Ижкар-1 °C
22 -тӥ коньывуон 2020 Покчиарня
18+

Удмуртиысь 1 сюрс 94 семьяос «Гурт ипотека» программая капчиятэм кредитъёс басьтӥзы. Соослы оглом 2 миллиард 180 миллион сётӥзы.Висъям коньдонлэн быдӟалаезъя элькунмы Россиысь вить азьветлӥсьёс пӧлы пыре. Со сярысь улосвыл тӧролэн но кивалтэтлэн пресс-службазы ивортӥз.

Программалэн улосвыламы ужаны кутскемез дырысен гурт ипотека басьтон понна оглом 11 миллиард 700 миллион манет тыр 5 сюрс 600 куриськонъёс вуизы ини. Одӥг адямилы сётэм коньдонлэн шор-куспо быдӟалаез 2 миллион манет луэ. Ӵемысьгес 15 арозьлы пунэмасько

42 процентэз коньдонэнызы дась юрт басьто, 18 процентэз – квартира. Нош эшшо 40 процентэз – пуктӥськись юртъёсын улон интылы висъяло. Гуртъёсын улӥсьёс пӧлын капчиятэм ипотека тужгес вӧлмемын Дэри, Ува но Эгра ёросъёсын.

Астэ страховать карон сярысь огкыл гожтыса, Россельхозбанкысь 2,7 процентъем капчиятэм гурт ипотека басьтон понна куриськон гожтыны 21 аресысен 75 аресозь кунмуртъёс быгато. Удмуртиын улӥсьёс понна 100 сюрс манетысен 3 миллион манетозь кредитъёсты троссэ 25 арлы сёто. Пунэмен коньдон басьтон понна, адямилэн улон интылэн дунызлэн ӧжытсэ 10 процентэз кияз луыны кулэ.

Озьы ик «Комплексное развитие сельских территорий» программа улсын, гурт ипотека сяна, капчиятэм потребительской кредит но басьтыны луэ. Гуртъёсын 23-65 аресъем улӥсьёс 6 толэзьысен 5 арозь 30 сюрсысен 250 сюрс манетозь коньдон басьтыны быгато. Астэ страховать карон сярысь огкыл гожтыса, кредитлэн процентэз троссэ 3 процент луэ, сотэк – 5 процент.

Тодэ вайытом, туэ пӧсьтолэзе улон инты пуктон яке басьтон понна 3 процентъем гурт ипотека сётъяны Удмуртилы ватсаса 150 миллион манет пала висъязы. Гудырикошконэ «Гурт ипотека» программаез улонэ пыӵатонэн герӟаськем ужпумъёсты Россиысь гурт возёсъя министр Дмитрий Патрушев элькунэ вуылыку эскеризы

2020-тӥ арын Удмууртиын 120-лэсь трос семьяос капчиятэм ипотекаез басьтыны быгатозы. Со понна элькун коньдэтысь ватсаса 17 миллион 600 сюрс манет висъязы. Со сярысь улосвыл кивалтэтлэн тӧроез Ярослав Семёнов «ВКонтакте» мерлыко вотэсысь бамаз ивортӥз.

Элькунмы – пилотной улосвыл, кытын куинетӥ арзэ ипотекая капчиятэм кредитъёсъя прогрмма ужа. Солэн пуштросэз туж валамон –коммерци но капчиятэм ставкаослэсь пӧртэмлыксэс кун ас вылаз басьтэ. Соин ик Удмуртиын улӥсьёс ипотека пичи процентэн басьтыны быгато – троссэ 6,2 процентэн
Ярослав Семёнов, Удмуртиысь кивалтэтлэн тӧроез

Таяз арын 44 семьяос кредит басьтӥзы ни, нош 2018-2019 аръёс ӵоже 200 семьяос улон интыен югдурзэс умоятыны быгатӥзы.

Капчиятэм кредит басьтыны луонлык чакламын:

- тылпу но инкуазь сэрен шугадӟонэ шедемъёс яке шимучыр сэрен улон интызэс ыштэмъёс;
- коньдэт чотын ужась предприятиосын но огазеяськонъёсын тыршисьёс;
- трос нылпиё семьяос;
- ож ужрадъёсы пыриськем ветеранъёс;
- сӧсыр пиналъёсты будэтӥсь семьяос;
- егит семьяос (пунэмен коньдон сётон сярысь пукылъян кутон дыры кыкезлы ик кузпалъёслы 36 тырмытэ луыны кулэ);
- нылпиоссэс огназы будэтӥсь 36 аресозь анайлы яке атайлы;
- кун служащийёс.

Куриськон сётӥсьёс улон интызэс умоятонлы кулэяськись шуыса лыдъямын луыны кулэ

Ватсалом, азьвыл программаез быдэсъяны 17 миллион 400 сюрс манет висъязы ни вал. Капчиятэм кредит выль коркаын улон инты басьтыны гинэ чакламын. Озьыен, улосвыл элькунын улӥсьёслы юрттэ но лэсьтӥськон удыслы азинскыны луонлык сётэ.

Юанъёсын Удмуртиысь ипотечной коропорацие 8 (3412) 77-77-75 телефон номеръя вазиськыны луэ.

