Ижкар+2 °C
1 -тӥ толсур 2021 Вирнунал
18+

Удмуртиын гуртъёсын ужбергатонэз азинтон понна «Быстрый старт» выль ӵектос ужалоз. Со сярысь элькунысь тӧролэн но кивалтэтлэн пресс-службазы ивортӥз.

Гуртлэн арез улсын улосвылысь ёросъёсын ужбергатонлы нимысьтыз интыос кылдытозы, кытын адямиос пӧртэм юрттӥськетъёс но кулэ луись вузъёс басьтыны быгатозы. Ӵектос улсын выль ужан интыос кылдытыны но гурт калыкез ужбергатонэ кыскыны чаклало.

Сыӵе интыос Удмуртиысь гуртъёсын ужбергатонэз но инфраструктураез азинтон понна кылдытэмын луозы. Со спортъя секциос но нылпиослы шудон интыос, пыжиськон интыос но буфетъёс, дӥсь вурон но пыдкутчан тупатъян интыос, йырси ӵышкон но гижыосты утялтон-лэсьтон студиос но мукет вузъёс но услугаос луыны быгато, кудъёсызлы гуртъёсын кулэяськон вань
Динара Алпашаева, Удмуртиез азинтонъя корпорацилэн кивалтӥсез

Нырысь ик ӵектосэз Пичи Пурга ёросын пыӵатыны кутскозы. Проектэз туэ сӥзьыл мытыны чаклало

Гуртъёслы тупась ужбергатонэн вырись яке ёросъёсын ужбергатон усьтыны тупась кыӵе ке инты возись адямиос Удмуртиез азинтонъя корпорацилэн сайтаз нимысьтыз онлайн-витринае пырон понна куриськон гожтыны быгато. Отчы арендае кутыны интыосын но франшизаосын яке дась ӵектосъёсын лыдметъёс пыртэмын луозы.

Онлайн-витринае сюрон понна чӧлсконпусъя куриськон гожтоно но тупась категориез быръёно: «Франшиза», «Филиал», «Помещение в аренду». Ужбергатон кудӟытӥсь юонъёс яке тамак вузанэн герӟаськемын луыны кулэ ӧвӧл, нош арендалы тупась интыосын коммуникациос кыскемын, вылтусыз но пушкыз тупатъямын луыны кулэ.

Пусъём, Удмуртиын гуртъёсын ужбергатыны луонлыкъёс кылдытон ласянь сӧзнэт уж мынэ. Ужбергатӥсьёслы спорт удысын но семья кафе ӵектосъёссэс улонэ пыӵатон понна Ужбергатонэз азинтонъя удмурт фондлэсь араз 1 процентъем пунэмен коньдон сёто. 2022-тӥ но 2023-тӥ аръёсы 5 сюрсозь улӥсен гуртъёслы капчиятэм радлыкъя выт тырон ставкаос кулэстэмын луозы – «доходы» базая 2 процентозь, «доходы минус расходы» базая – 5 процентозь. Льготаез Удмуртиысь 1 сюрс 937 черкогуртъёсысь но гуртъёсысь юрттӥськет, спорт, лулчеберет удысъёсын ужась ужбергатӥсьёс басьтозы.

Тодэ вайытом, Удмуртиын «Школа фермера» дышетон ӵектослэн кыкетӥ потоказ пыриськыны куриськонъёсты куто.


Удмуртиын нылкышно ужбергатонлы юрттон понна ньылетӥзэ «Анай-ужбергатӥсь» федерал дышетон ӵектос ужалоз. Со сярысь элькун тӧролэн но кивалтэтлэн пресс-службазы ивортӥз.

Удмуртиын ӵектосэз «Малое и среднее предпринимательство и поддержка индивидуальной предпринимательской инициативы» йӧскалык ӵектос улсын Ужбергатонлы юрттэт сётонъя центр но Элькун бизнес-инкубатор радъяло.

Нылкышно ужбергатонлы юрттон но сое азинтон – дунне вылын огез тужгес кулэез уж но пичи но шор ужбергатонлэсь лыдзэ йылэтыны луонлык луэ. Тросэзлэн нылкышноослэн ас ужзэс усьтэмзы потэ, но соослэн тодон-валанзы, луонлыкъёссы уг тырмо. Ми адӟиськом сыӵе кулэяськонэз но юрттэт сётӥськом
Михаил Тумин, Удмуртиысь экономикая министр

Анайёслы дунтэк дышетсконъёс вить нунал ӵоже интенсив сямен ортчозы. Нылкышноосты ужбергатон ужлэн инъетэныз но кивалтонын пайдалыко амалъёсын тодматозы. Пыриськисьёс бизнес-ӵектосъёс дасялозы. Бӧрысь соос 100 сюрс манет тыр грант утыны быгатозы.

Ӵектосэ пыриськон понна куриськонъёсты 2021-тӥ арын 17-тӥ куартолэзёзь чӧлсконпусъя кутозы

Конкурсэ ужбергатонэн вырымтэ яке та вожвылъяськон вакытозь ужбергатонэн одӥг арлэсь ӧжыт вырем нылкышноос пыриськыны быгато.

