Ижкар+15 °C
2 -тӥ пӧсьтолэзь 2020 Покчиарня
16+

Сяська будэтӥсь, суредась кадь - Дэбесысь Валентина Хардина пӧртэм буёло будосъёслэсь суредъёс кылдытэ

  • 217
  • 0
Дэбес / Удмуртия
Сяська будэтӥсь, суредась кадь - Дэбесысь Валентина Хардина пӧртэм буёло будосъёслэсь суредъёс кылдытэ
Туспуктэм: «Байгурезь» газет

Дэбесысь Валентина Васильевна Хардина сяськаос котырын вырыны туж яратэ. Кыӵеосыз гинэ ӧвӧл солэн садаз! Ваньмыз утялтэмынэсь, ваньмызлы кельшымон инты шедьтэмын.

- Сяськаосы трос, куд-огезлэсь нимзэ но вунэтӥсько, - пальпотэ нылкышно. - Озьы ке но, мыным тужгес но петуниос кельшо. Соосты кемалась будэтыны кутски ини, соин сямзэс ӟеч тодӥсько.

Валентина Васильевна верамъя, петунизэ со май толэзьлэн кутсконаз ик теплицаысь поттылэ. Сяська куак пуштрес мед луоз шуыса, будӥсь вайёссэ вандылэ (прищипывать каре). Озьы одӥг вайысь кык вай потыны кутске.

- Мар кароно, петуниос котьку чебер мед сяськаялозы шуыса? - юасько сяська будэтӥсьлэсь.

- Соос липет улын умойгес будо. Мон соосты, кашпоосы мерттыса, тӧллэсь но зорлэсь ышыг интыосы интыясько, кылсярысь, пырон ӧс азе, беседкаосы. Озьы ик кырын но, тӧлтэм азьын, вазонъёсын умой будо.

Валентина Васильевна петуниез мерттыку сортсэ чаклано шуыса пусъе. Ачиз со берло дыре «сурфиния» каскадной сортэз мерттэ. Солы зор но, тӧлъёс но кышкыт ӧвӧл, шуэ.

- Кыӵе музъеме мерттӥськоды петунидэс?

- Торфез, гыбедэз огшоры сюен сурасько, суперфосфат кӧня ке ватсасько. Будэмзыя арняяз одӥг пол пеньлэсь, кыедлэсь, жуг-жаг турынъёслэсь лэсьтэм суретъёсын киськасько.

- Кидысъёс кытысь басьяськоды?

- Кык-куинь ар ини мон ачим петуниосты черенковать карисько. Августлэн пумаз юн, таза вайёссэ пичиен вандылӥсько но горшокъёсы мерттӥсько. Тол ӵоже соос будо, феврале соосты нош ик черенковать карисько. Озьы ог 100 пала петуния череноке люкаське. Мон соосты эшъёсылы, ӵыжы-выжыосылы, тодмоосылы сётъясько.

Валентина Васильевна мукет сяськаосты но трос мерттэ. Азбарзэ тулысысен лымы усьытозь пӧртэм будосъёс шулдырто. Вазь тулыс ик яркыт буёлъёсын сюлэмез шумпоттыса пишто тюльпанъёс, примулаос, бадан но мукет сяськаос.

-Таосыз тӧлӟо ке, бордазы гужем сяськаяськисьёссэ мерттӥсько, - вера нылкышно. – Кылсярысь, таяз клумбаям тюльпанъёс вӧзын однолетней георгинъёс будозы, нош мукетаз чеберлыксэс усьтон дырзэс розаос витё.

Сяська будэтӥсь, суредась кадь, тулысысен сӥзьылозь отчы яке татчы яркыт виштыос ватса, пӧртэм буёло будосъёсын синмаськымон суредъёс кылдытэ. Ваньмыз убоосыз али уг на сяськаяло но, кызьы верало Валентина Хардиналэн тодмоосыз, гужем соос шорысь синэз но воштыны уг луы

- Розаос будэтэме туж потэ, - азьланьтэ веранзэ нылкышно. - Кӧня коньдон быдтӥ ини соосты басьяса. Мерттӥсько, нош соос толалтэ кынмо, быро. Розалэсь пӧртэм сортъёссэ ӵошатыса, «Спрей» сорт яраз, со умойгес толъе. Азьланяз сое тросгес мерттыны малпасько.

Валентина Васильевналэн тужгес но яратоно сяськаез - бузульник. Мынам со сярысь та дырозь кылылэме но ӧй вал. Али, тулыс, со уг сяськая на. Но гужем зэмос чеберайлы пӧрме, пе. Бадӟымесь, яркыт ӵуж сяська гурыосыныз амалтэк синэз бордаз кыске.

Хардинъёслэн азбаразы пӧртэм будосъёс будо
Фото: Руфима Ложкина ©

Хардинъёслэн садазы пӧртэм сяськаяськись куакъёс но будо: айва, спирея, курильский чай, чубушник, слива но мукетъёсыз. Азбарлэсь одӥгзэ люкетсэ лысо куакъёс шулдырто. Корка азязы ӝикытак радэн сусыпуос сыло.

– Таосты ми Пермь улосвылысь сикысь ваимы, - вера Валентина Васильевна. – Мерттӥмы но, соос туж умой выжыяськизы. Табере номырин воштэммы уг поты ни.

Озьы ик азбарез пичильтык тымет шулдыртэ, со вӧзысь альпийской горка нырысетӥ тулыс сяськаосын шумпоттэ.

-Тыметамы зор ву люкаське, - маде сяська будэтӥсь. - Кузпалы нимысьтыз гумыос лэсьтӥз, соосъя липет вылысь зор ву отчы мед виялоз шуыса. Та вуэн мон сяськаосме киськасько.

Паймоно, кӧня мылкыд, тыршем кулэ сомында будосъёсты утялтыны. Но шӧдӥське, Валентина Васильевна та ужезлэсь бадӟым шумпотон басьтэ шуыса. Соин ик жадёнэз валатэк тырше, аслыз но, матысь адямиосызлы но ӟеч мылкыд кузьма.

Руфима Ложкина, туспуктэм авторлэн

Ивортон Дэбес ёросысь «Байгурезь» газетын потӥз. Ивортодэтъя «Удмуртия» агентстволэн но Удмуртиысь печатья но калыке ивортодэт вӧлмытонъя агентстволэн валче ӵектоссы. 



Наверх
Вниз