Тодэ вайытом, азьвылгес улон инты пуктон яке басьтон понна 3 процентъем гурт ипотека сётъяны Удмуртилы ватсаса 150 миллион манет пала висъязы

Удмуртиын вылӥ ӟечлыко кидыс будэтӥсьёслы, фермеръёслы но гурт возёс техникаез выльдыны ватсаса 195 миллион 600 сюрс манет висъялозы. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Ватсаса субсидиос выльысь люкылон чотын шедьтэмын – мукет ӧръёсъя уже кутымтэ коньдон та ужпумъёслы висъямын луоз. Басьтӥсьёс дорозь со шуркынмон пумозь вуоз но, удыслэн 2020-тӥ арлы оглом коньдэтэз быдэсак быдэстэмын луоз шуыса оскиськом
Ольга Абрамова, Удмуртиысь кивалтэтлэн тӧроезлэн воштӥсез - гурт возёсъя но сиён-юонъя министр

Вылӥ ӟечлыко кидысъёс басьтыны, со пӧлын сӥзьыл кизён понна, гурт возёсъёслы ватсаса 23 миллион 200 сюрс манет сётозы. Та дырозь висъям 19 миллион 400 сюрс манет ваньмыз уже кутэмын ни. Озьы ватсаса юртэтт 131 возёс басьтоз. Пусъём, туэ умой удалтонлыко кидысъёсын 71,9 сюрс гектар кизизы вал.

51 миллион манет гурт возёс техника басьтыны кутэм коньдонэз берыктыны висъяське. Азьвыл солэсь оглюкетсэ гинэ берыктыны шуыса 101 миллион 300 сюрс манет чакламын вал.

Пандемия вакытэ ужзэс огсыр азинтыны луонлык сётон понна, элькунысь фермеръёслы ватсаса 121 миллион 400 сюрс манет висъялозы. Коньдонэз грант сямен сётозы – одӥг выль ужан инты кылдытэм понна 1 миллион 500 сюрс манет.

Туннэ нуналлы Удмуртиысь гурт возёсъёслы федерал но элькун коньдэтъёсысь 1 миллиард 780 миллион манет тыр кун юрттэт сётӥзы ни. 

Ужтэк кылем анай-атайёслы куарусёнэ котькуд нылпизы понна 3 сюрс манет тырозы. Со сярысь «Российская газета» ивортэ.

Кун кивалтэтлэн тӧроез Михаил Мишустин ужтэк кылем анай-атайёслы ватсаса тыриськонъёсты куартолэзьлы кузятыны пуктӥз. Юрттэтэз ужзэс ыштэмен лыдъяськись но 18 аресозь пиналъёссэс будэтӥсь 2 миллион 800 пала адямиос басьтыны быгатозы.

3 сюрс манет котькуд нылпи понна тыриськоз но ужтэк кылемен сэрен тыриськись пособие борды ватсаськоз

Ужпумез быдэстон понна коньдэтысь 8 миллиард 500 сюрс манет висъялозы. 

Мерлыко контракт улсын семьяослы юрттон понна 2020-тӥ арын Удмуртиын 247 миллион манет висъялозы. Со сярысь улосвыл тӧролэн но кивалтэтлэн пресс-службазы ивортӥз.

Таяз арын элькун Россиын куанер улӥсьёслэсь лыдзэс кулэстонъя пилотной планэ пыриз. Секыт улон югдуре шедем семьяослы «Демография» йӧскалык ӵектос улсын мерлыко контракт ӵектӥзы. Коньдон ас подсобной возёсэз азинтыны, ас ужез кутскыны яке выльысь дышетскыны сёто. Ёрмыса улӥсь семьяос коньдонэн юрттэт но басьтыны быгато. Уксёез котькуд югдурез нимаз эскерыса висъяло – троссэ 100 сюрс манет.

Мерлыко контрактъёсты быдэстыны федерал коньдэтысь шӧдскымон уксё басьтӥмы. Туннэ нуналлы 160 миллион манет тыр 1 сюрс 900 тупанкылъёс гожтэмын. Мерлыко контрактъёс пӧртэм ӧръёсъя быдэсъясько: уж утчан, ӧнерчиосын дышетон, секыт улон югдуре шедем семьяослы коньдонэн юрттон
Александр Бречалов, Удмуртилэн тӧроез

Коронавирус инфекци вӧлмон югдурын гуртын улӥсьёслы юрттон вылысь Удмуртиын ас подсобной возёсэз азинтон понна ватсаса 30 миллион манет висъязы. Та дырлы 20 миллион манетлы 860-лэсь трос куриськонъёс сётӥзы ни.

Мерлыко контрактлэн ужпумез – начар улӥсь кунмуртъёслэсь улон ӟечлыксэс будэтон. Татын кун огшоры коньдон уг висъя, со луонлык сётэ, кудӥз азьланяз семьялы табыш поттыны юрттоз. 2020-тӥ арын мерлыко контрактлы висъям коньдэтлэн быдӟалаез, 2019-тӥ арен ӵошатыса, 39 поллы тросгес
Александр Бречалов, Удмуртилэн тӧроез

Пусъём, мерлыко контрактъя юрттэт сётон элькунын 2014-тӥ арысен мынэ. 83 процентэз юрттэтэз басьтӥсьёс гуртын уло но кык куиньмослэсь уноез трос нылпиё семьяос луо. 

Удмуртиын гуртын улӥсьёслы ас подсобной возёссэс азинтыны 30 миллион манет висъязы. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Ас возёсэз азинтыны коньдон мерлыко контракт юнматыса басьтыны луэ. Туннэ нуналлы 900 пала 900 пала куриськонъёс вуизы ни.

Туж оскиськомы, федерация милесьтым тазьы ужан амалмес инъет карыса басьтӥз ке, вуоно арын ми та удыслы федерал коньдэтысь ватсаса уксё басьтыны быгатомы
Удмуртиысь гурт возёсъя но сиён-юонъя министерстволэн пресс-службаез

Удмуртстат ивортэмъя, 1-тӥ пӧсьтолэзьлы Удмуртиысь ас подсобной возёсъёсын 50 сюрс 739 сюро таза пудо вордо, со пӧлын 15 сюрс 203 кысконо скалъёс. Со уллёлэсь 33 сюрс 700 тонна йӧл кыскизы. Туэ нырысетӥ паларын вандыны шуыса 5 сюрс 100 тонна (улэп секталаен) пудо но тылобурдо будэтӥзы, 61 миллион штука пала курегпуз басьтӥзы.