Пусъём, кылем арын конкурсэ Удмуртиысь 27 анайёс пыриськизы. Соку вормисе турынъёс будэтон ӵектосэныз Татьяна Лаврентьева потӥз вал. 

Каракулино ёросысь Вятской черкогуртысь мушкась Николай Сапаев ас кожаз калыккуспо вузпӧре потыны но чечызэ Швейцарие вузанэз радъяны быгатӥз. Со сярысь 29-тӥ шуркынмонэ Удмуртиысь Кун Кенешлэн 29-тӥ сессияз элькунлэн тӧроез Александр Бречалов вераз.

Туэ егит ужбергатӥсь «Агростартап» программая 3 миллион манет утӥз но муш вордыны кулэ луись тӥрлык но техника басьтӥз. Швейцарие келяны 2 сюрс 500 тонна чечы дасязы ни.

Удмуртия – бадӟым дуннелэн люкетэз. Пичи ужбергатӥсь кыӵе ке бадӟым коньдонтэк сое радъяны быгатӥз бере, малпалэ, мар асьмеос ваньмы ӵошен лэсьтыны быгатом
Александр Бречалов, Удмуртилэн тӧроез

Улосвыллэн тӧроез пусйиз, 2021-тӥ ар Удмуртиын Гуртлэн ареныз ялэмын. Вуоно арлы нимысьтыз программа дасяло ни, нырысь ик экономика ласянь.

Со сюресъёс гинэ ӧвӧл, но вераны кулэ, сюресъёсты лэсьтыны висъяськись коньдонлэн быдӟалаез 2021-тӥ арын кык поллы йылоз. Со сяна, бадӟым саклык висъяськоз чагыр эстӥськон кысконлы, герӟетлы, интернетлы. Ӟечгес вакытъёсты возьмаса дугдыны уг яра. Ӟеч вакыт али. Николай Сапаев выллем адямиос милем мылкыд сёто
Александр Бречалов, Удмуртилэн тӧроез

Тодэ вайытом, Удмуртиын мушъёсты хими суретъёслэсь утьыны юрттӥсь сервис кылдытӥзы Удмуртиын.

Удмуртиын ужбергатонлы, со пӧлын кинотеатръёслы, юрттэт сётон амалъёс борды выльёссэ дасяло на. Со сярысь 2-тӥ куарусёнэ журналистъёсын пумиськылыкуз улосвыл кивалтэтлэн тӧроезлэн нырысетӥ воштӥсез Александр Свинин ивортӥз.

Кинотеатръёс татчыозь уг ужало на, али но тодмо ӧвӧл, ку усьтӥськозы. Соин ик соос элькунлэсь ватсаса юрттэт басьтозы.

Юрттон амалъёс пӧлын ваньбурлы но музъемлы вытъёсты тыронэз берлолы кельтон, кулэстон, мукет сямен нокызьы ӧз луы ке, куштон
Александр Свинин, Удмуртиысь кивалтэтлэн тӧроезлэн нырысетӥ воштӥсез

Солэн кылъёсызъя, выт тыронъя капчиятэм сӧзнэтэ потэм ужбергатӥсьёслы вытъя тужгес пичи ставка тупатозы.

Вань вытъёсты 2021-тӥ арлы выжтозы. Вераськон мынэ со удысъёс сярысь, кудъёсыз али но ужзэс азьланьтыны ӧз быгатэ, ватсаз Александр Свинин. 

Удмуртиын «Анай-ужбергатӥсь» («Мама-предприниматель») дышетон программа ортчоз. Со сярысь Элькун бизнес-инкубаторлэн пресс-службаез ивортэ.

Программае пыриськыны быдэ вуымтэ пиналъёслэн анайёссы но декретын пукись нылкышноос быгато. Курон одӥг гинэ – кышномуртлэн аслаз бизнесэз вань ни ке, улосвылын программаез кутскон дырлы со одӥг арлэсь кема медаз ужа на

Ас ужзэс кутскыны мылкыд карись анайёс понна федерал программа Ижкарын 11-тӥ пӧсьтолэзе кутске. Пыриськисьёс вить нуналскын егит ужбергатӥсьлэн сюрессэ ортчозы: инъетсэ дышетон бордысен кутскыса, ужась бизнес-планэн тодматытозь. Курсъёс бизнес-инкубаторлэн юртаз (Дзержинский нимо ульча, 71А) ортчозы.

Дунтэк дышетсконэ пыриськон понна куриськонэз 4-тӥ пӧсьтолэзёзь программалэн сайтаз сётоно. Со понна анкета гожтоно но ужбергатон малпанэз рос-прос верано.

Дышетскон пумын котькуд пыриськись аслаз бизнес-планэныз тодматоз. Вормись анай ӵектоссэ быдэстон понна 100 сюрс манетъем грант басьтоз. 

Тодэ вайытом, озьы ик Удмуртиын куинь аресозь нылпиосын пукись анайёс понна «Демография» йӧскалык ӵектос улсын но дышетонъёс радъяло.

