Ижкар-15 °C
28 -тӥ тулыспал 2021 Воскресенье
18+

Нырысетӥосыз выль трамвайёс калыкез нуллыны кутскизы Ижкарын

  • 167
  • 0
Ижкар / Удмуртия
Нырысетӥосыз выль трамвайёс калыкез нуллыны кутскизы Ижкарын
Туспуктэм: Руслан Нуриахметов

8-тӥ толсуре Ижкарын нырысетӥосыз «Львёнок» трамвайёс 10 номеро маршрутын калыкез нуллы кутскизы. Нырысь-валысь соос нуназе вадес гинэ ужалозы. Со сярысь журналистъёслы «ИжГЭТ» муниципал предприятилэн кивалтӥсез Андрей Батов вераз.

Али трамвай вагон 10-тӥ маршрутъя котькуд нунал кысык ужан вакыт дыр вискын ветлоз, нош быдэс маршрутэз умой-умой лэзём, куке ваньмыз вагонъёс татын луозы ни но ми вань водительёсты стажировать каром но дышетом. <…> Ми Ижкарысь трамвай линиетӥ ветлӥськом но валаськом, ваньмыз умой
Андрей Батов, «ИжГЭТ» муниципал предприятилэн кивалтӥсез

Выль трамвайёсты Ижкарысь урамъёсы эскерон вылысь поттэм бере, калыкын трос вераськонъёс кылдӥзы, соос кожон интыосы уг тэро шуыса. Но Андрей Батов буйгатӥз, трамвай сюресъёсты вылысь тырыны кулэ ӧвӧл.

«Львьёнок» Ижкарысь вань трамвай сюресъёс кузя ортчоз, трамвай сюресъёсты выльысь тырыны со понна кулэ ӧвӧл. <…> Котькуд карын габаритлы тупасьтэм интыос вань - со кожонъёс. Трамвай сюресъёс карен ӵош лэсьтӥськизы, интыез шыръян вылысь азьвыл ик чакламын вал, кожонъёсты трамвай вагонъёс одӥген-одӥген ортчозы шуыса
Андрей Батов, «ИжГЭТ» муниципал предприятилэн кивалтӥсез

Озьы ик со пусйиз, вань маршрутъёсын котькуд водитель со шуг интыосты тодэ. Кожонын пумиськон азьын соос асьсэос верасько, кин отӥ азьпалгес ортчоз.

Туннэ куатез «Львёнокъёс» ветлыса эскеремын ни, куронъёсъя соос 50 иськемез ортчыны кулэ. Эшшо ньылез вагонъёс трамвай сюресъёс вылэ пуктэмын. Кылемез куатез Ижкаре толсур шорозь вуыны кулэ.

Ижкарысь урамъёсы «Львьёнок» трамвайёс потӥзы

10 фото

Вагонъёс быдэсак лапег выжо, ньыль ӧсъёсын, 40 пуксён интыез, салонын кондиционеръёс, видеокамераос вань (отчы гожтэм виде 21 нунал утиське). Озьы ик урдэс но мышпал камераосыз вань, со мынон-ветлонэз кышкыттэмлыко карыны юрттэ. Андрей Батовлэн верамезъя, пассажиръёс кулэ каризы ке, вайфаен ужаны сим-карта пуктыны луонлык но вань. Али ужась «Татраосын» ӵошатоно ке, «Львёнок» 3 метрлы кузьгес, нош пасьталаез сыӵе ик – 2 но ӝыны метр.

Ваньмыз выль трамвайёс 10 номеро маршрутэ потозы. Кызьы валэктӥз Андрей Батов, вагонъёслы куриськон «Кышкыттэм но ӟечлыко автомобиль сюресъёс» йӧскалык ӵектос улсын сётӥзы бере, отын нимаз маршрутэз солэн аспӧртэмлыкъёсыныз пусйыны кулэ вал. Туннэ 10-тӥ маршрутын тужгес трос калык ветлэ. Та дыре отын 18 вагонъёс ужало, со пӧлысь 16-ез «Львёнокъёс» луозы, эшшо кык «Татараос» кылёзы.

Андрей Батовлэн верамезъя, али депоын оглом 200 пала трамвайёс. Маршрутъёсы 120 но солэсь тросгес вагонъёс пото, лыдзы гужем но тол расписаниен герӟаськемын. Берлозэ выль трамвайёс Ижкаре 2003-тӥ арын вуизы вал. 



Наверх
Вниз