Ижкар+2 °C
28 -тӥ коньывуон 2021 Покчиарня
18+

Удмуртиысь 14 ёросъёс толйись юосты кизьыны чаклам лыдпусъёссэс быдэстӥзы ни

  • 215
  • 0
Ижкар / Удмуртия
Удмуртиысь 14 ёросъёс толйись юосты кизьыны чаклам лыдпусъёссэс быдэстӥзы ни
Туспуктэм: Удмуртиысь гурт возёсъя но сиён-юонъя министерстволэн пресс-службаез

Удмуртиысь 14 ёросъёс толйись юосты кизьыны чаклам лыдпусъёссэс быдэстӥзы ни. Со пӧлысь 11-ез – планзэс но азьпалтӥзы ни. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Гуртоос юнме уг дырто – соос киземъёссэс кӧс куазьлэн пытьыосызлэсь утьыны тыршо, уго элькунамы туэ соин сэрен шуэрес югдур ялӥзы

Озьы, ужъёссэс планзэс трослы азьпалтыса Дэри ёросын (чакламзылэсь 121 процентлы тросгес кизизы ини), Шаркан ёросын (92 процентлы тросгес) но Пичи Пурга ёросын (85 процентлы) быдэсто. Можгаысь возёсъёс 42 процентлы чакламзылэсь тросгес кизизы ини, Яр ёросысь гуртоос – 22 процентлы, Глаз ёросын – 12 процентлы, Дэбес ёросын – 11 процентлы.

Оглом элькунысь гурт возёсъёс кын улэ 59,6 сюрс гектар музъемъёссэс кизизы ини. Со планлэсь 1,2 сюрс гектарлы яке 2 процентлы тросгес (58,2 сюрс гектарез кизьыны чакламын вал).

Ужъёс азьланьтӥсько, соин ик лыдпусъёс эшшо йылозы на, уго сӥзьыл кизьыны ӟеч вакыт куарусён шорозь лыдъяське. Куазь но луонлыкъёс сётэ. Со сяна, сӥзьыл зоръёс но толйись юослы пайда ваё, вуоно арын ӟеч урожай луоз шуыса оскон сёто.

Пусъём, та нуналъёсы гуртоос кын улэ гырон ужъёссэс но нуо. Туннэ нуналлы 101,5 сюрс гектар музъемъёсты гыризы ини (31 процентсэ чаклам ужъёсты быдэстӥзы). Котькинлэсь трос Красногорск ёросысь возёсъёс гыризы – 63 процентсэ чаклам музъемъёссэс, Кизнер ёросын – 62 процент, Грак ёросын – 61 процент.

Тодэ вайытом, гуртоос та вакытэ пудо сиён но дасяло. Озьы, соос кукурузаез утялтыны кутскизы ини. 



Наверх
Вниз