Ижкар-6 °C
27 -тӥ шуркынмон 2020 Удмуртарня
18+

Постол станциозь сюресэз тупатъян ужъёсты йылпумъязы Удмуртиын

  • 62
  • 0
Дэри / Удмуртия
Постол станциозь сюресэз тупатъян ужъёсты йылпумъязы Удмуртиын
Туспуктэм: Удмуртиысь тӧролэн но кивалтэтлэн пресс-службазы

Дэри ёросын (Ижкар – Ува) – Постол станция сюресэз выльдонэз йылпумъязы. Ужъёсты элькун коньдэт чотын быдэстӥзы. Со сярысь улосвыл тӧролэн но кивалтэтлэн пресс-службазы ивортӥз.

Сюресэз выльдон кык люкетэн мынӥз: таяз арын 3,8 иськемзэ тупатъязы, кылем арын – 3,15 иськемзэ.

Азьвыл татын грунтовой сюрес вал. Али трактысен Постол станциозь ӟеч асфальт сюрес нуэ. Туэ 1-тӥ куарусёнэ черкогуртын выль школа усьтӥськиз, соку Удмуртилэн тӧроез выль сюрес шуркынмонэ дась луоз ни шуыса оскытӥз. 16-тӥ шуркынмонэ объектэз уже кутӥзы. Школа вӧзын нылпи сад пукто на, соин ик та сюрес туж кулэ
Ярослав Семёнов, Удмуртиысь кивалтэтлэн тӧроез

Сюресэз выльдон улсын ӧнерчиос ву кошкон сизьым гумыос пуктӥзы, ву кошкон канаваосты юнматӥзы. Со сяна, гуртын автобуслы берытскыны инты тупатӥзы, дугдылонниын павильон пуктӥзы, тротуаръёс лэсьтӥзы.

(Ижкар – Ува) – Постол станция сюрес туэ тупатъяны чаклам улосвыл трассаос пӧлысь куинетӥез. Ижкар – Сарапул, Вотка – Чёрной сюресъёсты уже кутӥзы ни. Озьы ик Орловской – Киров улосвыллэн гожез сюрес вылын ужъёс йылпумъян пала вуо.

Оглом 2020-тӥ арын «Кышкыттэм но ӟечлыко автомобиль сюресъёс» йӧскалык ӵектос улсын 140 иськем сюресъёсты (88 объект) тупатъязы. «Опорный план дорожной деятельности» элькун программая 28 сюрес люкетъёсты ветлыны луымон каризы (130 иськемлэсь трос). «Гурт интывылъёсты котыр ласянь азинтон» федерал программая Удмуртиын куинь объектъёс выльдӥсько. Шаркан ёросысь (Якшур-Бӧдья – Шаркан) – Быги сюресэз 16-тӥ шуркынмонэ уже кутӥзы. Кияса – Лутоха, (Кез – Кулига – Карсовай) – Жерноково – Медьма сюресты тупатъянэз шуркынмон пумозь йылпумъялозы.

Озьыен, 123 объектъёс пӧлысь куиняз ужъёс мыно на


Наверх
Вниз