Тодэ вайытом, Удмуртиысь гурт возёсъёсын пудо вордӥсьёслы туэ 1 миллиард 400 миллион манет тыр кун юрттэт сётӥзы.

Удмуртиын коронавирус инфекциен нюръяськись 2 сюрс 286 эм ужасьёс пӧсьтолэзь понна тыриськонъёс басьтӥзы. Со сярысь улосвыл тӧролэн но кивалтэтлэн пресс-службазы ивортэ.

Секыт югдурын ужамзы но ватсаса ужез быдэсъямзы, тужгес кулэ луись ужез лэсьтэмзы понна ватсаса висъям коньдонэз 636 эмчиос, 1 сюрс 128 шор ёзо эм ужасьёс, 295 покчи эм ужасьёс, удысысь 227 мукет ужасьёс басьтӥзы.

Пӧсьтолэзь понна тыриськонъёс оглом 107 миллион 700 сюрс манет тыр усизы

Удмуртиысь тазалыкез утёнъя министрлэн воштӥсез Мария Галеева пусйиз, туннэ нуналлы элькунысьтымы эмчиослы но тазалыкез утён удысын мукет ужасьёслы мылкыдзэс ӝутон понна ватсаса тыриськонъёслы оглом 459 миллион 100 сюрс манет висъязы. Со пӧлысь 423 миллион манетэз федерал коньдэтысь, 36 миллионэз – элькун коньдэтысь.

Тазалыкез утён кун сӧзнэтысь эм огазеяськонъёсын ужасьёслы мылкыдзэс ӝутӥсь тыриськонъёсъя ӝегатонъёс ӧвӧл. Тыриськонъёс дэмен гожтэм огкылъёсын юнматэм дыре но валтӥсь уждунлэсь нимаз сётэмын
Мария Галеева, Удмуртиысь тазалыкез утёнъя министрлэн воштӥсез

Коньдонэз эм огазеяськонъёсы 30-тӥ пӧсьтолэзьысен 7-тӥ гудырикошконозь вуттӥзы.

Удмуртиысь ужъя но мерлыко политикая министрлэн воштӥсез Ольга Лубнина карантинын улэм мерлыко ужъюртъёсын ужам 3 сюрс 910 ӧнерчиос ватсаса тыриськонъёсты 7-тӥ гудырикошконэ басьтӥзы шуыса ивортӥз.

Мерлыко ужасьёслы 99 миллион манет висъязы

Озьы ик со пусйиз, 3-тӥ гудырикошконысен Арлыдоослы но сӧсыръёслы элькун юрт-интернат азьло сямен ужа ини шуыса. 9-тӥ гудырикошконысен дышем сямъя ужан режиме Глазкарысь но Канифольнойысь йырвизьзыя ляб пиналъёслы юрт-интернатъёс потӥзы. Ужъюртъёсын ужасьёслы тыриськонъёс та арня пумозь вуттэмын луозы.

Улон инты пуктон яке басьтон понна 3 процентъем гурт ипотека сётъяны Удмуртилы ватсаса 150 миллион манет пала висъязы. Со сярысь элькунысь гурт возёсъя но сиён-юонъя министерстволэн пресс-службаез ивортэ.

Коньдонлэн бадӟым люкетэз элькунэ 15-тӥ пӧсьтолэзь бере вуоз

Удмуртилы тросгес коньдон юнме шорысь ӧз висъялэ. Элькунмы пыре вить улосвылъёс пӧлы, кытын капчиятэм гурт ипотекаез басьтыны мылкыд карисьёс лыдзы но соослы сётэм коньдон тужгес трос луэ.

Та дырлы банке 4 сюрс пала куриськонъёс вуизы. 529 семьялы оглом 1 миллиард 51 миллион манет сётӥзы ни. 

Удмуртия сюресъёсты тупатъян понна ватсаса 340 миллион манет басьтыны быгатоз. 

2020-тӥ ар кутсконысен Удмуртия  гурт возёс удысын поттэм вузъёсты кунгож сьӧры вузанэз 32 процентлы йылэтӥз. Со сярысь элькунысь гурт возёсъя но сиён-юонъя министерстволэн пресс-службаез ивортэ.

10-тӥ инвожолы предприятиос гурт возёс вузъёсты но сиён-юонъёсты 1 миллион 850 сюрс доллар тыр келязы ни, кылем арын та дыр ӵоже ик 1 миллион 40 сюрс доллар тыр вал.

Туннэ нуналлы Удмуртиысь гурт возёс вузъёс Китае, Монголие, Белоруссие, Казахстанэ, Туркменистанэ, Узбекистанэ, Армение, Молдавие, Польшае но Нидерландые вуо. Кунгож сьӧры кошкись валтӥсь вузъёс пӧлы йӧллэсь лэсьтэм сиён-юонъёс, парсь сӥль, пызьлэсь сиёнъёс но ческыт сиёнъёс, долгунец етӥнлэн но вӧй сётӥсь мукет будосъёслэн кидысъёссы, картофка но вегенсъёс (куасьтэм бакча сиёнъёс) пыро.

Тодэ вайытом, 2020-тӥ арын Кияса ёросын нырысетӥез Удмуртиын экологи ласянь чылкыт вузъёс поттонъя возёс ужаны кутскоз.

Удмуртия табыш кулэсмемез компенсировать карон понна федерал коньдэтысь 3 миллиард 90 миллион манет басьтӥз. Со сярысь элькун кивалтэтлэн но тӧролэн пресс-службазы ивортэ.

Александр Бречалов дотациос туж дыраз вуизы шуыса пусйиз.

