100 лет государственности Удмуртии
Ижкар+14 °C
31 -тӥ куартолэзь 2020 Воскресенье
16+

5 сюрс патерлы выль улон квартал кылдоз Ижкарысь Октябрь ёросын

  • 438
  • 0
Ижкар / Удмуртия
5 сюрс патерлы выль улон квартал кылдоз Ижкарысь Октябрь ёросын
Фото: ИНКОМ-ИНВЕСТ

Ижкарысь Октябрь ёросын 5 сюрс патерлы выль улон квартал кылдоз. Карез лэсьтонъя мерлыко кенешлэн пумиськоназ тодматэм ӵектосэз журналистъёслы возьматӥзы «Центр» медиагруппаын ортчем пресс-конференциын.

Выль кварталлэн гожез тазьы ортчоз: лымшор палтӥз ВЛКСМ-лы 50 ар урам, шунды пуксён палтӥз — Фруктовой урам, шунды ӝужан палтӥз — Подборенка шур, уйпалтӥз — ЛЭП. Али отын сад-бакчаослэн кык эштосъёссы интыяськемын: Металлург-3 но Металлург-4. Лэсьтӥськись фирмалэн ыстэм муртъёсыз верамъя, 2006-тӥ арын ай, карлэн выльдэм Генпланэзъя, со интывыл трос патеръем коркаос пуктон улэ чакламын вал. Музъем кесэгъёслэн тросэз кузёоссы музъемъёссэс лэсьтӥськисьёслы вузазы ни, мукетъёсыныз компания вераськонъёс нуэ.

Фото: Инком-инвест

«Интывылъёсты огазеян, воштон-выльдон — со котьку но споръяськон. Но али «луоз яке уз луы» шуыса вераськон ӧвӧл ни, юан — «кӧня со сылэ», вераз «Инком-инвест» компанилэн кивалтӥсез Дмитрий Данилов.

СНТ Металлург-3 и Металлург-4

Ӵектос быдэстӥськоз кварталэз пуктон амалъя. 5–12 этажъем коркаос одӥг азбарен огазеямын луозы, отын нылпиослы шудон интыос, пуконъёс, сяська убоос лэсьтозы. Машина пуктон интыос пушказ уз луэ, соосты кварталлэн сьӧраз поттозы. Юртъёслэн нырысетӥ этажъёсаз луозы, кылсярысь, искусствоосъя школа, кафе, фитнес-клубъёс, вузкаронниос. Чакланъёсъя, со эконом-классъя улон интыос луозы.

Фото: Инком-инвест

Кварталэн артэ пуктозы черк — солы инты висъяны куронэн компание вазиськиз епархия. Со сяна, отын ик луозы нылпи сад, школа, Поборенка шурлэн чылкытатэм-чебертэм ярдурез.

Архитектурая ӵектосэз кылдытон бордын ужазы Speech бюро но Россиысь но Германиысь архитектор Сергей Чобан.

Фото: Инком-инвест

Дмитрий Даниловлэн верамезъя, лэсьтӥськонэз вуоно арын кутскыны чакламын ни. Нырысь чотамъя, со 8 ар кыстӥськоз. Куд-огзэ объектъёсты пуктонэ кун ласянь но коньдон висъяны быгатозы.

Квартал 9 сюрс адямилы но 2 сюрс 500-лэсь трос машиналы (музъем вылын, но музъем улын парковкаосын) чакламын.



Наверх
Вниз