100 лет государственности Удмуртии
Ижкар+21 °C
29 -тӥ куартолэзь 2020 Удмуртарня
16+

Удмуртиын сюресъёсты тупатъян ужъёсты вань программаосъя кутскизы

  • 218
  • 0
Ижкар / Россия
Удмуртиын сюресъёсты тупатъян ужъёсты вань программаосъя кутскизы
Туспуктэм: Руслан Нуриахметов

Удмуртиын сюресъёсты тупатъян ужъёсты вань программаосъя но ӵектосъёсъя кутскизы. Со сярысь улосвыл тӧролэн но кивалтэтлэн пресс-службазы ивортэ.

«Кышкыттэм но ӟечлыко автомобиль сюресъёс» йӧскалык ӵектосъя 1 миллиард 560 миллион манет висъязы. Али 21 сюрес люкетъёсты тупатъяло ни, со пӧлын 13 улосвыл сюресъёс но тямысэз Ижкарын.

Со сяна, федерал коньдэтэн валче «Комплексное развитие сельских территорий» кун программа быдэсъяське. 2020-тӥ арын программая 646 миллион 500 сюрс манет кутыны чакламын, со пӧлысь 342 миллион 200 сюрс манет федерал коньдэтысь, 304 миллион 200 сюрс манет Удмуртилэн коньдэтысьтыз. Со чотын (Якшур-Бӧдья-Шаркан) – Быгы, Кияса – Лутоха, (Кез-Кулига-Карсовай) – Жорногурт – Медьма сюресъёсты выльдыны чакламын, оглом 25,6 иськем. Туннэ нуналлы Кез ёросысь сюресъя тупанкыл юнматӥзы ни, мукетъёсызъя таяз арняе гожтыны кулэ.

Озьы ик Удмуртиын «Опорного плана дорожной деятельности» программа улонэ пыӵатӥське. Солы элькун коньдэтысь 956 миллион манет висъялозы. Туэ ветлыны луонтэм 28 интыосты тупатъяны чаклало, оглом 131,5 иськем мында. 19 объектъёсъя тупанкылъёс юнматӥзы ни. Лыдметэ кылем арын урод куазь сэрен тупатъямтэ сюресъёсты но пыртӥзы. Озьы ик 2021-тӥ арлы чаклам, но ӝегатскытэк выльдэмез кулэ карись кык объектъёс шедизы.

Али сюресчиос сизьым объектъёсын ужало ни: Балезино – Сергино, Можга ёросысь Гозек – Ӟуч Пычас, Сарапул – Вылӥ Бугрыш, Глазкар – Поонино – Зотово, Кез – Кулига – Карсовай, Вотка ёросысь Первомайской – Черепановка, Сьӧлта ёросысь (Эгра-Сьӧлта-Сюмси-Киров улосвылэн гож) – Кӧпка – Удгурт.

Со сяна, улосвыл но муниципалкуспо сюресъёс вылын укмыс огъетъёс гожъёс лэсьтон бордын тыршо, соос инвожоозь ужзэс быдэстыны кулэ.

Эшшо одӥгез улосвыл программа - «Развитие транспортной системы Удмуртской Республики». Таяз арын лыдметэ ньыль люъектъёс шедизы, эшшо кыкез кылем арысь выжизы. Али ужъёс ваньмаз объектъёсын мыно: Вотка – Чёрной (1-тӥ но 2-тӥ люкетъёсыз), Орловской – Киров улосвылэн гож (2-тӥ но 3-тӥ люкетъёсыз), (Ижкар-Ува) – Постол станция (2-тӥ люкетэз), Сарапул – Вотка (2-тӥ люкетэз).

Озьы ик таяз арын муниципал кылдытэтъёслы нимысьтыз саклык. Урамъёсысь сюресъёсты, тротуаръёсты тупатъяны но пыдын выжон интыосты радъяны элькунлэн коньдэтысьтыз 750 миллион манетлэсь трос висъямын. Тупатъян ужъёсты инвожое кутскозы
Алексей Горбачёв, Удмуртиысь транспортъя но сюрес возёсъя министр

Тодэ вайытом, Росси азьмуртэн Владимир Путинэн кичӧлтэм «Кышкыттэм но ӟечлыко автомобиль сюресъёс» йӧскалык ӵектослэн «Сюрес вылын кышкыттэмлыкез будэтон» подпрограммаезъя Удмуртиысь сюресъёс кузя тыл юбоос но светофоръёс пуктыло.



Наверх
Вниз