100 лет государственности Удмуртии
Ижкар+19 °C
31 -тӥ куартолэзь 2020 Воскресенье
16+

Гербер Москваын: мар возьматозы Удмуртиысь ужбергатӥсьёс кунлэн шоркараз улӥсьёслы

  • 388
  • 0
Ижкар / Удмуртия
Гербер Москваын: мар возьматозы Удмуртиысь ужбергатӥсьёс кунлэн шоркараз улӥсьёслы
Туспуктэм: Михаил Шустов

Гербер удмурт йӧскалык шулдыръяськон Москваын куинетӥзэ ортчоз. Таяз арын йӧскалык лулчеберетэз сяна, Удмуртия туризмъя, экономикая но инвестициосъя луонлыкъёссэ возьматоз. Куноосты 1-тӥ пӧсьтолэзе «Эрмитаж» садын возьмало.

Удмурт Элькунлэн тӧроезлэн Росси азьмурт бордын ялан ужась ыстэм муртэз Михаил Хомич верамъя, праздниклэн мереткылэз (девизэз) «Лэсьтэмын Удмуртиын» луоз.

Москваын Гербере пыриськись ужбергатӥсьёс иворъёсъя «Удмуртия» агентстволы веразы, мар соос возьматозы но мар возьмало ужрадлэсь.

«Малпасько, со тунсыко луоз»

facebook.com

Артём Субботин, «Симкомат» компаниез кылдытӥсь:

 — Зэмзэ вераса, Москваысь Герберлэсь бадӟым возьманъёсы али ӧвӧл, угось та ужрадэн матысь тодмо ӧвӧл. Малпасько, со тунсыко луоз! Ми отын асьмелэн самообслуживаниея киоскмес — симкоматэз — возьматомы.

Озьы луиз, ми Удмуртиысь Москвае выжимы, клиентъёсмы доры матэгес. Али элькунын зэзьлык (активность) но усьтӥськон (публичность) тросгес луиз, азьвыл со ӧй вал, со улослы ӝоггес азинскыны юрттоз. Матысь дыре #ИнвестируйвУдмуртию мереткыл улсын нырысетӥ азинлыко ӵектосъёсмес быдэстомы шуыса малпасько.

Милям кык ас ӵектосмы. Нырысетӥез — мобильной операторъёслэсь SIM-картаоссэс вузанъя киоскъёсты поттон. Ми соин 2013-тӥ арын вырыны кутскимы, нырысь ик Россиысь сотовой операторъёслы вузаны кутскимы, али СНГ-е пырись кунъёсын но, Африкаын но, кылсярысь, Камерунын.

Кыкетӥез ӵектос — адямиез онлайн амалэн тодманъя программаосты кылдытон — 2015-тӥ арын кылдӥз. Матысь чакланъёсмы — инвестициосты шедьтон но кыкезъя ик ӧръёсъя вузкаронэз будэтон.

«Москваын улӥсьёслы Удмуртилэн учкымонлыкъёсыныз 360 градус форматэн видео возьмато»

facebook.com

Игорь Мельников, Boxglass компанилэн кивалтӥсез:

 — Мынам учкеме потэ, кызьы дунъялозы Москваын улӥсьёс но куноос Удмуртилэсь вузъёссэ но лулчеберетсэ. Москвичьёслы виртуальной дуннеез кылдытӥсь Boxglass очки возьмато, со Удмуртиын кылдытэмын но поттэмын, озьы ик Удмуртилэн учкымонлыкъёсыныз 360 градус форматэн видео.

Вордскем элькунме туж азинлыко улосэз сямен адӟисько, но али солы тодмамон луон, инвестициос но пайдалыко кивалтон уг тырмы.

Милям Boxglass компанимы виртуальной дуннеез кылдытӥсь очки поттэ, AR/VR-контент кылдытэ но 360 градусэн видео лэсьтэ. Матысь чакланъёсмы — Boxglass брендэз Иранын, Грузиын, Армениын, Киргизиын вӧлмытон.

«#ИнвестируйвУдмуртию ӧтёнысь мон бадӟым луонлыкъёсты адӟисько»

facebook.com

Василий Мунтян, «Рубашка на заказ» онлайн-ательелэн кивалтӥсез:

 — Малпасько, со умой луонлык аслам ӵектосэ сярысь вераны, кызьы ми  Удмуртиын дэремъёсты куриськонъёсъя вуриськомы. Стендын вузмес возьматомы, лекциям история, сервис, сое кылдытон сярысь верало.

#ИнвестируйвУдмуртию ӧтёнысь мон элькунэз азинтон понна бадӟым луонлыкъёсты, Ижкарын но быдэс элькунын улон-вылонэз умоятонлэсь кутсконзэ адӟисько.

Ми ӵектосмес 2009-тӥ арын кутскимы, со дырысен 80 сюрслэсь трос дэрем вуримы ни, Россиысь пӧртэм каръёсын дасо пала ёзэтъёсмес усьтӥмы. Ми дорын 50 адями ужа, толэзяз сюрс витьсю дэрем вуриськомы. Али бызьылон но триатлон понна дӥськут кылдытон ужен выриськомы, та спорт амалъёсын мон мыло-кыдо вырисько.

«Кужымез Удмуртиысь кошкон понна ӧвӧл, татын улонэз умоятон понна сётоно»

facebook.com

Дмитрий Стаханов, «Мой кассир» ӵектослэн кичӧлтӥсез:

 — Та выллем ужрадэ мон нырысьсэ мынӥсько, соин ик мар ке возьман сярысь шуг вераны. Шумпотӥсько, ми асьме ӵектосэнымы Удмуртилэсь мынӥськомы шуыса.

Ми «Мой Кассир» онлайн кассаен тодматомы. Со планшетын яке android телефонын туж капчи но каньыл касса. Огшоры но каньыл интерфейс, ужамлэн бадӟым ӝоглыкез — со, мар милям лэсьтэммы потэ вал.

#ИнвестируйвУдмуртию ӧтён трос адямиослы тупа. Мон понна со нырысь ик вера, покчи шаред сярысь вунэтоно ӧвӧл шуыса. Кужымез Удмуртиысь кошкон понна ӧвӧл, татын улонэз умоятон понна сётоно.

Мон кылдытӥсьёслэн (разработчикъёслэн) пичи командаенызы кивалтӥсько. «Мой Кассир» ӵектос — милям яратоноез. Котьку шумпотӥсько, куке тынэсьтыд уждэ зэмлыко вожвылъяськонын быръё. Ми кулэяськисьёсмылэсь лыдзэс пумен будэтӥськомы. Азьланяз Россиын валче ужасьёсын кусыпъёс юнматыны но вузэнымы кунгож сьӧры потыны чакласькомы.



Наверх
Вниз