Александр Бречалов: Удмуртия быдэс дуннеын вожвылъяськыны кулэ

Удмуртилэн тӧроезлэсь ужзэ огдырлы быдэсъясь Александр Бречалов Россилэн азьмуртэзлы Владимир Путинлы элькунын ивестици луонлыкъёсъя карта кылдытон сярысь вераз. Кун но улосвыл кивалтӥсьёс вирнуналэ, 27-тӥ инвожое, пумиськылӥзы, ивортэ Кремльлэн пресс-службаез.

Ваче пумиськонын соос Удмуртиысь экономика, мерлык но дышетон удысъёсын югдур сярысь вераськизы. Нимысьтыз саклык висъязы элькунын инвестици луонлыкъёсъя карта кылдытонлы. Александр Бречаловлэн верамезъя, соин 2-тӥ гудырикошконэ тодматыны чаклало.

«Ми поселениысен кутскыса карозь быдэсак инвентаризация ортчытӥмы — вань луонлыкъёсмес. Со туж бадӟым уж вал. <…> Котькуд муниципал ёросъя быдэн 30 бам: сюрес урдсысь сервисысен кутскыса, интыысь учыръя туризмлэн люкетъёсыныз йылпумъяса, ӵектосъёс туж рос-просэсь. <…> Ми дуннелы Удмурт Элькунлэсь инвестициосъя луонлыкъёссэ возьматомы. Ми предприятиосмылы но ужбергатонлы, чиновникъёслы кутсконаз ик вераськомы, ми быдэс дуннеын вожвылъяськыны кулэ. Бускель улосэн, Россиысь улосвылъёсын ӧвӧл — быдэс дунееын», — вераз азьмуртлы улосвыл кивалтӥсь.

Бречаловлэн верамезъя, ас луонлыкъёсты пусъён элькунлы пуктэм ужпумъёсты быдэстыны юрттыны кулэ.