Ижкар-1 °C
22 -тӥ коньывуон 2020 Покчиарня
18+

2021-тӥ арын Удмуртиын гурт сюресъёсты тупатъяны ӧжытсэ 750 миллион манет висъялозы. Со сярысь 20-тӥ коньывуонэ мерлыко вотэсъёсын меӵак эфирез дыръя элькунлэн тӧроез Александр Бречалов вераз.

Вуоно арын гурт сюресъёслэсь эшшо 13 люкетсэс тупатъяны чакламын. <…> Соин ик со ӧрлы таяз арынлэсь, 2019-тӥ арынлэсь кык поллы трос коньдон висъяны пумкылъян кутӥм. Гуртъёсысьтымы сюресъёсты тупатъяны, выльдыны но лэсьтыны ӧжытсэ 750 миллион манет коньдон кутӥськоз
Александр Бречалов, Удмуртилэн тӧроез

Пусъём, туннэ нуналлы «Опорный план дорожной деятельности» элькун программа улсын гурт сюресъёслэсь 79 люкетсэс тупатъязы ини. Эшшо ньыльзэ 2020-тӥ ар пумозь вуттозы.

Тодэ вайытом, кемалась ик ӧвӧл сюресчиос Сюмси ёросысь ветлыны луонтэм сюресэз лэсьтӥзы

Удмуртиысь кун автоинспекци водительёслы машиназылэсь гужем шинаоссэ толалтэ ветлыны чакламъёсызлы воштыны ӵектэ. Со сярысь ГИБДД-лэн элькунъя управлениезлэн 1-тӥ ёзэтэз ивортӥз.

20-тӥ коньывуонысен Удмурт Элькунын температура лэзькоз шуыса чаклало. Сюресъёс вылын автомобилистъёс понна туж умойтэм югдур луыны быгатоз – гылыт лымы но йӧвалег. Уйин элькунъя куд-ог интыосын температура 0 градуслэсь улӥе лэзькоз
ГИБДД-лэн элькунъя управлениезлэн 1-тӥ ёзэтэз

Со сяна, автоинспекци машинаослэсь виссэс бадӟымгес возьыны, ӝоглыкез кулэстыны кулэ, нош пумит лыктӥсь транспорт вань дыръя азьысьсэ ортчыны потыны уг яра шуыса тодэ вайытэ. Кин шинаоссэ ӧз вошты, но руль сьӧрын ӧжыт ветлэ ай, соослы сюрес вылэ потэмлэсь возиськыны куро. 

Сюмси ёросын (Ува – Сюмси) – Силино – Коӵо-Юс (Верх-Юс) гуртозь сюреслэсь ветлыны луонтэм кык люкетъёссэ тупатъязы. Со сярысь «Удмуртавтодор» огазеяськон «ВКонтакте» мерлыко вотэсысь огиназ ивортӥз.

«Опорный план дорожной деятельности» элькун программа улсын сюреслэсь оглом 5 иськемзэ выльдӥзы (км 3+400-км 7+000 но км 7+800-км 9+200)

Ӧнерчиос сюрес урдсысь куакъёсты но вечи писпуосты коразы, канаваосты муромытӥзы, ву кошкон гумыосты сузязы. Сюресэз ӵошкытатӥзы, лазег интыосы ватсаса сюй кисьтӥзы. Вылзэ векчиятэм изэн, луоё кӧльыен шобыртӥзы.

Тодэ вайытом, азьвылгес Якшур-Бӧдья ёросын элькун программая Якшур-Бӧдья – Красногорск сюреслэсь ветлыны луонтэм люкетсэ тупатъязы.

«Кышкыттэм но ӟечлыко автомобиль сюресъёс» йӧскалык ӵектосъя Можгаын 10 урамъёсты тупатъязы ни. Со сярысь улосвыл тӧролэн но кивалтэтлэн пресс-службазы ивортӥз.

Сюресъёсты 2020-тӥ арын элькунлэн йӧскалык ӵектосъя вань ужъёсты дыраз быдъсъямезлы луыса ватсаса басьтэм коньдонэн тупатъяло.

Туннэ карын 10 сюрес люкетъёс тупатъямын ни, туж шумпоттэ, соос школаос но нылпи садъёс доры нуись валтӥсь сюресъёс луо шуыса. Со сяна, ужъёслэсь быдӟалазэс но пусйыны кулэ - кожон интыосты но сюрес дуръёсты лэсьтӥзы, кык интыын тротуаръёсты но тупатъязы
Марат Хамидуллин, «Автомобильная Удмуртия» мер огазеяськонлэн кивалтӥсезлэн аоштӥсез

Сюресчиос Красной, Южной, Нагорной, Пролетарской, Железнодорожной, Первомайской, Азин, Устюжанин, Чапаев нимо урамъёсты но Базарной пролкаез тупатъязы.

Чаклась ӧри ужъёслэсь ӟечлыксэс эскериз. Ваньмыз объектъёс 100 процентлы дась.

Таяз арын Можгаын 18 урамъёсысь сюресъёсты выльдозы, оглом 8,7 иськем мында

Та дыре Родниковой, Союзной, Сюагильской но Лесной урамъёсты тупатъянэз йылпумъян пала вутто. Наговицын нимо, Лесной урамъёсын но Северной пролкаын асфальт вӧлдыны кутскизы.

Тодэ вайытом, Удмуртия йӧскаылк ӵектосъя ватсаса 340 миллион манет басьтӥз. Со коньдонэз Сарапулысь, Камбаркаысь, Воткаысь, Можгаысь сюресъёсты тупатъяны висъязы. 