Удмуртиысь вузкарон центръёсты 15-тӥ инвожоозь уз усьтэ на. Сыӵе пумкылъян сюбегатонъёслэсь куштӥськонлэн кыкетӥ люкетаз выжыны элькунмылэн дась луымтэеныз сэрен кутӥзы. Со сярысь мерлыко вотэсъёсын меӵак эфирез дыръя улосвылмылэн тӧроез Александр Бречалов ивортӥз.

Удмуртия сюбегатонъёслэсь куштӥськонлэн кыкетӥ люкетаз выжыны дась ӧвӧл. Матысь нуналъёсы уз усьтӥське вузкарон центръёс – вераськон тросгес Ижкар но 400 квадрат метрлэсь бадӟым вузкарон интыос, озьы ик нылпиослы но спортъя ужъюртъёс сярысь мынэ. 15-тӥ инвожолы выжтӥськом
Александр Бречалов, Удмуртилэн тӧроез

Элькунамы югдур 15-тӥ инвожоозь тупатскиз ке, сюбегатонъёслэсь куштӥськон азьланьтӥськоз. Со Удмуртиысь вузкарон центръёсты, пӧртэм арбериосын вузкарись магазинъёсты но ужбергатӥсьёслэсь быдэ вуэмъёслы ватсаса тодон-валан сётӥсь огазеяськонъёссэс усьтыны луонлык кылдытоз.

Тодэ вайытом, элькунамы паркъёсты но зоопаркез выльысь ворсало.

Александр Бречалов Удмуртиез азинтонъя корпорацилэн Россиын ужбергатонлэн нуналэзлы сӥзем меӵак эфираз пыриськиз но элькунысьтымы ужбергатӥсьёсты ӟечкылаз. Со сярысь улосвыл тӧролэн но кивалтэтлэн пресс-службазы ивортэ.

Удмуртиын та арез ми Ужбергатонлэн ареныз ялӥм. Мон котьку пусйисько, ужбергатон интывыл – со улон интывыл, экономика азинскем бордысь мерлыко удыслэн азинсконэз потэ
Александр Бречалов, Удмуртилэн тӧроез

Туэ ужбергатӥсьёслы секыт югдурен пумиськоно луиз. Росси азьмуртлэн косэмезъя юрттэт сётон ужрадъёслы луыса, тужгес шугъяськись удысъёслы но ужтэк кылем муртъёслы юрттыны луэ. Элькунмы но покчи но шоро-куспо ужбергатонлы юрттонъя кӧня ке ужрадъёс кутӥз.

Ми адӟиськом ини лыдпусъёсты, кутэм ужрадъёслэсь пайдалыксэс но соослы бадӟым кулэяськонэз. Таин гинэ ми ум дугдэ, али выль пакет бордын ужаськом
Александр Бречалов, Удмуртилэн тӧроез

Александр Бречалов пусйиз, тросэз ужбергатӥсьёс компаниоссэс азинтыны выль амалъёс утчало, выль форматъёсты эскеро. Шугъяськытӥсь вакытэз выль луонлыкъёс утчаны куто. Ӵапак со ик зэмос ужбергатӥсьёсты адӟытэ.

Удмуртилэн тӧроез вань ужбергатӥсьёслы вормонъёс, азинсконъёс сӥзиз но кивалтэтлэн экономика блокез котьку усьтэмын но предприятиослы шугъяськытӥсь ужпумъёссэс сэрттыны-пертчыны юрттыны дась шуыса тодазы вайытӥз.

Тодэ вайытом, Можга ёросысь огаз гурт возёсын нылпиослы сок поттон борды басьтӥськыны малпало.

Вордӥськонысен, 27-тӥ оштолэзьысен, Удмуртиысь куд-ог удысъёс но ужбергатӥсьёс ужзэс азьланьтыны быгатозы. Со сярысь элькунлэн тӧроез Александр Бречалов мерлыко вотэсъёсысь бамаз меӵак эфирез дыръя вераз.

Санитарной куронъёсты туж юн но одно ик быдэсъяса, ужаны быгатозы:

- водительёсты дасясь автошколаос;

- ломбардъёс но микрофинансовой огазеяськонъёс;

- реклама конструкциос лэсьтӥсь но пуктӥсь агентствоос;

- чеберлыкъя салонъёс, парикмахерскойёс, косметической салонъёс. Алнаш но Грак ёросъёсын сяна.

Ми выламы бадӟым дӥсьтон басьтӥськом. Туж оскисько, тӥ но кылкутондэс валалоды шуыса. Чаклалэ вань куронъёсты, ваньмыз соос быдэстыны луымонэсь
Александр Бречалов, Удмуртилэн тӧроез

Тодэ вайытом, Удмуртиын коронавирусэз алон понна астэ ачид нимаз возён режим вакытэ ужзэс азьланьтыны быгатӥсь мукет огазеяськонъёсты 6-тӥ оштолэзе пусйизы

Удмуртилэн тӧроез Александр Бречалов 14-тӥ оштолэзе Грак ёросысь кивалтӥсьёсын но ужбергатӥсьёсын онлайн кенешон ортчытӥз. Азьланяз мукет ёросъёсын но сыӵе амалэн вераськонъёс радъяськозы. Со сярысь элькун тӧролэн но кивалтэтлэн пресс-службазы ивортэ.