Инвожолэн нырысетӥ декадаяз бюджет чотын ужасьёслы уждун тыронэн валче котьку но коньдэт вылэ бадӟым нагрузка усе. Со сяна, сюресъёсты тупатъян вакыт кутскиз, соин ик дотацилэсь ог люкетсэ быдэстэм ужъёс понна тыриськыны келялом. Элькунысь каръёслы но ёросъёслы юрттэт сётэмын луоз, выль коронавирус инфекцияя пандемиен сэрен сюбегатонъёслэсь секыт югдуре сюрем ужбергатӥсьёслы но предприятиослы юрттэт сётонэз азьланьтом
Александр Бречалов, Удмуртилэн тӧроез

Россиысь коньдон ужпумъёсъя министерство ватсаса коньдонэз келяз со улосвылъёсы, кытын 1-тӥ куартолэзьлы, азьвыл кык аръёсын ӵошатыса, вытъёс но выт луисьтэм тыриськонъёс ӧжытгес вуизы.

Дотацилэсь быдӟалазэ улосвыл коньдэтъёслэсь нырысь-валысь тыриськонъёссэс лыдэ басьтыса пуктӥзы. Сыӵе амал пандемиен сэрен экономикаын шугъяськонъёс вакытэ Удмуртилэсь огазеям коньдэтсэ огсыр возьыны юрттоз.

Пусъём, Россиысь коньдон ужпумъёсъя министерство кунысь 56 улосвылъёслы оглом 100 миллиард манет висъяз.

Тодэ вайытом, Удмуртиын агропром огъетлы огсыр ужаны луонлык кылдытон понна ватсаса 320 миллион манетлэсь трос коньдон висъязы

Удмуртия коронавирус висён вӧлмон вакытэ агропром огъетлы юрттэтлэсь быдӟалазэ будэтэ – удыслы огсыр ужаны сётон понна ватсаса 321 миллион 100 сюрс манет висъялозы. Сыӵе пумкылъян 20-тӥ куартолэзе улосвыл кивалтэт кутӥз, ивортэ элькунысь гурт возёсъя но сиён-юонъя министерстволэн пресс-службаез.

Элькун коньдэтысь ватсаса висъяськись уксё пӧлысь 171 миллион 500 сюрс манетэз йӧл поттон удыслы мыноз. 150 миллион манетэз гурт возёсъёслэн 2020-тӥ арын 1-тӥ южтолэзь бере басьтэм яке рефинансировать карем вакчи дырлы кредитъёссыя процент ставкаосты субсидировать каронэз йылэтон понна кутыны чаклало.

Коммерци но льготая кредитъёсъя ставкаосты тыронэз коньдэт быдэсак ас вылаз басьтэ. Пандемия югдурын удысэтлы юрттон понна сыӵе выль юрттэтэз улосвылысь гурт возёсъя но сиён-юонъя министерство оштолэзе юнматӥз. Сое кылдэм югдурын пунэмаськемзэс тырон ласянь шуг-секытъёсын пумиськыны быгатӥсьёс возьмало. Юрттэтэз соос матысь дыре басьтозы ини

2020-тӥ арын Удмуртиысь агропром огъетлы федерал но улосвыл коньдэтъёсысь оглом 2 миллиард 635 миллион 800 сюрс манет висъялозы. Туннэ нуналлы гурт возёсъёсы 816 миллион 900 сюрс манет тыр (35 процентэз) субсидиос вуттэмын ини.

Тодэ вайытом, Удмуртиын йӧл поттон удысын выль рекорд пуктӥзы

2019-тӥ арын Удмуртиын йӧскалык ӵектосъёсты быдэсъяны 11 миллиард манет пала быдтӥзы. Кылем арлы элькун коньдэтэз быдэсъянлы йылпумъянъёс лэсьтыса, со сярысь коньдон ужпумъёсъя министр Станислав Евдокимов вераз, ивортэ улосвыл тӧрлэн но кивалтэтлэн пресс-службазы. 

2019-тӥ арлы коньдэтэз быдэстонлэн аспӧртэмлыкез Росси азьмуртэн Владимир Путинэн кичӧлтэм йӧскалык ӵектосъёсты улонэ пыӵатыны кутскемен герӟаськемын вал. Элькун 11 нацпроектъёсты быдэсъянэ пыриське. Соосын пуктэм ужпумъёсты быдэстон понна Удмуртиын 51 улосвыл ӵектос юнматэмын. Соосты быдэстыны коньдэтысь 10 миллиард 900 миллион манет кутэмын
Станислав Евдокимов, Удмуртиысь коньдон ужпумъёсъя министр

Удмуртилэн коньдэтэзлэн табыш люкетэз 2019-тӥ арын 80 миллиард 600 миллион манет луиз, 2018-тӥ арын сярысь 10 процентлы тросгес. Кылем арын федерал коньдэтысь 22 миллиард 800 миллион манет вуиз (4 миллиард 500 миллион манетлы тросгес). Азьвыл чаклам лыдпус борды ватсаса 4 миллиард манет котыр федерал коньдон кыскыны луиз.

Коньдэтлэн уже кутэм люкетэз 82 миллиард 900 миллион манет луиз. 2018-тӥ арен ӵошатыса, со 16 процентлы тросгес.

Расход люкетэзлэн 65 процентэз – 54 миллиард 200 миллион манет – мерлыко удысъя кун программаослы мынӥз. Со пӧлысь ӝыныез (27 миллиард манет) – дышетонэз азинтонлы. Тазалыкез утён удысэз азинтыны 12 миллиард 800 миллион манет висъязы, калыклы мерлыко юрттэт сётонлы – 9 миллиард 700 миллион манет.

