Ижкар+17 °C
21 -тӥ инвожо 2021 Вордӥськон
18+

Трос йӧл сётӥсь скалъёслэн лыдзы 244 процентлы йылӥз Удмуртиын

  • 302
  • 0
Ижкар / Удмуртия
Трос йӧл сётӥсь скалъёслэн лыдзы 244 процентлы йылӥз Удмуртиын
Туспуктэм: Григорий Фомин

Удмуртиын араз 10 сюрс килограммлэсь трос йӧл сётӥсь скалъёслэн лыдзы, 2019-тӥ арен ӵошатыса, 244 процентлы йылӥз. Элькунысь гурт возёсъя но сиён-юонъя министерствоын ӟеч выжыысь пудо вордон удыслэн ужамезлы йылпумъянъёс лэсьтӥзы. Со сярысь удысэтлэн пресс-службаез ивортӥз.

Туннэ нуналлы элькунамы трос йӧл сётӥсь 3 сюрс 382 скалъёс лыдъясько. Берло вить ар ӵоже соослэн лыдзы 3 сюрс 174-лы йылӥз

Берло вить аръёсы ӟеч выжыысь уллёосысь скалъёс шорлыдын 1 сюрс 565 килограммлы тросгес йӧл сётыны кутскизы. Нош 2020-тӥ арлы йылпумъянъёсъя, котькуд скаллэсь шорлыдын 7 сюрс 927 килограмм йӧл кыскизы (племзаводъёсын – 8 сюрс 278 килограмм, племрепродукторъёсын – 7 сюрс 697 килограмм). Со, 2019-тӥ арен ӵошатыса, 560 килограммлы тросгес.

2020-тӥ арын тужгес трос йӧл Шаркан ёросысь Николай Собинлэн крестьян возёсысьтыз скал сётӥз – 16 сюрс 741 килограмм. Скаллэн вылӥ ӟечлыкез нырысьсэ кунян ваем бераз ик адӟиськиз. Со сяна, солэн йӧлэзлэн наплыкез – 3,67 процент, белокез – 3,21 процент луэ.

Туннэ нуналлы Удмуртиын йӧл сётӥсь скалъёслэсь ӟечлыксэс будэтон бордын 12 племзаводъёс но 28 племрепродукторъёс ужало. 2020-тӥ арын элькунамы голштин выжыысь скалъёсты вордонъя возёс кылдӥз. Голштинъёс дунне вылын тужгес йӧло скалъёс лыдъясько.

Улосвыл кивалтэтлэн тӧроезлэн воштӥсез - гурт возёсъя но сиён-юонъя министр Ольга Абрамова 2021-тӥ арын ӟеч выжыысь пудо вордон удысын ветылъёсты будэтонлы саклык висъяны куриз.

Тодэ вайытом, 2020-тӥ арын Удмуртиын йӧл кыскон 5,4 процентлы будӥз.  



Наверх
Вниз