Россиын пу коркаослы но ипотека сётъяны быгатозы

  • 2031
  • 0
Ижкар / Россия
Россиын пу коркаослы но ипотека сётъяны быгатозы
Туспуктэм: Анжелика Тихонова

Россиын нимаз пу коркаослы но ипотека сётъяны быгатозы. «Единая Россия» партилэн сыӵе кичӧлтонэзлы федерал кивалтэтын дурбасьтӥзы. Со сярысь, вице-премьер Виктория Абрамченко вылэ чӧлскыса, партилэн улосвыл ёзэтэзлэн пресс-службаез ивортӥз.

Солэн кылъёсызъя, али пу коркаосты пуктон сокем вӧлмемын ӧвӧл – сыӵе коркаосты вузанэн Россиын 65 гинэ компаниос выро.

Партиын лыдъяло, пу коркаослы ипотека сётон лэсьтӥськыны мылкыдэз ӝутоз но нюлэс возёс удыслы выль условиосъя тупатскыны луонлык сётоз

Али ипотекая вань кредитъёс пӧлысь 1-2 процентэз гинэ нимаз корка пуктыны висъяське, угось солэн ставкаез огшоры потребительской кредитэн ӵошатымон луэ. Со дыре ик, калык пӧлын юалляськонъёсъя, 60 процентлэсь уноезлэн кунмуртъёслэн ас коркаязы улэмзы потэ.

Кун Думаын Удмуртилэсь депутат Валерий Бузилов та кичӧлтон туж кулэ но дыраз шуыса пусйиз.

Пу – лэсьтӥськон понна туж умой материал, асьме выжыосмы вашкала дырысен пу коркаосын улӥзы – отын шуныт, чылкыт, со дыре ик дуно но ӧвӧл, со опытэз паськытгес кутыны кулэ. Нимаз пу коркаосты ипотека программае пыртон солы ватсаса мылкыд сётон луоз
Валерий Бузилов, Кун Думаын Удмуртилэсь депутат

Тодэ вайытом, 2020-тӥ арын Удмуртиын улӥсьёс гурт ипотекая 3,6 миллиард манетлэсь трос коньдон басьтӥзы.  



Наверх
Вниз