Якшур-Бӧдья тракт но Ижкар котыр сюрес вожын (ДПС-лэн азьвыл постэз дорын) светофоръёс, фото- но видеокамераос ужаны, тыл пиштыны кутскизы. Ужъёсты «Кышкыттэм но ӟечлыко автомобиль сюресъёс» йӧскалык ӵектосъя быдэстӥзы. Со сярысь улосвыл тӧролэн но кивалтэтлэн пресс-службазы ивортӥз.

Али светофоръёс эскерон вылысь ужалозы: 30 секунд - «вож» коридор Якшур-Бӧья тракт вылтӥ мынӥсьёслы, 25 секунд – Ижкар котыр сюрес вылысь потӥсьёслы.

Нырысетӥ арня ӵоже ӧнерчиос сюресъёс вожетӥ ортчись вань транспортлэсь лыдзэ чаклалозы. Соя светофорлэсь транспорт но пыдын ветлӥсьёс понна тужгес умой тупась ужан радлыксэ лыдъялозы. Озьы ик эскерон амалэн мынон-ветлон куронъёсты тӥямез пусйись фото- но видеокамераос ужалозы.

2018-тӥ арын та сюрес вож кышкытлыо интыен лыдъямын вал. Туэ 9 толэзь ӵоже татын куинь шудтэм учыръёс луизы, отын вить адями шуккиськиз. Ваньмыз соос сюресэз сётымтэен герӟаськемын

Таяз арняе Ижкарын йӧскаылк ӵектосъя пуктэм эшшо ньыль светофоръёс ужаны кутскозы. Со Союзной, Пушкинской ульчаосысь светофоръёс, озьы ик «Вормон урамъёс» федерал ӵектосэ шедем Вормонлы 30 ар но Вормонлы 40 ар ульчаосысь кык светофоръёс. Вуоно арын ми озьы ик вить светофоръёс пуктыны малпаськомы. Со уж элькунамы улӥсьёсты кышкытлыкъёслэсь утьыны юрттоз шуыса оскиськомы
Ирина Шкляр, Удмуртиысь транспортъя но сюрес возёсъя министрлэн воштӥсез

Тодэ вайытом, таяз арын тыл юбоос эшшо куинь кышкытлыко интыосын пуктӥзы – Дэри – Изгурт сюрес вылын кык интыын но Ижкар – Ува сюрес вылын Шор Постол гурт вӧзын. 

Якшур-Бӧдья ёросын «Опорный план дорожной деятельности» элькун программая Якшур-Бӧдья – Красногорск сюреслэсь ветлыны луонтэм люкетсэ тупатъязы. Со сярысь улосвыл тӧролэн но кивалтэтлэн пресс-службазы ивортӥз.

Тупатъям сюреслэн кузьдалаез 2,2 иськем. Со Тыло (Старые Зятцы) черкогурт пыр ортче, отын улӥсьёс выльдӥьсконэз туж кема возьмазы.

Шумпотӥськомы, милям асфальтэн шобыртэм сюресмы кылдӥз шуыса
Любовь Кононова, «Старозятцинское» муниципал кылдытэтлэн тӧроез

Азьвыл та сюрес векчи кӧльен шобыртэмын вал, зоро вакытъёсы со ортчыны луонтэм луылӥз. Ӧнерчиос сюреслэсь инъетсэ юнматӥзы, вылаз 7 метр пасьта асфальтобетон вӧлдӥзы. Со сяна, 13 кожон инытосты тупатӥзы, берытскон но транспортэ пуксён интыос, автостанци дорысен вузкаронниозь тротуар лэсьтӥзы. Ву кошкыны вить гуымос пуктӥзы.

Озьы ик та сюреслэн Гобгурт но Лигорон гуртъёс вискысь 2,5 иськемъем гарантийной люкетаз шекъёсты палэнтон ужъёс азьланьтӥсько.

Тодэ вайытом, Удмуртиын «Опорный план дорожной деятельности» улосвыл программа улсын 2020-тӥ арын тупатъяны чаклам ӝынызэ ветлыны луонтэм сюресъёсты выльдӥзы ни. 

Ижкарын Саранской ульчаысь сюресэз тупатъян ужъёсты йылпумъязы. Со туэ Удмуртиын «Кышкыттэм но ӟечлыко автомобиль сюресъёс» йӧскалык ӵектос улсын выльдыны чаклам объектъёс пӧлысь берпуметӥез. 29-тӥ куарусёнэ ужез элькунсь транспортъя но сюрес возёсъя министр Алексей Горбачёв, Ленин ёросысь администрацилэн тӧроез Рамиль Гайнуллин, Ижкарлэн администрациысьтыз но мер огазеяськонъёсысь ыстэм муртъёс эскеризы.

Тупатъян ужъёсты нуыкузы сюресчиос сизьым ошмесъёсты шараязы, соин ик объектэз вуттон дыр ӝегаз. Ӧнерчиос вуэз ӧръянъя ватсаса ужъёс быдэстӥзы но гумыос пуктылӥзы. Ужасьёс оглом 670 метр сюрес шобрет вӧлдӥзы, бордюръёс лэсьтӥзы, тротуаръёсты асфальтэн шобыртӥзы.

Алексей Горбачёвлэн верамезъя, Саранской ульча Ленин ёрос понна валтӥсь объект луэ. Со Строитель но Татарбазар микрорайонъёсты герӟа, озьы ик Азин нимо ульчалэн но Кирпичной проездлэн дублёрез луэ.

