100 лет государственности Удмуртии
Ижкар+8 °C
3 -тӥ инвожо 2020 Вирнунал
16+

Ижкарын «Лэсьтэмын Удмуртиын» форум ужаны кутскиз

  • 355
  • 0
Ижкар / Удмуртия
Ижкарын «Лэсьтэмын Удмуртиын» форум ужаны кутскиз
Туспуктэм: ЦЕНТР ИНВЕСТИЦИОННОГО РАЗВИТИЯ УДМУРТИИ

Ижкарын «Лэсьтэмын Удмуртиын» форум ужаны кутскиз. Ужрад ӧдъяз Приволжск федерал округе пырись улосвылъёслэн азинсконъя институтъёссылэн стратеги сессиенызы кар ӵектосъёсъя «Лифт» штабын. Пумиськонэз ПФО-ысь стратеги кичӧлтонъёсъя агентстволэн ыстэм муртэз Сергей Бочаров нуиз.

Сессилэн валтӥсь ужпумез — улосвылъёслэн устоосыныз ужан амалъёсынызы тодматскон но соосты элькунын кутон, компаниос яке фирмаос улосвылэ капчиен мед пырозы но татын ужпӧрзэс мед усьтозы, вераз журналистъёслы Удмуртиысь инвестициосты азинтонъя агентстволэн кивалтӥсез Римма Бякова.

«Йӧскалык рейтингын Удмуртия туннэ 23-тӥ чурез басьтэ. Ми чидатэк возьмаськозы, ку Санкт-Петербургын экономикая калыккуспо форум усьтӥськоз, отын кылем арлы йылпумъянъёсъя йӧскалык рейтинглэсь йылпумъянъёссэ шараялозы. Нош туннэ ми инвесторъёслы возьматӥськомы, кыӵе кун юрттӥськет сётӥськомы федерал катрадлык улсын. Со сяна, инфраструктура борды итӥськонэн, лэсьтӥськыны лэзён сётонэн герӟаськем ужпумъёсты эскериськомы. Малы ке шуоно туннэ инвесторъёсты со туж сюлмаськытэ, инвесторен пумкылъян кутонын куд-ог дыръя со валтӥсь инты басьтэ — пырыны улосвылэ яке ӧвӧл», — вераз Римма Бякова.

Фото: Центр инвестиционного развития Удмуртии

«Лифт» штабын ортчем сессиын пусйизы, Удмуртиын лэсьтӥськонэз кутскыны лэзёнэз 110 нунал ортчыса басьтыны луэ, нош Мордовиын солы 56 нунал кулэ.

Со дыре ик Удмуртия Приволжск федерал округысь ӧжытэз улосвылъёс пӧлын, кин «Национально-технологическая инициатива» ӵектосэз быдэсъян борды итӥськиз, со 2035-тӥ арозь технологиосты кылдытонэз чакла. Сергей Бочаровлэн кылъёсызъя, со элькунлэн бадӟым луонлыкъёсыз сярысь вера, инвестор сое одно ик лыдэ басьтоз.

Стратеги кичӧлтонъёсъя агентство ужбергатонлы умой луонлыкъёс кылдытонъя модельёс кылдытӥз, 2016-тӥ арын толсуре соосты Росси азьмурт юнматӥз.

Соослэн валтӥсь ужпумзы — Россиысь вань улосвылъёсын ужбергатӥсьёс понна одӥг кадь умой луонлыкъёс кылдытон. Стратеги сессия шугъяськонъёсты эскерыны но соосты палэнтыны ӟечлыко амалъёс шедьтыны юрттэ.

Элькунысь ужбергатӥсьёс Бочаровен туннэ пумиськыны быгатозы на. Со Удмуртиын мерлыко ужбергатонэз азинтон ужпумъёсъя сессиын вераськоз. Пумиськон 17 часысен 19 часозь Союзной урамысь 167 номеро юртын ортчоз.

Форумлэн ужез Ижкар администрациын но радъяськоз. Отын элькунысь егит ужбергатӥсьёс азьын Москваысь, Санкт-Петербургысь но Ижкарысь азинлыко бизнесменъёс вераськозы. Иворъёсъя «Удмуртия» агентство отысь меӵак возьматон нуоз.



Наверх
Вниз