 делегатъёс люкаськизы, тросгес крестьянъёс но дышетӥсьёс вал. Кенешонын йӧскалык юанъёсты, Горд Армилы юрттон, лулчеберетэз но гурт возёсэз азинтон, дышетон, удмурт кылэн герӟаськем ужпумъёсты, выт бичан политикаез эскеризы.

Ӧтчам Удмурт комиссариатэз кылдытон сярысь туж кулэ пумкылъян кутӥз

1919-тӥ арын 25-29 куарусёнэ Сарапулын Удмуртъёслэн III огъяросси ӧтчамзы ортчиз. Вятской, Казанской, Уфимской, Пермской но Самарской губерниослэсь 102 делегатъёс люкаськизы. Ужрадэ дасянэ мыло-кыдо пыриськиз Алабгоысь исполкомлэн тӧроез но «Гудыри» газетлэн редакторез Трофим Борисов.

Ӧтчамын со радъян ужпумъя докладэн вераськиз, соя Удмуртъёслэн ужъёссыя шор комиссариатэз кылдытон сярысь пумкылъян ӧтчамез история понна пусйымон кариз
Людмила Бехтерева, Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсезлэн воштӥсез, истори тодосъя доктор, профессор

Выль ёз губерниослэн но уездъёслэн исполкомъёссы бордын ужась вань удмурт секциослэсь ужзэс радъяны кулэ вал. Комиссаре Трофим Борисовез бырйизы.

Мускоын ӧтчамлэсь йылпумъянъёссэ юнматыны мынэм Борисов но Гусев Иосиф Наговицынэн пумиськизы, со Совето партийной ужъя шор школалэн секретарез, музъемъя, сиён-юонъя но кооперацияя секциосын кивалтэ вал. Удмурт комиссариатэн кивалтыны куронлы со соглаш луиз. Партилэн комитетэз солы дурбасьтӥз но удмуртъёслэн ужъёссыя комиссаре юнматӥз.

Кутскиз кун автономиез кылдытон понна луонлыкъёсты дасян, кадръёсты люкан но дышетон, удмурт кылын валэктон нуон сӧзнэтэз радъян уж

Партилэн шор комитетэз но Наркомнац удмурт калыклэсь нимаз улосвылзэс кылдытонлы озьы ик дурбасьтӥзы. Курон одӥг гинэ пуктэмын вал: вуоно административной кылдытэмын улӥсьёс пӧлын тросэз выжы калык луыны кулэ. Удмуртъёс та интыын огазе уло вал бере, куронэз быдэстыны капчи вал.

Кулэ ужкагазъёсты ӝоген дасязы но 4-тӥ шуркынмонэ 1920-тӥ арын Огъросси шор быдэсъясь комитет но РСФСР-ысь калык комиссаръёслэн кенешсы удмурт калыклэсь автономной улосвылзэ (Вотской автономной область) кылдытон сярысь декрет кутӥзы. Ужкагаз улэ кинюртэмзэс Михаил Калинин но Владимир Ленин пуктӥзы

Россиысь удмуртъёслэн III ӧтчамзылы сӥзем конференциын Сарапулын

8 фото

Россиысь удмуртъёслэн III ӧтчамзы удмурт школалэн ӝужан сюресэз

Макем секыт вал, дыр, удмурт калыклы кунлык басьтон ужез кутскисьёслы. Россиын кунэн кивалтон радлык чутрак воштӥськиз, калык сое возьма вал шуыны уг луы. Со сяна, тросэз удмуртъёс дышетскымтэ вал ай. Соин но III ӧтчамын йӧскалык школаосты кылдытон сӧзнэт (система) кылдытонлы нимысьтыз саклык висъязы.

Конференциын «Удмурт Кенеш» огазеяськонлэн Ижкарысь Октябрь ёросысь ёзэтэзлэн кивалтӥсез, Кузебай Герд нимо йӧскалык премилэн лауреатэз, педагогика тодосъя кандидат Валентина Ившина вераз, кыӵе юанъёс пуктӥзы ӧтчамын дышетон сӧзнэтэз кылдытон понна:

- марлы дышетоно со удмурт школаын? Кыӵе солэн ужпумъёсыз, кыӵе пуштросэз луыны кулэ;

- кин дышетоз? Дышетӥсьёсты дасян;

- кинэ дышетоно? Анай-атайёс пиналъёссэс школае нуыны кулэ;

- маин дышетоно? Кулэ учебникъёс, пӧртэм пособиос. Со сяна, утчано но шедьтоно школаослы юртъёс, соосты дышетон тӥрлыкен тырмытоно;

- кызьы дышетоно? Дышетон удыслы тодосъя ужасьёсты дасян. Валано, кыӵе грамматика луыны кулэ, кызьы со пыкъяськыны кулэ академической грамматика вылэ, кыӵе амалъёсын дышетоно;

- кин вань та ужез огазея но радъя, школаосты кылдытон понна кылкутэ? Дышетон удыслы кивалтӥсьёсты дасяно;

- коньдон висъян радлык чаклано.