Татын чугун сюрес вамен потонэз ӧвӧл, со та росысь магистральной ульчаосты бушатон понна бадӟым юрттэт луэ
Алексей Горбачёв, Удмуртиысь транспортъя но сюрес возёсъя министр

Рамиль Гайнуллин пусйиз, та сюресэз тупатъяны курыса, калыклэсь трос ӝожтӥськонъёс вуылӥзы. Озьы ик 2020-тӥ арын Ленин ёросын йӧскалык ӵектосъя 11 сюрес люкетъёсты тупатъязы шуыса ватсаз.

Удмуртиысь транспортъя но сюрес возёсъя министрлэн кылъёсызъя, вуоно арын Удмуртиын йӧскалык ӵектосъя сюресъёсты тупатъяны федерал коньдэтысь 680 миллион манет висъялозы, сомында ик элькун ватсалоз.

Алексей Горбачёвлэн верамезъя, коньдонлэсь бадӟым люкетсэ ёросъёсы келялозы но элькун трассаосты тупатъяны кутозы. 2021-тӥ арын Ижкарын валтӥсь ужъёсты йылпумъялозы.

Куинь арскын Ижкаре 2 миллиард 500 миллион манет инъямын вал. Соин ик вуоно арлы ми 200-300 миллион манет чакласьком, 3-6 объектъёс тупатъямын луозы. <…> Туннэ нуналы иж агломерациын 48 процентэз сюресъёс эсэпъёслы тупало. 2024-тӥ арлы ми 53 процентозь вуыны кулэ
Алексей Горбачёв, Удмуртиысь транспортъя но сюрес возёсъя министр

Тодэ вайытом, Удмуртия йӧскалык ӵектосэн пуктэм ужпумъёссэ быдэстӥз но ватсаса 340 миллион манет басьтӥз. Со коньдонэз Можгаысь, Воткаысь, Сарапулысь но Камбаркаысь сюресъёсты тупатъяны висъязы. 2020-тӥ арын «Кышкыттэм но ӟечлыко автомобиль сюресъёс» ӵектосъя 110 иськем пала сюресъёсты выльдӥзы – 19 элькун трассаосты но Ижкарысь 23 объектъёсты. 

Удмуртиын Сарапул – Вотка сюреслэсь 3,7 иськемъем люкетсэ тупатъянэз йылпумъязы. Ужъёсты «Развитие транспортной системы Удмуртской Республики» программа улсын улосвыл коньдэт чотын быдэстӥзы. Со сярысь элькун тӧролэн но кивалтэтлэн пресс-службазы ивортӥз.

Азьвыл Ольхово – Перевозной сюрес грунтовой вал, али со быдэсак асфальтэн шобыртэмын, пасьталаез 7 метр. Объектын ужъёсты кык люкетэн нуизы: 3,2 иськемзэ сюресчиос 2019-тӥ арын лэсьтӥзы, 3,7 иськемзэ – таяз арын. <…> Сюресэз выльдэмен валче Воткаысь Сарапулэ но берен Ижкаре партэк вуыны луонлык кылдӥз
Ярослав Семёнов, Удмуртиысь кивалтэтлэн тӧроез

Тупатъян ужъёсты южтолэзе кутскизы. Нырысь ик сюресчиос ву кошкон гумыос пуктӥзы, собере сюресэз асфальтобетонэн шобыртӥзы, сюрес урдэсъёсты ӵошкытатӥзы но юнматӥзы.

Улосвыл трассаосты выльдон улсын эшшо куинь интыын ужъёсты нуо на: Вотка – Чёрной (5,3 иськем), (Ижкар – Ува) – Постол станция (3,82 иськем) но Орловской – Киров улосвыллэн гожез (7,4 иськем).

Тодэ вайытом, Удмуртиын «Опорный план дорожной деятельности» улосвыл программа улсын 2020-тӥ арын тупатъяны чаклам ӝынызэ ветлыны луонтэм сюресъёсты выльдӥзы.

Удмуртиын «Опорный план дорожной деятельности» улосвыл программа улсын 2020-тӥ арын тупатъяны чаклам ӝынызэ ветлыны луонтэм сюресъёсты вуттӥзы. Со сярысь элькунысь транспортъя но сюрес возёсъя министерстволэн пресс-службаез ивортӥз.

Туэ ӧнерчиос 28 объектъёсысь оглом 131 иськем 523 метр сюресъёсты выльдыны кулэ. 24-тӥ куарусёнэ лыдметысь 14-тӥзэ люкетэз – Дэбес – Уйвай сюресэз уже кутӥзы. Выльдэм сюреслэн кузьдалаез 3 иськем луиз.

Сюрес вазен ветлыны луонтэм лыдъяськиз ини. Со пумысен трос ӝожтӥськонъёс вуылӥзы. Объектын ужъёсты туэ 3-тӥ гудырикошконэ мытӥзы.

Сюресчиос асфальт шобретсэ выльдӥзы, барьеръёс, сюрес знакъёс, сигнал юбоос пуктӥзы, сюрес дуръёсты юнматӥзы но дугдылон интыос радъязы.

Вуоно арын сюреслэсь эшшо куать иськемзэ лэсьтыны чаклало

Удмуртиысь кивалтэтлэн тӧроез Ярослав Семёнов пусйиз, «Опорный план дорожной деятельности» элькун программа куинетӥ арзэ ужа ини шуыса. Нырысь-валысь со улсын 62 сюрес люкетъёсты выльдыны чаклало вал, бӧрысь лыдметэз ватсазы на. Али отчы 83 сюрес люкетъёс пыро.

