Ижкар-13 °C
23 -тӥ толшор 2021 Кӧснунал
18+

Уж соосты кыдатӥз, юнматӥз: Алнаш ёросысь ож мышкын ужам кӧня ке нылкышноос бадӟым юбилейзэс пусйизы

  • 8100
  • 0
Алнаш / Удмуртия
Уж соосты кыдатӥз, юнматӥз: Алнаш ёросысь ож мышкын ужам кӧня ке нылкышноос бадӟым юбилейзэс пусйизы
Туспуктэм: Григорий Фомин

Толшоре асьсэлэсь 90 аресъем юбилейёссэс пусйизы Алнаш ёросысь Казакгуртысь Юлия Матвеевна Николаева, Ӟатчалась Наталья Андреевна Николаева, Улын Котнырысь Марфа Павловна Краева, Юмьяшурысь Зинаида Даниловна Зиновьева, Алнашысь Василиса Степановна Пугачева, Кузёбайысь Парасковья Ефимовна Гареева. Нош Шайтангуртысь Матрёна Алексеевна Капитонова - 95 арессэ. Арлыдоосты вордӥськем нуналэнызы ӟечкылазы ӵыжы-выжыоссы, ёрос кивалтӥсьёс, гурт поселениослэн тӧрооссы. Ож мышкын тыршемъёс Росси Федерацилэн Президентэзлэсь Владимир Путинлэсь гожтэтъёссэ басьтӥзы.

Юлия Матвеевна Николаева Юлия Матвеевна Николаева вордӥськиз Актэмырын. Та вакытэ со пичи пиезлэн семьяяз Казакгуртын улэ. Улон даураз пӧртэм шуг-секытъёс пыр потоно луиз. Вормымтэзэ но вормиз, сютэм улонэз но чидаз. Но нылкышно ноку ӧз ӝожтӥськы, улыны, ужаны тыршиз. Со быдэс улонзэ колхозын кунян сюдӥз. Кузпалыз, Иван Иванович, шоферын ужаз, но жаляса верано луэ, улонысь вазь кошкиз.

Юлия Матвеевна нокыӵе секытъёслэсь ӧз кышка, ассэ жялятэк, котькыӵе уж борды басьтӥськылӥз. Куать нылпиоссэ но ужлы дышетыса будэтӥз. Юлия Матвеевна котькудзылы соослы вань шуныт сюлэмзэ сётӥз, дышетыны тыршиз. Та вакытэ ньылез пенсиын ни. Табере песянаез ӟеч дышетскеменызы но уженызы куать внукъёсыз шумпотто.

Марфа Павловна Краева Марфа Павловна Краева вордӥськиз Выль Утчанын, трос нылпиё семьяын. Война кутскемен атаез но агаез фронтэ кошкизы. Дорысь вань секыт уж, нылпиосты учкон анаезлы кылиз. Озьы нылаш анайзэ жаляса, 4 классэз йылпумъяса, колхозэ ужаны кутскиз. Бадӟымъёсын ог радын кунян сюдӥз, ыжъёсты чаклаз. Нош ӧжыт будэмез бере, сое Каркалае нюлэс кораны лэзизы. Эшъёсыныз ӵош ӝужытэсь писпуосты погыръязы. Туж секыт вал со вакытэ, сиёнзы ӧз тырмы, дӥськутсы кот, кесяськемын. Куасьтӥськон интызы ӧвӧл. Озьы ке но сётэм планзэс быдэсъязы, ныл мугорзэс жалятэк, пиосмурт ужез быдэсъязы. Доразы жуммыса бертылӥзы.

Война бырем бере но улон капчи ӧй вал на. Вазь ӵукнаысен бусые гырыны пото ни вал, нош уйёсы пудо возьмазы. Кызь аресаз бызиз, кузпалэныз ӵош вить нылпи будэтӥз. Марфа Павловналэн картэз но, ачиз но котьку ас удысъёсазы ӟеч азинсконъёс басьтыса тыршизы.

Кузпалыз тракторен ужаз, нош ачиз - пудо вордонын. Со - ужысь ветеран. Солэн тыршемез пӧртэм данъетъёсын пусйылэмын. Марфа Павловна киужлы усто кышномурт. Дэремъёс нылпиосызлы сяна, гуртоосызлы но вурылӥз, ваньмыкуз керттӥськиз, пужыятӥськиз. Сое мӧйыос но пиналъёс но яратӥзы, гажазы.

Ас улоназ Марфа Павловна трос куректонэз адӟиз: 45 аресаз кузпалзэ ыштӥз, 51 аресаз нылыз улонысь кошкиз. Шуг-секытъёс пыр ортчыса но ваньзэ чидаз. Солэн 15 внукъёсыз но 18 правнукъёсыз. Мӧйы нылкышно туннэ но ужтэк уг пукы. «Ужаськод ке, сюлмын но капчи луэ, улэм но потыны кутске», - мыньпотэ со.

Василиса Степановна Пугачёва Василиса Степановна Пугачёва вордӥськиз Мукшурын. Будӥз со песянай-песятаез вӧзын. Песятаез быгатыса крезен шудӥз, соин ик ӵемысь кырӟанъёс дышетъязы. Сизьым аресаз бускель гуртэ Кадикуртэ школае мынӥз. Нош начальной школаез йылпумъян аре война кутскиз. Атайзэ фронтэ басьтӥзы.

