Ижкар+9 °C
16 -тӥ куарусён 2021 Покчиарня
18+

177 иськемлэсь трос сюресъёсты тупатъялозы йӧскалык ӵектос улсын Удмуртиын 2022-тӥ арын

  • 104
  • 0
Ижкар / Удмуртия
177 иськемлэсь трос сюресъёсты тупатъялозы йӧскалык ӵектос улсын Удмуртиын 2022-тӥ арын
Туспуктэм: Григорий Фомин

2022-тӥ арын Удмуртиын «Кышкыттэм ӟечлыко сюресъёс» йӧскалык ӵектос улсын оглом 177,7 иськем кыстӥськись 120 сюрес люкетъёсты тупатъялозы. Со сярысь элькун тӧролэн но кивалтэтлэн пресс-службазы ивортӥз.

Ужъёсты быдэстыны 2,4 миллиард манет висъялозы (2021-тӥ арын 2,2 миллиард висъязы вал)

Йӧскалык ӵектослэн куронъёсызъя, 2022-тӥ арлы 50 процентсэ огкылъёсты ми кылем ар пумын гожтыны кулэ вал ини. Туэ 1-тӥ куарусёнлы кылемзэ но тупатӥм. Озьыен, азьвыл ик лэсьтӥськон материал басьтон но куазь сётэмъя соку ик объектъёсы потон понна ми вуоно арлы вань процедураосты дасям ини. Кылсярысь, озьы ик туэ но пӧрмиз, планъя ужъёс борды 1-тӥ куартолэзе басьтӥськыны кулэ вал ай, нош ми 22-тӥ оштолэзе ужаны кутскыны быгатӥм ини
Ярослав Семёнов, Удмуртиысь кивалтэтлэн тӧроез

Сюрес лэсьтон выль вакытэ оглом 100 иськем пала 19 улосвыл сюресъёсты выльдозы. Тужгес кулэосыз пӧлын Ува – Сюмси сюреслэн кык люкетэз. Та сюреслэн шобретэз вылэ калык кемалась ӝожтӥське ини. Озьы, ӧнерчиослэн эскеронъёссыя но ГИБДД-лэн косонэзъя объектэз «Кышкыттэм ӟечлыко сюресъёс» ӵектослэн лыдметаз пыртӥзы.

Ӧнерчиос сюреслэсь Ува но Сюмси ёросъёсысь ог 14 иськем пала кыстӥськись кык люкетсэ тупатъялозы

Тужгес кузез тупатъяно объект Ижкар – Ува сюрес луоз. Сюресчиос Дэри но Ува ёросысь 17,5 иськем пала люкетсэ выльдозы.

Озьы ик Дэри но Сарапул ёросъёсысь Сарапул – Вотка, Якшур-Бӧдья ёросысь Якшур-Бӧдья – Шаркан, Шаркан ёросысь Дэбес – Шаркан улосвыл сюресъёслэсь люкетсъёссэс лэсьтозы. Со сяна, Глаз, Грак, Вотка, Вавож, Эгра, Можга, Кияса ёросъёсысь сюресъёс вылын ужалозы.

Ужъёсты ёрос сюресъёс вылын но нуозы. Озьы, 2022-тӥ арын «Кышкыттэм ӟечлыко сюресъёс» ӵектосэ 12 ёросъёс пыриськозы. Соос пӧлы Сарапул ёрос итӥськоз. Оглом 61 иськем пала сюресъёсты выльдозы (2021-тӥ арын 54,2 иськем вал). Туэ сямен ик, вуоно арын но тросэз ужъёс Дэри ёросын мынозы – отын 20 сюрес люкетъёсты лэсьтозы. Якшур-Бӧдья ёросын 12 объектъёсын ужалозы. Вавож ёросын – тямыс. Нош Вотка, Камбарка, Сьӧлта ёросъёсын быдэн сизьым сюрес люкетъёссэс тупатъялозы.

Ижкарын вуоно арын куать сюрес люкетъёсты лэсьтозы: Гагарин нимо, Олег Кошевой нимо, Леванеский нимо, Новой урамъёсын но Северной пролкаын. Озьы ик Ижкар – Сарапул сюрес дорысен Совхоз Медведево дорозь потонэз выльдозы. Оглом 7,4 иськем сюресъёс тупатъямын луозы.

Сарапулын тямыс урамъёсысь сюресъёс вылын ужалозы: Гагарин нимо, Ленинградской, Фурманов нимо, Жуковский нимо, Фрунзе нимо, Электрозаводской урамъёсын но мукет сюрес люкетъёсын. Оглом 3,5 иськем сюрес люкетъёсты выльдозы.

Можгаын Можгинской, Сюгаильской, Наговицын нимо, Красной урамъёсын ужъёсты азьланьтозы. Озьы ик Казанской, Северной но Короленко нимо урамъёсысь сюресъёсты выльдозы. Оголм 6 иськемлэсь трос сюресъёсты лэсьтозы.

Тодэ вайытом, Удмуртиысь М7 трассалэсь люкетсэ 4 чурозь паськытатозы



Наверх
Вниз