Удмуртиын 2021-тӥ арын кизён вакытлы гурт возёсъёслы 102 миллион 800 сюрс манет тыр субсидиос сётӥзы ини. Со сярысь элькунысь гурт возёсъя но сиён-юонъя министерстволэн пресс-службаез ивортӥз.
Али гурт возёсъёс удобрениос, кидысъёс, запчастьёс но мукетсэ дасян бордын тыршо.
Бусы ужъёсты усыян бордысен но кын улэ кизем но трос аръёс будӥсь турынъёс вылэ удобрение пазян бордысен кутскозы. Кылем арын та ужъёс борды нырысетӥ радын можгаос кутскизы вал. Соос бусыосы 3-тӥ оштолэзе ик потӥзы вал ини.
Пусъём, Удмуртиысь гурт возёсъя но сиён-юонъя министерство субсидиос висъян ужзэ азинтэ. 12-тӥ оштолэзе йӧл поттонлы коньдон висъян понна ужкагазъёс кутыны кутскозы. 2021-тӥ арын йӧл поттӥсь возёсъёслы оглом 930 миллион манетлэсь трос субсидиос сётыны чаклало. Озьы ик, азьло сямен, ужаны мылкыд сётон понна поттэм но вузам йӧллэн котькуд килограммезлы 5,2 манет висъялозы.