Ижкар-11 °C
4 -тӥ толсур 2020 Удмуртарня
18+

Быгие сюресэз тупатъянэз йылпумъязы Шаркан ёросын

  • 57
  • 0
Быги / Удмуртия
Быгие сюресэз тупатъянэз йылпумъязы Шаркан ёросын
Туспуктэм: Удмуртиысь тӧролэн но кивалтэтлэн пресс-службазы

Шаркан ёросын Быги гуртэ сюресэз быдэсак выльдон ужъёс йылпумъяськизы. Со сярысь элькун тӧролэн но кивалтэтлэн пресс-службазы ивортӥз.

Ӧнерчиос сюреслэсь 4,2 иськемзэ тупатъязы. Азьвыл со векчи кӧльыен шобыртэмын вал, табере - асфальтэн

Сюрес Шегъян (Нижний Казес) но Быги гуртъёсты герӟа. Ӧнерчиос сюреслэсь инъетсэ, дуръёссэ юнматӥзы, ву кошкон гумыос пуктӥзы, сигнал юбоос, сюрес пусъёс но барьеръёс пуктӥзы. Ужъёсты «Гурт интывылъёсты котыр ласянь азинтон» программа улсын быдэстӥзы. 

Объектын ужъёс 2019-тӥ арын кутскизы но кык люкетэн мынӥзы. Со дыр ӵоже оглом 6,5 иськемез выльдӥзы. Гуртын скал гид, сюро таза пудо возён ферма, школа, нылпи сад, фельдшер-акушер пункт ужало. Татын ю но трос аръем турынъёс будэто. Со сяна, та сюрес вылтӥ быдэ Шегъянысь дышетскисьёсты нуо-ваё. Со сюресъя ик Быгиын поттэм гурт возёс вузъёсты Шарканэ келяло
Ярослав Семёнов, Удмуртиысь кивалтэтлэн тӧроез

Озьы ик татын туризм туж умой азинске. 2013-тӥ арын 7-тӥ гудырикошконэ Хельсинкиын Финн-угор егитъёслэн ассоциацизылэн XI конгрессаз Быгиез Финн-угор дуннелэн нырысетӥ лулчеберет шоркареныз ялӥзы.

Сюресэз эскерем бере, удмурт лулчеберетъя «Быгы» йӧскалык центрлэн кивалтӥсез Жанна Ермолаева но «Быгинское» муниципал кылдытэтлэн тӧроез Нина Беляева сюресчиослы экскурсия ортчытӥзы но удмурт улон-вылонлэн аспӧртэмлыкез, интыысь сям-йылолъёс сярысь мадизы.Арлы быдэ Быгиын финн-угор сиён-юонъя «Быг-Быг» калыккуспо фестиваль радъяське, нош ачиз гурт «ДаУР!» ӵектос улсын быръем 100 тужгес учкымон интыос пӧлы пыре.

Сюресъёсты тупатъян вакыт Удмуртиын пумаз вуэ ини. Ужын та вакытлы куинь объект гинэ на: Орловской – Киров улосвылэн гож (7,4 иськем), Кияса – Лутоха (11,3 иськем) но (Кез – Кулига - Карсовай) – Жерноково – Медьма (9,8 иськем). Берпуметӥ кык сюресъёсты озьы ик «Гурт интывылъёсты котыр ласянь азинтон» программа улсын лэсьто, соосты шуркынмон пумозь уже кутозы. 

Тодэ вайытом, кемалась ик ӧвӧл Постол станциозь сюресэз но вуттӥзы.



Наверх
Вниз