Ижкар-13 °C
28 -тӥ тулыспал 2021 Воскресенье
18+

400 иськемлэсь трос сюресъёсты тупатъязы Удмуртиын 2020-тӥ арын

  • 107
  • 0
Ижкар / Удмуртия
400 иськемлэсь трос сюресъёсты тупатъязы Удмуртиын 2020-тӥ арын
Туспуктэм: Григорий Фомин

20020-тӥ арын Удмуртиын 400,8 иськем сюресъёсты тупатъязы. Ужъёсты куать программаосъя нуизы: «Кышкыттэм но ӟечлыко автомобиль сюресъёс» йӧскалык ӵектос, «Гурт интывылъёсты котыр ласянь азинтон», «Россиысь транспорт сӧзнэтэз азинтон», «Сюресъёсты лэсьтонъя инъет ужанрадлык», «Удмуртиысь ёросъёсын тупатъянъёс». Сюрес лэсьтон вакытлы йылпумъянъёсын 21-тӥ толсуре ортчем пресс-конференциын тодматӥзы.

Удмуртиысь кивалтэтлэн тӧроез Ярослав Семёнов верамъя, 2019-тӥ ар сюрес возёс удыс понна куазь сэрен секыт вал, соин ик туэ кылем арысь ужъёсты быдэстӥзы.

Оглом тупатъямын но выльдэмын 400 иськемлэсь трос. <…> Ужъёс борды оштолэзь кутсконын басьтӥськизы ни, ӝыныезлэсь тросэз объектъёс сизьым толэзь ортчыса лэсьтэмын ни вал – коньывуонэ. Табере ми вераны быгатӥськом, сюресъёсты лэсьтон вакыт ворсамын. Объектъёсын вань ужъёс быдэстэмын
Ярослав Семёнов, Удмуртиысь кивалтэтлэн тӧроез

Солэн кылъёсызъя, мер огазеяськонъёсын валче ужаса, умой ужъемышъёс адӟыны но шекъёсты палэнтыны луиз. Со сяна, йӧскалык ӵектосъя ватсаса 340 миллион манет басьтыны кылдӥз.

«Кышкыттэм но ӟечлыко автомобиль сюресъёс» йӧскалык ӵектос улсын Ижкарын, Камбаркаын, Сарапулын, Можгаын, Воткаын но улосвыл сюресъёс вылын 88 люкетъёсты тупатъязы - со 138,66 иськем. Та ужъёслы 1 миллиард 700 миллион манет быдтӥзы. Нош оглом элькунысь сюресъёслы 4 миллиард 800 миллион манет висъязы

2020-тӥ ар пумозь Ижкар – Сарапул сюрес вылын (Брангуртэ кожонлы матын) машинаослэсь секталазэ чаклась эрказ ужась пункт пуктозы, со сюресэз эсэплэсь секыт транспортлэсь утьыны юрттоз.

Йӧскалык ӵектос улсын туэ сюресъёслэсь ньыль люкетъёссэс югдытӥзы, вить светофоръёс, 15 фото- но видеокамераос пуктӥзы.

Ярослав Семёновлэн верамезъя, али 2021-тӥ арлы чаклам объектъёсъя конкурс ужъёс мыно ни. Йӧскалык ӵектосъя торгъёс йылпумъяськизы ни, мукет программаосъя контрактъёсты толшор пумозь юнматыны малпало.

«Сюресъёсты лэсьтонъя инъет ужанрадлык» («Опорный план дорожной деятельности») программая сӥзьыл но тулыс ветлыны луонтэм 28 объектъёсты рос-прос тупатъязы – оглом 131,523 иськем

Со сяна, Орловской – Киров улосвыллэн гожез, Вотка – Чёрной, (Ижкар – Ува) – Постол станция, Сарапул – Вотка сюрес люкетъёсты рос-прос выльдӥзы. Соослэн оглом кузьдалазы 20,323 иськем.

Озьы ик туэ Костино – Камбарка сюреслэсь витетӥ люкетсэ – 4,5 иськем – тупатъязы.

«Гурт интывылъёсты котыр ласянь азинтон» («Комплексное развитие сельских территорий») федерал программая Кияса – Лутоха, (Якшур-Бӧдья – Шаркан) – Быгы, (Кез – Кулига – Карсовай) – Жерноково – Мельма сюресъёсты тупатъязы.

Таяз арын муниципал кылдытэтъёс сюресъёсты но тротуаръёсты тупатъяны умой субсидиос басьтӥзы – 692 миллион 500 сюрс манет. Оглом 80,6 иськем сюресъёс тупатъямын вал. Ми ужъёсты котыр ласянь быдэстӥм
Алексей Горбачёв, Удмуртиысь транспортъя но сюрес возёсъя министр

Таяз арын тужгес урод сюресъёсын ёрос центръёсты пусйизы но соослы тросгес коньдон висяъзы. Озьы, Балезинолы 40 миллион манет сётӥзы, Красногорсклы – 61 миллион манет, Дэрилы – 26 миллион манет, Увалы – 20 миллион манет.

Озьы ик 2020-тӥ арын Удмуртиысь сюресъёс вылын вуосты лэзись 53 гумыосты воштӥзы, 2 выжъёсты рос-прос выльдӥзы, вуосты лэзись сэрего ньыль гумыос пуктӥзы, ньыль искусственной сооружениосын алӥсь тупатъян ужъёсты быдэстӥзы. 



Наверх
Вниз