Пандемия дыръя элькунысь экономикалы юрттон понна ми нырысь ик Удмуртиысь инъет луись 120 предприятиосты пусйим, но соин ум дугдӥське. Котькуд ӧръя нимаз ужаны кутскиськом, табере ёросъёсысь тӧроосын но валтӥсь предприятиослэн кивалтӥсьёсынызы ӵош, котькыӵе быдӟалаем ужбергатонзы мед луоз, ми онлайн-пумиськонъёс ялан ортчытъялом
Александр Бречалов, Удмуртилэн тӧроез

Кенешон улсын Грак ёрослэн тӧроез Виктор Белов ёрос экономикалэсь инъетсэ агропром огъетысь предприятиос кылдыто шуыса пусйиз – 11 крестьян-фермер возёсъёс, вить пичи гурт возёсъёс но одӥг бадӟымез – «Родина» гурт возёс. Гурт возёс продукцизылэсь 65 процентсэ йӧл но йӧллэсь сиён-юонъёс поттон басьтэ, 18 процентсэ – сад-бакча емышъёс будэтон, 14 процентсэ – сӥль поттон. Ёросын поттэм ӝыныезлэсь троссэ йӧлэз «Родина» возёсын кыско – 53,2 процентсэ, тысё юосты – 47 процентсэ.

Кылем арын Грак ёрос валтӥсь капиталэ одӥг адямилы лыдъяса инвестициослэн быдӟалазыя элькунамы 10-тӥ инты басьтӥз. Ужъя рыноксы огсыр улэ. Шоро-куспо уждунзы 25 сюрс 964 манет. Ужтэк кылемъслэн лыдзы 2,4 процент гинэ.

Удмуртилэн тӧроез «Родина» гурт возёслэн но «Вылнуд» огазеяськонлэн кивалтӥсьёсынызы предприятиосын али кылдэм югдур сярысь кенешиз но ӵектонъёссэс кылзӥз. Кылсярысь, «Родина» возёслы инвестициосъя выль ӵектоссэ быдэстыны юрттэт кулэ, нош «Вылнудлы» - ужан тӥрлыксэс выльдыны.

Элькунысь котькуд ужбергатӥсен герӟет возьыны кулэ – кинлы юрттэт кулэ, кин азинскыны дась. Кинлы али секыт, соослы юрттэм сяна, ми туннэ но ӵуказе выль ужан интыос кылдытыны дась луисьёслы но юрттыны кулэ
Александр Бречалов, Удмуртилэн тӧроез

Пусъём, юрттэт басьтыны луонлыкъёс сярысь юанъёсын ужбергатӥсьёс Удмуртиысь азинсконъя корпорацие вазиськыны быгато. Со понна солэн сайтаз куриськон кельтыны яке 8 (3412) 22-00-00 телефон номеръя жингыртыны луэ. 

Тодэ вайытом, туэ Удмуртиын гурт возёс удысысь егит ӧнерчиослы юрттэтлэсь быдӟалазэ будэтӥзы

Удмуртиын коронавирусэз алон понна астэ ачид висъян режим вакытэ 6-тӥ оштолэзьысен ужзэс азьланьтыны быгатӥсь огазеяськонъёсты пусйизы. Со сярысь улосвыллэн тӧроез Александр Бречалов мерлыко вотэсъёсын меӵак возьматонэз дыръя вераз.

Лыдметэ пыризы: обороная кун кулэяськонэз быдэстӥсьёс, стоматологиос, лизинг компаниос, гурт ёросъёсын гинэ лэсьтӥськон магазинъёс, автосервисъёс, машина миськонъёс, машина ёзъёсын вузкаронниос, вож нуныослы вузъёсын (со пӧлын дӥсь) магазинъёс, сад-бакчалы кулэ луись вузъёсын магазинъёс, куд-ог МФЦ-ос, онлайн-заказъёсты сётъясь пунктъёс но вузэз доре ваись ёзэсъёс, нюлэс дасясь, лэсьтӥськись компаниос, калыклы доразы юрттэт сётӥсь компаниос, но со понна кун юрттӥськетъёсъя портал пыр куриськон сётыны кулэ, озьы ик дорысен ужаны луонлык кылдытэм копаниос.

Ужбергатӥсьёслэн юанъёссылы Удмуртиысь азинсконъя корпорациысь ӧнерчиос 8(3412) 22-00-00 телефонъя валэктонъёс сётозы

Тодэ вайытом, элькунын астэ ачид нимаз висъян режим азьланьтӥськоз

Минскын «Удмуртилэн Беларусь Элькунын нуналъёсыз» форум улсын Удмуртия 15-лэсь трос тупанкылъёс кинюртӥз. Со сярысь улосвыл тӧролэн но кивалтэтлэн пресс-службазы ивортэ. 

Форумын кык элькунъёслэн валче ужаны луонлыкъёссэс эскеризы. Котырес ӝӧк сьӧрын кенешон бере Минскысь трактор завод но Удмуртиысь экономикая министерство тупанкыл гожтӥзы. Озьы ик экономикая министр Михаил Тумин Белоруссиысь Туризмъя элькун огазеяськонэн туризмез азинтон сярысь тупанкылэз кинюртӥз. 