Со сюресъёс гуртъёсы нуо, кудъёсаз оглом 20 сюрс пала адями улэ. Отӥ нӧд вакытэ ортчыны ик уг луы вал. Туэлы пуктэм ужпумысь ӝыныез объектъёс тупатъямын ини. Тросэз ужъёс – эшшо 14 сюрес люкетъёс – коньывуон-шуркынмон вакытлы усёзы. Со вакытэ куазен сэрен сюресчиослы ӝог ужаны шуг луэ. Озьы ке но, ваньмыз соос туэ вуттэмын луыны кулэ
Ярослав Семёнов, Удмуртиысь кивалтэтлэн тӧроез

Тодэ вайытом, кемалась ик ӧвӧл сюресчиос Грак ёросысь ветлыны луонтэм сюресэз выльдӥзы

Удмуртиысь Грак ёросын Вылӥ Эгра – Мишкино – Татарстанлэн гожез сюресэз лэсьтӥзы. Со сярысь «Удмуртавтодор» огазеяськонлэн «ВКонтакте» мерлыко вотэсысь огиназ ивортӥзы.

Сюресэз «Опорный план дорожной деятельности» элькун программа улсын тупатъязы

Ӧнерчиос сюрес урдсысь будосъёсты утялтӥзы, ву кошкон сӧзнэтэз тупатъязы: кюветъёсты мургес каризы, ву кошкон гумыосты чылкытатӥзы, керамика гумыослэсь ворсам дренаж пуктӥзы.

Сюресэз ӵошкытатӥзы, улыг интыосаз музъем понӥзы. Бӧрысь сюрес вылэ щебеньлэсь, луолэсь но гравийлэсь суретлэсь 20 сантиметръем сӥ вӧлдӥзы.

Лэсьтэм сюреслэн кузьдалаез 2 иськем 500 метр луиз

Тодэ вайытом, Сюресэз туэ пӧсьтолэзе тупатъяны кутскизы вал. Кемалась ик ӧвӧл, элькун программа улсын Сюмси ёросысь сюресэз но вуттӥзы.

Удмуртиын Дэбес – Кез сюресэз тупатъязы. Со сярысь «Удмуртавтодор» огазеяськонлэн «ВКонтакте» мерлыко вотэсысь бамаз ивортӥзы.

Ӧнерчиос сюреслэсь кык люкетсэ (оглом 6,79 иськем) выльдӥзы. Нырысетӥез - сюреслэн кутсконысеныз (Дэбесысь Советской но Андронов нимо урамъёс вожысен) Варни гурт пала куинь иськем, кыкетӥез - Тольён гуртэ кожон дорысен Ванялуд гурт дорозь (км 7+900 км 11+602).

Сюресчиос сюрес урдсысь будосъёсты утялтӥзы, сюреслэсь вылӥ сӥзэ фрезеровать каризы, кык сӥен асфальтобетон кисьтӥзы, сюрес дуръёсты юнматӥзы, дугдылон интыосты умой каризы, кык павильон пуктӥзы.

Сюресэз «Кышкыттэм но ӟечлыко автомобиль сюресъёс» йӧскалык ӵектос улсын лэсьтӥзы.

Тодэ вайытом, кылем арын Дэбес – Кез сюреслэсь 3 иськем 600 метр люкетсэ выльдӥзы вал ини. 

Удмуртиысь Сюмси ёросын «Опорный план дорожной деятельности»улосвыл программа улсын Бадӟымлуд – Зун – Орловской гурт сюресэз тупатъязы. Со сярысь «Удмуртавтодор» огазеяськонлэн «ВКонтакте» мерлыко вотэсысь огиназ ивортӥзы.

Выльдэм сюреслэн кузьдалаез ньыль иськем луиз

Ӧнерчиос сюрес урдсысь будосъёсты утялтӥзы, ву кошкон сӧзнэтэз выльдӥзы: кюветъёсты мургес каризы, ву кошкон гумыосты сузязы. Сюресэз ӵошкытатӥзы, улыг интыосаз музъем кисьтазы. Сюресэз щебеньлэсь, песоклэсь но гравийлэсь суретэн 20 сантиметр зӧкталаем сӥен шобыртӥзы.

Тодэ вайытом, кемалась ик ӧвӧл элькун программа улсын Вавож ёросысь сюресэз вуттӥзы

Удмуртиысь Шаркан ёросын (Якшур-Бӧдья - Шаркан) – Шегъян Тыло сюресэз вуттӥзы. Сюрес «Кышкыттэм но ӟечлыко автомобиль сюресъёс» йӧскалык ӵектос улсын 2020-тӥ арын тупатъям 19 сюресъёс пӧлысь берпуметӥез луиз. Со сярысь элькун тӧролэн но кивалтэтлэн пресс-службазы ивортэ.

Ӧнерчиос сюреслэсь 5 иськем 700 метрзэ тупатъязы. Ужъёс улсын сюреслэсь вужмем вылӥ сӥзэ куштӥзы, куд-ог интыосын инъетсэ юнматӥзы, бӧрысь кык сӥен асфальтобетон кисьтӥзы. Со сяна, сюрес урдсысь будосъёсты утялтӥзы, сюрес дуръёсты юнматӥзы.

Азьланяз калык понна Сосновка гуртэ кожон доры дугдылон инты лэсьтозы. Выль павильон пуктозы.