Вераны кулэ, 1919-тӥ арын РСФСР-ын ӧжыт лыдъем калыкъёслэн школаоссы сярысь пуктэт потӥз. Соя котькуд калыклы дышетон ужез вордскем кылын радъяны луонлык сётӥзы. Йӧскалык школаос усьтыны быгато вал отын, кытын ваньмыз яке 85 процентлэсь уноез пиналъёс одӥг выжыысь луо, шуом, удмуртъёс. Нош выжы калыкъёслэн пиналъёссы вань нылпиос пӧлын 85 процентлэсь ӧжыт ке, со школаос суро лыдъясько вал, дышето со кылын, кудзэ тросгес пиналъёс тодо.

Куинетӥ съезд усьтӥськыку, ачиз Борисов но, Наговицын но, Кузебай Герд но умой тодмо ни вал та куронъёсын, соин ик дышетон ужез азинтон сярысь ужпум ӝутэмын вал съездын туж лэчыт но туж валаса
Валентина Ившина, педагогика тодосъя кандидат

1920-тӥ арозь Сарапул, Малмыж, Алабго, Глазов уездъёсын 175 удмурт школаос усьтӥзы. Со ӧжыт ӧвӧл, угось 40 процентэз пиналъёс грамотаез чик уг тодо вал, пусйиз Валентина Ившина.

Самой секытэз ужпум вал та школаосты усьтыку – кадръёсты дасян. Удмурт комиссариатлэн нырысетӥ кивалтӥсез Иосиф Алексеевич Наговицын тазьы шуэ: туж кулэ удмурт кадръёсты дасян, но соос ӧвӧл. Дасяно соосты выльысь но со материалэз кутыса, кудӥз, пе, асьмелэн ки уламы
Валентина Ившина, педагогика тодосъя кандидат

Озьы гожъяськыны-лыдӟиськыны быгатӥсь удмуртъёсты лыдъян-гожтон ортчытӥзы. Валентина Ившиналэн верамезъя, церковно-приходской, миссионерской школаосын дышетскемъёс пӧлын удмуртъёс ӧжыт ӧй вал. Соосты ик училищеосы, техникумъёсы дышетӥсьлэсь ӧнерзэ басьтыны келязы.

Куинетӥ съезд удмурт школаез усьтонын туж бадӟым инты басьтӥз. Тани 18-тӥ арын 15 процентэз гинэ грамотаен вал удмуртъёс, 29-тӥ арын, 30-тӥ аръёсы 34,3 процентлы соос будӥзы
Валентина Ившина, педагогика тодосъя кандидат

1929-тӥ арын 235 удмурт школа ужаз ни, отын 30 сюрс 512 пиналъёс дышетскизы. Со сяна, 231 суро школаосын удмурт нылпиос анай кылынызы тодон-валанъёс басьтӥзы.

Удмурт йӧскалык движение туала вакытлэн куронъёсыз азьын

Удмурт автономилэсь дауръем историзэ учконо ке, отын туала вакытлы адӟем карымонэз но тырмыт. Удмуртъёслэн куинетӥ ӧтчамзы ас вакытаз туж визьмо, история ласянь туж кулэ луись решение кутӥз – удмурт калыклэсь выль Россия пала дурбасьтэмзэ юнматӥз, удмуртъёслы выль властьлэсь вормонъёссэ утьыны курыса вазиськиз, ӧжыт лыдъем калыкъёслы паськыт, югыт сюрес сӥзиз
Юрий Перевозчиков, Удмуртиысь лулчеберетъя кылёсбурез кун ласянь утёнъя агентстволэн кивалтӥсез, истори тодосъя кандидат

Туннэ асьмеос чылкак мукет югдурын улӥськом но ужаськом. Но азьвыл сямен ик калыкез ӝутон ужын нырысь интыын анай кылдэ утён но азинтон, калык сям-йылолъёсты тодӥсь егитъёсты будэтон, анай кылын книга-газет лыдӟыны луонлыкъёс кылдытон, пусйиз со.

