Ижкар+19 °C
7 -тӥ пӧсьтолэзь 2020 Пуксён
16+

Быдӟым оже пыриськем улосчизылы сӥзем «Генеральская гостиная» ӵектосэз улонэ пыӵато Дэбес ёросын

  • 48
  • 0
Дэбес / Удмуртия
Быдӟым оже пыриськем улосчизылы сӥзем «Генеральская гостиная» ӵектосэз улонэ пыӵато Дэбес ёросын
Туспуктэм: Руфима Ложкина

Дэбес ёросысь «Тольён» муниципал кылдытэтын «Генеральская гостиная» ӵектос улонэ пыӵато. Со Вормонлы 75 ар тырмонлы сӥземын но улосчимылэн Фёдор Городилов генерал-майорлэн нимыныз герӟаськемын.

Фёдор Иванович Городилов 1912-тӥ арын Дэбес ёросысь Наговицыно гуртын вордскиз. Фин оже ветлӥз. Быдӟым Атыкай ож дыръя Берлинозь вуиз. Горд Кизили, Отечественной война, Горд Знамя, Ленин нимо, «Знак Почёта» но мукет орденъёсын но медальёсын пусъемын. Вань улонзэ ожгар техникаез азинтон бордын тыршиз, Москваын улӥз, 1989-тӥ арын улонысь кошкиз

Ӵектос муниципал кылдытэтысь ньыль гуртын улонэ пыӵатӥське – Тольёнын, Варниын, Лесагуртын, Турнэсын. Та гуртъёсысь библиотекаосын но Варниысь школаын ожысь но ужысь ветеранъёслы сӥзем экспозициос дасямын. Соос пӧлын нимысьтыз инты басьто Фёдор Городиловен герӟаськем материалъёс но экспонатъёс. Тужгес но узыр экспозиция люкамын Тольён библиотекаын. 

Проектлэн одӥгез кылдытӥсез но улонэ пыӵатӥсез - Тольён школаысь музеен кивалтӥсь Галина Бойкова. 

- Школа музеямы Фёдор Иванович Городилов сярысь узыр материал люкамын, - вера Галина Петровна. – Но мынам кемалась ини сюлэмы бӧрдэ вал, соосты туж ӧжыт адямиос адӟо шуыса. Кӧтӝоже сярысь верай муниципал кылдытэтмылэн кивалтӥсезлы Любовь Александровна Белослудцевалы. Со ӵектӥз Городиловлы сӥзем висъет библиотекае лэсьтыны, «Генеральская гостиная» проект дасяны.

Ӵектос бордын Галина Бойкова но Любовь Белослудцева ӵошен ужазы. Тыршемзы юнме ӧз луы. Проектсэс ёрос конкурсын вылӥ дунъязы, сое улонэ пыӵатыны 30 сюрс манет сётӥзы. Соин Тольён библиотекае стеллажъёс, шкафъёс, чебер укно возъетъёс басьтӥзы. Фёдор Городиловлы но дано улосчиоссылы экспозициос дасян понна Варни, Лесагурт, Турнэс библиотекаосы но уксё висъязы.

Культура юртын ужасьёс но мукетъёсыз мылкыд карисьёс саесъёссэс пужалъяса тупатон ужъёс борды басьтӥськизы: вуоно генерал висъетлэсь борддоръёссэ волятӥзы, буязы, возъетъёс вуризы. Кылем даурлэсь шӧмзэ пыӵатон понна Тольёнысь но Чепыкысь вашкала пуконъёс, ӝӧк шедьтыса ваизы. Висъетсы ӝикыт но чебер пӧрмиз. Нош пуштросэз солэн кыӵе узыр!

Галина Бойкова верамъя, генерал-майор Тольён школаын 1-2 классъёсын гинэ дышетскиз. Озьы ке но, улытозяз отысь дышетскисьёсын но дышетӥсьёсын юн кусыпъёс возиз. Пумиськонъёсы ветлӥз, дораз куное ӧтьылӥз. 1970-тӥ аръёсы Тольён школаысь дышетскисьёс Фёдор Городилов доры Москвае ветлӥзы. Со пумиськонъёсысь трос туспуктэмъёс, тодэ ваёнъёс кылемын. Ваньмыз соос, озьы ик генераллэн пиналъёслы гожтэтъёсыз, ӝикытак альбомъёсы люкамын.

Туж тунсыко учкыны Фёдор Ивановичлэсь война вакытэ лэсьтэм туспуктэмъёссэ. Соос вылысь лек ожлэсь зэмос ымнырзэ адӟиськод. Татын ик одӥгаз ӝажы вылын генераллэн фотоаппаратэз кылле, сое со Тольён школае кузьмаса кельтэм. Озьы ик татысь адӟыны луэ генераллэсь фуражказэ, орденской планкаоссэ, погонъёссэ но мукет арбериоссэ. Туж дуно луэ солэн тодэ ваёнъёсыныз «В годы мирные и военные» книгаез. Мукетыз книгаез вордӥськем Наговицыно гуртэзлы сӥземын. Таосты но Тольён библиотекаысь адӟыны луэ. Ож вакытэз озьы ик возьмато гимнастёрка, Нырысетӥ дунневыл ожысь ваем пуньы, Граждан ож аръёсысь пыӵал штыкъёс.

Вератэк кельтэм уг поты Фёдор Ивановичлэн дышетскисьёслы сӥзёнэз сярысь. Отын со гожтэ, нылпиос ожысь но ужысь ветеранъёсты медаз вунэтэ шуыса. Солэсь сӥзёнзэ быдэстыса, проектэз кылдытӥсьёс мукет экспозициос но дасязы.

Тольёнын, Турнэсын, Лесагуртын, Варниын Фёдор Городиловен герӟаськем музей висъетъёс аспӧртэмлыко но тунсыко пӧрмизы. Жаляса верано, коронавирус висёнэн сэрен калыклы соосты паськыт ӧз возьматэ на. Та дырлы экспозициосынызы Интернет пыр гинэ тодмато. Но азьланяз одно экскурсиос ортчытъяны чаклало.

Руфима Ложкина, туспуктэм авторлэн

Ивортон Дэбес ёросысь «Байгурезь» газетын потӥз. Ивортодэтъя «Удмуртия» агентстволэн но Удмуртиысь печатья но калыке ивортодэт вӧлмытонъя агентстволэн валче ӵектоссы. 



Наверх
Вниз