Ми дорозь тылпу кысӥсь, ӝог эмъюрттэт сётӥсь машинаос но вуыны уг быгато вал. Соин ик ми понна та сюрес туж кулэ. Ӟечокъёс, сюресчиос. Кылем арын ӟеч тыршизы, туэ но ӝог огъя ужазы. Али пумтэм шумпотӥськом. Табере ми Якшур-Бӧдьяысь но Шарканысь автоперевозчикъёс доры вазиськом но соосты калыкмы понна выль автобус маршрутъёс радъяны куром
Елена Широбокова, «Заречно-Вишурское» муниципал кылдытэтлэн тӧроез

Пусъём, та сюрес куинь матысь гуртъёс понна валтӥсь сюрес луэ. Со кузя соос школае, нылпи садэ, эмъюртэ, ёрос центре ветло. 2017-тӥ арысен сюрес «Дорожная инспекция ОНФ/Карта убитых дорог» ӵектослэн лыдметаз куинь тужгес аламаосыз сюресъёс пӧлы пыриз. Гуртэ автобусъёс ветлэмысь дугдӥзы.

Тодэ вайытом, Шегъян Тылоозь сюреслэсь 3 иськем 200 метръем нырысетӥ люкетсэ «Кышкыттэм но ӟечлыко автомобиль сюресъёс» йӧскалык ӵектос улсын 2019-тӥ арын тупатъязы. 2020-тӥ арын йӧскалык ӵектос улсын сюресъёсты тупатъян валтӥсь ужъёсты йылпумъязы.  

Ижкарын Россилэн азьмуртэныз Владимир Путинэн кичӧлтэм «Кышкыттэм но ӟечлыко автомобиль сюресъёс» йӧскалык ӵектос улсын Советской урамысь сюресэз тупатъязы. Со сярысь элькун тӧролэн но кивалтэтлэн пресс-службазы ивортэ.

Тупатъян ужъёс улсын Ленин нимо урам дорысен Карлутка Ярдур валлин Орджоникидзе урам дорозь сюреслэн инъетэз ӧвӧл шуыса тодмо луиз. Соин валче ӧнерчиос нырысь выль инъет лэсьтӥзы, собере гинэ кык сӥен асфальтобетон кисьтӥзы. Со сяна, 133 колодчаосты ӝутӥзы. Озьы ик соос Советской урамысь вань сюрес вожъёсты выльдӥзы: Орджоникидзе нимо урамен, Воровский нимо урамен, Удмуртскоен, Коммунар урамен, Пушкинской урамен, Красноармейскоен, Горький нимо урамен но Карл Маркс нимо урамен.

Ватсаса Советской урам дорысен Ленин нимо урам дорозь Красноармейской урамлэсь люкетсэ лэсьтӥзы.

Выльдэм сюреслэн кузьдалаез оглом 2 иськем 686 метр луиз

Эскерисьёс лэсьтэм ужъёслы алонъёссэс ӧз вералэ.

Удмуртиысь транспортъя но сюрес возёсъя министрлэн воштӥсез Ирина Шкляр туэ Ижкарын гинэ 30 иськемлэсь трос сюресъёсты лэсьтӥзы шуыса пусйиз.

Асфальт вӧлдыны гинэ ӧжыт, сюрес ӟечлыко, кема аръёс ӵоже чидась но кышкытлыктэм луыны кулэ. «Кышкыттэм но ӟечлыко автомобиль сюресъёс» улсын лэсьтӥськись вань объектъёсын ми битумно-полимерной материаллэсь стык лентаосты уже кутӥм. Озьы ми стыкъёсты пыр паӵамлэсь утиськом, кузьдалаезъя пилиськон учыръёсты ӧжытгес карыса, но азьланяз куашкан учыръёсты палэнтыса, сюрес шобретлэсь ужан вакытсэ кузятӥськом
Ирина Шкляр, Удмуртиысь транспортъя но сюрес возёсъя министрлэн воштӥсез

Озьы ик министрлэн воштӥсез пусйиз, вуоно арын вань объектъёсын «уясь люкъёс» («плавающие люки») технологиез кутыны чаклало шуыса. Солэн кылъёсызъя, со бетон люкъёс вылэ понӥськись дышем колодчаослэсь сюрес конструкция вылэ пыкъяськеменыз висъяське. Соин валче асфальт уг лапка. Со сяна, люкез ӝуждалаезъя чакланы луэ, мар бӧрысь сюресэз тупатъяку ужъёсты капчиятэ. 

Тодэ вайытом, Удмуртиын йӧскалык ӵектос улсын сюресъёсты тупатъян валтӥсь ужъёсты йылпумъязы

Удмуртиын Владимир Путинэн кичӧлтэм «Кышкыттэм но ӟечлыко автомобиль сюресъёс» йӧскалык ӵектос улсын 2020-тӥ арын сюресъёсты тупатъян валтӥсь ужъёсты йылпумъязы. Со сярысь элькун тӧролэн но кивалтэтлэн пресс-службазы ивортэ.

Улосвыл кивалтэтлэн тӧроезлэн Ярослав Семёновлэн кылъёсызъя, туэ сюресчиос азьын бадӟым ужпум сылӥз. Соослы вань программаосъя оглом 400 иськемлэсь трос сюресъёсты тупатъяны, выльдыны кулэ вал.