2018-тӥ арен ӵошатыса, мерлыко удысын валтӥсь ӧръёсъя расходъёс озьы ик будӥзы. Со йӧскалык ӵектосъёсты быдэсъянэн но дышетӥсьёслэсь, визьнодасьёслэсь, эмчиослэсь, эм ужасьёслэсь, мерлыко ужасьёслэсь но лулчеберетын ужасьёслэсь уждунзэс будэтонъя улосвыл «дорожной картаен» пусъем лыдпусъёсты 2018-тӥ арын вормем но соосты утёнэн герӟаськемын
Станислав Евдокимов, Удмуртиысь коньдон ужпумъёсъя министр

Озьы ик со пусйиз, расходъёс будон вылын тужгес ӧжыт уждунлэсь быдӟалазэ 12 сюрс 972 манетозь будэтон, коньдэт чотын мукет ужасьёслэсь уждунзэс индексъян, элькунын улӥсьёслы мерлыко тыронъёсты индексъян шӧдӥськиз.

2019-тӥ арын Удмуртиын коньдэт чотын ужасьёслы уждун тырыны 39 миллиард 900 миллион манет висъязы. Со вань расходъёс пӧлысь 41,5 процентэз. 2018-тӥ арен ӵошатыса, лыдпус 6 процентлы будӥз. Уждунэз но мерлыко тыронъёсты кылем арын дыраз тыризы, пунэмъёс ӧвӧл.

Экономика удысъя расходъёс 16 миллиард 200 миллион манет тыр быдэстэмын (ваньмыз пӧлысь 20 процент). 47 процентэз яке 7 миллиард 600 миллион манет транспорт сӧзнэтэз азинтыны мынӥз. Агпропром огъетлы кун юрттэт чотын 2 миллиард 100 миллион манет висъязы. Кун асъетэ юртъёс пуктыны (басьтыны) но вань кун программаос улсын лэсьтӥськон удысэз азинтыны – 5 миллиард 500 миллион манет. 2018-тӥ арен ӵошатыса, капвложениос 52 процентлы яке 1 миллиард 89 миллион манетлы йылӥзы.

Читать полностью

Удмуртиын коронавирус инфекциен нюръяськись 1 сюрс 400-лэсь трос эм ужасьёс ватсаса тыронъёс басьтозы. Со сярысь элькун тӧролэн но кивалтэтлэн пресс-службазы ивортэ.

Коньдон карантин вакытэ ужам понна ватсаса сётӥське но азьвыл юнматэм тыронъёс борды ватсаське. Озьы ик со ёрос коэффициентэз ватсаку но лыдэ басьтӥськоз.

Росси азьмуртлэн Владимир Путинлэн косэмезъя федерал катрадлыкен чаклам тыронъёсты Удмуртиысь тазалыкез утён удысын ужасьёслы сётон понна 159 миллион 700 сюрс манет висъялозы

Коньдонэз коронавирус инфекциен черламъёсын ужась эм но мукет ужасьёс басьтыны быгатозы. Со COVID-19 висёнэн нюръяськыны дасям паласькись висёнъёсъя элькун эмъюртын, Дэри ёросысь эмъюртын ужасьёс. Тыронъёсты коронавирусэн висисьёсты эмъяны дасям но висисьёсты кутыны кутскемзы дырысен 2, 7 но 8 номеро кар эмъюртъёсын ужасьёс но басьтыны быгатозы. Озьы ик Воткаысь, Глазкарысь, Ижкарысь, Можгаысь но Сарапулысь ӝог эмъюрттэт сётонъя нимысьтыз бригадаос, коронавирус диагноз пуктэм муртъёслы но Роспотребнадзорлэсь астэ ачид нимаз висъян сярысь пуктэт басьтэм адямиослы эмъюрттэт сётӥсьёс.

Со сяна, Удмуртиысь тӧрлыкъёс карантинысь поттэм 1 номеро кар эмъюртын ужасьёслы тыронъёс сярысь косэт (распоряжение) дасязы. Элькун тӧролэн Александр Бречаловлэн верамезъя, коньдонэз 1-тӥ куартолэзьысен тырыны кутскозы.

Тыронъёсты Ижысь 1 номеро кар эмъюртысь 79 ужасьёс басьтозы: 19 эмчиос, 36 шор эм ужасьёс, 10 покчи эм ужасьёс но техникаен 14 юрттӥськисьёс

Озьы ик улосвыл коньдэтын Росси кивалтэтлэн 484 но 415 номеро пуктэтъёсаз пырымтэ, но коронавирус инфекциен висисьёслы юрттэт сётонэ пыриськисьёслы тыронъёс понна 36 миллион манет чаклазы.

Тодэ вайытом, 30-тӥ оштолэзьлы Удмуртиын коронавирус инфекциен черлан 237 учыръёс лабораториосын зэматэмын

«Гурт ипотека» программая Удмуртиын улӥсьёслэсь 1 сюрс 500 пала куриськонъёс вуизы ни. Со сярысь 16-тӥ южтолэзе улосвыл тӧро дорын ортчем кенешонын элькун кивалтэтлэн тӧроезлэн воштӥсез – гурт возёсъя но сиён-юонъя министр Ольга Абрамова ивортӥз.

Туннэ нуналлы 1 сюрс 426 куриськонъёс кутэмын. 13-тӥ южтолэзьлы Удмуртиын 19 миллион манет тямыс кредитъёс сётэмын ни. Гурт ипотекаез одӥг пол гинэ басьтыны луэ. Кредитлэн быдӟалаез троссэ 3 миллион манетозь луыны быгатэ. Пунэмаськыны Россиын ялан улӥсь 21-75 аресъем кунмуртъёс быгато
Ольга Абрамова, Удмуртиысь кивалтэтлэн тӧроезлэн воштӥсез - гурт возёсъя но сиён-юонъя министр

Гурт ипотекая кык ставкаос чакламын: пунэмаськись ассэ страховать каре ке – 2,7 процент, уг ке – 3 процент.

