Ижкар-13 °C
23 -тӥ толшор 2021 Кӧснунал
18+

Ужаса но кырӟаса: Дэбес ёросысь Алевтина Тимофеева 90 арес тырмонзэ пусйиз

  • 9515
  • 0
Такагурт / Удмуртия
Ужаса но кырӟаса: Дэбес ёросысь Алевтина Тимофеева 90 арес тырмонзэ пусйиз
Туспуктэм: Руфима Ложкина

Нырысетӥ толсуре Такагуртысь Алевтина Ивановна Тимофеевалы 90 арес тырмиз. Арлыдыз шоры учкытэк, мылкыдыз солэн задор но егит.

Кырӟаны-вераны яратэ

Котырес лыдпусэныз арлыдо нылкышноез ӟечкылазы нылпиосыз, ӵыжы-выжыосыз, эшъёсыз, гуртысьтызы но ёросысь ветеран огазеяськонъёс.

- Ой, лачак куноос вуылӥзы! Дэбесъёс шобрет ваизы, сю аресозь улӥд на ке, кровать кузьмаломы, шуизы, - пальпотыса маде Алевтина Ивановна. – Подружкаосы, Людмила Фёдоровна Хохрякова, Римма Фёдоровна Куртеева, ӟечкыланы ветлӥзы. Туж шулдыр пукимы, кырӟамы.

- Мамамы кырӟаны туж яратэ, - верало нылкышно вӧзын пукись нылпиосыз. – Егит дыръяз гуртысьтымы ансамблен Ижевске но выступать карыны ветлӥз.

Алевтина Ивановна трос малпаса ӧз улы, яратоно кырӟанзэ мытӥз. 90 аресъем нылкышнолэн куараез жингрес на ай.

- Кырӟам сяна, сцена вылын серемес учыръёс сярысь мадисько на вал, - азьланьтэ со но, вис карытэк, удмурт кылын басня вераны кутске. Кузь кылбурез, нокытчы учкытэк, одӥг шокчемен кадь лыдӟе.

- Таиз вакчигес, - лыдӟонзэ быдэстыса пусъе юбиляр. – Кузьзэ басняме кема кылзоно луоды.

- Кӧлон азяз кылбуръёс, молитваос ас понназ сипыр-сипыр лыдӟыса улэ, – шуныт пальышаса верало пиналъёсыз. – Азьло книга, газет лыдӟыны яратэ вал. Али синмыз умой уг адӟы ни.

Узыр анай

Алевтина Ивановнаез узыр анай шуыны луоз. Кузпалыныз соос вить нылпи будэтӥллям. Жаляса верано, самой бадӟымез 50 аресаз улонысь кошкем. Витя пиез кузпалэныз Ленинградской областьын уло, гурт удысын тыршо. Вера нылыз Глазов ёросысь гурт возёсын бухгалтер луыса ужа. Коля но Вася пиосыз семьяосынызы Такагуртын уло, отын ик ужало. Вань улытозяз гурт удысын тыршем нылкышно пиналъёсызлы но гурт ужлы яратон пыӵатыны быгатэм.

Нуналскын 6 кубометр пу

Алевтина Ивановна война вакытэ 14 арескысен сикын ужаса улэм.

- Игра ёросысь Удмурт Лоза гурт вӧзын пу дасямы, - вера со. – Нуналлы быдэ норма сётъязы – кык адями куать кубометр пу дасяны кулэ вал. Нормаез быдэстӥськод ке, 600 грамм нянь сёто, уд ке, сютэм кылиськод. Писпуосты погыръяса, соосты шпалъёслы, рудостойлы, коръёслы но пулы висъяськомы вал.

Еж, пинал нылмурт куинь тол сикын секыт воргорон ужез быдэсъям. Лек тыложе Смоленск улосвылын тятяез бырыны шедем. Сикысь гуртаз бертэмез бере, сое кладовщике пуктӥллям.