Та быдӟым ужпумъёс элькунмы азьын берло 10 арзэ ӧз сылылэ ни, дыр. Ӵошатон понна, 2016-тӥ арын 257 иськем сюресъёс лэсьтоно вал, 2017-тӥ арын – 220 иськем, 2018-тӥ арын – 288 иськем, 2019-тӥ арын – 303 иськем
Ярослав Семёнов, Удмуртиысь кивалтэтлэн тӧроез

Сюресъёсты тупатъянъя валтӥсез программа «Кышкыттэм но ӟечлыко автомобиль сюресъёс» йӧскалык ӵектос луэ.

2020-тӥ арын сое быдэстон понна 1 миллиард 580 миллион манет висъязы. Со улсын улосвыл но муниципал кылдытэтъёс вискысь, Ижкарысь 42 сюресъёсты тупатъязы но сюрес вылын кышкытлыкез палэнтон понна ужрадъёсты быдэстӥзы.

Ярослав Семёновлэн кылъёсызъя, туэ сюрес лэсьтонъя вань огкылъёсты сюрес лэсьтон вакыт кутскытозь гожтӥзы. Солы луыса сюресчиос объектъёсы оштолэзь пумын куазь тупатскем бере ик потыны быгатӥзы.

Валтӥсь ужъёсты ньыль толэзь ӵоже быдэстӥзы. Туннэ нуналлы Ижкарысь Саранской урамын гинэ ужъёс кылё на, со тупатъян ужъёс дыръя ватсаса ужъёс кылдэмен герӟаськемын. Сюрес улын сизьым ошмесъёс шараяськизы. Вань ужъёс куарусён пумозь вуттэмын луозы
Ярослав Семёнов, Удмуртиысь кивалтэтлэн тӧроез

Туэ йӧскалык ӵектос улсын 110 иськем сюресъёсты выльдӥзы, со пӧлысь 80 иськемез – улосвыл сюресъёс

Тросэз тупатъям улосвыл сюресъёс ёрос центръёсты герӟало. Соос пӧлын Алнаш – Грак, Кизнер – Грак, Можга – Вавож, Глаз – Яр – Пудем, Дэбес – Кез, Эгра – Красногорск но мукет сюресъёс. Со сяна, вань сюресъёс, кудъёсыз каръёсысь яке бадӟым улон интыосысь потто: Ижкар – Якшур-Бӧдья но Шабердӥ тракт («М7 Волга» сюресэ вутто), Эгра – Глазкар, Сьӧлта черкогуртэз котыртон сюрес.

Калык понна бадӟым инты басьто школаосы, нылпи садъёсы, эмъюртъёсы, фельдшер-акушер пунктъёсы но лулчеберет центръёсы вуттӥсь сюресъёс. Кылсярысь, Шаркан ёросысь (Якшур-Бӧдья - Шаркан) – Шегъян Тыло сюрес ёрос центре вуттӥсь валтӥсь сюрес луэ. 2017-тӥ арысен со тужгес зол бырем сюресъёс пӧлын вал, отӥ автобусъёс но ветлэмысь дугдӥзы. Туэ сюресэз лэсьтӥзы

Ижкарын «Кышкыттэм но ӟечлыко автомобиль сюресъёс» йӧскалык ӵектос улсын Сельской урамысь Выставочной урам дорысен кар гожозь сюрес люкетсэ тупатъязы. Со сярысь элькун тӧролэн но кивалтэтлэн пресс-службазы ивортэ.

Ӧнерчиос сюрес вылэ кык сӥ асфальтобетон вӧлдӥзы, куд-ог интыосаз сюрес инъетэз воштӥзы. Озьы ик сюресчиос оглом 2 сюрс 365 квадрат метр тротуаръёсты но выльдӥзы. Ваньзэ «Доступная среда» программалэн куронъёсызъя вакчиятэм бордюр изъёс тырыса лэсьтӥзы.

Озьы соос ву кошконэз радъязы. Азьвыл сюреслэн аспӧртэм ландшафтэныз сэрен улыг интыосаз ву люкаськылӥз. Сыӵе учыръёсты палэнтон понна ӧнерчиос ву кошкон гумыос лэсьтӥзы, озьы ик сюрес улэ труба понӥзы.

Огаз сюрес люкетын сюрес инъетэн шуг-секытъёс кылдӥзы. 600 метр кузьдалаем интыяз со воксё ӧвӧл вылэм шуыса тодмо луиз. Соин сюресчиослы ватсаса уж лэсьтоно луиз. Собере гинэ сюресэз асфальтобетон сӥосын вӧлдӥзы.

Выльдэм сюреслэн оглом кузьдалаем 3 иськем 500 метр луиз

Ми Ижкарын йӧскалык ӵектосъя ужъёсты йылпумъяськом. Туннэ нуналлы Индустри ёросысь Сельской урам - одӥгез йылпумъясез объект луэ ини. Вераны кулэ, та сюрес Ижкарез котыртон сюресысь каре пырон луэ, ветлӥсь трос. Татӥ мер транспорт ветлэ, трос гинэ ас но секыт груз нуллӥсь машинаос. Соин ик та объект вань куронъёслы мед тупалоз, адямиослы кышкыттэм мед луоз шуыса кулэ вал
Алексей Горбачёв, транспортъя но сюрес возёсъя министр

Туннэ нуналлы Ижкарын лэсьтоно 23 объектъёс пӧлысь 21-зэ уже кутӥзы ини. Сюресъёсты чаклась ӧри Советской урамын ужъёсты эскерыны дасяське. Ужъёс Ленин ёросысь Саранской урамын гинэ мыно на. Сое куарусён пумозь вуттыны кулэ.

