Ижкар+32 °C
10 -тӥ пӧсьтолэзь 2020 Удмуртарня
16+

63 иськем улосвыл сюресъёсты тупатъялозы Удмуртиын 2021-тӥ арын

  • 1148
  • 0
Ижкар / Удмуртия
63 иськем улосвыл сюресъёсты тупатъялозы Удмуртиын 2021-тӥ арын

2021-тӥ арын Удмуртиын 63,3 иськем улосвыл сюресъёсты тупатъялозы. 2-тӥ южтолэзе Удмуртиысь транспортъя но сюрес возёсъя министерство бордысь мер кенеш Росси азьмуртэн Владимир Путинэн кичӧлтэм «Кышкыттэм но ӟечлыко автомобиль сюресъёс» йӧскалык ӵектос улсын тупатъяно люкетъёсты юнматӥз. Со сярысь улосвыл тӧролэн но кивалтэтлэн пресс-службазы ивортэ.

Ӵектэм объектъёсты ми калыклэн кулэяськонъёсыз но улосвылысь экономикаез азинтон ласянь рос-прос эскеримы. Нокыӵе замечаниосмы ӧз кылдэ – лыдмет понна огкылысь дурбасьтӥм. Пусйымон объектъёс пӧлын Можга – Вавож сюресэз ниманы луоз, со палан али пудо вордон огъет туж умой азинске. Валамон, сюрес отын улӥсьёслы гинэ ӧвӧл, продукциез поттон понна туж кулэ. Али отын сюрес туж урод
Наиль Зиятдинов, Удмуртиысь транспортъя но сюрес возёсъя министерство бордысь мер кенешлэн тӧроез

Валтӥсь объектъёс вуоно арлы лыдметэ одно ик пырозы. Нырысь ик со бадӟым ёрос центръёсты герӟась сюресъёс: Ижкар – Ува, Можга – Вавож, Сарапул – Вотка, Якшур-Бӧдья – Шаркан но мукетъёсыз.

Тупатъяно люкетъёслэн лыдметсы:

  • Глазов – Яр – Пудем (км 22+195 – км 23+695, км 24+130 – км 26+396);
  • Ижкар – Ува (км 22+690 – км 35+190);
  • Сарапул - Вотка (км 29+144 – км 33+744);
  • Ижкар – Люк (км 13+600-км 21+600);
  • Ижкар котыртӥ сюреслэн Ижкар – Аэропорт сюрес дорысен Ижекар – Вотка сюрес дорозь люкетэз (км 0+000 – км 10+085);
  • Ижкар – Ува (км 60+060 – км 65+060);
  • Брангурт – Кияса (км 0+038 – км 8+000);
  • Можга – Вавож (км 17+000-км 23+800);
  • Якшур-Бӧдья – Шаркан (км 7+800- км 12+400).

Резерв объектъёс борды басьтӥськозы, коньдонэз шыръяны луиз яке ватсаса висъязы ке. Со Ува – Сюмси, Эгра – Сьӧлта – Сюмси – Киров улосвылэн гож, Алнаш – Грак, Кияса котыр сюрес но мукетъёсыз.

Кызьы пусъемын ивортонын, вуись арлы лыдметэз Удмуртиын такем вазь ӧз кылдытъялэ на вал. Сыӵе пумкылъян коньдонэз ӝегатскытэк висъяны луонлык сётоз, ӵапак сыӵе курон Россилэн азьмуртлэн Владимир Путин тӧрлык ёзэсъёс азе пуктэ. Кылем 10 толэзь ӵоже заказчикъёс ужкагазъёс дасяны, торгъёс ортчыны кулэ. Нош подрядчикъёс, быдэстоно ужъёслэсь быдӟалазэс азьвыл ик тодыса, пичигес дунъёсын материалъёс басьтыны, техникаез но ужан тӥрлыксэс выльдыны быгатозы.

«Кышкыттэм но ӟечлыко автомобиль сюресъёс» йӧскалык ӵектосэз быдэсъян улсын Ижкар агломерациысь 85 процентсэ сюресъёсты эсэп куронъёслы тупась карыны кулэ. 2021-тӥ арын со лыдпусэз 63-ысь 70 процентозь вуттыны чакламын.

Тодэ вайытом, 2020-тӥ Удмуртиын пӧртэм программаосъя 240 иськем пала сюресъёсты тупатъялозы. Ижкарысь сюресъёсты выльдыны 488 миллион 400 сюрс манет кутозы



Наверх
Вниз