100 лет государственности Удмуртии
Ижкар+14 °C
31 -тӥ куартолэзь 2020 Воскресенье
16+

Скалодромен спортъя огъет пуктыны малпало Ижкарын «Молодёжный» йӧ дворец вадьсын

  • 285
  • 0
Ижкар / Удмуртия
Скалодромен спортъя огъет пуктыны малпало Ижкарын «Молодёжный» йӧ дворец вадьсын
Фото: ООО "ТЕКТОНИКА"

Ижкарысь Рупасов урамын бассейнъёсын но скалодромен спортъя огъет пуктыны малпало инвесторъёс. Со кемалась ӧвӧл усьтэм «Молодёжный» муниципал йӧ дворец вадьсын, нюк сьӧрын кылдыны быгатоз. Ижкарлэн тӧроез бордын ужась Инвестициосъя кенешлэн 30-тӥ инвожое ортчем пумиськоназ ӵектосэз умоен лыдъязы но инвестици программа улэ музъем висъян сярысь тупанкыл дасяны куризы.

Фото: проект

Инвестици ӵектослэн кичӧлтӥсез, «Тектоник» огазеяськон, карын но солы матысь улон интыосын адӟылымтэ спорт огъет пуктыны малпа. Ужпумез — спортысь пӧртэм амалъёсъя секциосты одӥг интыын огазеян но ёрос но кар ужрадъёс ортчытъян.

Выль огъетын луоз:

 — теннисэн, волейболэн, баскетболэн шудон, эктонъёсын вырон понна 42×28 метръем зал, отчы нуналаз 352 адями ветлыны быгатоз;

 — уянъя 6 чуръёсын 25×11 метръем бассейн, нуналаз 540 адямиез кутыны чакламын;

 — нылпиослы 10×5 метръем бассейн;

 — 40 тренажёръёсын 438 квадрат метр быдӟа зал, нуналаз 520 адями ветлыны быгатоз;

 — аэробикаен, гимнастикаен вырыны 170 квадрат метр быдӟа зал;

 — нюръяськонэн вырыны 542 квадрат метръем зал, отын нуналаз 600 адямиез кутозы;

 — кӧс парен но массаж лэсьтон висъетъёсын шутэтскон центр, быдӟалаез 780 квадрат метр;

 — ӵошатсконъёсы пыриськисьёс понна 42 интылы кунокуа (вылӥ этажаз).

Ӵектослэн кичӧлтӥсьёсызлэн ыстэм муртсы Алексей Нуреев верамъя, огъетлэн аспӧртэмлыкез но одӥгез валтӥсь ӧрез — скалодром. Солэн кык люкетэз луоз: нырысетӥез — шудон залын тупатэм борддор, кыкетӥез нюкез, писпуосты уже кутэмез чакла, отын ик юри лэсьтэм вуусён луоз. Скалодроме нуналаз 420 адями ветлыны быгатоз шуыса пусъемын.

Фото: проект

Лэсьтӥськон улэ 5 сюрс 460 квадрат метр музъем кулэ. 4 этажъем юртлэн огъя быдӟалаез — 8 сюрс 700 квадрат метр. Со нуналаз 1 сюрслэсь трос адямиез кутыны быгатоз.

Ӵектосэз куинь арскын быдэстыны чакламын: нырысетӥ араз — проектэз кылдытон но пӧртэм ёзэсъёсын кылтупатон, кыкетӥез но куинетӥез — лэсьтӥськон но уже пыртон.

Нырысь чакланъёсъя, 240 миллион манет инвестициос кулэ. Сое 7 арскын берыктыны луоз. Удмуртилэн коньдэтаз арлы быдэ 5 миллион манет вытъёс вуозы. 50 ужан интыос кылдытэмын луозы.

Фото: проект

«Спортъя огъетлэн ӵектосэз туж тунсыко вал. Со туж умой интыяськемын, ӵапак отын, кытын кулэ луыны, кытын кулэяськон вань. Соин ик паймонэз ӧвӧл, солы огкылысь дурбасьтӥзы шуыса. Али ужпум тупанкылэз йылаз-пумаз вуттон бордын гинэ, ваньмыз пӧрмиз ке, со Устинов ёрос понна туж пусйымон объект луоз», — мылкыдзэ вераз Ижкарлэн тӧроез Юрий Тюрин. Со пусйиз, кар та ӵектослы дурбасьтэ шуыса. Озьы ик экономика ӧрез нуисьёсты инвестици тупанкылэз дасяны куриз.



Наверх
Вниз