Со сяна, гуртын улӥсьёс коммунициосты лэсьтыны, коркаез тупатъяны 5 процентъем кредит басьтыны быгато. Со понна адямилэн гурт интывылын ялан регистрациез луыны кулэ. Троссэ 250 сюрс манет басьтыны луэ

Элькунлэн тӧроез Александр Бречалов та юрттон амалэз быдэстонын застройщикъёс но подрядчикъёс ласянь спекулровать карон учыръёс медаз луэ шуыса чакланы куриз.

Валтӥсез ужпум – каргуртъёс но гуртъёс мед улозы, медаз быре. Гурт ипотека сётыны гинэ тырмыт ӧвӧл, гуртоос понна ӟеч но тунсыко улыны луонлыкъёс кылдытыны кулэ. Азьмуртэн Владимир Путинэн кичӧлтэм йӧскалык ӵектосъёсъя милям 2020-тӥ арын гурт интывылъёсын бадӟым перезагрузка чакламын
Александр Бречалов, Удмуртилэн тӧроез

Солэн верамезъя, кылсярысь, «Культура» йӧскалык ӵектосъя лулчеберет юртъёсты быдэсак выльдыны но пуктыны чакламын, «Здравоохранение» ӵектосъя 88 фельдшер-акушер пунктъёс лэсьтыны. Федерал коньдэтысь гинэ со понна 397 миллион 200 сюрс манет висъямын. Озьы ик 2020-тӥ арын чагыр эстӥськон гумыос кыскон, дышетон юртъёс пуктон ласянь бадӟым ужпумъёс пуктэмын.

ВАТСАН

Гурт ипотека басьтыны малпасьёс понна нимысьтыз куронъёс ӧвӧл. Банкъёс адямилэсь тыриськыны быгатэмзэ но кредит историзэ ваньмызлэсь сямен ик эскерозы. Гурт ипотека чакламын: 
- гурт интывылын музъемен корка басьтыны; - нимаз корка пуктон понна музъем басьтыны; 
- азьвыл басьтэм музъем вылын нимаз корка пуктыны яке пуктӥськонэз йылпумъяны; 
- выль коркаын патер басьтыны (банклэн куронъёсызъя со лэземын ке); 
- вылӥ верам ужпумъёс понна 2020-тӥ арозь басьтэм кредитъёсты ворсаны (банклэн куронъёсызъя со лэземын ке).

2019-тӥ арын Удмуртиын вань удысъёсъя шоро-куспо уждунлэн быдӟалаез 34 сюрс 69 манет луиз. Со сярысь Удмуртстат ивортэ.

Азьвыл арен ӵошатыса, уждун 6,5 процентлы будӥз, но дунъёслэсь йылэмзэс лыдэ басьтыса, ватсан 2,9 процент луиз

Гурт возёс, нюлэс возёс, пӧйшуран, чорыг будэтон удысын ужасьёслэн шоро-куспо уждунзы миым 24 сюрс 364 манет пусъемын. Тужгес трос коньдон тыризы музъем узырлыкез поттон удысын – 54 сюрс 688 манет но коньдон бергатон но утетъя (страховой) удысын – 52 сюрс 201 манет.

Дышетон удысын ужасьёслэн уждунзы элькунъя шоро-куспо уждунлэн быдӟалаезлэсь 79,4 процентэз луиз. Лулчеберет, спорт, шутэтскон но шулдыръяськон удысын ужасьёслэн – 88,4 процентэз, тазалыкез утён но мерлыко юрттэт сётон удысын – 99,7 процентэз.

Шоро-куспо уждунлэн быдӟалаезъя Удмуртия Приволжск федерал округысь 14 улосвылъёс пӧлын куатетӥ интыын. Азьпалан Пермь шаер, Татарстан, Башкортостан, Самара но Нижний Новгород улосвылъёс

Тужгес трос коньдон басьто Пермь шаерын – 38 манет 562 манет, тужгес ӧжыт – Саратов улосвылын, 28 сюрс 503 манет. 

Удмуртилэн тӧроез Александр Бречалов но Тимченкоосэн фондзылэн Чаклась кенешезлэн кивалтӥсез Ксения Франк лулчеберет но спорт ӵектосъёсъя валче ужан сярысь тунпанкыл гожтӥзы. Со сярысь улосвыл тӧролэн но кивалтэтлэн пресс-службазы ивортэ.

2020-тӥ арын ӵектосъёсты быдэсъяны 20 миллион манет пала висъялозы. Со пӧлысь ог 13 миллионзэ Фонд сётоз.

Тимченкоослэн фондзылэн ӵектосъёсаз но вожвылъяськонъёсаз Удмуртия кӧня ке ар ни пыриське. Оскисько, та тупанкылэз кинюртон улосвылэз лулчеберет но спорт пыр азинтыны выль мылкыд сётоз
Александр Бречалов, Удмуртилэн тӧроез

Тимченкоослэн фондэнызы кылдытэм «Культурная мозаика» ӵектоссы вылын улосвылын «Культурная мозаика Удмуртской Республики» программаез быдэсъялозы. Со ӟечгес улыны но ужаны луонлыкъёс кылдытыны дась луись адямиосты но огазеяськонъёсты шараяны юрттоз.

Программае пыриськись ӵектосъёс аръем ньыль люкетъёсты ортчыны дэмлало. Ӵектосэ Можга но Камбарка, озьы ик 25 гурт ёросъёс пыриськозы. Программаез быдэсак ортчыса, лулчеберетъя мерлыко ӵектосъёслэн луонлыкъёссы усьтӥськозы, юлтош кусыпъёс герӟаськозы, кудъёсыз пичи интывылъёслы азинскыны юрттозы.

