100 лет государственности Удмуртии
Ижкар+14 °C
31 -тӥ куартолэзь 2020 Воскресенье
16+

Удмуртиын трактор лэсьтон заводэз пуктонэ 22 миллиард манет понозы

  • 514
  • 0
Дэри / Удмуртия
Удмуртиын трактор лэсьтон заводэз пуктонэ 22 миллиард манет понозы
Туспуктэм: Григорий Фомин

«УралИжТрак» огазеяськонлэсь трактор лэсьтонъя заводзэ пуктыны 2022-тӥ арозь оглом 22 миллиард манет инвестициос кутэмын луозы. 19-тӥ куартолэзе Удмуртилэн шоркарез вӧзын предприятиез пуктонлэн инъетаз нырысетӥ из сӥё-дано понӥзы. Заводэз ӝутозы Дэри ёросысь чылкыт бусыын, Вотка трактлэн но Котыр сюреслэн вожазы ГИБДД-лэн азьвыл постэз вадьсын.

Отын механизмъёсты бичанъя кык бадӟым ужпӧр, юрттӥсь ужпӧръёслэн корпусъёсы, административно-бытовой юртъёс интыяськозы. 25 сюрс трактор поттымон ужпӧрлэсь нырысетӥ черодзэ 2020-тӥ арын лэзьыны малпало. 2022-тӥ арлы сыӵе ик быдӟалаем кыкетӥзэ площадкаез усьтозы, вераз компанилэн Чаклась кенешезлэн кивалтӥсез Николай Секерин.

Удмуртиын трактор лэсьтон заводэз пуктонэ 22 миллиард манет понозы


Солэн кылъёсызъя, ӵектосэз дасяны кык ар кулэ луиз. Заводын 2–3 классъем (150 но 180 вал кужымен) ЛТИ162.5 интегральной тракторъёс поттозы. Ас вакытаз со машинаез кылдытӥзы но эскерон вылысь возьматэтъёсты лэсьтӥзы Липецкысь заводын, берлогес «Уралвагонзавод» сое выльдӥз.

Техникаез кунгож сьӧры но вузаны мед луоз шуыса (Россиысь гурт возёсъя но сиён-юонъя министерство ӵектэмъя), отчы «Каммингс Кама» заводэн нимысьтыз лэсьтэм двигателез пуктозы, Ярославльын лэсьтэмез интые.

Россиысь гурт возёс араз 45 сюрс таӵе тракторъёслы кулэяське. Со сяна, сое мукет удысъёсын но кутыны луэ — лэсьтӥскьонын, жилищно-коммунальной возёсын, мувӧй кыскон но нюлэс поттон промышленностьын, оскемзэ вераз Николай Секерин.

Ӵектосэз дунъяз Удмуртиысь гурт возёсъя но сиён-юонъя министрлэсь ужзэ быдэсъясь Александр Прохоров но.

«Туннэ, Пионерилэн нуналаз, умой бадӟым ужлы кутскон сётӥськомы. <…> Мон ӵектос быдэсмемлы оскисько. Гуртлы таӵе тракторъёс туж кулэ — али ванезлэн ужан дырзы ортчемын ни. Ӵемысьгес таӵе классъем тракторъёс трактористъёслэсь пересьгес луо», — вераз министрлэсь ужзэ быдэсъясь.

Ижкарлы матын луэменыз, ӟеч инфраструктураеныз но быгатонлыко ӧнерчиос ванен Дэри ёрос инвесторъёслы пумен тунскыогес потэ, вераз муниципал кылдытэтлэн тӧроез Андрей Коняшин.

«Ми туж шумпотӥськомы, та ӵектос милям музъем выламы аслыз инты шедьтӥз шуыса. Интывыламы ужпӧрен лыктӥсь инвесторъёслы ми котьку шумпотӥськом», — пусйиз со.

Люкаськемъёс нырысетӥ из вылэ тодын возён пул юнматӥзы.

Фото: Григорий Фомин

Пусъём, тракторлэн дуныз 2017-тӥ арын 2 миллион 600 сюрс манет котыр луоз. Нырысетӥзэ инвожое Бусылэн нуналаз возьматыны малпало ни.

ВАТСАН

Ужпӧр площадкаез 2018-тӥ ар ӵоже лэзьыны малпало. Со дырозь машинаосты элькунысь пӧртэм предприятиосын поттозы — кылсярысь, Воткаын. Ёзъёсты Набережные Челныысь, Чебоксарыысь, Курганысь но мукет каръёсысь ваёзы. 
2017-тӥ ар пумозь 400 пала трактор бичаны малпало. 2018-тӥ но 2019-тӥ арлы чакланъёсын — 1 сюрс 500, но 4 сюрс машинаос. Завод быдэс кужыменыз ужаны кутскиз ке, отын 4 сюрслэсь трос, оло, ятыргес но, адями ужалоз.


Наверх
Вниз