Кызьы вераз Удмуртиысь кивалтэтлэн тӧроезлэн нырысетӥ воштӥсез Александр Свнин, промышленность элькунлэн экономикаезлэн инъетэз луэ. 47 процентэз элькунын поттэм вузъёслэн но юрттӥськетъёслэн дунзы со вылэ усе. Валтӥсь инты оборонно-промышленной огъетысь предприятиос басьто.

Туннэ элькунын атомной электростанциослы тӥрлыкъёс, инсьӧрлы телекоммуникационной сӧзнэтъёс, герӟет тӥрлыкъёс, радиоэлектроника, эм техника, мувӧй но чагыр эстӥськон кыскон удыслы тӥрлык, кортлэсь но пластмассалэсь арбериос потто. Шӧдскымон инты пулэсь вузъёс лэсьтон удыс басьтэ. Али Удмуртиын 4 сюрс пала промышленной предприятиос
Александр Свинин, Удмуртиысь кивалтэтлэн тӧроезлэн нырысетӥ воштӥсез

Удмуртиысь кӧня ке предприятиос асьсэ вузъёсыныз тодматӥзы. Кылсярысь, «Буммаш» промышленностьлэн пӧртэм ӧръёсызлы герӟетъёс, агрегатъёс, кортлэсь конструкциос но кулэяськисьлэн чертёжъёсызъя тӥрлык поттыны быгатэ.

«Аксион» концерн Белоруссие эм тӥрлык, машина ёзъёс, улон-вылонын кутӥськись вузъёс келя ини, валче ужанэз эшшо паськытатыны малпа.

2020-тӥ арын Пичи Пурга ёросысь Сизяшур вӧзын тылобурдо вордонъя бадӟым огъетэз усьтозы. Отын 1 сюрс 500 тонна сӥль поттыны чакламын. Со сярысь элькунысь гурт возёсъя но сиён-юонъя министерстволэн пресс-службаез ивортэ.

Тылобурдоосты возён улэ «Радист» совхозлэсь уже кутӥськисьтэм скал гидъёссэ тупато. Выль кузёос вуоно арын тулыспалэ отчы нырысетӥ 10 сюрс бурдоосты пыртозы ни. Ньыль гидъёс огдыре 115 сюрс бройлеръёсты будэтыны чакламын

Сӥль поттон понна вандон но переработка цехъёс пуктозы на, озьы ик предприятилэн аслаз инкубаторез луоз. Инкуазь ласянь чылкыт интыын поттэм продукцилэн бадӟым люкетэз Москвае кошкоз, но элькунысь вузкаронниосын но тупанкылъёс юнматэмын.

Со сяна, предприятие тютюосты калыклы вузаны чакла.

Сизяшурын улӥсьёслы выль огъет мерлык ласянь тунсыко луоз – отын 40 ужан интыос кылдозы

Вуоно вузпӧрлэн дуныз 104 миллион манет дунъяське, туннэ нуналлы 29 миллион манет уже кутӥзы ни. 

Ижкарысь «Буммаш» заводлэн уже кутӥськисьтэм корпусаз Технопарк кылдытозы. Со сярысь Удмуртиысь тӧролэн но кивалтэтлэн пресс-службазы ивортэ.

«Лэсьтэмын Удмуртиын» форум улсын Удмуртиысь кивалтэт но «Техно Парк» огазеяськон инноваци удысын валчеужан сярысь тупанкыл гожтӥзы. Ужкагаз улэ кинюртэмъёссэс элькунлэн тӧроез Александр Бречалов но инвестор Григорий Ушаков пуктӥзы.

Тупанкылъя NOBEL технопарклэсь нырысетӥ черодзэ 2019-тӥ арын толсуре лэзьыны чаклало

Александр Бречаловлэн верамезъя, та дыре юрт 90 процентлы дась ни.

Ижкарын NOBEL технопаркез усьтэмен валче вылӥ технологиосын ужась компаниос кылдозы, нош со улосвылэн азинтыны юрттоз. Партнёрмы – «Техно Парк» огазеяськон – «Сколково» фондлэн улосвыл операторез луоз но аслаз резидентъёсызлы Сколковолэн сервисъёсыз борды итӥськыны луонлык сётоз.
Александр Бречалов, Удмуртилэн тӧроез

Пусъём, 2019-тӥ арын инвожое Петербургысь экономикая калыккуспо форумын «Сколково» фонд но Удмуртиысь кивалтэт инноваци удысын валчеужан сярысь тупанкыл гожтӥзы. Фонд улосвылын Технопаркез кылдытонъя но усьтонъя учкетэз (концепциез) дасяны юрттэ, азьланяз со объект «Сколково» фондлэн улосвыл операторез луон понна аккредитациез ортче. 

Тодэ вайытом, ужбергатӥсьёс понна «Лэсьтэмын Удмуртиын» форум Ижкарын 24-тӥ но 25-тӥ коньывуонэ ортчоз. 

