Ижкар-12 °C
7 -тӥ южтолэзь 2021 Воскресенье
18+

Удмуртиын улӥсьёсты сюресъёсты азинтонъя улосвыл программалэн ӵектосэзъя мылкыдъёссэс вераны куро

  • 808
  • 0
Ижкар / Удмуртия
Удмуртиын улӥсьёсты сюресъёсты азинтонъя улосвыл программалэн ӵектосэзъя мылкыдъёссэс вераны куро
Туспуктэм: Григорий Фомин

2019-тӥ арын Удмуртиын «Кышкыттэмлыко но ӟечлыко сюресъёс» вылез йӧскалык ӵектос ужаны кутскоз. Сое быдэсъян понна улосвылысь Транспортъя но сюрес возёсъя министерство матысь аръёсы ужаны программалэсь ӵектоссэ дасяз. Удысэтлэн пресс-службаез ивортэмъя, 13-тӥ толсурозь элькунын улӥсьёс сюресъёсты тупатъян но кышкыттэмлыкез будэтон пумысен асьсэлэсь ӵектонъёссэс вераны быгато.

2019-2021 аръёсы Удмуртиын 522 иськем улосвыл но муниципал сюресъёсты эсэпъёсъя тупатыны чаклало. Со пӧлысь 33 но ӝыны иськемез быдэсак выльдэмын но рос-прос тупатъямын луоз. Троссэ ужъёсты (23 иськем сюрес вылын) 2019-тӥ арын быдэстыны малпало. Эшшо 130 иськем сюресъёсты вуоно арын тупатъяны чаклало. Озьы оглом 153 иськем луоз.

Программаын пусъем ужъёсты быдэстыса, 2021-тӥ арлы 50 процентэз сюресъёс эсэпъёслы тупаны кулэ, нош Ижкар агломерацие пырисьёсыз – 85 процентэз. Укыр трос машинаосты лэзьыны быгатӥсьтэм сюресъёслэн лыдзы йӧскалык ӵектослы луыса кулэсмоз.

Бадӟым уж нуыны чакламын кышкыттэмлыкез будэтон ласянь. Транспортъя но сюрес возёсъя министерстволэн малпанъёсаз – фото но видео лэсьтӥсь огъетъёс, светофоръёс пуктон, югдытон. Та ужрадъёслэн ужпумзы – машинаос ӵем шуккиськон интыослэсь но сюрес вылын бырисьёслэсь лыдзэс кулэстон.

Эшшо одӥгез ужпум – тупатъям сюресъёсты возёнэз радъян. Со понна машинаослэсь секталазэс чаклась пунктъёслэсь лыдзэс будэтыны чакламын.

Удысэтлэн пресс-службаез озьы ик алэ, элькун программалэн ӵектосэз Сюресъёсъя федерал агентствоын вань эскеронъёсты ӧз ортчы на шуыса, ужкагазэ чыры-пыры воштонъёс пыртэмын луыны быгатозы на. 

Программалэн ӵектосэныз Удмуртилэн Транспортъя но сюрес возёсъя министерстволэн сайтаз тодматскыны луэ. Ӵектонъёсты bkad18@mail.ru электрон адресъя куто. 13-тӥ толсуре программаез министерствоын эскерозы. 

Тодэ вайытом, 2018-тӥ арын Удмуртиын оглом 198 иськемлэсь ятыр автомобиль сюресъёсты тупатӥзы, со пӧлысь 117 иськемез – «Кышкыттэмлыко но ӟечлыко сюресъёс» ӵектос улсын. Улосвыл программалэсь выль ӵектоссэ Сюресъёсъя федерал агентствоын нырысь-валысь эскеронъёс куарусёнэ ортчизы.



Наверх
Вниз