Ми туж шумпотӥськомы, элькун тӧролыкъёслэн программаез улосвылын пыӵатыны мылкыд каремзылы
Ксения Франк, Тимченкоосэн фондзылэн Чаклась кенешезлэн кивалтӥсез

Тимченкоослэн фондзы нылпи хоккеез азинтонъя «Добрый лёд» программаез улонэ пыӵатыны юрттоз. Со улсын тренеръёслэсь тодон-валанъёссэс будэтозы, ӵошатсконъёс радъяны но ортчытыны, командаослы спорт тӥрлык но дӥськут басьтыны, нылпи следж-хоккеез азинтыны юрттозы.

2020-тӥ арын Удмуртия «Добрый лёд» но «Хоккей без барьеров» вожвылъяськонэ пыриськись улосвылъёс пӧлы пыроз, озьы ик «Добрый лёд» кубоклэсь усьтонэз ортчытоз.

Фонд но Россиысь шахматъя федераци юрттэмен «Шахматы в школах» ӵектос улсын Удмуртиын шахматэн шудыны дышетонъя ресурсной центр усьтозы, кунын со кыкетӥез луоз.

Тодэ вайытом, Елена но Геннадий Тимченкоослэн ӟечлэсьтон фондзылэн юрттэмен, кылем арын Удмуртиын нылпиослэсь следж-хоккей командазэс кылдытӥзы, нош Пичи Пурга ёросысь Баграш-Бигра гуртлэн «Деревня, где живёт Шӧртчи» ӵектосэз 700 сюрс манет грант утӥз

2020-тӥ арын Удмуртиын спорт инфраструктураез азинтон понна федерал но элькун коньдэтъёсысь 196 миллион 100 сюрс манет висъязы. Со сярысь элькун кивалтэтлэн пресс-службаез ивортэ.

Россилэн азьмуртэныз Владимир Путинэн кичӧлтэм «Демография» йӧскалык ӵектосэн пуктэм ужпумъёсты лыдэ басьтыса, 2024-тӥ арозь улосвыламы ӝыныезлэсь трос улӥсьёс физкультураен но спортэн вырыны кулэ.

Со ужпумез быдэстон понна Удмуртия трос кужым понэ: 2019-тӥ арын ми 37 спорт объектъёсты вуттӥм, соос пӧлын Шарканын куасэн бызьылонъя улосвыл центр, школаоскуспо 2 стадионъёс, 30 пала пичи спорт площадкаос. Спортэн вырыны чаклам объектъёсты пуктон 2020-тӥ арын но азьланьтӥськоз
Александр Бречалов, Удмуртилэн тӧроез

Ар пумозь элькунын трос гинэ объектъёс усьтӥськозы. Кылсярысь, Воткаын искусственной йӧэн выль спортъя дворец, Ижкарысь 17 но 35 номеро школаосын, озьы ик Грак ёросысь школаын школаоскуспо стадионъёс, ГТО куронъёсты сётон понна 5 площадкаос пуктозы.

Озьы ик куд-ог спорт огазеяськонъёслы спортинвентарь но ужан тӥрлык басьтыны, спортъя школаосысь тренеръёслэсь тодон-валанъёссэс будэтыны, транспорт басьтыны юрттозы.

Кӧня ке арня ортчыса, Можгаын 300 миллион манетлэсь трос сылӥсь йӧ дворецез уже кутозы

Спорт инфраструктураез азинтэм сяна, элькун спорт ужрадъёсын дырпусэз но паськытатэ. Солы луыса котькуд мылкыд карись пӧртэм спорт амалъёсын ассэ эскерыны быгатэ.

Кылсярысь, 21-26 тулыспалэ Ижкар спортэз гажасьёс пӧлын спортъя огъяросси тол шудонъёсты пумиталоз. Улосвыламы куасэн бызьылонъя, тол триатлонъя, кёрлингъя но сноубордъя ӵошатсконъёс ортчозы. Спорт нюръяськонъёс борды туэ Москва, Москва улосвыл но Пермь шаер итӥськизы. Отын биатлонъя, конькиен бызьылонъя, трамплинысь тэтчанъя но куасэн двоеборьея ӵошатсконъёс радъялозы.

Тодэ вайытом, 29-тӥ тулыспалэ Ижкарысь ыбылӥськонъя но спортъя генерал-майор Александр Демидов нимо огъетын таза улонэз но биатлонэз гажасьёс понна «Калашников биатлон фест» сяме пырем ӵошатсконъёс ортчозы.

Удмуртиын семьяослы но нылпиослы юрттэт сётон понна 616 миллион 300 сюрс манет висъяны ӵекто. Со сярысь элькун кивалтэтлэн кенешоназ 2020-тӥ арлы но 2021-2022 чаклам аръёслы коньдэт сярысь катэ  тупатонъёсын тодматыкуз коньдон ужпумъёсъя министр Станислав Евдокимов вераз, ивортэ улосвыл кивалтэтлэн пресс-службаез.

Коньдонэз пӧртэм ужпумъёслы кутыны чаклало. Кылсярысь,пиналъёслэсь шутэтсконзэс радъяны 283 миллион манет висъялозы, йылпумъян кун аттестацизэс ортчытыны - 225 миллион 700 сюрс манет, мерлыко тыронъёслы, егит семьяослы улон интылы кредитъёслэсь процентъёсъя ставказэ берыктыны - 60 миллион манет, улон инты басьтыны субсидиослы но капчиятэм займъёслы - 15 миллион 500 сюрс манет, пиналъёслэсь пӧртэм ӧръёсын быгатонлыкъёссэс шараяны но азинтыны - 15 миллион 800 сюрс манет, школаосы учебникъёс но пособиос басьтыны - 6 миллион 500 сюрс манет. 