Тодэ вайытом, кылем арняе Ижкарысь Красногеройской но Степной урамъёсысь сюресъёсты вуттӥзы

Удмуртиысь Вавож ёросын «Опорный план дорожной деятельности» элькун программа улсын (Вавож - Кильмезь) – Вуж Ӝуё сюреслэсь ветлыны луонтэм кык люкетсэ тупатъязы. Со сярысь «Удмуртавтодор» огазеяськонлэн «ВКонтакте» мерлыко вотэсысь бамаз ивортӥзы.

Тупатъян ужъёс улсын ӧнерчиос сюрес урдсысь будосъёсты утялтӥзы. Озьы ик ву кошкон сӧзнэтсэ тупатӥзы: кюветъёссэ мургес гудӥзы, ву кошкон гумыосты чылкытатӥзы. Сюрес вылэз ӵошкатӥзы, нюко-гопо интыосаз музъем кисьтӥзы. Сюресэз 20 сантиметр зӧкталаем щебеньлэсь, луолэсь, гравийлэсь суретэн вӧлдӥзы.

Выльдэм сюреслэн оглом кузьдалаем 5 иськем 100 метр луиз

Тодэ вайытом, элькун программа улсын озьы ик Дэри ёросысь Сизьгуртозь сюресэз выльдӥзы

Ижкарын «Кышкыттэм но ӟечлыко автомобиль сюресъёс» йӧскалык ӵектос улсын Первомай ёросысь Красногеройской но Ленин ёросысь Степной урамъёсысь сюресъёсты тупатъязы. Со сярысь ӵектослэн улосвыл офисэзлэн пресс-службаез ивортӥз.

Сюресъёслэсь дасьлыксэс Ижкар администрациысь ӧнерчиос, подрядчикъёс, ГИБДД-ын ужасьёс, мер огазеяськонъёслэн ёзчиоссы эскеризы.

Красногеройской урамын быдэсаз (1 иськем 280 метр) сюрес шобретсэ воштӥзы, Коммунаръёслэн, Пушкинской, Красноармейской урамъёсын вожъёсты но выльдӥзы. Тупатъян ужъёс улсын кык сӥен асфальтобетон вӧлдӥзы. Изъянмем бордюр изъёсты воштӥзы, колодчаосты но зор ву кошкон решёткаосты ӝутӥзы, гумыоссэ сузязы. Адямиослы сюрес вамен потыны каньыл мед луоз шуыса, бордюр изъёсты лапеггес каризы.

Степной урамын озьы ик кык сӥен асфальтобетон кисьтӥзы. Тупатъян ужъёс быдэс урамын – Областной урамыен Московской урам дорозь – мынӥзы (2 иськем 460 метр). Калыклэн куремезъя, сюресчиос кыремъёсты но ву кошкон гумыосты сузязы.

Сюресъёсты эскерись ӧриос лэсьтэм ужъёсты умоен лыдъязы, сюресъёсты уже кутӥзы

Удмуртиысь кивалтэтлэн тӧроез Ярослав Семёнов тупатъяно сюресъёсты бырйыку соослэсь мерлыко кулэлыксэс но лыдэ басьто шуыса пусйиз.

Красногеройской – Ижкарлэн шор люкетэзлэн огез валтӥсез сюресэз луэ. Отын дышетон но спорт ужъюртъёс интыяськемын, соин ик ветлӥсьёс трос. Али, тупатъян ужъёслы луыса, Удмурт кун университет, 30 номеро лицей, «Динамо» стадион доры шуг-секыттэк вуыны луэ. Степной урамтӥ озьы ик М. Т. Калашников нимо 20 номеро лицее, 10 номеро школае, 43 номеро нылпи садэ мыно
Ярослав Семёнов, Удмуртиысь кивалтэтлэн тӧроез

Кивалтэтлэн тӧроез пусйиз, сюресъёсты тупатъям сяна, нылпиослэн кышкыттэмлыксы сярысь но сюлмаськизы. Кыказ ик урамъёсын дышетскон юртъёслы матын луись сюрес выжон интыосын искусственной лёгъёс лэсьтӥзы, сюрес пусъёс пуктылӥзы. Со сяна, кулэ интыосы тыл юбоос пуктон ласянь ужпумъёсты сэртто-пертчо.

Пусъём, 2-тӥ куарусёнлы Ижкарын тупатъяно 23 сюрес люкетъёс пӧлысь 19-сэ вуттӥзы ини. Эшшо куинез уже кутыны дась. Огаз ужъёс азьланьтӥсько на. 

Тодэ вайытом, на нуналъёсы Маркин но Пастухов нимо урамъёсысь сюресъёсты уже кутӥзы.  

Ижкарын «Кышкыттэм но ӟечлыко автомобиль сюресъёс» йӧскалык ӵектосъя Маркин нимо но Пастухов нимо ульчаосты тупатъянэз йылпумъязы. Со сярысь ӵектослэн улосвыл офисэзлэн пресс-службаез ивортӥз.

Маркин нимо ульчаын 2,36 иськемез выльдӥзы. Сюресчиос асфальтобетон кык сӥен вӧлдӥзы, куд-ог интыын выль тротуаръёс лэсьтӥзы но мер транспортлы дугдылон интыос тупатӥзы.

Пастухов нимо ульчаын, нош со 1,78 иськем, асфальтэз воштӥзы, куд-ог интыосын тротуаръёсты тупатъязы.

