Ижкар-1 °C
26 -тӥ толшор 2021 Пуксён
18+

Ӧжытсэ 200 иськем сюресъёсты выльдозы Удмуртиын 2021-тӥ арын

  • 90
  • 0
Ижкар / Удмуртия
Ӧжытсэ 200 иськем сюресъёсты выльдозы Удмуртиын 2021-тӥ арын
Туспуктэм: Григорий Фомин

2021-тӥ арын Удмуртиын ӧжытсэ 200 иськем сюресъёсты выльдозы. Элькунын Гуртлэн арез улсын нимысьтыз саклык гурт сюресъёслы висъялозы. Со сярысь 21-тӥ толсуре брифингын улосвыл кивалтэтлэн тӧроез Ярослав Семёнов вераз, ивортэ тӧролэн но кивалтэтлэн пресс-службазы.

Ярослав Семёновлэн верамезъя, Гуртлэн араз «Опорный план дорожной деятельности» программа одӥгез валтӥсез луоз. Туннэ нуналлы кылдытэм лыдметэ 13 объектъёс пыризы – со 54,229 иськем. Озьы ик Костино – Камбарка сюреслэсь эшшо 6 иськем люкетсэ выльдозы. Якшур-Бӧдья – Шаркан сюреслэсь 2,55 иськемзэ выльдыны кутскозы.

Муниципал сюрес фондъёсы мынӥсь мувӧй вузъёслы акцизъёслэн быдӟалазы 2021-тӥ арысен кык поллы йылоз. Со муниципалитетъёслы сюресъёссэс возьыны но тупатъяны тросгес коньдон висъяны луонлык сётоз
Ярослав Семёнов, Удмуртиысь кивалтэтлэн тӧроез

«Кышкыттэм но ӟечлыко автомобиль сюресъёс» йӧскалык ӵектосъя 55,17 иськем сюресъёсты тупатъялозы. Озьы ик вить интыосы электротыл кыскозы, 25 фото- но видеокамераос пуктозы.

Йӧскалык ӵектосъя тупатъян радлыке пыризы: Ижкар – Аэропорт сюрес дорысен Ижкар – Вотка сюрес дорозь люкет, Брангурт – Кияса, Глазкар – Юкаменск, Можга – Вавож. Озьы ик Дэри ёросын 11 объектъёсты лэсьтозы. Валтӥсьёсыз пӧлын: Вотка шоссе дорысен «Встреча» кафе дорозь сюреслэн люкетэз, Изгуртысь но Дэриысь объектъёс. Сарапулын Алин но Крал Маркс нимо ульчаосысь сюресъёсты выльдозы.

Ижкарын 6,7 иськем кузьда 9 сюрес люкетъёсты тупатъяны чаклало.

Ваньмаз со люкетъёсын тротуаръёс лэсьтэмын луозы, куд-ог объектъёсын – сюреслэн кык палтӥз. Тупатъяно тротуаръёслэн кузьдалазы – 8,1 иськем
Олег Бекмеметьев, Ижкарлэн тӧроез

Ижкарын тупатъяны кулэ луись сюресъёсын лыдмет карысь Мер палатаез но автомобилистъёслэн мер огазеяськонъёсынызы соглаштэмын. Нырысь ик отчы сизьым объектъёс пыризы:

- Ворошилов нимо ульча, Автозаводской ульчаысен 9-тӥ Январь ульчаозь;
- Нижняя ульча, Киров нимо ульчаысен 7-тӥ подлесной ульчаозь;
- М. Горький нимо ульча, Бородин нимо ульчаысен Ленин нимо ульчаозь;
- Ленин нимо ульча, М. Горький нимо ульчаысен Красной ульчаозь;
- Восточной ульча, Промышленной ульчаысен Краев нимо ульчаозь;
- Революционной ульча, ВЛКСМ-лы 40 ар ульчаысен Чугуевский нимо ульчаозь.

Сметаосты чаклам бере, лыдметэ эшшо кык объектъёсты пыртыны луиз: Совхозной ульчаез но Спартаковский пролкаез.

Ньыль ар ӵоже Ижкарысь сюресъёсты тупатъяны 2 миллиард 800 миллион манет кутӥзы, эсэп куронъёслы 165 иськем сюрес шобретэз тупатӥзы. 2020-тӥ арын 23 сюрес люкетъёсты (30 иськем) выльдӥзы, кызез со пӧлысь – тротуаръёсын ӵош. Куинь светофоръёс пуктӥзы. Йӧскалык ӵектосъя солы 500 миллион манетлэсь трос коньдон висъязы

Тодэ вайытом, 2020-тӥ арлы ужанрадлыке 330 иськемлэсь трос сюресъёс пыризы вал. 2019-тӥ арысь выжем объектъёсты лыдэ басьтыса, туэ 400 иськемлэсь трос сюресъёсты тупатъязы но выльдӥзы



Наверх
Вниз