Озьы ик ёрмыса улӥсь семьяослы юрттэт сётыны, нимъям стипендиос тырыны но мукет ужпумъёслы кутозы.

Тодэ вайытом, азьвылгес веразы вал туэ гужем Удмуртиысь 120 сюрслэсь трос пиналъёс но быдэ вуымтэос нылпи лагерьёсын шутэтскозы шуыса, солы 363 миллион манет пала коньдон висъяны чакамын вал. 

2020-тӥ арын Удмуртиын нылпиосын семьяослы мерлыко тыронъёс воштӥськозы. Со сярысь улосвыл тӧролэн но кивалтэтлэн прес-службазы ивортэ.

Нылпиосын семьяослы юрттон – Удмурт Элькунэз азинтонлэн одӥгез валтӥсь ӧрез. Росси азьмуртэн Владимир Путинэн кичӧлтэм йӧскалык ӵектосъёслы, озьы ик улосвылын экономикая умой югдурлы луыса 2020-тӥ арысен Удмуртиын куд-ог мерлыко тыронъёс воштӥськизы
Александр Бречалов, Удмуртилэн тӧроез

«Нылпиос вордскыку семьяослы коньдонэн юрттон» («Финансовая поддержка семей при рождении детей») улосвыл ӵектос улсын нырысетӥ нылпи вордскем понна толэзьлы быдэ коньдон тырон азьланьтӥське. 2020-тӥ арысен сое нырысетӥ но кыкетӥ нылпилы 3 ар тырмытозь сётъялозы, азьвыл 1 но ӝыны аресозь тыро вал. Туэ юрттэтлэн быдӟалаез толэзяз 9 сюрс 964 манет луэ. Сое басьтыны быгато семьяос, кытын одӥг адямилы толэзьлы тырмымон уксёлэн кык быдӟалаезлэсь ӧжыт табыш усе.

Со сяна, 2017-тӥ арысь 31-тӥ толсурозь вордскем куинь но солэсь трос нылпиосын юрттэтлы кулэяськись семьяослы улосвыл коньдэтысь толэзьлы быдэ 5 сюрс манет тыронъёс чакламын. Сое куинетӥ но со бӧрсьы 1 но ӝыны аресысен 3 аресозь нылпиослы басьтыны луэ. 2017-тӥ арысь 31-тӥ толсур бере вордскем куинетӥ но со бӧрсьы нылпиослы федерал коньдэт чотын толэзьлы быдэ 9 сюрс 964 манет висъяське. Сое нылпилы 3 арес тырмытозь сётъялозы.

Азьланьтӥськоз студентъёслэн семьяоссылы 100 сюрс манет юрттэт висъян. 2020-тӥ арын сое басьтыны быгатозы кылем арын вазиськыны вуттымтэ семьяос но, кылсярысь, кинлэн нылпиез толсур пумын вордскиз. Куриськонэн пиналлы куать толэзь тырмытозь мерлыко юрттэт сётонъя ёзэтэ сётоно. Студентъёслэн семьяоссылы одӥг пол висъяськись юрттэтэз тырон понна элькун коньдэтын 7 миллион манет чаклазы.

Федерал Собранилы вазиськоназ Россилэн азьмуртэз Владимир Путин выль мерлыко тыронъёс сярысь ялӥз, со пӧлын 3-7 аресъем нылпиослы толэзьлы быдэ коньдон тырон. Сое Удмуртиын кылем арын кыкетӥ кварталын одӥг адямилы толэзь ӵоже улыны тырмымон шуыса юнматэм коньдонлэн быдӟалаезлэсь (9 сюрс 992 манет) пичи табышен улӥсь семьяос басьтозы. Тыронлэн быдӟалаез кылем арын кыкетӥ кварталын элькунын нылпилы толэзь ӵоже улыны тырмымон коньдонлэн ӝыныез луоз (4 сюрс 982 манет). 3-7 аресъем нылпиослы тыронъёс басьтон понна куриськонэз 2020-тӥ арын 1-тӥ пӧсьтолэзь

Читать полностью

Студентъёслэн семьяоссылы нылпизы вордӥськем бере юрттон понна 2020-тӥ арын Удмуртилэн коньдэтаз 7 миллион манет чаклазы. Со сярысь улосвыл тӧролэн но кивалтэтлэн пресс-службазы ивортэ.

Росси азьмуртэн азьмуртэн Владимир Путинэн кичӧлтэм «Демография» йӧскалык ӵектосэз но «Удмурт Элькунысь семьяослы нылпизы вордскем бере коньдонэн юрттон» улосвыл ӵектосэз быдэсъян улсын 2019-тӥ арын студентъёслэн семьяоссылы одӥг тыриськись коньдонлэсь быдӟалазэ 15 сюрс манетысь 100 сюрс манетозь будэтӥзы

Юрттэтэз Удмуртиын улӥсь но очной амалэн дышетскись студентъёслы сёто, семьяысь котькуд адямилы табышлэн быдӟалаез 19 сюрс 298 манетлэсь трос уг ке луы.

2020-тӥ арын 100 сюрс манет басьтыны быгатозы кылем арын вазиськыны вуттымтэ семьяос но, кылсярысь, кинлэн нылпиез толсур пумын вордскиз. Куриськонэн пиналлы куать толэзь тырмытозь мерлыко юрттэт сётонъя ёзэтэ сётоно. Коньдонэз семья ас чакламезъя быдтыны быгатэ.

2019-тӥ арын элькунын 103 семья быдэн 100 сюрс манет басьтӥз. Юрттэтэз 2024-тӥ арозь сётъяны чаклало. 

Наверх
Вниз