Ижкар+1 °C
30 -тӥ шуркынмон 2021 Пуксён
18+

Пудо сиён дасян ужъёс азьланьтӥсько Удмуртиын

  • 310
  • 0
Ижкар / Удмуртия
Пудо сиён дасян ужъёс азьланьтӥсько Удмуртиын
Туспуктэм: Григорий Фомин

Удмуртиысь гурт возёсъёсын пудо сиён дасян ужъёс азьланьтӥсько. 1-тӥ куарусёнлы одӥг йыр пудолы чакласа 17,2 центнер дасязы ини. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Чурыт но жалем пудо сиёнъёссы тужгес трос Якшур-Бӧдья ёросысь возёсъёсын дасямын ни – одӥг йыр пудолы 29,7 центнер, Эгра ёросын – 29,4 центнер, Глаз ёросын 25,2 центнер. Нош оглом 20 центнерлэсь трос 7 ёросъёсын дасязы ини

Та дыре гуртоос нордос турынъёссэс турнаса сенажзэс йылэто. Куд-ог ёросъёсын силослы кукурузазэс но утялтыны кутскизы ини.

1-тӥ куарусёнлы лыдпусъёсъя, турын элькунысь возёсъёсын 101,1 сюрс тонна дасямын, со кулэезлэсь 64 процент луэ (кылем арын та вакытлы 100 процентэз люкамын вал ини). Планэз Дэри но Сюмси ёросъёсын азьпалто – 15 процентлы но 8 процентлы.

Сенаж 705,2 сюрс тонна яке кулэезлэсь 72 процент вань ни (кылем арын та дырлы – 134 процент). Чакламлэсь 67 процентлы трос Юкаменск ёросын дасязы ни, 12 процентлы – Эгра ёросын, 7 процентлы – Шаркан ёросын.

Силос 637,4 сюрс тонна яке планлэсь 42 процент дасямын (кылем арын 66 процент вал). Чакламзылэсь 15 процентлы трос Сюмси ёросын дасязы ини. Озьы ик ӟеч лыдпусъёс возьмато Кизнер ёросын – 87 процент но Красногорск ёросын – 85 процент.

Куро 1-тӥ куарусёнлы 98 сюрс тонна яке кулэезлэсь 76 процент дасямын (кылем арын та дыре 50 процент гинэ вал на). 100 процентлэсь трос Грак, Вавож, Кез, Сьӧлта, Шаркан, Яр ёросъёсын дасязы ини.

Зернофураж 84 сюрс тонна дась (кылем арын 61,2 сюрс тонна вал).

Со сяна, элькунын 148,9 сюрс тонна кылем арын дасям турынъёс но вань на.

Гурт возёсъя министерстволэн чакланъёсызъя, улосвылын одӥг йыр пудолы 25 центнер сиён дасяны ужпум быдэстэмын луоз. Но ӟечлыкез сярысь сюлмаськон вань ик, уго куазь эсэптэм пӧсь но кӧс возиськиз.  

Тодэ вайытом, Удмуртиын нырысетӥ куать возёсъёсысь ю куасьтон огъетъёссэс чагыр эстӥськон вылэ выжтозы.




Наверх
Вниз