Ижкарлэн шундыпуксён палтӥз котыр сюресэз тупатъян ужъёсты куарусёнэ йылпумъялозы

Ижкарлэн шундыпуксён палтӥз котыр ортчись федерал сюресэз тупатъян ужъёсты элькунысь сюресчиос 15-тӥ куарусёнлы йылпумъяны чаклало.

Ужъёсты кык огазеяськонъёс нуо. Чакламын 40 иськем сюрес шобретэз тупатъяны. Выльдон «Кышкыттэмлыко но ӟечлыко сюресъёс» ӵектос улсын мынэ.

«Ӵектос ужъёс вакчи дыр куспын ортчытэмын вал, собере таяз арын ми та сюресэз тупатъян борды басьтӥськыны быгатӥмы, со 10 арлэсь трос тупатъямтэ ни вал. Та дыре кыкетӥ люкетэзлэн вылӥ сӥезъя ужъёс йылпумъямын. Али огдыре нырысетӥ но куинетӥ люкетаз ужъёс мыно», — вераз «Волго-Вятскуправтодор» ужъюртлэн ыстэм муртэз Константин Мошкин.

«Та программая («Кышкыттэмлыко но ӟечлыко сюресъёс» — ред.) милям 80 процентэз ужъёс быдэстэмын. Мукет сямен вераса, 80 процентэз объектъёс кутэмын ни. Куатез объектъёс быдэсак вуттэмын, мукетъёсыз кутон вие вуттэмын», — вераз Удмуртиысь транспортъя но сюрес возёсъя министрлэсь ужзэ быдэсъясь Алексей Горбачёв.

Ӵектосэз быдэстыны таяз арын 1 миллиард 786,6 миллион манет висъямын. Со пӧлысь 537,6 миллион манетэз федерал сюресъёсты тупатъяны мыноз.