Ижкар-2 °C
16 тулыспал 2019 Кӧснунал
16+

1,3 миллиард манетлы будэтозы Удмуртилэн коньдэтэзлэсь уже кутон люкетсэ йӧскалык ӵектосъёсты быдэсъян понна

  • 147
  • 0
Ижкар / Удмуртиын
1,3 миллиард манетлы будэтозы Удмуртилэн коньдэтэзлэсь уже кутон люкетсэ йӧскалык ӵектосъёсты быдэсъян понна
Туспуктэм: Алексей Арзамасцев

2019-тӥ арын Удмуртиын йӧскалык ӵектосъёсты быдэстон понна улосвыл коньдэтлэн расход люкетэз 1 миллиард 336 миллион манетлы будоз. Сыӵе тупатъянъёсын катӵектосэз элькун кивалтэтлэн кенешоназ умоен лыдъязы но Кун Кенеше сётӥзы, ивортэ Удмуртиысь тӧролэн но кивалтэтлэн пресс-службазы.

Элькунысь коньдон ужпумъёсъя министр Станислав Евдокимов верамъя, ватсаськем коньдонэз ньыль йӧскалык проектъёслы висъялозы. «Демография» ӵектослы 813 миллион 252 сюрс манет чакламын, со пӧлысь 780 миллионэз ясли пуктонлы кутӥськоз.

«Тазалыкез утён» («Здравоохранение») проектлы 188 миллион манет висъялозы. Со улсын Удмуртиын пыктос висёнъёсын курадӟисьёслы амбулаторной юрттэт сётонъя центръёс кылдытыны малпало. Озьы ик инфаркт бере висисьёслы эмъюм басьтыны уксё висъялозы. 

«Дышетон» йӧскалык ӵектослы 330 миллион манет кошкоз. Со пӧлысь 287 миллион манетэз школа пуктыны кутӥськоз. Со сяна, умой дышетскись пиналъёслы но егит ӧнерчиослы юрттонъя ужрадъёс ортчозы. 

«Ужамлэсь пайдалыксэ будэтон но уже интыяськонлы юрттон» проектлы 4 миллион манет висъялозы.

Со сяна, Удмуртилэн 2019-тӥ арлы коньдэтэз сярысь катэ воштӥськонъёс пыртэмын кылем арын Сюрес фондысь кутымтэ 1 миллиард 133 миллион манет коньдонэз фондэ ик юнматон вылысь. Моногородъёсты азинтонъя фондын кылем 26 миллион 258 сюрс манетэз Глазкарын Мебель лэсьтонъя кыкетӥ фабрикаын лэсьтӥськон но тупатъян ужъёслы висъяны чакламын. Федерал коньдэтысь кылем 100 миллион манетэз Кар средаез умоятон ӵектосъёсъя огъяросси вожвылъяськонын вормем «Вотка кар» муниципал кылдытэтлы сётозы.

Эшшо 1 миллиард 634 миллион манет ватсаны чакламын мерлыко юрттэт сётонлы, кун ужъюртъёслэсь ужамзэс радъянлы но кун программаосты быдэсъянлы. Со пӧлын дышетонъя федерал кун куронъёслы тупась учебникъёс но гурт школаослы автобусъёс басьтонлы, транспортъя ужъюртъёслы субсидиос сётонлы, «Удмуртия» телеканалэз спутник вещание пыртонлы, кун, элькун но йӧскалык праздникъёсты радъянлы но мукет ужпумъёслы но мукетызлы

Вань воштӥськонъёсты лыдэ басьтыса, 2019-тӥ арын Удмуртилэн коньдэтэзлэн табыш люкетэз 72 миллиард 869 миллион манет луоз, уже кутон люкетэз – 73 миллиард 295 миллион манет, дефицитлэн быдӟалаез – 426 миллион манет.

Наши партнеры

Наверх
Вниз