Удмуртиын ужбергатӥсьёс понна валтӥсь элькун форуме пусйиськон кутскиз. «Лэсьтэмын Удмуртиын» ужрад 24-тӥ но 25-тӥ коньывуонэ Ижкарын ортчоз. Со сярысь улосвыл тӧролэн но кивалтэтлэн пресс-службазы ивортэ.

«Лэсьтэмын Удмуртиын» форум – со ужбергатӥсьёс понна «Бизнес-клуб» форматэн площадка, покчи, бадӟым ужбергатон, тӧрлык понна кенешон инты. Со ужбергатон удысын тужгес лэчыт ужпумъёсты сэрттыны-пертчыны луонлыкъёс шедьтон но ас ужан амалъёсын мукетъёссэ тодматон
Михаил Тумин, Удмуртиысь экономикая министр

Форумлэн нырысетӥ нуналаз ӧнерчиос инстаграмез азинтон но сое улосвылъёсын нуонлэн аспӧртэмлыкъёсыз, ивент-менеджмент но пӧртэм ужрадъёсты радъян сярысь вералозы. Мастер-классын форуме пыриськисьёсты компаниенызы тодматыны дышетозы. Озьы ик инвесторъёс понна ужрад ортчоз, кытын ужбергатӥсьёслы вералозы, кызьы бизнес-ӵектосъёсы коньдон кыскыны.

Кыкетӥ нуналаз промышленной предприятиослэн ыстэм муртъёссы понна «Инженерные кадры» стратегической сессия ортчоз.

«Лэсьтэмын Удмуртиын» форумлэн кыкетӥ нуналаз «Бизнес-успех» йӧскалык премилэн улосвыл люкетэз ортчоз. Элькунысь ужбергатӥсьёс ӵектосъёссэ тямыс ӧръёсъя возьматыны быгатозы:

- «Егитъёслэн устоез ӵектоссы. Сергей Выходцев нимо номинация»;
- «Устоез гурт возёс ӵектос»;
- «Устоез созидательной ӵектос»;
- «Устоез производственной ӵектос»;
- «Цифровой экономика»;
- «Вузкарон но юрттӥськет удысъя устоез ӵектос»;
- «ЗОЖ»;
- «Калык ужбергатӥсь».

Вормисьёс Удмуртилэсь данзэ вожвылъяськонлэн огъяросси люкетаз утёзы, озьы ик ужбергатӥсьлы пайдалыко кузьымъёс басьтозы, со пӧлын дунтэк дышетскон.

«Лэсьтэмын Удмуртиын» форуме но «Бизнес-успех» премие ужрадлэн сайтаз пусйиськыны луэ.

ВАТСАН

«Лэсьтэмын Удмуртиын («Сделано в Удмуртии») форум элькунын куинетӥзэ ортчоз ни. 2017-тӥ арын со 1 сюрс 200 пыриськисьёсты люказ, 2018-тӥ арын – 2 сюрс 500-лэсь трос. Ужрадэз «Малое и среднее предпринимательство и поддержка индивидуальной предпринимательской инициативы» йӧскалык ӵектосэз улонэ пыӵатон улсын Удмуртиысь экономикая министерство, «Мой бизнес» центр Россиысь экономикаез азинтонъя министерство юрттэмен ортчыто.

Гудырикошкон кутсконын Россельхознадзорлэн управлениысьтыз фиосанитарной чакланъя ёзэт Удмуртиысь Японие келяны чаклам 15,8 килограмм кызьпу туез но 1,42 килограмм пужым выжыез, озьы ик США-е поттоно 5,4 килограмм кызьпу туез эскериз. Со сярысь удысэтлэн пресс-службаез ивортэ.

Изъянтӥсь лулосъёсты шараян понна возьматосъёсты Татарстанысь лабораторие келязы вал, номыр сыӵезэ ӧз шедьтэ. Вузэз кунгож сьӧры поттыны сертификатъёс сётӥзы

Ар кутсконысен Россельхознадзорлэн управлениысьтыз ӧнерчиос 280 килограммлэсь трос кызьпу туез но 4 килограмм пала пужым выжыосты эскеризы. Соосты Японие, Кореяе, Францие, Германие, Италие но США-е поттӥзы.

Удмуртиын вашкала дырысен туйлэсь но пужым выжылэсь пӧртэм арбериос лэсьтылӥзы. Берло аръёсы соослэсь чеберлыко киужъёс лэсьтонэн кунгож сьӧрын но тунсыкъяськыны кутскизы. 

Гурт возёсын ваньбур поттӥсьёслы юрттон вылысь толшор пумын Удмуртиын «Мон – фермер!» выль дышетон ӵектосэз кутскозы. Со сярысь элькунысь Гурт возёсъя но сиён-юонъя министерстволэн пресс-службаез ивортэ.

«2019-тӥ арын дышетонъя камапаниез 24-тӥ толшоре кутскыны чакламын. <…> Ужпум – гурт возёсын ваньбур поттон удыслы туала куронъёслы тупась выль амалъёсъя ужась ӧнерчиосты «визьнодан». Дышетон программаосы элькунысь агропром огъетын ужасьёслэсь тодонлыкъёссэс будэтонъя 218 ӧръёс пыризы», - верамын ивортонын.

