Ижкар+7 °C
20 -тӥ куарусён 2020 Воскресенье
18+

Балезино – Сергино сюрес вылысь Чупчи вамен выль выжез усьтӥзы Удмуртиын

  • 497
  • 0
Балезино / Удмуртия
Балезино – Сергино сюрес вылысь Чупчи вамен выль выжез усьтӥзы Удмуртиын
Туспуктэм: Удмуртиысь тӧролэн но кивалтэтлэн пресс-службазы

23-тӥ толшоре Балезино ёросын Чупчи шур вамен выль выжез сӥё-дано усьтӥзы. Сое «Платон» кун сӧзнэтысь коньдонэз кутыса пуктӥзы, ивортэ улосвыл тӧролэн но кивалтэтлэн пресс-службазы.

Азьвылэз 100 метръем выж ӝыны даурлэсь азьвыл пуктэмын но куашкан калэ вуэмын вал, соин ик сое сэрттоно луиз. Вылез бадӟым секталалы, трос автотранспортэз лэзьыны чакламын. Соин валче мынон-ветлон кышкыттэм луэ.

Чупчи шур вамен выжез лэсьтыны кык арсын 376,4 миллион манет быдтӥзы, со пӧлысь «Платон» сӧзнэт чотын федерал коньдэтысь 294,6 миллион манет. Вылез выж кузьгес луиз, пасьталаез сизьым метр интые 10 метрозь вуттэмын. 

Белезино ёросысь выль выж – пуктэм ужпумъёсты быдэстон ласянь аспӧртэм луэ, угось Балезино – Сергино сюрес – Удмуртиын одӥгез сюлмаськытӥсь инты. Со тулыс но сӥзьыл ортчыны лонтэм 62 сюресъёс пӧлы пыртэмын
Удмуртиысь тӧролэн но кивалтэтлэн пресс-службазы

Балезино - Сергино сюрес вылысь Чупчи вамен выжез усьтӥзы

8 фото

Сюрес 20-лэсь трос пичи но бадӟым гуртъёсты Кез ёросэн но Пермь шаерен вакчияк герӟа. Солэн огъя кузьдалаез 80 иськем пала, со пӧлысь 40 иськемлэсь уноез асфальтобетонэн шобыртэмын, кылемез – векчиятэм изэн.

Балезино ёрослэн тӧроез Юрий Новойдарский выжез усьтон вань калык понна туж пусйымон ужрад луэ шуыса вераз, со муниципал кылдытэтлэсь экономиказэ азинтон понна бадӟым луонлыкъёс усьтэ.

Выжез выльдонэн ӵош Удмуртилэн коньдэтысьтыз уксёен Белезино – Сергино сюреслэсь 13 иськем люкетсэ тупатъязы. 2019-тӥ но 2020-тӥ аръёсы со ужез азьланьтозы, 2020-тӥ арлы трасса быдэсыз выльдэмын луыны кулэ.

Выж пусъем дыре но вань технической куронъёсъя вуттэмын, со оскон сётэ, ми азьланяз но выжъёсты федерал коньдон чотын тупатъяны быгатомы шуыса. Та дыре милям эшшо куать выжъёсъя куриськонмы дась ни, соос пӧлын проектно-сметной ужкагазъёс дасямъёсыз но, - коньдонлэн огъя быдӟалаез 600 миллион манетлэсь трос. 2018-тӥ арын, кудӥз Удмуртилэн тӧроеныз Сюресъёслэн аренызы ялэмын вал, быдэстэм ужъёсты лыдэ басьтыса, куриськонъёсмылы дурбасьтэмзылы бадӟым оскон – ми федерал коньдонэз басьтыны но выжъёсты тупатыны быгатом
Ярослав Семёнов, Удмуртиысь кивалтэтлэн тӧроез

«Платон» кун сӧзнэтлэн Волга котырысь ёзэзлэн кивалтӥсез Наталья Соболева Удмуртилэн кивалтэтэзлы пайдалыко ӵош ужамзы понна тау кариз.

Ватсалом, элькунысь транспортъя но сюрес возёсъя министерствоысь ӧнерчиослэн верамзыя, «Платон» сӧзнэт чотын пуктэм выж нырысетӥез ӧвӧл ни. 2017-тӥ но 2018-тӥ аръёсы Сюмси ёросын Кильмезь шур но Глазарын Чупчи шур вамен выжъёсты выльдӥзы

Тодэ вайытом, Удмуртилэн тӧроез Александр Бречалов элькунысь сюресъёсты тупатъян ужпумез валтӥсь интые пуктӥз, нырысь ик, ветлыны ярантэм люкетъёсыз борды кутскыса. 



Наверх
Вниз