Азьмынӥсь ужась

- Ужаны кыдёке, мукет гуртэ, ветлоно вал, – маде Алевтина Ивановна. – Семьяе кылдэм бере секыт луиз отын ужаны. Мамае пиме ныпъетэн нонтыны вайылӥз. Соин Такагуртэ фермаын ужаны куриськи. Нырысь скал кыски, собере фермаен кивалтыны оскизы. Со сяна, осеменатор луыса ужай на. Колхозамы, ёросысь мукет гурт возёсъёсын ӵошатыса, ваньмызлэсь трос кунянъёс вордскылӥзы.

Алевтина Ивановнаез ӟеч тыршемез понна Москвае ВДНХ-е ысъязы.

- Ёросысьтымы куинь кузя ветлӥмы, – тодаз вае нылкышно. – Поездын калык лачак, пуксьыны инты ӧвӧл. Соку ми удмурт сямен котькуд слог бере «ф» куара ватсаса вераськыны кутскимы. Тазьы – ӟефечбуфурефесь (ӟечбуресь). Калык котырысьтымы палэнскыны кутскиз, таос олокинъёс сыӵеесь шуыса. Москваозь пуксьыса мынӥмы, отын пӧртэм тунсыко интыостӥ экскурсиен ветлӥмы.

Чупрес, задор мылкыдо, котькытчы вутскись нылкышноез гурт калык депутатэ но бырйылӥз. Алевтина Ивановна быгатэмезъя гуртоосыз сярысь сюлмаськылӥз.

Шунытэсь тодэ ваёнъёс

- Азьло аръёсын ӵошатыса, туала улон кыӵе потэ тӥледлы? – юасько солэсь.

- Ма, выжыкылын кадь улӥськомы: гур ӧвӧл эстоно, пу но ву ӧвӧл пыртылоно, киын ӧвӧл мисьтаськоно… Туэ гуртысьтымы сюресмес асфальтировать каризы на. Корка дорозямы асфальт ӧвӧлгес вуттэмын, соин ик пиналъёс выль сюресэз возьматыны машинаен нуллӥзы. Одӥг пол асфальт вылтӥ но ветлоно шуыса, мынӥ. Сюрес вылэ султӥ но - бӧрдӥсько, кырӟасько… Инмар ӟеч улон мед сётоз та сюресэз лэсьтӥсьёслы.

- Ортчем аръёсы но марке но умоез, ӟечез вал, дыр?

- Соку ми пиналэсь вал. Егит дыръя мылкыд капчи, син адӟе, пель кылэ. Секыт ке но вал, шулдыр улӥмы. Ӵош ужаллям, турналлям, мажсаськылӥм. Кырӟаса ужаллямы. Куараосмы шур кузя кыдёке шуккиськылӥзы. Али егитъёс уг но кырӟало ни. Ульча кузя кырӟаса мынӥд ке, юэмын шуозы.

Шыкысэз половикъёсын тырмемын

Алевтина Ивановна Вася пиезлэн семьяез бордын улэ. Улыно-вылыно корказы вӧлмыт, ӝик-ӝик.

- Гужем мамамы корка уг ик пыра, – вера Светлана кенэз. – Азбаретӥ, бакчаетӥ ветлэ, шуре ваське, курегъёсты, ӵӧжъёсты сюдэ. Одуванчиклэсь куаръёссэ вандылыса, курегъёслы толлы ньыль мешок куасьтӥз. Одӥг но тэк уг улы. Половикъёс оломамында керттӥз ини. Троссэ сётъяз ке но ини, шыкысэз тыр-тыр на. Толалтэ лымы кӧня ке усе ке, шумпотыса корказез ӵужыны потэ ини.

Кин тодэ, оло, ужез яратэмез ик юрттэ Алевтина Ивановналы 90 аресаз но сэзь, чырткем луыны. Нош сюлэмзэ шумпотто, шунто нылпиосыз, 10 внукъёсыз, 11 правнукъёсыз.

Руфима Ложкина

Ивортон Дэбес ёросысь «Байгурезь» газетын потӥз. Ивортодэтъя «Удмуртия» агентстволэн но Удмуртиысь печатья но калыке ивортодэт вӧлмытонъя агентстволэн валче ӵектоссы. 



Наверх
Вниз