Ижкар-1 °C
22 -тӥ коньывуон 2020 Покчиарня
18+

10 миллиард манетлэсь трос коньдон висъялозы йӧскалык ӵектосъёсты быдэсъяны Удмуртиын 2020-тӥ арын

  • 437
  • 0
Ижкар / Удмуртия
10 миллиард манетлэсь трос коньдон висъялозы йӧскалык ӵектосъёсты быдэсъяны Удмуртиын 2020-тӥ арын
Туспуктэм: Руслан Нуриахметов

2020-тӥ арын Удмуртиын йӧскалык ӵектосъёсты быдэсъяны 10 миллиард манетлэсь трос коньдон висъялозы. Сыӵе лыдпусэз Кун Кенешысь депутатъёс вуоно арлы элькун коньдэтлэсь ӵектоссэ кыкетӥ лыдӟемен эскерыкузы юнматӥзы, ивортэ улосвыл парламентлэн пресс-службаез.

Коньдэт бусьтыр ӧвӧлтэм дыръя со улосвылъёс понна зэмос юрттэт. Соин ик одӥгез валтӥсь ужпум, кудзэ коньдэт бордын ужаку элькунлэн тӧроез Александр Владимирович Бречалов пуктӥз – нацпроектъёсты быдэсъянлы коньдон висъян. Удмуртия 11 йӧскалык ӵектосъёсты быдэсъянэ пыриське, элькунын 51 улосвыл ӵектос юнматэмын, нош нацпроектъёсъя вань ужрадъёс кун программаосын нимаз люкетъёсы висъямын
Алексей Прасолов, Удмуртиысь Кун Кенешлэн тӧроез

Элькун коньдэт сярысь катлэсь ӵектоссэ кыкетӥ лыдӟемен эскеронлы йӧскалык ӵектосъёсты быдэсъяны чаклам федерал но улосвыл коньдонлэн быдӟалаез 1 миллиард 782 миллион 800 сюрс манетлы йылӥз но 10 миллиард 12 миллион 600 сюрс манет луиз

Тужгес трос коньдон «Демография» йӧскалык ӵектосъя ужрадъёслы чакламын – 3 миллиард 889 миллион 300 сюрс манет. Уксё нылкышноослы уже интыяськыны юрттон, 3 аресозь покчиослы нылпи садъёсын интыос кылдытон, арлыдоослы юрттон, нылпиосын семьяослы коньдонэн юрттон ужрадъёслы, озьы ик «Спорт – норма жизни» ӵектосэз быдэсъяны кутӥськоз.

«Здравоохранение» йӧскалык ӵектослы вуоно арлы коньдэтын 2 миллиард 54 миллион 800 сюрс манет чакламын. Быдэстоно ужрадъёс пӧлын – эмъюрттэт сётон сӧзнэтэз но нылпиослэсь тазалыксэс утён сӧзнэтэз азинтон, сюлэм но вирсэр, пыктос висёнъёсын нюръяськон, удысэ ӧнерчиосты кыскон но цифровизация.

«Кышкыттэм но ӟечлыко автомобиль сюресъёс» нацпроектлы – 1 миллиард 432 миллион манет. Соя сюресъёсты но сюрес возёсэз азинтонъя федерал ӵектосъёсты быдэсъяны чакламын.

853 миллион 900 сюрс манет висъязы «Образование» йӧскалык ӵектослы. Со «Успех каждого ребенка», «Современная школа», «Цифровая образовательная среда» но «Социальная активность» федерал ӵектосъёсты быдэсъяны кутӥськоз.

«Жилье и городская среда» йӧскалык ӵектослы 834 миллион манет чакламын. Татын интывылъёсты умоятон но улыны ярантэм но куашкан калэ вуэм юртъёслэсь лыдзэс кулэстон чакламын.

Шуръёсты но тыметъёсты, нюлэсъёсты утён, калыклы чылкыт юон ву сётон но жуг-жагез быдтон ужрадъёслы «Экология» йӧскалык ӵектос улсын 273 миллион 200 сюрс манет висъялозы.

«Культура» йӧскалык ӵектослы 213 миллион 900 сюрс манет чакламын, со пӧлын «Культурная среда», «Творческие люди» но «Цифровая культура» федерал ӵектосъёслы.

Эшшо 331 миллион 600 сюрс манет «Малое и среднее предпринимательство и поддержка индивидуальной предпринимательской инициативы» йӧскалык ӵектослы висъялозы. Чаклам ужрадъёс пӧлын ужбергатӥсьёслэн покчи но шоръёзо предприятиоссылы капчиятэм кредитъёс басьтыны луонлыкъёс кылдытон, егит фермеръёслы юрттонъя сӧзнэт кылдытон но гурт кооперациез азинтон, ужбергатонэз вӧлмытон.

«Производительность труда и поддержка занятости» йӧскалык ӵектослы 86 миллион 700 сюрс манет висъязы. Со ужамлэсь но ужъя рыноклэсь пайдалыксэ будэтон ужрадъёслы кутӥськоз.

Со сяна, «Международная кооперация» но «Цифровая экономика» йӧскалык ӵектосъёслы 37 миллион 400 сюрс манет но 5 миллион 800 сюрс манет чаклазы.

Йӧскалык ӵектосъёсын пуктэм ужпумъёсты быдэстон понна федерал коньдэтысь уксё сётыны чакламын. 2020-2022 аръёсы ваче вылысь висъяськись коньдонлэн быдӟалаез 97 процент луоз. Удмуртилэн коньдэтаз 6 миллиард 724 миллион 200 сюрс манет чакламын

Тодэ вайытом, Удмуртилэсь 2020-тӥ арлы коньдэтсэ улосвыллэн Кун Кенешысьтыз депутатъёс 10-тӥ толсуре ортчем сессиязы кыкетӥ лыдӟемен эскеризы но кутӥзы

  



Наверх
Вниз