Гуртэ нылкышноос но нылпиос гинэ кылизы. Колхоз уж ваньмыз соос вылэ усиз. Куать классэз йылпумъяса, нылаш ужаны кутскиз. Берлогес трактористэ дышетскон курсъёсты ортчиз. Нырысь прицепщикын ветлӥз. Нош 1949-1959 аръёсы ХТЗ7 тракторен ужаз. 1960-тӥ арын ёрос больницае санитаркае кутскиз, нош пенсие потытозяз нылпи садын тыршиз.

Василиса Степановна но Леонид Алексеевич Пугачевъёслэн ньыль нылпизы вордӥськиз. Ваньзы соос Алнашын уло. Табере Василиса Степановна узыр песянай. Пенсие потыса но со тэк пуконэз ӧз тоды, внукъёссэ будэтыны юрттӥз, яратӥз губи бичаны, керттӥськыны.

Парасковья Ефимовна Гареева вордӥськиз ёросысьтымы Варзи-Омга гуртын. Дас аресаз сирота кылиз, дядяезлэн семьяяз будӥз. Нырысь Голюшурма школаын дышетскиз. Нош 12 аресаз «Культурник» («1 Май») колхозын ужаны кутскиз. Эшъёсыныз ӵош бусыын уриськиз, турнаськиз, пудо возьмаз, рядовойын тыршиз. Война аръёсы Каркалайын, Сюмси, Игра ёросъёсын нюлэс дасяз. Ужам стажез ваньзэ-ӧвӧлзэ 40 арлэсь трос люкаське.

Парасковья Ефимовна котькыӵе удысын синмаськымон тыршиз. Со сярысь верало дуно кузьымъёсыз, юбилейной медальёсыз. Со - ужысь ветеран. Кузпалэныз ӵош будэтӥзы но дышетӥзы куать нылпи. Табере соослэн ваньзылэн ас семьяоссы. Та вакытэ ож мышкын тыршем нылкышно Кузёбайын пичи пиезлэн семьяяз улэ.

Матрёна Алексеевна Капитонова Матрёна Алексеевна Капитонова вордӥськиз Карйылын. Ньыль классэз йылпумъяз но школае ӧз ни мыны. Дораз анаезлы юрттӥськиз: керттӥськиз, черсӥськиз, вынъёссэ, сузэръёссэ чаклаз. Ӧжыт будэмез бере, колхозэ ужаны потаз. Гыриз, кизиз, валэн ужаз. Отӥяз Ижын аэродром пуктонэ, Елабуга, Кекоран сюрес лэсьтонэ пыриськиз, Каркалайын, Пычасын нюлэс дасяз. Котькыӵе уж борды мед басьтӥськоз, котьку азьветлӥсьёс радын ветлӥз. Ӟеч ужамез пӧртэм данъётъёсын пусйылэмын. Нылкышноез гуртоос гажазы но гажало.

Пенсие потыса но со ялкарыны ӧз дырты на, кунян сюдӥз, нылпи садын, начальной школаын выж миськисьын ужаз. Кузпалэныз ӵош вить нылпи будэтӥзы. Табере нылкышно внукъёсыз но правнукъёсыз понна шумпотэ ни.

Зинаида Даниловна ЗиновьеваЮмьяшурысь Зинаида Даниловна Зиновьевалэн улон сюресэз капчи ӧй вал. Пичи дырысеныз ик атайтэк кылиз. Война аръёслэн секытсы анаезлэн но пиналъёслэн пельпум вылазы усизы.

- Дышетскыны мылкыды котьку вал, - вера арлыдо нылкышно. – Начальной школаез йылпумъяса, витетӥ классэ Ӟатча школае мынӥ. Но ӝыны ар сяна, ӧй дышетскы. Пыдъёсысьтым кутъёсы сурыкмизы, кутаны нокинлы вал, басьтыны уксёмы ӧй вал. Озьы дышетсконме куштӥ. Колхозэ ужаны потӥ. Мар гинэ ӧй ужа: валъёсын гыри, кизи, уриськи, етӥн ишки, фермаын ужай, кунян сюдӥ.

Колхоз ужлэсь нылкышно ноку ӧз кышка. Котькуд мытэм ужзэ лулысь-сюлмысь быдэсъяз. Зинаида Даниловналэн вань ужан сюресэз колхоз фермаын ортчиз. Кузпалэныз Андрей Васильевичен адӟем карымон вить нылпи будэтӥзы. Та вакытэ арлыдо нылкышно ас вордскем гуртаз пиезлэн семьяяз улэ. Сое матысьёсыз ярато, гажало, данъясько.

Людмила Сурчакова, Ирина Ильина, туспуктэмъёс Людмила Сурчаковалэн

Ивортон Алнаш ёросысь «Алнаш куара» газетын потӥз. Ивортодэтъя «Удмуртия» агентстволэн но Удмуртиысь печатья но калыке ивортодэт вӧлмытонъя агентстволэн валче ӵектоссы. 



Наверх
Вниз