Ижкар-18 °C
26 -тӥ тулыспал 2021 Удмуртарня
18+

12 процентлы йылӥз йӧл поттон Удмуртиын толшор ӵоже

  • 382
  • 0
Ижкар / Удмуртия
12 процентлы йылӥз йӧл поттон Удмуртиын толшор ӵоже
Туспуктэм: Григорий Фомин

2021-тӥ арын толшор ӵоже Удмуртиын йӧл поттон, кылем арысь та вакытэн ӵошатыса, 12 процентлы йылӥз. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Арлэн нырысетӥ толэзез ӵоже шаерысьтымы гурт возёсъёс но крестьян-фермер возёсъёс оглом 72 сюрс 700 тонна йӧл кыскизы. Со кылем арынлэсь 7 сюрс 700 тонналы тросгес. Фермер возёсъёс кылем ар лыдпуссэс 13,8 процентлы йылэтӥзы, гурт возёсъёс – 11,8 процентлы.

Йӧл поттон заводъёсы келям йыллэн мындалаез озьы ик 12,5 процентлы будӥз

Фермер возёсъёсын толшор ӵоже скал уллёзы но будӥз – оглом 43 йырлы. Озьы 2021-тӥ арын 1-тӥ тулыспаллы элькунамы кысконо скалъёслэн лыдзы 117 сюрс 498 йыр луиз. Со дыр ӵоже ик 10 сюрс 775 кунянъёс вордскизы.

Толшоре тужгес трос йӧл Вавож ёросын кыскизы (7 сюрс 300 тонна). Со бӧрсьы Шаркан ёрос (5 сюрс 900 тонна) но Можга ёрос (5 сюрс 200 тонна) мыно. Та ёросъёс ик кысконо скалъёссылэн лыдзыя но азьмынӥсьёс луо – Вавож ёросын оглом 9 сюрс 652 скалъёссы лыдъясько, Можга ёросын – 8 сюрс 918, Шаркан ёросын – 8 сюрс 521. Нош котькуд скаллэсь тужгес трос йӧл кыскизы Вотка ёросысь пудо вордӥсьёс (26,8 килограмм), Вавож ёросысь (25,2 килограмм) но Шаркан ёросысь (23,6 килограмм) возёсъёс.

Пусъём, туннэ нуналлы элькунамы килограмм йӧлэз 25 манет 22 коньыен вузало (2020-тӥ арын та нуналлы 24 манет 16 коньы вал). 2021-тӥ арын гурт возёсъя министерство йӧл кыскисьёслы 936 миллион 300 сюрс манет субсидиос висъяны чакла.  

Тодэ вайытом, Удмуртиын нылпиос понна пудоез возьматон-вожвылъяськонлы кутскон сётӥзы.




Наверх
Вниз