Истори тодосъя кандидатлэн верамезъя, удмурт кылэз пӧртэм удысъёсын кутон ужез азинтоно, та ласянь эшшо ӟечгес ужано. Кыл – со калыклэн устолыкез гинэ ӧвӧл, удмурт кыл – со элькунлэн культураен но историен туж кулэ гердэз. Калыклэсь кылзэ быдтон - со йыруж. Озьы ик шуыны луысал историысь но культураысь синпелетъёсты быдтон сярысь но, вераз Юрий Перевозчиков.

Национальной республикаосын анай кыл сярысь юанъёс кылдыны кулэ ӧвӧл. Кыл – со улослэн аспӧртэм матрицаез, кабез но инъетэз. Со шӧдӥськыны кулэ республикаын улӥсь котькуд адямилэн улоназ – кинлэн ке тросгес но мургес, кинлэн ке ӧжытгес. Кыл – астэ шӧдонлэн пусэз. Кыл юрттэ асьме улон интымылы, республикамылы, мукетгес, культура ласянь тунсыкогес луыны, азинскыны. Удмурт кыл - культурая объект выллем, соин ик республикаямы котькуд улӥсь со доры сюрес шедьтыны быгатыны кулэ
Юрий Перевозчиков, Удмуртиысь лулчеберетъя кылёсбурез кун ласянь утёнъя агентстволэн кивалтӥсез, истори тодосъя кандидат

Солэн верамезъя, удмурт кылэн, лулчеберетэн герӟаськем ужпумъёсты эскерон понна аспӧртэм удмурт парламент кылдытыны умой луысал. Отчы интыосысь быръем депутатъёс мед пырысалзы. Валамон ин, со понна муниципал ёзъёсысь депутатъёсты быръёнъёсы удмуртъёс одно ик пыриськыны кулэ.

Озьы ик Юрий Перевозчиков вуоно арын калыкез лыдъян-гожтон ужрад пумысен но сюлмаськыны куриз. Солэн верамезъя, котькуд дышетскон ар кутсконын со нырысетӥ курсэ дышетскыны лыктэм студентъёслэсь юа, кыӵе выже соос асьсэдыз пырто. Ӝыныез пала валэктон сётыны шугъясько.

Кинлэн ке анай-атаез пӧртэм калык пӧлысь, кин ке шугъяське анай кылзэ, культуразэ тодымтэеныз. Мар вералозы соос перепись дыръя? <…> Малпаськоно, мар кароно ӟучомем удмуртъёс перепись дыръя ас выжыоссэс медаз вунэтэ шуыса но котькуд учыре котькуд удмурт аслаз калыкез, культураез но кылыз шоры ӟечен мед учкоз
Юрий Перевозчиков, Удмуртиысь лулчеберетъя кылёсбурез кун ласянь утёнъя агентстволэн кивалтӥсез, истори тодосъя кандидат

Россиын улӥсь украинецъёс, немецъёс но армянъёс быгато ӟучомыны, но дунне вылын вань Украина, Германия но Армения, нош мукет Удмуртия дунне вылын ӧвӧл ни, асьмелы татын улыны, пусйиз со.

Йылпумъянъёс

Али быдэс арзэ асьмеос валэктон уж нуны кулэ калык пӧлын, кыӵе со лыдпус, марлы асьмеос сыӵе пусйиськом со 100 арез кунлыкмылы тырмонзэ. Кызьы со кылдэмын, кин со бордын ужамын, кыӵе шуг-секытъёсын соос пумиськылӥзы, со пумысен туннэ трос гинэ чузъяськизы вераськонъёс. Кыкетӥез, мон малпасько, бадӟым озьы ик юан, котькудмылэн йырамы кылиз, кыӵе югдурын али асьмеос, кыӵе, шуом, ляб интыосмы яке кужмо интыосмы вань
Татьяна Ишматова, «Удмурт Кенеш» огазеяськонлэн тӧроез

Солэн верамезъя, Сарапулын ортчем конференциын ӝутэм ужпумъёсъя рос-прос йылпумъянъёс «Удмурт Кенеш» огазеяськонлэн Пичи кенешаз лэсьтозы. Отын ик вуоно арын вань удмуртъёслэн XIV ӧтчамазы поттоно ужпумъёсты пусъёзы. 



Наверх
Вниз