Вераны кулэ, Маркин нимо ульчаын вань нимаз коркаос доры транспорт пырон понна бордюр изъёс лапег лэсьтэмын, сюресчиос ву кошкон ужпумъёсты но сэрттӥзы-пертчизы. Со сяна, отын тротуаръёс ноку но ӧй вал, али пыдын ветлон сюрес, паськыт ӧвӧл ке но, вань. Пастухов нимо ульчаын подрядчиклы ужась ӧриен верам алонъёс палэнтэмын. Вераськон тротуаръёс, сюресэз выжон интыос, бордюръёсты лапег лэсьтон сярысь
Борис Ломаев, «Автомобильная Удмуртия» мер огазеяськонлэн кивалтӥсез

Уже кутэм вань материалъёс ГОСТ-лы тупамзыя вань эскеронъёсты ортчизы. Куронъёсты тӥянъёс ӧвӧл. Маркин нимо но Пастухов нимо ульчаосты уже кутонъя ужкагазъёсты кинюртӥзы.

Туннэ милям объектъёсты кутон, актъёсты кинюртон мынэ. Йӧскалык ӵектос улсын валтӥсь контрактъёсъя ужъёс быдэстэмын. Туннэлы милям одӥг объект кылемын – со Саранской ульча, но со ватсаса ужрадъёс улсын. Отын ву кошконэз лэсьтоно, угось сизьым ошмесъёсты шараязы. Озьы ик куд-ог объектъёсын, карын улӥсьёслэн вазиськонъёссыя, ватсаса ужъёс нуисько
Алексей Горбачёв, Удмуртиысь транспортъя но сюрес возёсъя министр

Туннэ нуналлы Ижкарысь 23 объектъёс пӧлысь 17-ез уже кутэмын ни, витез ӧриен эскеронъёслы дась. Ужъёсты одӥгаз объектъёсын азьланьто. 

Тодэ вайытом, гужемлэн берпуметӥ нуналаз ӧри Ижкарысь Шабердӥ трактэз но Клубной урамез уже кутон сярысь ужкагазъёсты кинюртӥз

Ижкарын Шабердӥ трактэз но Клубной урамез тупатъязы. 31-тӥ гудырикошконэ эскерись ӧри ужез быдэстэм сярысь ужкагазъёсты кинюртӥз. Со сярысь улосвыл тӧролэн но кивалтэтлэн пресс-службазы ивортӥз.

«Кышкыттэм но ӟечлыко автомобиль сюресъёс» йӧскалык ӵектос улсын Шабердӥ трактлэсь 4,5 иськемзэ выльдӥзы. Ӧнерчиос куинь интыын сюреслэсь инъетсэ воштӥзы, ву кошкон канаваосты тупатӥзы, бордюр изъёс пуктӥзы. Сюрес вылэ кык сӥен асфальтобетон вӧлдӥзы. Со сяна, мер транспорт дугдылон интыын автобуслы котырскон интыез паськытатӥзы.

Озьы ик Шабердӥ трактысь 1-тӥ Тверской ульчае кожонэз но 60 номеро школаозь сюресэз быдэсак тупатъязы.

Та сюрес, Шабердӥ тракт кадь ик, милемлы туж кулэ вал. Малы ке шуоно школаозь та сюрес гинэ вуэ. Та сюрес вылтӥ школае пиналъёсты ваё, сиён-юонъёс вутто, жуг-жагез потто. Ӝог эмъюрттэт сётӥсьёс, частникъёс – ваньмыз та сюрес вылтӥ ветло
Людмила Кунаева, Ижкарысь 60 номеро школалэн кивалтӥсез

Та дыре кар тӧрлыкъёс сюре пусъёс пуктон, юри лэсьтэм лёгъёсын пыдын выжон интыосты радъян сярысь ужпумез сэртто-пертчо.

Клубной урам Строитель микрорайонысь одӥгез валтӥсь сюрес луэ, соин ик тупатъян ужъёс вакытэ но отӥ мынон-ветлонэз быдэсак ӧз дугдытъялэ. Сюресчиос 29-тӥ инвожое ужаны кутскизы, соослы 1,8 иськемысь сюрес шобретэз куштыны, выль асфальт кык сӥен вӧлдыны, тротуаръёсты тупатъяны кулэ вал. Ужъёсты кутскем бере валамон луиз, куд-ог интыын сюреслэсь инъетсэ но воштоно шуыса. 

Клубной но Кузебай Герд нимо ульчаос вожын пыды выжон инты но кылдӥз. Выль тротуар Мужвайской урамысен Оружейник Драгунов нимо урамозь лэсьтӥзы. Со сяна, тротуаръёс Саранской урамозь но вуозы.

Улосвыл кивалтэтлэн тӧроез Ярослав Семёнов пусйиз, Удмуртиын йӧскалык ӵектосэз умой быдэсъямлы луыса, федерал коньдэтысь ватсаса 340 миллион манет басьтыны луиз. 15-тӥ коньывуонозь каръёсысь урамъёсын ватсаса 27 иськем сюресъёсты тупатъялозы. Та дыре ужъёс 56 процентлы быдэстэмын ни.

Ми ӟечлыко лэсьтӥськом ке, дыраз лэсьтӥськом ке, ужъёсты быдэстон технологиосты ум ке тӥяське, ми ватсаса коньдон басьтыны быгатӥськом, озьы 2021-тӥ, 2022-тӥ, 2023-тӥ аръёслы ӵектосъёсты чакламлэсь вазьгес лэсьтыны быгатӥськом
Ярослав Семёнов, Удмуртиысь кивалтэтлэн тӧроез

Тодэ вайытом, азьвыл Кез ёросын сюресэз тупатъян ужъёсты йылпумъязы

Наверх
Вниз