Сюресчиос Ижкар-Вотка трассалэсь люкетсэ тупатъян ужъёсты йылпумъязы

Ижкар-Вотка сюреслэсь Болгор (Болгуры) гуртэ кожон вӧзысь люкетсэ тупатъян ужъёс йылпумъяськизы. Со сярысь ивортэ Удмуртиысь транспортъя но сюрес возёсъя министерстволэн пресс-службаез.

2,5 иськем люкетэз «Кышкыттэмлыко но ӟечлыко сюресъёс» ӵектос улсын тупатӥзы.

«Объект кутыны дась. Матысь дыре транспортъя но сюрес возёсъя министерствоысь ӧнерчиос быдэстэм ужъёслэсь ӟечлыксэс эскерозы», — верамын ивортонын.

4 фото

Тодэ вайытом, Ижкар «Кышкыттэмлыко но ӟечлыко сюресъёс» ӵектос улсын федерал коньдон басьтэм Россиысь 38 агломерациос пӧлы шедиз.

Ижкар агломерацие та дыре 1 сюрс 533,8 иськем сюресъёс но урамъёс пыро, соос пӧлын 239,4 иськем мында кык федерал трассаос. Эсэпъёслы тупа 562,1 иськем сюреслэн вылыз.

2017-тӥ ар пумозь Удмуртиын шудтэм учыръёс ӵемгес кылдоно 50 интыос быдтэмын луыны кулэ, нош эсэпъёслы тупась сюресъёсты 693,76 иськемозь вуттыны.

Таяз арын 56 объектъёсын ужъёсты быдэстозы: 216 иськем сюресъёсты тупатъялозы, 9,3 иськемын электротыл кыскозы, 920 метр мында сюресэз тросэн кенертозы, 873 метрзэ — могӟетъёсын, ӵаш поттӥсь кык чуръёс лэсьтозы.

Со ужъёслы 1 миллиард 787 миллион манет висъямын, со пӧлысь 26,3 миллион манетэз — интыысь коньдэтысь, 598,7 миллион манетэз — улосвылысь но 1 миллиард 162 миллион манетэз — федерал коньдэтысь. Отысь 604,34 миллион манетэз — кар урамъёслы, 645,66 миллион манетэз — улосвыл сюресъёслы но 537,6 миллионэз — федерал трассаослы.