Ижкар+27 °C
12 -тӥ пӧсьтолэзь 2020 Воскресенье
16+

Тулыс-сӥзьыл ветлыны луонтэм 83 иськем сюресъёсты тупатъялозы Удмуртиын 2020-тӥ арын

  • 804
  • 0
Ижкар / Удмуртия
Тулыс-сӥзьыл ветлыны луонтэм 83 иськем сюресъёсты тупатъялозы Удмуртиын 2020-тӥ арын

2020-тӥ арын Удмуртиын тулыс-сӥзьыл вакытэ ветлыны луонтэм гурт сюресъёслэсь 17 люкетъёссэс тупатъялозы, оглом 83,67 иськем. Ужъёсты «Опорный план дорожной деятельности» элькун программая нуозы. Со сярысь «Удмуртавтодор» огазеяськон «ВКонтакте» мерлыко вотэсысьтыз огиназ ивортӥз.

Та дыре куать люкетъёсын ужъёсты кутскизы ни. Кез ёросын Кез – Кулига – Карсовай сюреслэсь 8,5 иськемзэ тупатъяны кулэ. Отын ву кошкон сӧзнэтэз тупатъялозы, сюреслэсь инъетсэ юнматозы, вылзэ векчи изэн, луоен суро кӧльыен шобыртозы.

Сюмси ёросын кык сюресъёс ужанрадлыке пыртэмын. Бадӟымлуд – Зун – Орловской сюреслэсь 4 иськем мында кык люкетсэ тупатъялозы. Та дыре сюрес урдсысь куакъёсты корало. Ву кошкон сӧзнэтэз выльдэм но сюреслэсь вылзэ ӵошкытатэм бере, сюресчиос векчи излэсь, луоен суро кӧльылэсь шобрет вӧлдозы.

Озьы ик (Ува – Сюмси) – Силино – Коӵо-Юс сюреслэсь кык люкетсэ тупатъялозы, оглом вить иськем.

Сарапул ёросын Сарапул – Верхний Бугрыш сюреслэсь 2,9 иськемзэ тупатъян борды басьтӥськизы. Али куакъёсты но вечи писпуосты утялто, ву кошкон корт гумы пукто. Ву кошкон сӧзнэтэз выльдон улсын эшшо кык гумы пуктозы но кыретъёсты муромытозы на. Сюресэз векчи изэн, луоен суро кӧльыен шобыртозы.

Балезино ёросын (Эгра – Глазкар) – Андрейшур сюреслэн оглом 8 иськем мында кык люкетъёсаз ужало. Та дыре ву кошкон сӧзнэтэз выльдыны кутскизы ни. Сюреслэн вылаз векчи из, луоен суро кӧльы кисьтозы.

Ужъёс сюреслэн одӥг палаз мыно, транспорт мукет палтӥз ветлыны быгатэ

Тодэ вайытом, таяз арын Удмуртиын 30 иськем улосвыл сюресъёсты выльдозы.  



Наверх
Вниз