Ижкар-15 °C
28 -тӥ тулыспал 2021 Воскресенье
18+

Лушкемен сием чабей: ож вакытлы тупам пинал дырысь тодэ ваёнъёс

  • 5853
  • 0
Подшивал / Удмуртия
Лушкемен сием чабей: ож вакытлы тупам пинал дырысь тодэ ваёнъёс
Туспуктэм: «Ӟардон» газетысь

Быдӟым война кутскыку, Дэри ёросысь Подшивалысь Агния Степановна Мараткановалы куинь арес гинэ вал. Пичи дыр вакытъёссэ со синвуаськыса тодаз вае:

— Айиме фронтэ нуизы, мамае уен-нуналэн ужаз, ми сое ӧм но адӟылэ. Милемыз, нылпиосыз, бадӟымез Ольга сузэрмы возиз-будэтӥз. Мар шедьтӥз: пушнер-а, пот-а — ваньзэ сюдӥз. Гурт котырын одӥг турын но ӧз кыльылы, оло. Пушнерен шыд пӧзьтылӥм, нянь интыын пот вал. Нырысь потэз мешокен бичаськом, гурын куасьтӥськомы, вукоын изӥськомы вал. Собере гинэ пырдӥсь нянь пыжылӥмы. Тулыссэ бусыысь сӥзьыл кылем картошкаез бичаса сиылӥмы. Зэмос нянез, сакар ӧм адӟылэ.

Ярам, коть гужемзэ каньылгес луылӥз. Сютэм пиналъёс пӧртэм емышъёсын — льӧмен, узыен — кӧтсэс тырылӥзы. Азбарын пудо вань дыръя но, ӟеч сиськыны уг луы вылэм. Курегпуз, сӥль, йӧл — ваньзэ фронтэ кулэ вал келяны.

— Мар ке со пичи кыле ик вал но, милемлы со кӧтмес тырытыны ӧз тырмылы. Ай, тазэ учырез верало на. Одӥг пол мамае но мукет кышноос сушилкае чабей куасьтыны мынӥзы. Нылы, шуэ, ваське, ява, сиемды туж потэ ук. Ми чугункаын чабей пӧзьтом. Озьы тӥни лушкемен чабей сиемме тодко, — шуэ Агния Степановна.

Дӥськутсы гинэ но мискиньёслэн йӧнала ӧй вал. Дӥсьмес-кутмес, пе, миськиськом но гур котырын куасьтӥськом вал. Нош воштоссы ӧвӧлэн, нылпиос шобретэн шобырсыкса куасьмемзэ возьмаллязы.

Со дыре ик, Макаровъёс ыж вордӥзы бере, Ольга пыдвыл, пӧзьёс керттылӥз. Но шуныт арбериос котьку сямен фронтэ кошкылӥзы.

Бадӟымъёслэн нылпиоссэс эркияны ваньмон дырзы ӧй вал. Ужазы мӧйыез но, покчиез но.

— Со картошкаез но, ӵукна куинь-ньыль часэ султыса, анайёсмы октыны пото вал. Милемыз но, нылпиосты, сьӧразы поттылӥзы. Тыраз ведраез ӝутыны ум вормиське… Озьы ик, секытэз пичиысен ӝуткаса, пыдъёсыным али уг луы ни. Нош гужемзэ, тазьы ик вазь ӵукна султыса, пудоослы турын дасяллязы.

Война вакыт вань валъёс бырылӥзы: соосты чисто ож лудэ нуизы, куд-огъёсыз нош висьса кулылӥзы. Соин ик бакчаосты ошен гырылӥзы. Мискиньёс, сютэм улэмен но секыт ужез быдэсъямен, тӥясько вал, — али ке но син азяз пуктэ покчи дырысьтыз суредъёсты Агния Маратканова.

Озьы но, тазьы но быдэсмим, войнаез ортчытӥм, пе. Пичи Агниялы школае мынон дыр вуиз. Нош пыдэ пононэз ӧвӧл, кут гинэ но кутаны некинлы.

— Сиён тырмыт сюрымтэен, дышетскыны ум валаське. Математика мыным, сютэм муртлы, туж секыт потэ вал. Со понна историез, немец кылэз яратко вал. Айн, цвайн, драйн — таӵе капчигес кылъёсты тодко на. Ма, учкы ай кӧня ар ортчиз ини, троссэ дышетэммес вунэтӥ ини. Немец кылъя дышетӥсьмы туж мусо вал, сое туж яратӥм. Синъёсыз лыз зарезь кадь вал, — школае ветлон дыръёссэ тодаз вае арлыдо мурт.

Ньыль классэз пиналъёс Подшивалын дышетскизы. Витьысен ини Никольское ветлӥзы. Агния Макарова сизьым классэз йылпумъяса, отӥяз визьнод люканы ӧз быгаты ини. Улон секыт вал бере, чалякгес ужаны потоно луиз

Нылмурт городэ ужаны мынӥз. Отын со стройкае уж шедьтӥз, штукатур луыса тыршиз. Городын Агния Степановна вить ар пала улӥз. Гуртын будэм нылашлэн берен бертэмез потӥз. Вылаз ик патер понна бадӟым дун тыроно луылӥз, нош уждунэз ичи вал. Подшивалэ берытскемез бере, нылмурт скал кыскисе ужаны кариськиз.

— Татын совхоз луиз. Уксё басьтыны кутским, дӥсяським. Отӥяз улонмы пумен умойгес но умойгес луиз ини, — вера Агния Степановна.

… Война со война ини. Адями улонъёсты, сюсьтылъёсты сямен, кысылӥз. Кӧня калык ӧз берытскы ож лудысь, лыдъяса но уд быдты. Тани Подшивалысь но воргоронъёслы кинлы ке удалтӥз бертыны вордскем интыяз, нош кин ке мурт шаерын синъёссэ кыниз. Агниялэн семьяез шудоос пӧлы пыриз — папазы войнаысь бертӥз. Гын сапег гындыса улӥз со. Но кема ӧз чида, висьыны кутскиз но кулӥз.

— Милемлы весь шуэ вал: пыддэс эн кынтэ, мон, окопын кылльыса, пыдме быдтӥ, табере тазьы курадӟисько ини, — айизлэсь та кылъёссэ али ке но тодэ на нылыз.

Степан Никитич Макаров Германиын пленын но вал. Кусказ шыр кадесь сьӧд виштыос пуксемын. Малы таӵе кускыд юанлы, со вера вал: «Пленысь поттыкузы, котькуд муртэз кортэн жугыса поттылӥзы». Кудӥз, тужгес но ӟигартэмъёсыз, дыр, отчыязы ик усьса кулылӥзы. Войнае ветлэмез пумысен Степан Никитич оломар но семьяосызлы вера вал. Агния Степановна айизлэсь мадемъёссэ троссэ вунэтӥз ини. «Мон тямыстон кыкам ин, соин уг но валаськы ни вераны», — шуэ песянай.

Али Агния Степановна пиеныз но кенэныз улэ. Внукъёсыз городэ кошкиллям, ваньзы сямен ас семьяосынызы уло. Нунокъёсыз песянайлэн ньыль кузя, сомында ик правнукъёсыз но. Песянайзы доры ӵем вуыло, мӧзмыны уг сёто.

Юлия Малых, туспуктэм авторлэн

Ивортон Дэри ёросысь «Ӟардон» газетын потӥз. Ивортодэтъя «Удмуртия» агентстволэн но Удмуртиысь печатья но калыке ивортодэт вӧлмытонъя агентстволэн валче ӵектоссы. 



Наверх
Вниз