Бизнес-акселераторе пыриськисьёс устоосыныз улосвыл но росси ужан амалъёсын тодматскозы. 30-тӥ толшорысен 1-тӥ тулыспалозь Вотка ёросысь «Мир» возёсын «Йӧллэн институтэзлэсь» семинарзэ радъялозы, отын туала гидъёсты пуктон но пудоез пайдалыко сюдонэз радъян сярысь вераськозы. 24-25 толшоре Вавож ёросысь «Колос» возёсын гуртын пичи возёсъёслы кун юрттэт сётонъя выль амалъёс но гурт кооперативъёсты кылдытон но ужзэс радъян сярысь кенешозы, ужрадэ гурт ёросъёслэн тӧрооссы пыриськозы.

Пусъём, фермеръёс понна ӵектос сярысь Удмуртилэн кивалтӥсез Александр Бречалов Россиысь гурт возёсъя министрлы Дмитрий Патрушевлы вераз. Озьы ик пумиськонын гурт интывылъёсты азинтон но элькунын та ужпумъя форум ортчытон ужпумез ӝутӥзы.

Тодэ вайытом, «Мон – фермер!» бизнес-акселераторлэн ужамезлы йылпумъянъёсъя Удмуртиын 30 выль возёсъёс кылдыны кулэ

Удмуртия Казахстанэ вегенсъёс – векчиятэм куасьтэм бакча сиёнъёс – вузаны дасяське. Вузлэн нырысетӥ люкетэз бускель кунэ 2019-тӥ ар кутсконын вуыны кулэ, ивортэ элькунысь Гурт возёсъя но сиён-юонъя министерстволэн пресс-службаез.

Тупанкылэз шуркынмонэ юнматӥзы, солэн дуныз 4 миллион 500 манет луэ.

Удмуртиын вегенсъёсты туэ южтолэзе поттыны кутскизы. Бакча сиёнэз пичи температураен куасьтон солэсь пайдалыко витаминъёссэ но микроэлементъёссэ 80 процентлы утьыны луонлык сётэ. Сое ас кожаз сиыны, пӧраськонэ кутыны луэ.

Али вегенсъёсты Пичи Пурга ёросысь возёсын будэтэм бакча сиёнъёслэсь лэсьто. Ужпӧрез паськытатыса, элькунысь мукет возёсъёс но ваньбур поттонзэс йылэтыны быгатозы, пусъё Гурт возёсъя министерствоын.

Туннэ компания 16 пумо вегенсъёс поттэ. Соосты Москваысь но Санкт-Петербургысь вузкаронниосын ӵекто ни. Солы луонлык сётӥз куарусёнэ Россилэн шоркараз ортчем World Food калыккуспо вожвылъяськонын вормон. «Продукт года 2018» номинациын векчиятэм куасьтэм бакча сиёнъёс азвесь медаль басьтӥзы. 

Удмуртиын етӥнэз переработать каронъя Белоруссиен валче предприятие кылдытыны быгатозы. Бускель кунлэн посольствоысьтыз ыстэм муртэн пумиськонлы йылпумъянъёсъя со сярысь ивортӥз элькун кивалтэтлэн тӧроезлэн нырысетӥ воштӥсез Александр Свинин.

Удмуртиысь тӧрлыкъёс чакламъя, Белоруссиен валче ужанын гурт возёс одӥгез валтӥсь удыс луэ. Вераськон пудо вордон сярысь гинэ ӧвӧл. 2017-тӥ арын элькунын етӥн будэтон удысын бадӟым выльдӥськонъёс кутскизы. Александр Свинин верамъя, та ласянь Белоруссиысь ужъюлтошъёсын огкылэ вуонъёс вань.

Удмуртиын валче ужанъя предприятие кылдытон сярысь тупанкылъёсты коньывуонэ юнматыны оскиськомы. Етӥнэз переработать каронъя соослэн тужгес умой амалъёссы, ми дась соосты асэстыны но элькунын кутыны
Александр Свинин, Удмуртиысь кивалтэтлэн тӧроезлэн нырысетӥ воштӥсез

Солэн кылъёсызъя, Удмуртилэн экспортаз Белоруссия 7-тӥ инты басьтэ. 2017-тӥ арын отчы 25 миллион доллар тыр вузъёс келямын вал, азьвыл арен ӵошатыса, со 14 миллион долларлы тросгес.

Озьы ик Александр Свинин Удмуртилэн тӧроез Александр Бречалов Беларусь Элькунэ ветлы дасяське шуыса вераз.

«Александр Владимир Бречалов дась ветлыны, ми сӥзьыл чакласькомы, со бадӟым бизнес-миссия луоз, соку элькунъёс куспын ужбергатонъя нырысетӥ тупанкылъёсты юнматыны малпаськомы», — вераз Свинин.

Беларусь Элькунлэн Россиысь посольствоезлэн Уфаысь ёзэтэзлэн кивалтӥсез Пётр Болтрушевич верамъя, со туннэ эшшо одӥг пол элькунзы ласянь ӧтёнэз зэматӥз. Александр Бречалов Белоруссилэн азьмуртэныз пумиськыны быгатоз. Кенешон Могилёвын Улосвылъёслэн витетӥ форумзылы тупатэмын луыны быгатоз, со таяз арын коньывуонэ ортчоз.

