Ижкар-24 °C
6 -тӥ толсур 2021 Вордӥськон
18+

Удмуртиын музъем куасьмемен валче шуэрес югдур ялӥзы

  • 373
  • 0
Ижкар / Удмуртия
Удмуртиын музъем куасьмемен валче шуэрес югдур ялӥзы
Туспуктэм: Мария Белова

Куазь пӧсь но кӧс улэмен сэрен музъем куасьмемен валче Удмуртиын шуэрес югдур кутӥське. Со сярысь элькун кивалтэтлэн тӧроезлэн воштӥсез – гурт возёсъя но сиён-юонъя министр Ольга Абрамова «ВКонтакте» мерлыко вотэсысь бамаз ивортӥз.

Мар сярысь со вера? Со вера, ёросъёсын меӵак но луыны быгатоно ыштонъёсты дунъясь группаос ужаны кутско. Йылпумъянъёсты улосвыл министерствое 2021-тӥ арын 5-тӥ гудырикошконозь сётыны кулэ
Ольга Абрамова, Удмуртиысь кивалтэтлэн тӧроезлэн воштӥсез - гурт возёсъя но сиён-юонъя министр

Солэн кылъёсызъя, ыштонъёсты но бервылзэс дунъян шуэрес югдурын шугадӟонэ шедем котькуд предприятилы но фермер возёслы юрттон сярысь пумкылъян кутыны инъет луоз.

Оштолэзьысен Удмуртиын эсэптэм пӧсь куазь улӥз, музъем 20 сантиметрозь мурдалае пилиськылӥз. Со сяна, кӧс тӧлъёс пельтӥзы, интыосын йӧ уськытӥз.

Туннэ нуналлы ёросъёсын 19 сюрс гектар вылысь юосты утялтӥзы, одӥг гектарысь 17 центнер гинэ ю тысь люкаське. Ольга Абрамовалэн кылъёсызъя, вуоно арлы кидысъёс утчано луоз. Трос нымы-кибыос рапсэз но бакча сиёнъёсты быдтӥзы. Озьы ик пӧсь куазен сэрен пудо но курадӟе. Азьланяз со кунянъёсты ыштонэ вуттыны быгатоз.

Та нуналъёсы зоре ке но, югдурез тупатыны уг луы ни. (Но… та зоръёс кукуруза чотын пудо сиён люканы луонлык сёто)
Ольга Абрамова, Удмуртиысь кивалтэтлэн тӧроезлэн воштӥсез - гурт возёсъя но сиён-юонъя министр

Тодэ вайытом, пудо сиён тырмыт дасяны ӧзы ик луы. Нош 2019-тӥ арын элькунын бадӟым мускытлыкен сэрен шуэрес югдур ялӥзы вал.




Наверх
Вниз