Ижкар+1 °C
30 -тӥ шуркынмон 2021 Пуксён
18+

95 процентсэ ю бусыосты бушатӥзы ини Удмуртиын

  • 146
  • 0
Ижкар / Удмуртия
95 процентсэ ю бусыосты бушатӥзы ини Удмуртиын
Туспуктэм: Григорий Фомин

Удмуртиын аран ужъёс йылпумъясько. Гурт возёсъёслы ог 5 процентсэ гинэ киземъёсты утялтыны кылиз на. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Ужъёссэс 25 пӧлысь тямысэз ёросъёс быдтӥзы ини: Алнаш, Вавож, Грак, Камбарка, Кизнер, Сарапул, Сьӧлта но Сюмси. Берпуметӥ гектаръёссэс Дэри, Кез, Кияса но Красногорск ёросъёсысь возёсъёс арало.

25-тӥ гудырикошконлы тысё но тысёпуртэсо юосты 267 сюрс 700 гектарысь утялтӥзы ини (95 процентэз). Отысь оглом 470 сюрс тонна ю тысь жильдӥзы – котькуд гектарысь 17,5 центнер басьтӥзы. Ӵошатоно ке, кылем арын та дырлы ӝыныез но кизем бусыос бушатымтэ на вал – 46 процентэз. Но соку гектарысь 24,1 центнер тысь люказы.

Оглом, элькунъя 27 сюрс гектар гинэ юосты утялтыны кылиз на. Кӧс но пӧсь куазен сэрен 40 сюрс гектар вылысь быризы. Та вакытэ гуртоос рапсэз утялто – 58 процентсэ ужъёссэс быдэстӥзы, етӥнэз – 54 процентсэ но бусыосын будэтӥськись бакча сиёнъёсты – 12 процентсэ.

Тодэ вайытом, Удмуртиын музъем куасьмемен сэрен шуэрес югдур ялӥзы. Со азьланьтӥське. Элькунысь гурт возёсъя но сиён-юонъя министерствоын кӧс куазен герӟаськем ыштонъёсты капчиятон ужрадъёсты юнматӥзы ни. нош Удмуртиысь Кун Кенеш гурт возёслы юрттэт сётыны куронэн кун кивалтэтлэн тӧроезлы вазиськон дасялоз.




Наверх
Вниз