Вуоно арын Ижкарын аэровокзаллэсь юртсэ тупатъяны кутскозы. Удмуртиысь тӧрлыкъёслэн чакланъёсазы — «Ижавиа» терминалысь ужан тӥрлыкез выльдон. Со сярысь 16-тӥ куартолэзе журналистъёслы элькунлэн тӧроез Александр Бречалов ивортӥз.

Со озьы ик пусйиз, предприятилэсь вожвылъяськыны луонлыкъёссэ будэтон понна улосвыл кивалтэт мукет авиакомпаниосын кенешонъёс нуэ шуыса.

Ми инбамез конкуренцилы усьтыны кулэ, туала, кышкыттэмлыко авиакомпаниос мед лыктозы шуыса. «Аэрофлот» — одӥгез сыӵе компания. <…> Милям потэ, ми доры авиакомпаниос мед лыктозы но клиент понна билет дунэн, сервисэн но юрттӥськетэн мед ӵошатскозы. Сыӵе сюрестӥ Россиысь ваньмыз каръёс мынӥзы
Александр Бречалов, Удмуртилэн тӧроез

Со сяна, Ижкарысь автовокзал ӝутскон-пуксён чурез тупатъяны коньдон сётонъя программае берытскиз. Элькун тӧро азьвылгес вераз вал, тупатъян ужъёс 4–5 миллиард манет тыр усёзы шуыса.

Озьы ик Александр Бречалов «Ижавиалэн» кивалтӥсез воштӥськем сярысь вераз. Со пусйиз, воштонлэн мугез азьвыл кивалтӥсьлэн но элькун кивалтэтлэн авиакомпанилэн азьланез шоры пӧртэм сямен учконэнызы герӟаськемын. Али выль кивалтӥсьлы предприятиез утёнъя ужанрадлык кылдытыны ужпум пуктэмын.

«Ижавиа» но авиакомпания — статегической объектъёс, милемлы соосты утьыны кулэ. <…> Малы ке шуоно ми утчаськом мукет амалъёс но, Ижкар — Москва, Москва — Ижкар маршуртъёслы гинэ саклык ӧвӧл, мукет направлениосы но
Александр Бречалов, Удмуртилэн тӧроез

Тодэ вайытом, «Ижавиа» предприятиен куать ар кивалтэм Александр Городилов 11-тӥ куартолэзе интыужысьтыз ас мылкыдызъя кошкиз. Авиакомпанилы выль кивалтӥсе Александр Синельников юнматэмын. Азьвыл со сизьым ар пала Нижний Новгородысь Стригино калыккуспо аэропортэн кивалтӥз.

«Ижавиа» компаниен 38 аресъем Александр Синельников кивалтоз, азьвыл со сизьым ар ӵоже Нижний Новгородысь Стригино калыккуспо аэропортэн кивалтӥз. Со сярысь мерлыко вотэсъёсысь бамаз ивортӥз Удмуртиысь кивалтэтлэн тӧроез Ярослав Семёнов.

«Нижний Новгородысь Стригино аэропорт солэн кивалтэмез улсын азинсконаз бадӟым вамыш лэсьтӥз, туала куронъёслы тупась но Россиысн тужгес ӝог азинскись луиз. Озьы ик Александр кунысь валтӥсь авиакомпаниосын ужаз но Россиысь улосвылъёсын авиаци активъёсын кивалтӥсь азинлыко компаниез кылдытӥз», — ивортӥз Ярослав Семёнов.

Тодэ вайытом, «Ижавиа» акционер огазеяськонлэн азьвыл кивалтӥсез Александр Городилов 11-тӥ куартолэзе ас мылкыд каремезъя интыужысьтыз кошкиз, со компаниен 6 но ӝыны ар ӵоже кивалтӥз. Кӧня ке нунал ӵоже кивалтӥсьлэсь ужзэ быдэсъяз валтӥсь директорлэн ӟечлыкъя воштӥсез Александр Крюков.

ВАТСАН

Александр Сергеевич Синельников вордӥськиз Свердловскын 1979-тӥ арын 22-тӥ куарусёнэ. Уралысь педагогикая университетысь экономикая факультетэз йылпумъяз. 
2001–2005 аръёсы — «Уральские авиалинии» компаниын менеджер, собере вузкарон ёзэтлэн кивалтӥсез; 
2006–2008 аръёсы — «Аэропорт Кольцово» акционер огазеяськонын валтӥсь директорлэн экономикая но коньдон ужпумъёсъя советникез; 
2008–2009 аръёсы — «Шереметьево» калыккуспо аэропортын кивалтӥсьёслэн кенешазы экономика ужпумъёсъя консультант; 
2009–2010 аръёсы — «Шереметьево» калыккуспо аэропортын кивалтӥсьлэн авиаци маркетингъя воштӥсез; 
2010–2012 аръёсы — Кольцово аэропортлэн кивалтӥсезлэн воштӥсез; 
2012–2018 аръёсы — Стригино калыккуспо аэропортлэн кивалтӥсез.
Наверх
Вниз